1, 2. ¿Imatá ichá maykʼajllapis tapukorqanchej?

 ICHÁ maykʼajllapis tapukorqanchej: “¿Jehová mañakuykunasniyman kutichishawanchu?”, nispa. Mana qanllachu ajinata tapukorqanki, ashkha hermanosninchejpis chayta tapukullarqankutaj, astawanraj llakiykunapi rikukuspa. Ichá noqanchejpis llakiykunapi kashaspa mana reparayta atillanchejchu imaynatachus Jehová mañakuykunasninchejman kutichishawasqanchejta.

² ¿Imaynapí yachanchej Jehová mañakuyninchejman kutichinawanchejtapuni? Chayta kay yachaqanapi yachakusun (1 Juan 5:15). Chantapis kay tapuykunaman kutichisun: ¿Imajtín yuyasunman Jehová mana mañakuykunasninchejman kutichishawasqanchejta? ¿Imaynasmantá Jehová kay tiempopi mañakuykunasninchejman kutichishawanchej?

3. ¿Imaraykutaj Jehová munan payman orakunanchejta?

³ Bibliaqa niwanchej Jehovaqa maytapuni munakuwasqanchejta, may valorniyojpajtaj qhawawasqanchejta (Ageo 2:7; 1 Juan 4:10). Chayrayku munan payman orakunanchejta, yanapantataj mañakunanchejta (1 Ped. 5:6, 7). Payqa yanapaytapuni munawanchej paypaj qayllallanpipuni kanapaj, tukuy problemasninchejtapis aguantanapaj.

4. ¿Imaynapí yachanchej Jehová kamachisninpa mañakuykunasninkuman kutichisqantapuni? (Dibujotawan qhawariy).

⁴ Bibliapeqa niwanchej Jehovaqa ashkha kamachisninpa mañakuykunasninkuman kutichisqanta. Ichapis rey Davidmanta yuyarikunchej. Payqa kausayninpi ashkha enemigoswan tinkorqa, Jehovamantaj orakojpuni yanapanta mañakuspa. Uj kuti jinata  mañakorqa: “Jehová Diosníy, uyarillaway mañakusqayta. Rogakuspa yanapata mañakusqayta uyarillaway. Cheqan Dios kasqaykirayku, cheqan kajta ruwasqaykirayku uyarillaway”, nispa (Sal. 143:1). Jehovaqa Davidpa mañakuykunasninman kuticherqa, salvarqataj (1 Sam. 19:10, 18-20; 2 Sam. 5:17-25). Chayrayku Davidqa mana iskayrayaspa nerqa: “Jehová Diosqa pikunachus payman qhaparikunku chaykunaj qayllankupi kashan”, nispa. Noqanchejpis David jinallataj niyta atisunman (Sal. 145:18).

5. Jehová kamachisninpa oracionesninkuman, ¿munasqankuman jinapunichu kuticherqa? Sutʼinchariy (dibujotawan qhawariy).

⁵ Ichapis Jehovaqa mana munasqanchejman jinapunichu mañakuykunasninchejman kutichiwasun. Ajinapi apóstol Pablo rikukorqa. Payqa uj sinchʼi llakiyniyoj karqa, chaytaj aychanpi khishka jina karqa, kinsa kutitataj Jehovamanta mañakorqa chay khishkata orqhonanta. Jehovaqa oracionesninman kuticherqa, pero mana Pablo munasqanman jinachu. Jehovaqa mana problemanta chinkacherqachu. Astawanpis kallpata qorqa payta tukuy sonqo sirvinallanpajpuni (2 Cor. 12:7-10).

6. ¿Imaraykutaj wakin kutis yuyasunman mana Jehová mañakuykunasninchejman kutichiwasqanchejta?

⁶ Ichá noqanchejmanpis mana munasqanchejman jinapunichu Jehová kutichiwasunman. Jinapis sutʼita yachanchej imachus noqanchejpaj allin kasqanta Jehová yachasqanta. Payqa “mañakusqanchejmantapis chayri yuyasqanchejmantapis, aswan ashkhataraj ruwayta atin” (Efe. 3:20). Chayrayku ichapis mana munasqanchejman jinapunichu, nitaj munasqanchej ratopunichu mañakuyninchejman kutichiwasun.

7. ¿Imajtintaj ichapis imatachus Jehovamanta mañakusqanchejta cambiananchej kanqa? Sutʼinchariy.

