1. ¿Imata ruwananchejtataj Jehová niwanchej? (Fotostawan qhawariy).

 SONQOCHAYTA chayri yuyaychayta necesitajtinchej, ¿pimantataj yanapata mañakusunman? Sutʼita yachanchej Jehovamanta mañakuyta atisqanchejta. Payllataj chayta ruwananchejta niwanchej. Pay munan paymanta ‘mana saykʼuspa mañakunallanchejtapuni’ (1 Tes. 5:17). Mana manchachikuspa paymanta mañakuyta atinchej. Chantapis kausayninchejpi imata ruwananchejpajpis paypa yuyaychayninta mañakuyta atinchej (Pro. 3:5, 6). Jehovaqa mana tiemponta michʼakunchu uyarinawanchejpaj, chayrayku payqa niwanchej mashkha kutistapis paymanta mañakunallanchejta.

2. ¿Imastá kay yachaqanapi yachakusun?

² Jehovaman mayta agradecekunchej payman orakojta saqewasqanchejmanta. Jinapis manchay ocupasqas kasqanchejrayku, wakin kutisqa mana tiempochakuyta atillasunmanchu Jehovawan parlarikunapaj. Chantapis ichá reparakunchej aswan sumajta orakunanchej kasqanta. Chaypajtaj Bibliapi sumaj yuyaychaykuna tiyan. Kay yachaqanapitaj yachakusun imaynatachus Jesús jina orakunapaj tiempochakuna kasqanta. Chantapis yachakullasuntaj orakusqanchej aswan sumaj kananpaj, phishqa imasta mana qonqanachu kasqanta.

3. ¿Imatá Jesús yacharqa?

³ Jesusqa yacharqa orakusqanchejta Jehová may jatunpaj qhawasqanta. Payqa niraj jallpʼaman jamushaspa rikorqa imaynatachus Tatan kamachisninpa mañakusqankuta uyarisqanta. Anapis, Davidpis, Eliaspis, waj kamachisninpis Jehovamanta  tukuy sonqo mañakorqanku, Jesustaj Tatanpa ladonpi kasharqa paykunaj mañakusqankuman kutichishajtin (1 Sam. 1:10, 11, 20; 1 Rey. 19:4-6; Sal. 32:5). Chayrayku Jesusqa discipulosninman nerqa mana saykʼuspa mañakunankuta, mana manchachikuspataj (Mat. 7:7-11).

4. ¿Imatá Jesusmanta yachakunchej?

⁴ Jesuspa discipulosnenqa mayta paymanta yachakorqanku. Jesusqa kay jallpʼapi kashaspa orakojpuni. Payqa may ocupasqapuni kaj, runastaj payman jamojpuni kanku. Chayrayku orakunanpajqa tiempochakunan karqa (Mar. 6:31, 45, 46). Jesusqa tutamanta jatarikuyta yachaj Tatanwan sapallanpi parlarikunanpaj (Mar. 1:35). Uj kuti tutantin Tatanmanta mañakorqa uj jatun ruwayta niraj ruwashajtin (Luc. 6:12, 13). Wañupunan ñaupaj chʼisitaj Jehovamanta kutin kutita mañakorqa, kay jallpʼapi ruwanasninmanta aswan mana atinata ruwananraj kasqanrayku (Mat. 26:39, 42, 44).

5. ¿Imaynatá Jesús jina ruwasunman orakushaspa?

⁵ Jesusmanta yachakunchej may ocupasqas kaspapis Jehovamanta mañakunapaj tiempochakuna kasqanta. Ichapis Jesús jina horarioyoj kana tiyan orakunapaj. Ichapis tutamantaña jatarikusunman chayri chʼisin orakunapaj aswan tardecituta puñukapusunman. Chayta ruwaspa Jehovaman may agradecesqa kasqanchejta rikuchisun, kay sumaj regalota qowasqanchejmanta. Hermana Lynneqa Jehovawan oracionnejta parlarikuyta atisqanta yachaspa, maytapuni agradecekorqa. Pay nin: “Jehová mañakusqayta ima ratopis uyarinawanpaj chaypipuni kashasqanta yachaspaqa, uj sumaj amigoyta jina payta qhawarqani. Nikorqanitaj aswan sumajta orakunaypaj kallpachakunay kasqanta”, nispa. Tukuychá pay jina may agradecesqas kashanchej. Kunanqa oracionesninchejpi ninapaj phishqa imasta yachakusun.

