1, 2. ¿Imaraykutaj Apocalipsis libromanta yachakunanchej tiyan?

 ICHÁ maykʼajllapis wajkunaj fotosninkuta qhawarerqanchej. Chay fotospi kajkunataqa ichapis mana tukuyninkutachu rejsinchej. Jinallapi ujnin fotopi noqanchej kashasqanchejta rikuspa, astawan qhawarerqanchej. Astawan qhawarispataj, maykʼajchus, maypitajchus chay fotota orqhochikusqanchejta yuyarikuyta munanchej. Chantapis pi rejsisqasninchejchus kashasqankuta allinsituta qhawaykunchej. Chay fotoqa noqanchejpaj mana mayqen foto jinallachu.

² Apocalipsis libroqa chay foto jina. Chaytataj ninchej iskay imasrayku. Ñaupajtaqa noqanchejpaj qhelqasqa kasqanrayku. Apocalipsis libroj qallariyninpi nin: “Kayqa Jesucristoj sutʼinchasqan kashan Diosmanta japʼisqanman jina, kamachisninman rejsichinanpaj imaschus tumpamantawan kanan kashan chay imasta”, nispa (Apo. 1:1). Chayrayku kay libroqa tukuy Jehovaj kamachisnillanpaj, manataj tukuy runaspajchu. Noqanchejqa chay profecías juntʼakunanpaj yanapakushanchej, nisunman “chay fotopi” kashanchej. Chaytaj mana tʼukunapajchu.

3, 4. Apocalipsis libro nisqanman jina, ¿maykʼajtaj profeciasnin juntʼakuyta qallarerqa chanta ima yuyaychaytataj kasukunanchej tiyan?

³ Iskay kajtaj maykʼajchus chay profecías juntʼakunan kasqanrayku. Apóstol Juanqa chay tiempomanta parlaspa nerqa: “Diospa espiritunwan juntʼa kaspa Señorpa pʼunchayninpi rikhurerqani”, nispa (Apo. 1:10). Juanqa chay palabrasta qhelqarqa 96 wata chaynejta. Chay kutispajqa ‘Señorpa pʼunchayninpaj’ unayraj faltarqa (Mat. 25:14, 19; Luc. 19:12). Jinapis profecías nisqanman jinaqa, Señorpa pʼunchaynin 1914 watapi qallarerqa, Jesús cielopi Rey jina gobernayta qallarishajtin. Chay watamantapacha Apocalipsis libropi Diospa llajtanmanta parlaj profecías juntʼakuyta qallarerqa. Chayrayku nisunman “Señorpa pʼunchayninpi” kausashasqanchejta.

 ⁴ Señorpa pʼunchayninpi kausakushasqanchejrayku, kasukunanchej tiyan imatachus Apocalipsis 1:3 yuyaychasqanta. Chaypi nin: “Kusisqamin pichus kay palabrasta jatunmanta leejqa. Kusisqallataj kanku pikunachus chayta uyarinku, chaypi qhelqasqa kaj imastataj kasukunku chaykunapis, señalasqa tiempo qayllapiña kasqanrayku”, nispa. Arí, chay profeciamanta palabrastaqa jatunmanta leenanchej tiyan, uyarinanchej tiyan, kasukunanchejtaj tiyan. Chanta, ¿mayqen palabrastataj kasukunanchej tiyan? Chayta qhepan parrafospi qhawarisun.

5. Apocalipsis libro nisqanman jina, ¿imaraykutaj imaynatachus Jehovata yupaychasqanchejta allinta qhawaykurinanchej tiyan?