⁷ Imachus Diospa munaynin kasqanta sutʼita entiendespaqa, ichapis imatachus paymanta mañakorqanchej chayta cambiananchej kanqa. Hermanonchej Martin Poetzingermanta parlarina. Paytaqa casarakusqanmanta pisi tiemponman nazispa carcelninkuman aparqanku. Qallariypi payqa Jehovamanta mañakorqa nazispa carcelninmanta orqhonanta, ajinamanta warmisitanta cuidananpaj, predicananpaj ima. Jinapis iskay semananmanqa qhawasqanman jina Jehovaqa mana ni imatapis ruwasharqachu carcelmanta orqhonanpaj. Chayrayku hermano Martinqa Jehovamanta mañakorqa: “Diosníy, yanapariway imatachus ruwanayta munasqaykita reparanaypaj”, nispa. Chaypitaj piensarerqa nazispa carcelnillankupitaj kaj hermanospis ima llakiykunapichus kashasqankupi. Paykunamanta ashkhasqa llakisqa  kasharqanku señorankumanta, wawitasninkumanta ima. Chayrayku hermano Martinqa Jehovaman nerqa: “Diosníy, agradecekuyki kay mosoj llankʼayta qowasqaykimanta, yanapariway hermanosniyta kallpacharinaypaj”, nispa. Chaytapunitaj ruwarqa jisqʼon watasta wisqʼasqa kashaspa.

8. ¿Imatataj mana qonqananchejchu tiyan orakushaspa?

⁸ Kayta ama qonqanachu: Jehovaqa imatachus ruwananta ninña, chaytataj tiemponpi juntʼanqa. Chay nisqanta juntʼananpajqa imachus sufrichiwanchej chaykunatawan wiñaypaj chinkachenqa: desastres naturalesta, onqoykunata, wañuyta ima. Jehovaqa nisqanta juntʼanqa Gobiernonnejta (Dan. 2:44; Apo. 21:3, 4). Jinapis chaykama saqeshan Satanás kay mundota gobernananta (Juan 12:31; Apo. 12:9). b Kay tiempopi sichus Jehová kay jallpʼamanta problemasta allinchanman chayqa, rikuchinman Satanás allillanta gobernashasqanta. Jehová munayninta juntʼananta suyakunallanchejpuni kajtinpis, payqa yanapawasunpuni. Kunanqa qhawarina imastachus Jehová noqanchejrayku ruwashasqanta.

9. ¿Imaynatá Jehová yanapawanchej imatapis kausayninchejpi ajllananchej kajtin? Sutʼinchariy.

⁹ Yachayta qowanchej. Jehovaqa imatapis allinta ajllanapaj yachayta qonawanchejta niwanchej. Kausayninchejta cambiachinanpaj jina imatapis ajllananchej kajtenqa, necesitanchej Jehová yachayta qonawanchejta. Chaymanta ujnenqa kanman casarakuytachus manachus ajllananchej kajtin (Sant. 1:5). Soltera hermananchej Mariamanta parlarina. c Payqa precursora regular jina kusisqa Jehovata sirvisharqa. Chaypitaj uj hermanota rejserqa, pay nin: “Tiemponmanqa paywan sumaj amigosman tukorqayku, purajmantataj gustanakuyta qallarerqayku. Sutʼita yacharqani casarakunaytachus manachus ajllanay kasqanta. Chayrayku unayta Jehovamanta mañakorqani. Necesitarqani Jehová yuyaychanawanta, jinapis yacharqani noqapuni ajllanay kasqanta imatachus ruwanayta”, nispa. Mariaqa repararqa Jehová mañakusqasninman kutichisqanta, yachaytataj qosqanta. ¿Imaynamantá Jehová kuticherqa? Mariaqa publicacionesninchejta estudiarqa, chaypitaj tapuykunasninpa kutichiykunasninta tarerqa. Mamanpis sumajta yuyaycharillarqataj chay hermanota munakusqantapunichus manachus sutʼita reparananpaj, mamanpis testigollataj. Mariaqa tukuy chay yanapaswan sumajta ajllarqa.