6. Apocalipsis 4:10, 11 versículos nisqanman jina, ¿imatá ruwananchej tiyan?

⁶ Jehovata jatunchana. Apóstol Juanqa mosqoypi jina rikorqa 24 ancianosta Jehovata cielopi yupaychashajta. Paykunataj Diosta jatunchasharqanku, nisharqankutaj: “Qanllamin jatunchanapaj jina kanki, yupaychanapaj jina, atiyta japʼinaykipaj jinataj”, nispa (Apocalipsis 4:10, 11 leey). Angelespis Jehovata alabanku, jatunchankutaj ashkha imasrayku. Paykunaqa Dioswan cielopi kashanku, may  sumajtataj rejsinku. Imaynatachus imatapis ruwasqanta rikuspa, sutʼita reparanku imayna Dioschus kasqanta. Chayraykutaj sonqonku aysan payta jatunchanankupaj (Job 38:4-7).

7. ¿Imaynasmantá Jehovata jatunchanchej mañakushaspa?

⁷ Noqanchejpis Jehovawan parlashaspaqa jatunchananchej tiyan. ¿Imaynamantá jatunchasunman? Imachus paymanta gustawasqanchejta nisunman, imaraykutajchus payta jatunpaj qhawasqanchejtapis. Bibliata leeshaspa, estudiashaspapis kallpachakuna reparanapaj Jehovamanta imaschus mayta tʼukuchiwasqanchejta (Job 37:23; Rom. 11:33). Chaymantataj Jehovaman willarina chay kʼacha kaykunasninpi tʼukurispa imaynachus sonqonchej kashasqanta. Chantapis noqanchejta yanapawasqanchejmanta, tukuy hermanosta yanapasqanmantapis Jehovata jatunchallasunmantaj. Payqa cuidashawanchejpuni, jarkʼashawanchejpunitaj (1 Sam. 1:27; 2:1, 2).

8. ¿Imasmantá Jehovaman agradecekusunman? (1 Tesalonicenses 5:18).

⁸ Jehovaman agradecekuna. Orakushaspaqa ashkha imasmanta Jehovaman agradecekusunman (1 Tesalonicenses 5:18 leey). Tukuy allin imas kapuwasqanchejmanta agradecekuna. Yachanchej jina, tukuy ima allin kaj regaloqa paymanta jamun (Sant. 1:17). Agradecekusunman jallpʼanchejta kʼachituta ruwapuwasqanchejmanta, waj tʼukuna imasta ruwapuwasqanchejmanta, kausayninchejmanta, familianchejmanta, amigosninchejmanta, suyakuyniyoj kasqanchejmantapis. Agradecekullasunmantaj amigosnin kajta saqewasqanchejmanta.

9. ¿Imajtintaj kallpachakunanchej tiyan agradecekuyta yachanapaj?

⁹ Sapa ujninchej kallpachakunanchej tiyan, imasmantachus Jehovaman agradecekusunman chay imaspi piensarinapaj. Kay mundomanta runasqa mana agradecekuyta yachankuchu. Paykunaqa imastachus munasqallankupi astawan yuyanku, imaschus tiyapun chaymantataj mana agradecekuyta yachankuchu. Noqanchejpis chay runaspa yuyasqankuwan chimpaykuchikusunman chayqa, imastachus munasqallanchejta Jehovamanta mañakusunman. Mana chay yuyasqankuwan chimpaykuchikunapajqa, kallpachakunanchej tiyan Jehovaman agradecekunapaj tukuy imata qowasqanchejmanta (Luc. 6:45).

10. ¿Imaynatá uj hermanata yanaparqa agradecekuyta yachasqan? (Fototawan qhawariy).

¹⁰ Agradecekuyta yachayqa yanapawanchej llakiykunata aguantanapaj. Hermananchej Kyung-sookmanta parlarina, paymantaqa parlarikorqaña Torremanta Qhawaj 15 de enero de 2015 watamanta revistapi. Paytaqa nerqanku pulmonninpi cancerniyoj kasqanta, chaytaj ancha avanzasqaña kasqanta. Pay nin: “Onqosqa kashasqayta yachaspaqa mayta llakikorqani. Yuyarqanitaj niña imatapis ruwayta atinayta, maytataj manchachikorqani”, nispa. ¿Imataj llakiyninta atipananpaj yanaparqa? Payqa sapa chʼisi niraj puñukapushaspa,  terrazanman wicharej Jehovawan parlarikunanpaj, chay pʼunchaypi ima phishqa allin imastachus Jehová ruwapusqanmanta agradecekunanpaj. Ajinamanta mana anchata llakikojchu, sonqontaj aysaj Jehovata mayta munakusqanta ninanpaj. Payqa kausayninpi sutʼita repararqa Jehovaqa llakiypi kashajtinchej yanapawasqanchejtapuni. Reparallarqataj kausayninchejpeqa llakiykunamanta nisqaqa, astawan bendiciones kasqanta. Hermananchej Kyung-sook jina, llakiypi kashaspapis ashkha imasmanta Jehovaman agradecekusunman. Jehovaman agradecekoyqa yanapawanchej aguantanapaj, sonqo tiyasqallataj kanapaj.

