1. ¿Imajtintaj Diospa yachayninta necesitanchej? (Proverbios 4:7).

 KAUSAYNINCHEJPI imatapis ajllanapajqa Jehovamanta yachayta mañakunchejpuni, astawanraj chay ajllasqanchej kausayninchejta cambianan kajtenqa. Chay kutispi Jehovaj yachayninta mayta necesitanchej (Sant. 1:5). Rey Salomón nerqa: “Yachayniyoj kayqa tukuy imamanta nisqa aswan sumaj”, nispa (Proverbios 4:7 leey). Salomonqa mana runaj yachayninmantachu parlasharqa, manaqa Jehovamanta jamoj yachaymanta (Pro. 2:6). Jinapis, ¿Jehovamanta jamoj yachay problemasninchejpi yanapawasunmanchu? Yanapawasunmanpuni. Chaytataj kay yachaqanapi yachakusun.

2. ¿Imatá ruwasunman sumaj yachayniyoj kanapaj?

² Salomonwan Jesuswanqa may yachayniyoj runas karqanku. Paykunaj yachachisqankuta estudiaspa, chayman jina ruwaspataj noqanchejpis sumaj yachayniyoj kasunman. Ñaupajtaqa Salomonmanta parlarisun. Bibliaqa paymanta nin: “Diosqa Salomonman qorqa sumaj yachayta, sumajta tanteayta yachaytawan”, nispa (1 Rey. 4:29). Chantá parlarillasuntaj Jesusmanta. Payqa jallpʼapi kaj runasmanta aswan yachayniyoj karqa (Mat. 12:42). Jesusmantaqa uj profecía nerqa: “Paypa patanmantaj Jehová Diospa espiritun tiyaykonqa. Chayrayku payqa yachayniyoj, sumaj yuyayniyoj kanqa”, nispa (Isa. 11:2).

3. ¿Imasmantataj kay yachaqanapi parlarisun?

³ Diosqa Salomonman, Jesusmanpis sumaj yachayta qorqa. Chayrayku paykunaj yuyaychasqankoqa ashkha imaspi  sumajta yanapawanchej. Kay yachaqanapitaj chay yuyaychasqankumanta kinsa imasllamanta parlarisun: qolqemanta, trabajomanta, noqanchejmantapis maychus kajllata yuyanamanta.

4. ¿Salomonwan Jesuswan kikin kapuyniyojchu karqanku?

⁴ Salomonqa manchay qhapaj runa karqa, tukuy ima patapitaj kausakorqa (1 Rey. 10:7, 14, 15). Jesustaj pisi imasnillayoj karqa, ni wasinpis tiyaporqachu (Mat. 8:20). Jinapis paykunaqa Jehová yachayta qosqanrayku, kapuyniyoj kaymanta maychus kajllata yuyarqanku.

5. ¿Imatataj Salomón yuyarqa ashkha qolqeyoj kayta munaymanta?

⁵ Salomonqa yacharqa qolqeqa ‘yanapakusqanta’ (Ecl. 7:12). Qolqetaqa necesitanchej kausayninchejpi imastachus necesitasqanchejta rantikunapaj chayri imatapis munaspa rantirikunapaj. Salomonqa qhapaj kaspapis, sutʼita repararqa mana chay imaschu aswan sumaj kasqanta. Pay nerqa: “Allinpaj qhawasqa kayqa aswan sumaj manchay qhapaj kanamantaqa”, nispa (Pro. 22:1). Payqa reparallarqataj qhapajyayta munaj runasqa, imaschus kapusqankuwan mana contentoschu kasqankuta (Ecl. 5:10, 12). Salomonqa nerqa ashkha qolqeyoj kaypi atienekoyqa mana allinchu kasqanta, imajtinchus qolqeqa ujta qhawarinallapaj (Pro. 23:4, 5).

6. ¿Imatá Jesús yuyaj kapuyniyoj kaymanta? (Mateo 6:31-33).