10. Filipenses 4:13 nisqanman jina, ¿imaynatá Jehová yanapanqa kamachisninta? Sutʼinchariy. (Fototawan qhawariy).

¹⁰ Aguantanapaj kallpata qowanchej. Jehovaqa  apóstol Pabloman jinallataj necesitasqanchej kallpata qollawasuntaj llakiykunata aguantanapaj (Filipenses 4:13 leey). Qhawarina imaynatachus hermanonchej Benjaminta yanapasqanta. Payqa jovencitomantapacha familianwan ashkha watasta tiyakorqa, Africapi ayqekojkuna tiyakunku chaypi. Pay nin: “Jehovaman mana saykʼuspa orakoj kani kallpata qonawanpaj allin kajta ruwanaypaj. Payqa oracionesniyman kutichiwaspa sonqo tiyayta qowarqa, kallpatapis predicanallaypajpuni. Paypaj qayllallanpipunitaj kanaypaj publicacionesta qowarqa”, nispa. Pay nillanpuni: “Hermanospa experienciasninkuta leerisqay, imaynatachus Jehová paykunata aguantanankupaj yanapasqanta leerisqaypis, yanapawarqa mana saykʼupunaypaj, Jehovatataj kasukunallaypajpuni”, nispa.

11, 12. ¿Imaynatá Jehová hermanosnejta oracionesninchejman kutichiwasunman? (Fototawan qhawariy).

¹¹ Hermanosnejta yanapawanchej. Jesusqa wañuchisqa karqa chay diaj ñaupaj chʼisin, sinchʼita Jehovamanta mañakorqa. Payqa Jehovamanta mañakorqa ama wajkuna piensanankuta paypa contranpi parlashasqanta, chayraykutaj wañuchishasqankuta. Jehovataj mana chay mañakusqanman jinachu ruwarqa, astawanpis uj angelta kachamorqa kallpachananpaj (Luc. 22:42, 43). Ajinallatataj noqanchejtapis Jehovaqa hermanosnejta yanapawasunman. Ichapis hermanosninchej kallpachanawanchejpaj visitawasunman chayri celularnejta wajyarimuwasunman. Tukuypis kallpachakusunman ‘allin palabraswanʼ hermanosninchejta yanaparinapaj (Pro. 12:25).

¹² Hermananchej Miriammanta parlarina. Qosan wañupusqanmanta pisi semanasninman, payqa wasinpi sapitan kasharqa llakisqa, sonqo pʼakisqataj. Chayrayku payqa waqaspalla kasharqa, pillawanpis parlarikuytataj necesitarqa. Pay nerqa: “Ni pita wajyarinaypaj kallpay karqachu. Chayrayku Jehovaman orakorqani waqaspa, orakushajtillayraj celularniy sonarqa, uj anciano wajyamushawasqa, payqa sumaj amigoy karqa”, nispa. Chay ancianowan señoranwanqa hermananchej Miriamta mayta sonqocharqanku. Payqa sutʼita yacharqa Jehovapuni chay hermanoj sonqonta aysasqanta payta wajyarinanpaj.

13. ¿Imaynatá Jehová mañakuykunasninchejman kutichiwanchej payta mana yupaychaj runasnejta? Sutʼinchariy.

 ¹³ Jehovaqa mana testigo runaswan yanapachiwasunman (Pro. 21:1). Wakin kutis Jehovaqa kamachisninpa oracionesninkuman kutichin, payta mana yupaychaj runaswan yanapachispa. Jehovaqa Nehemiasta yanaparqa rey Artajerjesnejta. ¿Imaynamanta? Rey Artajerjesqa Nehemiasman permisota qorqa Jerusalenman kutinanpaj, llajtatataj watejmanta sayarichiypi yanapakamunanpaj (Neh. 2:3-6). Kunan tiempopipis Jehovaqa, kamachisnin yanapata necesitajtinchej mana testigo runaswan yanapachiwanchej.

14. ¿Imaynatá hermananchej Soo Hingpa experiencian kallpachawanchej? (Fototawan qhawariy).

¹⁴ Hermananchej Soo Hingmanta parlarina. Payqa repararqa Jehovaqa doctorninnejta yanapashasqanta. Wawanqa umitanmanta mana sanochu, uj kuti wawan sinchʼitapuni accidentaykukorqa. Chayrayku hermananchej Soo Hing, qosan ima payta cuidanankupaj trabajonkuta saqerqanku, qolqenkutaj pisiyarqa. Ajina llakiypi rikukusqanrayku hermanchej Soo Hingqa niña ni imata ruwayta aterqachu, niña kallpanpis karqachu. Chayrayku Jehovaman tukuy sonqo orakorqa yanapata mañakuspa. Doctortaj paykunata yanaparerqa gobiernomanta yanapata japʼinankupaj, uj wasitapis baratollapi tarikunankupaj. Chantá Soo Hing nerqa: “Jehová yanapawasqaykuta sutʼita repararqayku. Payqa ‘mañakuykunasninchejta uyarinpuni’”, nispa (Sal. 65:2).