11. ¿Imaraykutaj Jesuspa discipulosnin mana manchachikoj kayta necesitarqanku?

¹¹ Jehovamanta yanapata mañakuna predicayta mana manchachikunapaj. Jesusqa niraj cieloman kutipushaspa, discipulosninman yuyaricherqa paymanta willananku kasqanta “Jerusalenpi, tukuy Judeapi, Samariapi, jinallataj kay jallpʼaj tukuy kʼuchusnintinpi” (Hech. 1:8; Luc. 24:46-48). Pisi tiemponmantaj judiosta kamachejkunaqa Pedrotawan Juantawan presochaspa Jatun Juntaman aparqanku. Chaypitaj kamacherqanku amaña predicanankuta, manchaykucherqankutaj (Hech. 4:18, 21). ¿Imatá Pedrowan Juanwan ruwarqanku?

12. Hechos 4:29, 31 nisqanman jina, ¿imatataj Jesuspa discipulosnin ruwarqanku?

¹² Ajinata manchaykuchejtinkupis Pedrowan Juanwanqa kuticherqanku: “Qankunaña qhawariychej, Diospa ñaupaqenpi qankunata kasukunaykuchus chayri Diosta kasukunaykuchus aswan allin kasqanta. Noqaykoqa mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:19, 20). Kacharipusqankutawantaj, Pedrowan Juanwanqa waj discipuloswan tantakamorqanku. Khuskataj Jehovamanta mañakorqanku munayninta ruwanallankupajpuni yanapananta. Paykuna Jehovata nerqanku: “Kamachisniykitataj yanapariwayku ari, mana manchachikuspa palabraykimanta willanallaykupajpuni”, nispa. Jehovataj chay kamachisnin sonqomantapacha mañakusqankuman kuticherqa (Hechos 4:29, 31 leey).

13. ¿Imatá yachakunchej hermanonchej Jin-hyukmanta?

¹³ Noqanchejpis chay discípulos jina ruwasunman, autoridades manaña predicananchejta kamachiwajtinchejpis. Chayta ruwarqa hermanonchej Jin-hyuk. Payqa mana cuartelman riyta munasqanrayku carcelpi kasharqa. Chaypeqa wajkunamanta tʼaqasqa presosta atiendenanpaj churarqanku. Chay presostaqa imatachus necesitasqankuta tapurinallanpaj parlapayanan karqa, kamacherqankutaj Bibliamantaqa amapuni parlananta. Jinapis Jehovamanta mañakorqa mana manchachikunanpaj yanapananta, sumajta yuyaychakuspataj atikojtin paykunaman predicananpaj (Hech. 5:29). Pay nin: “Jehovaqa mañakusqayman kutichiwarqa, yanapawarqataj mana manchachikunaypaj, allin yuyaytataj qowarqa. Ashkha presosmantaj Bibliamanta yachachiyta qallarerqani. Wisqʼasqa kasharqanku chay punkupi phishqa minutosllata yachachej kani. Tutasnintaj presospaj cartasta escribej kani, qʼayantin paykunaman jaywanaypaj”, nispa. Noqanchejtapis Jehová yanapawasun kamachiwasqanchej llankʼayta juntʼanapaj. Jin-hyuk jinallataj Jehovamanta mañakusunman mana manchachikunapaj yanapanawanchejta, allin yuyaytataj qonawanchejta.

14. ¿Imataj llakiykunata aguantanapaj yanapawasun? (Salmo 37:3, 5).

¹⁴ Jehovamanta yanapata mañakuna llakiykunata aguantanapaj. Ashkhas llakisqas  kashanchej uj familiarninchej wañupusqanrayku, qhatiykachasqa kasqanchejrayku, uj onqoyrayku chayri familiaresninchejrayku. Chantapis wañuchej onqoykuna rikhurisqanrayku, guerras kasqanrayku astawanraj chay llakiykuna yapakun. Chayrayku imachus sonqonchejpi kasqanta Jehovaman willakuna. Imaynatachus uj sumaj amigonchejman imatapis willakunchej, ajinallatataj paymanpis willakuna. Jehovaqa yanapawasunpuni, ama chaymanta iskayrayanachu (Salmo 37:3, 5 leey).

15. ¿Imaynatá mañakusqanchej yanapawanchej ñakʼariypi kaspa sinchʼita sayanapaj? Uj experienciamanta parlariy.