⁶ Jesusqa kapuyniyoj kaymanta maychus kajllata yuyaj. Payqa sumajta mikhurikoj, ujyarikojpis (Luc. 19:2, 6, 7). Ñaupaj kaj milagronta ruwashaspaqa yakuta sumaj vinoman tukucherqa (Juan 2:10, 11). Wañucherqanku chay diapis may valesqa ropayoj kasharqa (Juan 19:23, 24). Jinapis mana kapuyniyoj kaytachu astawan maskʼarqa. Payqa discipulosninman nerqa: ‘Mana pipis iskay patronesta ujllapi sirviyta atinmanchu. Mana atinkichejchu ujllapi Diostawan qolqetawan sirviyta’, nispa  (Mat. 6:24). Jesusqa yachacherqa Diospa Gobiernonta ñaupajta maskʼajtinchej Jehovaqa imatachus necesitasqanchejta qonawanchejta (Mateo 6:31-33 leey).

7. ¿Ima bendicionestataj uj hermano japʼerqa Jehovata sirviyta ñaupajman churasqanrayku?

⁷ Jehovaqa imaynatachus qolqeta qhawanamanta sumajta yuyaychawanchej. Ashkha hermanostaj chaywan yanapachikorqanku. Hermanonchej Danielmanta parlarina. Payqa soltero, nintaj: “Jovencitomantapacha Jehovata sirviyta ñaupajman churanayta nerqani”, nispa. Danielqa mayta kallpachakorqa pisi imasllawan kausakunanpaj. Chayrayku imastachus ruwayta yachasqanwan Diospa llajtanpi yanapakuyta aterqa. Pay nillanpuni: “Ni jaykʼaj arrepientekunichu imatachus ruwasqaymanta. Trabajollaman qokuspaqa ashkha qolqeyoj kayta atiyman karqa. Jinapis mana sumaj amigosniyoj kayta atiymanchu karqa. Diospa Gobiernonta ñaupajman churaspaqa kusisqa kani. Qolqellata maskʼaspaqa mana jina kusisqa kayta atiymanchu karqa. Jehová may chhika bendicionesta qowasqantaqa, ni mashkha qolqewanpis rantiyta atiymanchu”, nispa. Kusisqa kausakunapajqa Jehovata sirviyta kausayninchejpi ñaupajman churana, amataj qolqetachu.

8. ¿Imaynapí yachanchej Salomón trabajomanta maychus kajllata yuyasqanta? (Eclesiastés 5:18, 19).

⁸ Salomonqa nerqa trabajonchejmanta kusisqa kayqa “Diospa regalon” kasqanta (Eclesiastés 5:18, 19 leey). Nillarqataj “ima laya sinchʼi trabajopis runapajqa sumajpuni” kasqanta (Pro. 14:23). Salomonqa chayta experienciawan nerqa. Payqa mayta trabajarqa wasista ruwaspa, uvasta plantaspa, huertasta ruwaspa, estanquesta ruwaspa, llajtasta sayarichispa ima (1 Rey. 9:19; Ecl. 2:4-6). Salomonqa ajina sinchʼita trabajaspa kusikorqachá. Jinapis yacharqa mana chayllatachu ruwanan kasqanta. Chayrayku Jehovapaj ashkha imasta ruwarqa. Payqa Jehovata yupaychanapaj kʼachitu templota qanchis wataspi ruwacherqa (1 Rey. 6:38; 9:1). Tukuy chay imasta ruwaspapis, repararqa Jehovapaj llankʼaypuni aswan sumaj kasqanta. Pay nerqa: “Kay tukuy imasta uyariytawan kayta nisunman: Cheqa Diosta manchachikuy, kamachisqasnintapis kasukuy”, nispa (Ecl. 12:13).

9. ¿Imatataj Jesús ruwarqa mana trabajollaman qokunanpaj?

