1. ¿Imatataj ashkhas mana ruwayta atillanchejchu?

 TUKUYPIS Jehovata astawan sirviyta munanchej, payta kusichiytataj. Chaypajtaj ichapis nikorqanchej kallpachakunanchejta aswan sumaj cristianos kanapaj aswan pacienciayoj kanata, chayri aswan sumajta Bibliata leenata, sapallanchejpi Bibliata aswan sumajta estudianata, aswan sumajta predicanatapis. Ichá chaykunamanta mayqellantapis ruwanaykita nikorqanki, nitaj juntʼayta atillarqankichu. Pero mana qanllachu ajinapi rikukorqanki. Philipqa sonqomantapacha astawan orakuyta munarqa. Jinapis mana tiempochakuyta atillarqachu Jehovawan parlarikunanpaj. Erikaqa nikorqa predicacionman llojsinapaj tantakuyman horanpipuni chayananta. Jinapis horawan saruchikullajpuni. Tomašqa ashkha kutispi enteron Bibliata leeyta munarqa. Pay nin: “Bibliata leespaqa mana gustachikojchu kani. Kinsa kutispi leej churakorqani, jinapis Leviticokamalla chayarqani”, nispa.

2. Imatachus ruwayta munasqanchejta manaraj juntʼanchejchu chay, ¿imajtintaj mana desanimakunachu?

² Ichá imatachus ruwanaykita nikusqaykita juntʼayta munashanki, jinapis mana atishallankichu. Jina kajtenqa ama desanimakuychu. Aswan juchʼuy imasta ruwanapajpis tiempo necesitakun, kallpachakunanchejtaj tiyan. Chayta ruwanaykipaj kallpachakushallankipuni chayqa, sutʼita rikuchinki Jehovaj amigon kayta jatunpaj qhawasqaykita, allin kajtapunitaj payman qoyta munasqaykitapis. Jehovaqa kallpachakusqaykita allinpaj qhawan, manataj mañasunkichu mana atisqaykitaqa (Sal. 103:14; Miq. 6:8). Chayrayku imastachus ruwayta munasqaykeqa atinaykipaj jinalla kanan tiyan, juntʼanaykipaj jinataj. Ruwayta munasqayki ajina kashan chay, ¿imatá ruwawaj juntʼanaykipaj? Qhepan parrafospi chayta qhawarisun.

3. ¿Imaraykutaj imatapis ruwanapaj sonqonchej aysanawanchejpuni tiyan?

³ Jehovata yupaychayninchejpi imastachus ruwayta munasqanchejta juntʼanapajqa, sonqonchej aysanawanchej tiyan chayta ruwanapaj. Imaraykuchus chayta ruwaytapuni munasun chayqa, tukuy atisqanchejta kallpachakusun chayta ruwanapaj. Sonqonchej aysawasqanchejqa juchʼuy barcota tanqaj wayra jina. Wayra phukojtillanpuneqa, chay barcoqa chayananman chayayta atin. Chay wayra aswan fuerteta phukojtenqa chay barcoqa ichá aswan usqhaytaraj chayanqa. Ajinallatataj imastachus ruwayta munasqanchejta juntʼanapaj sonqonchej aysawasun chayqa, juntʼayta atisunmanpuni. El Salvador suyumanta hermanonchej David nin: “Imatapis ruwayta munanapaj sonqoyki aysasunki chayqa, chaypaj astawan kallpachakunki. Tukuy imata ruwanki imatachus ruwayta munarqanki chayta juntʼanaykipaj, nitaj saqenkichu imapis jarkʼasunanta”, nispa. ¿Imataj yanapawasunman imatapis ruwanapaj sonqonchej aysanawanchejpaj?

4. ¿Imatá Jehovamanta mañakusunman? (Filipenses 2:13; dibujotawan qhawariy).