⁵ Jesusqa imaschus congregacionespi kashasqanta sumajta qhawamushan. Chaytataj reparanchej Apocalipsis libroj ñaupaj kaj capitulonmantapacha (Apo. 1:12-16, 20; 2:1). Jesusqa congregacionesta allinta rejsisqanta rikucherqa, Asia Menorpi kaj qanchis congregacionesman willaykunata willachisqanpi. Chaypeqa chay tiempomanta cristianosman sutʼita yuyaycharqa. Chaytaj paykunata yanaparqa imaynatachus Jehovata yupaychashasqankuta allinta qhawaykurinankupaj. Imatachus Jesús chay tiempomanta cristianosman nisqanqa, kay tiempomanta cristianostapis yanapallawanchejtaj. ¿Imaynatá yanapawanchej? Kamachejninchej Jesucristoqa, sumajta yachan Jehovata yupaychayninchejpi imaynachus kashasqanchejta. Chantapis Jesusqa tukuy imapi yanapawanchej, jarkʼawanchejtaj. Yachallantaj imatachus ruwananchej kasqanta Jehová allinpaj qhawanallawanchejpajpuni. Jesús jaqay tiempopi yuyaychasqantaqa, kay tiempopipis kasukunallanchejtaj tiyan. Chaytataj qhepan parrafospi qhawarisun.

6. 1) Apocalipsis 2:3, 4 nisqanman jina, ¿imatataj Efesomanta cristianos mana ruwasharqankuchu? 2) ¿Imatá chaymanta yachakunchej?

⁶ (Apocalipsis 2:3, 4 leey). Imaynatachus ñaupajpi Jehovata munakorqanchej, ajinallatapuni munakuna. Jesusqa Éfeso congregacionman uj willayta willacherqa. Chaypitaj cristianosman nerqa llakiykunapi kaspapis aguantallasqakutapuni, mana saykʼuspataj Jehovata sirvillasqankutapuni. Jinapis paykunaqa niña qallariypi jinachu Jehovata munakusharqanku. Jehová paykunaj yupaychasqankuta allinpaj qhawananpajqa, watejmanta qallariypi jina payta munakunanku karqa. Kay tiempopipis ajinallataj. Mana aguantanallanchejchu tiyan, manaqa Jehovata munakusqanchejrayku imatapis paypaj ruwananchej tiyan. Imajtinchus Jehovaqa mana ruwasqasnillanchejtachu qhawashan, astawanpis payqa qhawashan, imaraykuchus imatapis ruwasqanchejta. Jehovaqa mayta munan payta munakusqanchejrayku, agradecekusqanchejraykutaj sirvinanchejta (Pro. 16:2; Mar. 12:29, 30).

7. 1) Apocalipsis 3:1-3 nisqanman jina, ¿ima problemayojtaj karqanku Sardis congregacionmanta cristianos? 2) Noqanchejrí, ¿imatá ruwananchej tiyan?

⁷ (Apocalipsis 3:1-3 leey). Rijchʼarisqasllapuni kana. Sardis congregacionmanta cristianosqa, waj problemayoj karqanku. Paykunaqa ñaupajpi Jehovapaj tukuy atisqankuta ruwaspapis, qhellayapusharqanku. Chayrayku Jesús nerqa ‘rijchʼarinankuta’. ¿Imatá chaymanta yachakusunman? Jehovaqa imastachus paypaj ruwasqanchejta mana qonqapunchu (Heb. 6:10). Jinapis mana yuyanachu tiyan Jehovapaj ñaupajta tukuy atisqanchejta ruwasqanchejrayku, kunan niña kallpachakunanchejchu kasqanta. Ichá kunanqa manaña ñaupajta jinachu ruwayta atinchej. Jinapis tukuy atisqanchejta kallpachakunanchej tiyan, ‘Señorpa ruwayninpi ashkhata llankʼanallapajpuni’. Chantapis kay sajra mundoj tukukuynin chayamunankama,  wakichisqallapuni kananchej tiyan, rijchʼarisqallapunitaj (1 Cor. 15:58; Mat. 24:13; Mar. 13:33).

8. Laodiceamanta cristianosman imatachus Jesús nisqanmanta, ¿imatá yachakusunman? (Apocalipsis 3:15-17).

⁸ (Apocalipsis 3:15-17 leey). Jehovata kusiywan, tukuy sonqotaj sirvina. Jesús Laodiceamanta cristianosman uj willayta willachishaspataj, waj problemayoj kasqankuta nerqa. Paykunaqa Diosta yupaychaypi ‘as qʼoñilla, mana chirichu, nitaj ruphachu’ kasharqanku. Jesusqa paykunaman nerqa mana imayoj, lastimay khuyay kashasqankuta. Chayrayku watejmanta Jehovata tukuy sonqo sirvej churakunanku karqa (Apo. 3:19). ¿Imatá chaymanta yachakusunman? Manaña Jehovata kusiywanchu sirvishanchej chayqa, kallpachakunanchej tiyan Jehová allin imasta qowasqanchejmanta astawan agradecekunapaj (Apo. 3:18). Ichapis tukuy imayoj kayta munaspa mayta trabajayta munashanchej. Jinapis chayqa mana Jehovata yupaychajta saqewasunchu. Chayrayku kallpachakuna Jehovata yupaychayta kausayninchejpi ñaupajmanpuni churanapaj.