¹⁵ Mana saykʼuspa mañakojtinchejqa ñakʼariypi kaspa sinchʼita sayayta atisun (Rom. 12:12). Jehovaqa yachan imaspichus kamachisnin rikukushasqankuta. Payqa “yanapata mañakuspa qhaparikusqankuta uyarin” (Sal. 145:18, 19). Chayta sutʼita repararqa hermananchej Kristie. Payqa precursora, 29 watasniyojtaj. Payqa mana yuyasqallamanta sinchʼita onqoykorqa. Chayraykutaj llakiywan atipachikorqa. Tiemponmantaj mamanta nerqanku wañuchej onqoyniyoj kasqanta. Kristie nin: “Jehovamanta maytapuni mañakoj kani sapa diapaj kallpata qonawanta. Kallpachakorqani reunionesman mana faltakunaypaj, sapallaypitaj Bibliata estudianaypaj”, nispa. Pay nillantaj: “Mañakusqayqa sinchʼi llakisqa kashajtiy aguantanaypaj yanapawarqa. Jehová ladoypipuni kashasqanta yachayqa maytapuni sonqochawarqa. Mana chay ratochu sanoyapojtiypis Jehová yanapawarqa sonqo tiyasqalla kanaypaj. Chaypi repararqani Jehovaqa mañakuykunasniyman kutichiwasqanta”, nispa. Amapuni kayta ni jaykʼaj qonqakunachu: “Jehová Diosqa sonqo kʼajaywan payta yupaychajkunata pruebamanta librayta yachan” (2 Ped. 2:9).

16. ¿Imaraykutaj Jehovaj yanapanta necesitanchej juchaman urmanapaj tanqasqa kajtinchej?

¹⁶ Jehovamanta yanapata mañakuna juchaman tanqasqa kashaspa mana urmanapaj.  Juchasapa runas kasqanchejrayku sapa kuti kallpachakunanchej tiyan sajra ruwaykunaman tanqasqa kajtinchej mana urmanapaj. Satanasqa tukuy imata ruwan juchaman urmachinawanchejpaj. Payqa yuyayninchejta chʼichichananpaj millay imasta qhawananchejta chayri uyarinanchejta munan. Chaywantaj umanchejman millay chʼichi yuyaykunas juntʼaykunman. Ajinamantataj Jehovaj ñaupaqenpi niña llimphupaj qhawasqachu kasunman, jatun juchamantaj urmachiwasunman (Mar. 7:21-23; Sant. 1:14, 15).

17. ¿Imatawantaj ruwanallanchejtaj tiyan juchaman tanqasqa kaspa mana urmanapaj? (Fotostawan qhawariy).

¹⁷ Ima tentaciontapis mana sapallanchej atipayta atisunmanchu. Necesitanchej Jehová yanapanawanchejta. Jesusqa Tatanmanta mañakuyta yachachishaspa nerqa: “Amataj juchaman urmajta saqewaykuchu, manachayqa Diablomanta librawayku”, nispa (Mat. 6:13). Jehovaqa yanapaytapuni munawanchej. Jinapis noqanchej chay yanapanta mañakunanchej tiyan. Chaywanpis mana mañakunallanchejchu tiyan. Kallpachakunanchej tiyan millay yuyaykunawan mana chimpachikunapaj. Satanaspa mundonqa millay imaswan juntʼa kashan. Chayrayku mana imatapis leenallachu, nitaj uyarinallachu (Sal. 97:10). Yuyayninchejta jarkʼanapaj, chaymantaj allin imasta juntʼachinapajqa Bibliata leenanchej tiyan, estudiananchejtaj tiyan. Chantapis tantakuykunaman rinanchej tiyan, predicacionmanpis. Jehovataj niwanchej mana saqenanta, mana aguantay atina juchaman tanqasqa kananchejta (1 Cor. 10:12, 13).

18. ¿Imatá tukuyninchej ruwananchej tiyan?

¹⁸ Kay qhepa llakiy tiempospi Jehovata sirvinallapajpuneqa, ni jaykʼaj jina orakunanchej tiyan. Jehovaqa munan ‘sonqonchejpi kaj imasta payman willakunanchejta’ (Sal. 62:8). Chayrayku tiempochakuna sonqomantapacha sapa día Jehovamanta mañakunapaj. Chantapis payta jatunchana, tukuy imata ruwasqanmantataj agradecekuna. Paymanta yanapata mañakuna mana manchachikuspa predicanapaj, llakiykunata aguantanapaj, juchaman tanqasqa kajtinchejtaj mana urmanapaj. Amapuni saqenachu ni pipis, nitaj imapis Jehovamanta mañakojta jarkʼanawanchejta. Jinapis ¿imaynatá Jehová orakusqanchejman kutichiwanchej? Qhepan yachaqanapi chaymanta yachakusun.