⁴ Jehovamanta mañakuna ruwayta munanapaj astawan sonqonchej aysanawanchejta. Imata ruwanapajpis sonqonchej aysanawanchejpajqa, Jehová espíritu santonwan yanapawasunman, ajinamanta ruwayta munasqanchejta juntʼanapaj (Filipenses 2:13 leey). Wakin kutisqa uj imata ruwananchejta ninchej ruwananchejpuni kasqanraykulla. Chaytaj mana juchachu. Jinapis ichá sonqonchejpeqa mana munanchejchu chayta ruwayta. Ajinapi rikukorqa Uganda suyumanta hermananchej Norina. Payqa munarqa uj runallamanpis Bibliamanta yachachiyta, jinapis chayta ruwananpaj sonqon mana aysarqachu mana sumajtachu yachachisqanta yuyasqanrayku. ¿Imataj yanaparqa? Pay nin: “Jehovamanta sapa día mañakorqani uj estudioyoj kanaypaj astawan sonqoy aysanawanta. Mañakusqayman jinataj aswan sumajta yachachinaypaj mayta kallpachakorqani. Uj mashkha killasninmantaj reparakorqani, sonqoy astawanña aysashawasqanta uj estudioyoj kanaypaj. Chay watapitaj iskay runasman Bibliamanta yachachiyta qallarerqani”.

5. ¿Imapitaj tʼukurisunman imatapis ruwayta munanapaj astawan sonqonchej aysanawanchejpaj?

⁵ Tʼukurina imatachus Jehová noqanchejrayku ruwasqapi (Sal. 143:5). Apóstol Pabloqa tʼukurerqa imastachus Jehová jatun khuyakuyninrayku paypaj ruwasqanpi. Chaytaj yanaparqa tukuy sonqo Jehovata sirvinanpaj (1 Cor. 15:9, 10; 1 Tim. 1:12-14). Ajinallatataj imastachus Jehová noqanchejrayku ruwasqanpi piensarillasunpuni chayqa, astawan juntʼayta munasun imatachus Jehovapaj ruwayta munarqanchej chayta (Sal. 116:12). Honduraspi tiyakoj uj hermananchejmanta parlarina. Payqa precursora regular kananpaj imachus yanapasqanmanta nin: “Piensarerqani Jehová mayta munakuwasqanpi, pay llajtanman pusamuwasqanpi, cuidawasqanpi, jarkʼawasqanpi ima. Chay  imaspi piensarispataj astawan Jehovata munakorqani, astawantaj precursora regular kayta munarqani”.

6. ¿Imataj yanapallawasunmantaj imatapis ruwayta munanapaj astawan sonqonchej aysanawanchejpaj?

⁶ Ima bendicionestachus japʼinanchejpi piensarina. Watejmanta Erikamanta parlarina. ¿Imataj Erikata yanaparqa predicacionman horanpi chayananpaj? Pay nin: “Reparakorqani predicacionman tarde chayaspaqa, ashkha imasta pierdeshasqayta. Tempranito chayaspaqa hermanosta saludariyta atinchej, paykunawan parlarikuytapis. Chantapis aswan sumajta, aswan kusisqataj predicanapaj sumaj yuyaychaykunata uyariyta atinchej”, nispa. Erikaqa horanpi chayaspa ima bendicionestachus japʼinanpi piensarisqanrayku, horanpi chayayta aterqa. Noqanchejpis piensarisunman ima bendicionestachus japʼinanchejpi ruwayta munasqanchejta juntʼajtinchej. Bibliata leenapaj, Jehovamanta mañakunapaj kallpachakushanchej chayqa, piensarina imaynatachus chay Jehovaman astawan qayllaykuchinawanchejpi (Sal. 145:18, 19). Aswan sumaj cristiano kanapaj kallpachakushanchej chayqa, piensarina imaynatachus chay wajkunawan aswan sumajta kausakunapaj yanapanawanchejpi (Col. 3:14). ¿Imatawán ruwasunman? Imaraykuchus imatapis ruwayta munasqanchejta anotakusunman, chaytataj sapa kuti qhawaykurisunman. Tomáš nillantaj: “Imatapis ashkha imasrayku ruwayta munani chayqa, chayta juntʼayta atinipuni”, nispa.

7. ¿Imatataj Juliowan señoranwan ruwarqanku imatachus ruwayta munasqankuta juntʼanankupaj?

⁷ Yanapawasunchej chay hermanoswan masichakuna (Pro. 13:20). Juliowan señoranwanqa astawan Jehovapaj llankʼayta munarqanku. Paykunata imachus yanapasqanmanta Julio nin: “Yanapanawaykupaj jina amigosta maskʼakorqayku, paykunamantaj willarerqayku imastachus ruwayta munasqaykuta. Paykunamanta ashkhasqa imastachus ruwayta munashasqaykuta ruwarqankuña. Chayrayku sumajta yuyaychariwarqayku. Tapuriwajtaj kayku imaynachus rishawasqaykuta, yanapata necesitajtiykutaj kallpachariwaj kayku”.