9. Imatachus Jesús Pergamomanta, Tiatiramantawan congregacionesman nisqanpi piensarispa, ¿imamantataj allinta qhawarikunanchej tiyan?

⁹ Diosta wasanchajkunaj yachachisqankuta ama japʼikunachu. Jesusqa Pergamopi kaj wakin cristianosta kʼamerqa. Imaraykuchus paykunaqa tʼaqanakusta, sectasta ima rikhurichisharqanku (Apo. 2:14-16). Jinapis Jesusqa Tiatira congregacionmanta cristianosman nerqa allinta ruwasqankuta, ‘Satanaspa llulla yachachiykunasninta’ mana japʼikuspa, kallpacharqataj cheqa yachachiyta japʼikunallankupajpuni (Apo. 2:24-26). Diosta yupaychaypi chiriyapoj, llulla yachachiykunatataj japʼikoj cristianosqa arrepientekunanku karqa. Noqanchejpis ima yachachiyllapis mana Jehovaj munayninman jinachu kajtenqa, qhesachananchej tiyan. Diosta wasanchajkunaqa ‘tukuy sonqo yupaychajkunaman rijchʼakullanku, manataj chayman jinachu kausanku’ (2 Tim. 3:5). Diospa Palabranta sumajta estudiasun chayqa, llulla yachachiykunata chay rato reparasun, qhesachasuntaj (2 Tim. 3:14-17; Jud. 3, 4).

10. Imatachus Jesús Pergamomanta, Tiatiramantawan cristianosman nisqanmanta, ¿imatá yachakullanchejtaj?

¹⁰ Khuchichakuy juchata qhesachana. Pergamopiwan Tiatirapiwanqa, waj problema kallarqataj. Chay congregacionesmanta wakin cristianosqa, khuchichakuy juchapi urmarasharqanku. Chayraykutaj Jesusqa paykunata kʼamerqa (Apo. 2:14, 20). ¿Imatá chaymanta yachakusunman? Jehovaqa unayña payta yupaychajtinchejpis  chayri llajtanpi ashkha ruwanasniyoj kajtinchejpis, ni imarayku saqellanqachu khuchichakuy juchata ruwananchejta (1 Sam. 15:22; 1 Ped. 2:16). Kay mundomanta runas khuchichakuy juchata allillanpaj qhawajtinkupis, Jehovaqa munan paypa kamachiykunasninta kasukunanchejta (Efe. 6:11-13).

11. ¿Imatá kaykama yachakunchej? (“ ¿Imatá yachakunchej?” nisqa recuadrota leeriy).

¹¹ ¿Imastataj kaykama yachakunchej? Yachakunchej Jehová yupaychayninchejta allinpajchus manachus qhawashasqanta allinta qhawarikunanchej kasqanta. Imatapis mana allintachu ruwashanchej chayqa, kallpachakuna usqhayllata cambianapaj (Apo. 2:5, 16; 3:3, 16). Jesusqa congregacionesman willaykunata willachisqanpi, waj imastawan willachillarqataj. ¿Imastataj willachinman karqa?

12. Imatachus Jesús Esmirnamanta, Filadelfiamantawan congregacionesman nisqanmanta, ¿imatá yachakunchej? (Apocalipsis 2:10).