⁹ Jesusqa sumaj trabajador karqa. Payqa joven kashaspa carpintero karqa (Mar. 6:3). Familianpeqa ashkha ukhu karqanku. Tatasnintaj maytachá agradecekorqanku Jesús trabajaspa paykunata yanapasqanmanta. Jesusqa mana pantaj runa kasqanrayku may kʼachitustachá tukuy imata ruwaj. Tukuychá imatapis paywan ruwachikuyta munaj kanku. Jesusqa tukuy chay imasta kusiywanchá ruwaj. Jinapis tiempochakojpuni Jehovata sirvinanpaj (Juan 7:15). Payqa predicayta qallarisqanmanta qhepaman nerqa: “Ama pʼosqoj mikhunaraykuchu llankʼaychej, manachayqa wiñay kausayta qoj mikhunarayku”, nispa (Juan 6:27). Orqopi Yachachishaspataj nerqa: “Valorniyoj imastaqa cielopi tantaychej”, nispa (Mat. 6:20).

10. Sumajta trabajaspapis, ¿imamantataj allinta qhawarikunanchej tiyan?

¹⁰ Jehová yachayta qowasqanchejrayku trabajomanta maychus kajllata yuyayta atinchej. Cristianosqa sinchʼita trabajanchej, allin kajtapunitaj ruwanchej (Efe. 4:28). Trabajomanta jefesninchejqa reparanku honrados kasqanchejta, sumajtataj trabajasqanchejta. Niwasunmantaj ni pi jina trabajasqanchejta.  Jefesninchej Jehovaj testigosninta aswan allinpaj qhawanankuta munaspataj, ichá astawan horasta trabajayta qallarisunman. Ajinata ruwajtinchejqa niña tiemponchej kanmanchu familianchejpaj, ni Jehovapajpis. Ajinapi rikukushanchej chayqa, kallpachakunanchej tiyan ama trabajollaman qokunapaj.

11. ¿Imatataj William uj ancianomanta yachakorqa?

¹¹ Uj joven hermano William sutiyoj yachakorqa trabajonmanta maychus kajllata yuyayta. Payqa uj tiempota uj ancianopaj trabajarqa. Chay ancianomanta William nin: “Maychus kajllata trabajan. Kʼuchitaj, runaspis sumajta ruwasqanta rikuspa, payta maskʼanku. Chay pʼunchaypaj trabajonta tukuspaqa, manaña chayllapichu yuyan, manaqa familianpaj, religionninpaj ima tiempochakun. Waj runamanta nisqaqa, ni mayqenta pay jina kusisqata rikunichu”, nispa. *

12. ¿Imaynataj Salomón qallariypi karqa chanta imapitaj rikukorqa?

¹² Salomonqa Jehovata sirvishaspa pay kikinmanta maychus kajllata yuyakoj. Payqa jovenllaraj kashaspa sutʼita reparakorqa mana tukuy imatachu yachasqanta, Jehovamantataj yanapata mañakorqa (1 Rey. 3:7-9). Rey jina kamachiyta qallarishaspataj, sutʼita repararqa jatunchakoyqa mana allinchu kasqanta. Pay nerqa: “Runaykachajqa desgraciaman chayanqa. Umata oqharejpis urmanqa”, nispa (Pro. 16:18). Tiemponmantaj chayta nisqanta qonqaporqa. Payqa unaytaña rey jina kamachishaspa jatunchakorqa, Jehovaj kamachiykunasnintataj niña valecherqachu. Leypeqa hebreo reyespaj kay kamachiy karqa: “Ama ashkha warmisniyoj kachunchu, ama Diosmanta karunchakunanpaj” (Deu. 17:17). Salomonqa mana chay leyta kasukuspa 700 warmisniyoj karqa, 300 tanta warmisniyojtaj. Ashkhasqa waj diosesta yupaychaj  kanku (1 Rey. 11:1-3). Payqa ichapis yuyarqa warmisnin mana pantachinankuta. Jinapis tiemponmanqa Jehovamanta karunchakusqanrayku mana allinchu rerqa (1 Rey. 11:9-13).