8. ¿Imataj kanman sonqonchej aysawajtillanchej imatapis ruwajtinchej? (Dibujotawan qhawariy).

⁸ Wakin kutisqa mana sonqonchej aysawanchejchu imatachus ruwayta munasqanchejta ruwanapaj. ¿Chay niyta munanchu niña chayta juntʼananchejta? Mana. Watejmanta parlarina wayramantawan juchʼuy barcomantawan. Wayraqa juchʼuy barcota maymanchus chayanan kashan chayman chayananpaj tanqayta atin. Jinapis wayraqa mana sapa diachu sinchʼita wayran, wakin diasqa ni wayrallanpischu. ¿Chay niyta munanchu barcota apaykachaj runa niña barconta ñaupajman apayta atisqanta? Mana. Wakin barcosqa motorniyoj kanku, wakintaj barco apaykachana remosniyoj. Chay imasmanta valekuspataj, barcota apaykachaj runaqa ñaupajllamanpuni rinman. Ajinallatataj wakin diasqa imatachus ruwayta munanchej chaypaj sonqonchej aysawasunman, wakin diastaj mana. Wakin kutisqa ni ganasninchejpis kanchu kallpachakunanchejpaj. Chayrayku sonqonchej aysawajtillanchej imatapis ruwasunman chayqa, nichá imatapis ni jaykʼaj ruwasunmanchu. Imaynatachus barcota apaykachaj runa wayra mana kajtinpis  tukuy imata ruwan maymanpis chayananpaj, ajinallatataj noqanchejpis siga kallpachakusunman ruwayta munasqanchejta juntʼanapaj sonqonchej mana aysawajtinchejpis. Chaypaj mayta kallpachakunanchej kajtinpis, nisqanchejta juntʼajtinchejqa sumajpuni kanqa. Chayta ruwanapaj imachus yanapanawanchejmanta niraj parlarishaspaqa, uj tapuymanraj kutichisun.

9. Ruwayta munasqanchejta juntʼanapaj sonqonchej mana aysawajtinchej, ¿allinchu kanman kallpachakunallanchejpuni?

⁹ Jehovaqa munan tukuy sonqo kusisqa payta sirvinanchejta (Sal. 100:2; 2 Cor. 9:7). Ruwayta munasqanchejta juntʼanapaj sonqonchej mana aysawajtinchejpis, ¿kallpachakunallanchejpunichu kanman? Arí. Apóstol Pablopi tʼukurina. Pay nerqa: “Cuerpoyta castigani, uj esclavota jinataj kamachini” (1 Cor. 9:25-27, sutʼinchaynin). Pabloqa obligakorqa imatachus Jehová ruwananta munarqa chayta ruwananpaj, chaypaj sonqon mana aysajtinpis. Jehovaqa kusisqa kasharqa Pablo imatachus payta sirvinanpaj ruwasqanmanta, ajinata kallpachakusqanraykutaj bendicerqa (2 Tim. 4:7, 8).

10. Ruwayta munasqanchejta juntʼanapaj sonqonchej mana aysawajtinchejpis, ¿imajtintaj kallpachakunallapuni tiyan?

¹⁰ Jehovaqa imatachus ruwayta munasqanchejta juntʼanapaj kallpachakojtinchej mayta kusikun, chaypaj sonqonchej mana aysawajtinchejpis. Imatachus ruwananchejta nikorqanchej chayta ruway mana gustawajtinchejpis, Jehovata munakusqanchejrayku chayta ruwanapaj kallpachakunchej. Chayrayku payqa kusikun. Jehovaqa Pablota bendicerqa, noqanchejtapis kallpachakojtinchejqa bendecillawasuntaj (Sal. 126:5). Jehová kallpachakusqanchejta bendecisqanta reparaspaqa, ichá astawan sonqonchej aysawasun ruwayta munasqanchejta juntʼanapaj. Poloniamanta hermananchej Lucyna nin: “Wakin kutisqa mana predicaj riyta munallanichu, astawanraj saykʼusqa kashaspa. Jinapis predicacionmanta kutinpuspaqa mayta kusikuni, chayqa uj sumaj regalopuni”, nispa. Kunantaj qhawarina imatachus ruwasunman mana sonqonchej aysawajtinchej.