15. ¿Imatá uj hermanitanchej ruwarqa Jehová mañakuykunasninman kutichishasqanta reparananpaj?

¹⁵ Jehovaqa mana tʼukunapaj jinachu oracionesninchejman kutichiwanchej. Jinapis payqa mañakuyninchejman kutichiwanchejpuni, chaytaj yanapawanchej paypa qayllallanpipuni kanapaj. Chayrayku mana qonqakunanchejchu tiyan imastachus Jehovamanta mañakusqanchejta. Ajinamanta sutʼita reparasun mañakuykunasninchejman kutichishawasqanchejtachus manachus. Hermananchej Yokomanta parlarina. Payqa mana reparayta atillarqachu Jehová oracionesninman kutichishasqanta. Jinapis uj cuadernopi anotakuyta qallarerqa imastachus Jehovamanta mañakusqanta. Tiemponmantaj payqa cuadernitonta qhawaykurerqa, repararqataj Jehovaqa casi tukuy mañakuykunasninman kutichisqanta. Chay mañakusqanmanta  wakintaqa qonqapusqaña. Chayrayku wakin kutis tiempocharikunanchejpuni tiyan, sutʼita reparanapaj imaynatachus Jehová mañakuykunasninchejman kutichishawasqanchejta (Sal. 66:19, 20).

16. ¿Imaraykutaj creeyniyoj kananchej tiyan orakushaspa? (Hebreos 11:6).

¹⁶ Mana orakunallapajchu creeyniyoj kananchej tiyan, manaqa imaynatachus Jehová mañakuykunasninchejman kutichiwasqanchejta japʼikunapajpis (Hebreos 11:6 leey). Hermanosninchej Mikemantawan Chrissymantawan parlarina. Paykunaqa mayta betelpi sirviyta munarqanku. Mike nin: “Betelman rinaykupaj ashkha kutista solicitudta juntʼacherqayku, kutin kutitataj Jehovamanta mañakorqayku. Jinapis ni jaykʼaj invitawarqaykuchu”, nispa. Pero Mikewan Chrissywanqa confiarqanku Jehová sutʼita yachasqanta maypichus aswan sumajta yanapakuyta atisqankuta. Chayrayku paykunaqa tukuy atisqankuta llankʼallarqankupuni: maypichus predicajkuna necesitakorqa chaypi precursores regulares jina yanapakorqanku, construccionpipis yanapakullarqankutaj. Kunantaj congregacionesta waturispa yanapakushanku. Mike nin: “Jehovaqa mana munasqaykuman jinapunichu mañakuykunasniykuman kutichiwarqayku, pero kutichiwarqaykupuni, imastachus mañakusqaykumantapis aswan sumajtaraj”, nispa.

17, 18. Salmo 86:6, 7 nisqanman jina, ¿imamantá mana iskayrayananchejchu tiyan?

¹⁷ (Salmo 86:6, 7 leey). Davidqa sutʼita yacharqa Jehová mañakuykunasninta uyarisqanta, kutichisqantataj. Qanpis chaymanta ama iskayrayaychu. Kay yachaqanapi yachakunchej jina Jehovaqa yachayta qowasunpuni, llakiykunata aguantanapajpis necesitasqanchej kallpata qowasun. Yachakullarqanchejtaj Jehovaqa hermanosnejta yanapawasqanchejta, payta mana yupaychaj runasnejtapis yanapallawasqanchejtataj.

¹⁸ Ichapis Jehovaqa mana munasqanchejman jinapunichu mañakuykunasninchejman kutichiwasun, jinapis kutichiwasunpuni. Jehovaqa necesitasqanchejtapuni qowasun, maychus tiemponpitaj. Chayrayku orakunallapuni Jehová oracionesninchejman kutichinawanchejta yachaspa. Jehovaqa kunan cuidawasunpuni, qhepamantaj tukuyninchejman ‘munasqanchejta qowasun’ (Sal. 145:16).