13. Jesús kʼumuykukoj sonqo kasqanpi tʼukurispa, ¿imastataj yachakusunman?

¹³ Jesusqa kʼumuykukoj sonqo karqa, paymantataj maychus kajllata yuyakoj. Payqa niraj kay jallpʼaman jamushaspa, Jehovata sirvispa tʼukuna imasta ruwarqa. Colosenses 1:16 nin, “Cielopi, jinallataj kay jallpʼapi tukuy ima kajpis paynejta ruwasqa” kasqanta. Jesusqa bautizakushaspa, yuyarikorqasina cielopi kashaspa imastachus Tatanwan ruwasqanta (Mat. 3:16; Juan 17:5). Chayta yuyarikuspapis mana jatunchakorqachu. Payqa ni jaykʼaj yuyakorqachu wajkunamanta aswan kuraj kasqanta. Astawanpis discipulosninman nerqa: “Mana sirvichikojchu jamuni, manachayqa wajkunata sirvej, kausayniytapis qosaj ashkha runasta kacharichinaypaj”, nispa (Mat. 20:28). Jesusqa nerqa mana imatapis payllamanta ruwayta atisqanta (Juan 5:19). Payqa kʼumuykukoj sonqo karqa, noqanchejpis pay jina kayta munanchej.

14. ¿Imaynatá Jesuspa nisqan yanapawanchej mana pisipaj qhawakunapaj?

¹⁴ Jesusqa discipulosninman yachacherqa maychus kajllata paykunamanta yuyanankuta. Uj pacha paykunaman nerqa: “Umaykichejmanta chujchasniykichejpis tukuyninku yupasqa kashanku”, nispa (Mat. 10:30). Chay nisqanqa maytapuni kallpachawanchej, astawanraj pisipaj qhawakunchej chayqa. Chantapis yuyarichiwanchej Tatanchej Jehovapajqa may munasqa kasqanchejta. Jehová sirvinanchejta munashajtin, wiñaypajtaj kausakunanchejta munashajtin, ¿allinchu kanman mana ajinachu kasqanta ninanchej?

15. 1) ¿Imatataj 15 watas ñaupajtaña La Atalaya revista yuyaychawarqanchej? 2) Kay 24 paginapi fotospi rikunchej jina, ¿ima bendicionestataj pierdesun noqallanchejpi yuyasun chay?

¹⁵ La Atalaya revistaqa 15 watas ñaupajtaña niwarqanchej noqanchejmanta maychus kajllata yuyanata. Chaypi nerqa: “Ama may  kasqanchejta yuyakunachu. Jinata yuyaspaqa jatunchakoj runaman tukusunman. Nillataj yuyanachu ni imapaj valesqanchejta. Astawanpis noqanchejmanta maychus kajllata yuyana. Chaypajtaj sumajta reparakunanchej tiyan imastachus allinta ruwayta atisqanchejta, imastatajchus mana ruwayta atisqanchejtapis. Uj hermana nerqa: ‘Mana manchay sajrapunichu kani, nitaj tukuymanta aswan kʼachapunichu kani. Tukuy runas jina pantani, allin imastapis ruwani’”, nispa. * Sutʼita reparanchej noqanchejmanta maychus kajllata yuyananchejqa, allinninchejpaj kasqanta.

16. ¿Imaraykutaj Jehová sumaj yuyaychaykunata qowanchej?

¹⁶ Jehovaqa Palabranpi sumaj yuyaychaykunata qowanchej. Chaytataj ruwan munakuwasqanchejrayku, kusisqa kananchejtataj munasqanrayku (Isa. 48:17, 18). Jehovata yupaychayta kausayninchejpi ñaupajman churaspaqa, may allintapuni ruwasun. Ajinallamanta kusisqas kayta atisun. Qolqellapi, trabajollapi, noqallanchejpi yuyaspataj, wajkuna jina llakiykunallapi rikukusun. Chayrayku sumaj yachayniyoj kana, Jehovatataj kusichina (Pro. 23:15).