¹² Kunanqa qhawarina imatachus Jesús Esmirnamanta, Filadelfiamantawan congregacionesman willachisqanta. Jesusqa chay cristianosman nerqa qhatiykachasqa kanankumanta ama manchachikunankuta. Imaraykuchus Jehovaqa sinchʼita sayajtinku paykunata tʼinkanan karqa (Apocalipsis 2:10 leey; 3:10). ¿Imatá chaymanta yachakunchej? Qhatiykachasqa kaytaqa suyakunanchejpuni kasqanta, chayta aguantanapajtaj wakichisqa kananchej kasqanta (Mat. 24:9, 13; 2 Cor. 12:10). ¿Imaraykutaj chayta mana qonqananchejchu tiyan?

13, 14. Apocalipsis capítulo 12 imastachus nisqan juntʼakusqanrayku, ¿imastaj karqa Jehovaj kamachisninwan?

¹³ Apocalipsis libroqa nin Diospa kamachisnin “Señorpa pʼunchayninpi” qhatiykachasqa kanankuta. Capítulo 12 sutʼinchan Diospa Gobiernon sayachisqa kasqantawan, “cielopi guerra” qallarisqanta. Miguel, nisunman jatunchasqa Jesucristo, angelesninwan khuska Satanaspa contranpi, demoniosninpa contranpiwan maqanakorqanku (Apo. 12:7, 8). Chay guerrapeqa Satanaswan demoniosninwan atipachikorqanku, jinamantataj kay jallpʼaman wijchʼuchikamorqanku. Chaymantapachataj kay jallpʼapi runasta mayta sufrichishanku (Apo. 12:9, 12). Jehovaj kamachisninwanrí, ¿imataj chaymantapacha kashan?

¹⁴ Apocalipsis libroqa Satanás wijchʼuchikamuytawan imatachus ruwasqanta willawanchej. Payqa manaña cieloman kutiykuyta atisqanrayku, kay jallpʼapiraj kaj ajllasqa cristianoswan rabianta pagachikushan. Ajllasqa cristianosqa Jesuswan khuska cielomanta kamachimonqanku. Kay jallpʼapitaj Jesusmanta “willanankupaj kamachisqa kanku” (Apo. 12:17; 2 Cor. 5:20; Efe. 6:19, 20). ¿Imaynatá chay profecía juntʼakun?

15. ¿Pikunataj karqanku Apocalipsis 11 capitulomanta ‘iskay testigos’ chanta imataj paykunawan karqa?

¹⁵ Satanasqa Jehovaj llajtanta ñaupajman  apaj ajllasqa cristianosta, Diospa enemigosninwan mayta qhatiykachacherqa. Chay ajllasqa cristianos ukhupeqa, Diospa llajtanpi jatuchaj cargosniyoj hermanos kasharqanku. Apocalipsis libroqa ‘iskay testigos’ wañuchisqa kanankumanta parlan, chay hermanostaj chay ‘iskay testigoswan’ ninakorqanku * (Apo. 11:3, 7-11). Jaqay 1918 watapi, Diospa llajtanta ñaupajman apajkunamanta pusaj hermanos qhasimanta juchachasqa karqanku, ashkha wataspajtaj carcelman wisqʼasqas karqanku. Ashkhasqa yuyarqanku ajllasqa cristianos imastachus ruwashasqanku sayachisqa kasqanta.

16. ¿Imataj karqa 1919 watapi chanta imatataj Satanás chaymantapacha ruwashallanpuni?

¹⁶ Apocalipsis 11 capitulomanta profeciaqa nillantaj, chay ‘iskay testigos’ wañuchisqa kasqankumanta pisi tiemponman kausarichisqa kanankuta. Chaytaj juntʼakorqa chay ajllasqa cristianos carcelman wisqʼasqa kasqankumanta niraj watanman. Marzo de 1919 watapi, carcelman wisqʼasqa karqanku chay ajllasqa cristianosqa, kacharichisqa karqanku. Aswan qhepamantaj, imamantachus juchachasqa karqanku chaymanta manaña juchachasqachu karqanku. Chay hermanosqa carcelmanta llojsimusqankutawan, Diospa Gobiernonmanta willayta ñaupajman apallarqankupuni. Jinapis Satanasqa paykunata qhatiykachallarqapuni. Chaymantapacha Satanasqa Jehovaj tukuynin kamachisninta maytapuni qhatiykachashan (Apo. 12:15). Chayrayku tukuyninchej ‘aguantananchej tiyan, creeyniyojtaj kananchej tiyan’ (Apo. 13:10).

