1. ¿Imatá Biblia nin cheqa munakuymanta?

 BIBLIAQA cheqa munakuymanta nin: “Munakoyqa nina jina laurarin, Jehová Diospa ninan jina laurarin. Munakuytaqa qhollchoqeyarishaj yakuspis mana thasnuyta atinkumanchu, nitaj mayuspis apakapuyta atinkumanchu”, nispa (Cant. 8:6, 7). b Chayqa kʼachitupuni, ¿icharí? Bibliaj chay nisqanqa sutʼita rikuchiwanchej casadospa munanakusqankoqa sinchʼi kayta atisqanta, mana tukukuyniyojtaj.

2. ¿Imatá casados ruwananku tiyan munakuyninku mana chiriyapunanpaj?

² Casadosqa sapa uj kallpachakunanku tiyan tukuy kausayninkupi munanakunankupaj. Kaypi piensarina: Nina lauranallanpajpuneqa llantʼata churana tiyan, mana churajtinchejqa wañuponqa. Ajinallataj casadospa munanakusqankuwanpis. Kallpachakunanku tiyan munakuyninku mana chiriyapunanpaj. Wakin kutisqa qolqe pisiyasqanrayku, onqoykusqankurayku chayri wawasta mana uywayta atillasqankurayku munakuyninku chiriyapunman. Casados, ¿imatá ruwawajchej munakuyniykichejta ‘Jehová Diospa ninanta jina’ laurarichinaykichejpaj? Kay yachaqanapi kinsa imasta yachakusun. Chaytaj yanapasonqachej matrimonio kausayniykichej sumaj kananpaj, kusisqataj kausakunaykichejpaj. c

3. ¿Imaraykutaj casados Jehovawan sumaj amigos kananku tiyan? (Eclesiastés 4:12; fototawan qhawariy).

³ Casados munakuyninkuta ‘Jehová Diospa ninanta jina’ laurarichinankupajqa, sapa uj kallpachakunanku tiyan Jehovawan sumaj amigos kanankupaj. Casados Jehovawan sumaj amigos kanqanku chayqa, Jehovaj yuyaychaykunasninta tukuy sonqo kasukuyta atillanqanku. Ajinamanta munakuyninkuta chiriyachej problemasta atipayta atillanqanku (Eclesiastés 4:12 leey). Chantapis Jehovaj amigosnenqa tukuy atisqankuta kallpachakunku pay jina ruwanankupaj. Paykunaqa kʼachas kanku, pacienciakunku, perdonaytataj yachanku (Efe. 4:32–5:1). Casados chayta ruwanqanku chayqa, munakuyninku wiñallanqapuni. Hermananchej Lenaqa 25 watasmanta astawanña casada. Pay nin: “Jehovata munakoj qosataqa munakuyta, respetaytapis atillanchej”, nispa.

4. ¿Imaraykutaj Jehová Josetawan Mariatawan ajllarqa Mesiaspa tatasnin kanankupaj?

⁴ Jehovaj wakin kamachisninmanta parlarina. Jehovaqa Davidpa tukuy mirayninmanta Josetawan Mariatawan ajllarqa Mesiaspa tatasnin kanankupaj. ¿Imaraykutaj paykunata ajllarqa? Sumaj amigosnin kasqankurayku. Chantapis Jehovaqa yacharqa matrimonionkupi paytapuni ñaupajman churanankuta. Casados kajkuna, ¿imatá yachakunkuman Josemantawan Mariamantawan?

5. ¿Imatá qosas Josemanta yachakunkuman?