11. ¿Imaynatá Jehová yanapawanchej munayninchejwan mana atipachikunapaj?

¹¹ Jehovaj yanapayninta mañakuna mana munayninchejwan atipachikunapaj. Munayninchejwan mana atipachikusunchu chayqa, mana sajra imasta ruwallasunchu. Chantapis chayqa allin kajta ruwanapaj yanapawasun, astawanraj chayta ruwayta mana atillajtinchej chayri sonqonchej mana aysawajtinchej. Yuyarikuna, munayninchejwan mana atipachikoj kayqa espiritoj poqoyninmanta kashan. Chayrayku Jehovamanta espíritu santonta mañakuna munayninchejwan mana atipachikunapaj (Luc. 11:13; Gál. 5:22, 23). Kinsa kaj parrafopi Davidmanta parlarerqanchej. Payqa munarqa mana saqespa sapallanpi Bibliata ukhunchayta. Paytaqa Jehovaman orakuy mayta yanaparqa. Pay nin: “Jehovamanta mañakorqani munayniywan mana atipachikunaypaj. Jehovataj yanapawarqapuni. Chayrayku sapallaypi Bibliata estudianaypaj uj sumaj horariota ruwakorqani, ajinallatapunitaj kunankama ruwashani”.

12. ¿Imaynatá Eclesiastés 11:4 yanapawanchej ruwayta munasqanchejta juntʼanapaj?

¹² Ama suyanachu imata ruwanapajpis tukuy ima allinpuni kanantaraj. Kay mundopeqa mana suyasunmanchu tukuy imapis allinpuni kananta. Tukuy ima allin kanantaraj suyasunman chayqa, nichá ni jaykʼajpis ni imata ruwasunmanchu (Eclesiastés 11:4 leey). Hermanonchej Dayniel nin: “Imata ruwanapajpis ni jaykʼaj tukuy imaqa allin kanmanchu. Jinapis ruwaj churakojtinchejqa, ruwananchejpaj jina tukuy ima allin llojsinman”, nispa. Ugandamanta Paul hermanonchej nillantaj: “Mana ruwayta atinapaj jina kashajtinchejpis ruwaj churakunchej chayqa, Jehová bendeciwanchejpuni”, nispa (Mal. 3:10).

13. Juchʼuy imasta ruwaspa qallarisun chay, ¿imaynataj riwasun?

 ¹³ Juchʼuy imasta ruwaspa qallarina. Imatachus ruwayta munasqanchej mana juntʼayta atinapaj jina kajtenqa, ichapis sonqonchejqa mana aysallawasunmanchu chayta ruwanapaj. Ajina kajtenqa chayta juntʼanapaj juchʼuy imasta ruwaspa qallarisunman. Ichapis aswan sumaj cristianos kanapaj aswan pacienciayoj kayta munanchej. Jina kajtenqa pisi imaspi pacienciakuyta qallarisunman. Chayri ichapis munashanchej enteron Bibliata leeyta. Jina kajtenqa pisisitullata leespa qallarisunman. Tomašqa enteron Bibliata uj watapi leenanta nikorqa, jinapis mana atillarqachu. Pay nin: “Reparakorqani uj watapi enteron Bibliata leeyqa, noqapaj ancha kasqanta. Chayrayku watejmanta Bibliata leeyta qallarerqani atisqayman jinallaña, nikorqanitaj uj mashkha versiculosllata sapa día leenayta, chaypitaj tʼukurinayta. Ajinata ruwaspaqa astawan miskʼirichikoj kani”. Tomáš Bibliata leespa astawan gustachikusqanrayku, astawan leerqa, enteron Bibliatataj leeyta tukorqa. b

14. ¿Imasraykutaj imatachus ruwayta munasqanchejta mana juntʼayta atillasunmanchu?