17. Qhatiykachasqa kaspapis, ¿imaynatataj Jehovaj llajtan mana suyasqallamanta yanapata japʼerqa?

¹⁷ Apocalipsis 12 capituloqa nin Jehovaj kamachisnin mana suyasqallamanta yanapasqa kanankuta. Chaypi nin: ‘Jallpʼatajrí ujyaykorqa sierpej phullchichimusqan mayuta’, nisunman qhatiykachasqa kasqanchejta (Apo. 12:16). Chaytaj ajinapuni karqa. Wakin kutisqa wakin lugarespi kay mundomanta jueces, leyesmanta yachajkuna ima Jehovaj llajtanta yanapawarqanchej. Jehovaj kamachisnenqa ashkha demandaspi atiparqanchej, jinamantataj autoridadesqa wakin imasta ruwajta saqellawarqanchej. Chayraykutaj tukuy atisqanchejta kallpachakushanchej, Jehová imatachus kamachiwasqanchejta juntʼanapaj (1 Cor. 16:9). ¿Imatataj Jehová kamachiwanchej?

18. Kay qhepa pʼunchaykunapi, ¿ima llankʼaytataj juntʼananchej tiyan?

 ¹⁸ Jesusqa nerqa niraj kay mundoj tukukuynin chayamushajtin, discipulosnin “Diospa Gobiernonmanta” sumaj willaykunata jallpʼantinpi willanankuta (Mat. 24:14). Chay llankʼaypitaj uj ángel chayri uj qotu ángeles yanapashawanchej. Apocalipsis libroqa chay angelmanta nin: “Payqa wiñay wiñaypaj sumaj willaykunata jallpʼapi tiyakojkunaman willasharqa: tukuy nacionesman, tukuy ayllusman, tukuy laya parlayniyojkunaman, tukuy laya runasmanpis”, nispa (Apo. 14:6).

19. Jehovata munakojkuna, ¿ima willaytataj willashallanchejtaj?

¹⁹ Jehovaj kamachisnenqa mana Diospa Gobiernonmanta sumaj willaykunallatachu willashanchej. Manaqa Apocalipsis 8-10 capitulospi parlasqan angelestapis yanapashallanchejtaj. Chay angelesqa willashanku, Diospa Gobiernonmanta willaykunata mana uyariyta munajkunapaj ashkha ñakʼariykuna kananta. Chayrayku Jehovaj testigosnenqa, juchachana willaykunata willashanchej. Chaytaj “granizowan ninawan” jina. Chay willayqa rikuchin imastachus Dios ruwananta Satanaspa mundonmanta kaj imasta (Apo. 8:7, 13). Runasqa yachananku tiyan, kay mundoj tukukuynin qayllitapiña kashasqanta. Ajinallamanta kausayninkuta cambiayta atenqanku, Jehová Diospa kʼajaj phiñakuynin pʼunchaypi mana wañunankupaj (Sof. 2:2, 3). Chay willayqa mana tukuy runasmanchu allin rijchʼan. Chayrayku chayta willanapajqa, mana manchachikojkuna kananchej tiyan. Manchay ñakʼariy tiempopi chay juchachana willayqa aswan sinchʼiraj kanqa (Apo. 16:21).

20. ¿Imastataj qhepan iskay yachaqanaspi qhawarisunchej?

²⁰ Noqanchejqa Apocalipsispi profeciamanta palabrasta kasukunanchejpuni tiyan. Imaraykuchus noqanchej chay profecía ukhupi kashanchej (Apo. 1:3). Jinapis, ¿imataj yanapawasun qhatiykachasqa kaspapis aguantanallapajpuni, mana manchachikuspataj chay willaykunata willanallapajpuni? Chaypajqa iskay imas yanapawasun. Ñaupajtaqa, Apocalipsis libro imatachus Diospa enemigosninmanta nisqanta yachay. Chaymantataj, Diosta kasukojtillanchejpuni ima bendicionestachus aswan qhepaman japʼinanchejta yachay. Chaykunatataj qhepan iskay yachaqanaspi qhawarisunchej.