¹⁴ Ruwayta munasqanchejta juntʼanapaj sonqonchej aysawajtinchejpis, imapis pasarqonmanpuni. Chayraykutaj mana juntʼayta atisunmanchu. Ichapis chayta juntʼarqonapajña kashasunman, jinallapitaj “mana yuyasqallamanta” imapis pasanman. Chayraykutaj niña tiemponchej kanmanchu chayta ruwanapaj (Ecl. 9:11). Chantapis ichá uj problema kapuwanchej, chaytaj desanimachiwanchej, niñataj kallpanchejpis kanchu chayta ruwanapaj (Pro. 24:10). Pantaj runas kasqanchejraykutaj imapipis pantarqosunmanpuni, chayrayku ruwayta munasqanchejta mana juntʼayta atillasunmanchu (Rom. 7:23). Chayrí saykʼusqa kasqanchejraykullachus mana juntʼayta atishanchejchu (Mat. 26:43). ¿Imataj yanapawasunman chay imaspi rikukojtinchej?

15. ¿Imajtintaj jarkʼaykuna kajtin mana ninachu ‘kaykamalla’ nispa? (Salmo 145:14).

¹⁵ Ima jarkʼaypis kajtenqa kallpachakunallanchejpuni tiyan. Biblia nisqanman jinaqa, ichapis  ashkha problemaspi rikukusunman. Jinapis Bibliaqa nillawanchejtaj Jehovaj yanapayninwanqa juntʼayta atisqanchejta (Salmo 145:14 leey). Philip nin: “Mana llakikunichu mashkha kutistachus urmasqaymanta, astawanqa mayta kusikuni mashkha kutistachus sayarikusqaymanta”. Davidpis nillantaj: “Imapis mana allin llojsejtin chayri imapis pasawajtenqa, mana ninichu ‘kaykamalla’ nispaqa. Astawanpis yachani Jehovata mayta munakusqayrayku kallpachakunallaypuni kasqanta”, nispa. Ajina problemaspi rikukuspapis ñaupajllamanpuni rispaqa, Jehovata kusichiyta munasqanchejta rikuchinchej. Jehovaqa maytapuni kusikun ruwayta munasqanchejta juntʼanapaj kallpachakushasqanchejta rikuspa.

16. ¿Imatataj jarkʼaykuna reparachiwasunman?

¹⁶ Jarkʼaykunamanta yachakuna. Kayta tapurikuna: “¿Imatataj ruwayman mana ajinallapitaj rikukunaypaj?”, nispa (Pro. 27:12). Imatachus ruwayta munasqanchejta mana juntʼayta atishanchejchu chayqa, ichapis mana ruwayta atinanchejpaj jinachu. Chayrayku piensarina ruwayta munasqanchej juntʼayta atinanchejpaj jinachus manachus kasqanpi. c Mana ruway atina kasqanrayku mana juntʼashanchejchu chayqa, Jehovaqa mana phiñakonqachu (2 Cor. 8:12).

17. ¿Imajtintaj yuyarikunanchej tiyan imastachus ruwanchejña chaykunamanta?

¹⁷ Imastachus ruwanchejña chayta yuyarikuna. Bibliaqa nin: “Diosqa cheqan, manataj qonqapunchu ruwasqasniykichejta”, nispa (Heb. 6:10). Noqanchejpis chayta amallataj qonqapunachu. Astawanpis piensarina imastachus juntʼasqanchejpiña: Jehovaj amigonña kasqanchejpi, predicasqanchejpiña chayri bautizakusqanchejpiña. Chaykunata juntʼayta aterqanchejña chayqa, kunan imatachus ruwayta munashanchej chaytapis juntʼayta atillasuntaj (Fili. 3:16).

18. Uj imata ruwanaykipaj kallpachakushanki chay, ¿imatataj mana qonqakunaykichu tiyan? (Dibujotawan qhawariy).

¹⁸ Jehovaj yanapayninwanqa ruwayta munasqanchejta juntʼayta atisun, imaynatachus barcota apaykachaj runa may kusisqa chayan maymanchus chayananman ajinata. Chantapis barcota apaj runasqa kusisqa viajariyta yachanku. Noqanchejpis ruwayta munasqanchejta juntʼanapaj kallpachakushaspaqa kusiyta tarisunman, imaynatachus Jehová yanapashawasqanchejta reparaspa (2 Cor. 4:7). Mana saykʼusunchu chayqa, aswan sumaj bendicionestaraj japʼisun (Gál. 6:9).