⁵ Joseqa Jehovaj nisqanman jinapuni imatapis ruwaj. Chayrayku sumaj qosa karqa. Jehovaqa kinsa kutispi Joseman nerqa imatachus familianwan ruwananta. Josetaj chay rato kasukorqa mana atikullajtinpis (Mat. 1:20, 24; 2:13-15, 19-21). Jehovata kasukusqanraykutaj Joseqa Mariata jarkʼarqa, cuidarqa ima. Chayrayku Mariaqa astawanrajchá Joseta munakorqa, respetarqataj. Qosas, qankunapis José jina ruwawajchej. Familiaykichejta cuidanaykichejpaj Bibliapi yuyaychaykunata maskʼaychej. d Cambianaykichej kajtinpis, Bibliaj yuyaychaykunasninman jinapuni ruwaychej. Ajinamanta señoraykichejta munakusqaykichejta rikuchinkichej. Chayta ruwankichej chayqa, matrimonioykichejqa astawan sinchʼi sayasqa kanqa. Vanuatumanta uj hermana 20 watasmanta astawanña casada. Pay nin: “Qosay Jehovaj yuyaychaykunasninta maskʼasqanta rikuspa, chayman jinataj ruwasqanta rikuspa, payta astawan respetani. Pay cuidanawanmanta mana iskayrayanichu, yachanitaj sumajtapuni imatapis ajllasqanta”, nispa.

6. ¿Imatá qosayoj hermanas Mariamanta yachakunkuman?

⁶ Mariaqa Jehovaj sumaj amigan karqa. Chaytaj mana Josemantachu karqa, manaqa paypuni sinchʼi creeyniyoj kananpaj kallpachakorqa.  Payqa Diosmanta Qhelqasqata sumajta rejsej, tiempochakojtaj chaypi sumajta tʼukurinanpaj (Luc. 2:19, 51). Mariaqa Jehovaj sumaj amigan kasqanrayku sumaj warmi karqa. Kay tiempomanta ashkha hermanaspis María jina kanankupaj kallpachakunku. Hermananchej Emikomanta parlarina. Pay nin: “Soltera kashaspaqa Jehovaj qayllallanpipuni kanaypaj sapallay tukuy imata ruwaj kani. Jinapis casarakusqaykumantaqa qosallayña Jehovamanta mañapuwaj, yanapawajtaj Jehovaj qayllallanpipuni kanaypaj. Reparakorqani qosay yanapawasqanraykulla Jehovaj qayllallanpipuni kashasqayta. Yacharqani Jehovaj qayllallanpipuni kanaypaj noqapuni kallpachakunay kasqanta. Chayrayku kunanqa tiempochakuni sapallaypi orakunaypaj, Bibliata leenaypaj, chaypitaj tʼukurinaypaj”, nispa (Gál. 6:5). Hermanas, Jehovaj qayllallanpipuni kanaykichejpaj kallpachakullankichejpuni chayqa, qosaykichejqa astawan munakusonqachej, allinta ruwasqaykichejtataj nisonqachej (Pro. 31:30).

7. ¿Imatá qhariwarmi kajkuna yachakunkuman Josemantawan Mariamantawan?

⁷ Josewan Mariawanqa Jehovawan sumaj amigos kanankupajpis iskayninku kallpachakullarqankutaj. Paykunaqa sutʼita yacharqanku familia jina Jehovata yupaychanankupuni kasqanta (Luc. 2:22-24, 41; 4:16). Chaytaj paykunapajqa nichá atikullarqachu, astawanraj wawasninku astawan yapakojtin. Jinapis chayta ruwarqankupuni. Paykunamantataj kay tiempopi matrimonios mayta yachakunkuman. Wawasniyoj kankichej chayqa, ichapis mana atillankichejchu reunionesman riyta, Familiapi Diosta Yupaychanapaj tantakuyta ruwaytapis. Chantapis qhariwarmi jina khuska estudianaykichejpaj, orakunaykichejpajpis astawanrajchá mana tiempochakuyta atillankichejchu. Jinapis kayta ama qonqaychejchu: Khuska Jehovata yupaychankichej chayqa astawan payman qayllaykunkichej, aswan ujchasqastaj kankichej. Chayrayku Jehovata yupaychaytapuni kausayniykichejpi ñaupajman churaychej.

8. Casados problemasniyoj kanku chay, ¿imatá ruwankuman Familiapi Diosta Yupaychanapaj tantakuywan yanapachikunankupaj?

⁸ Casados, ¿imatá ruwawajchej matrimonioykichejpi problemas kajtin? Ajina problemaspi kashaspaqa, nichá Familiapi Diosta Yupaychanapaj tantakuyta ruwayta munallankichejchu. Jina kajtenqa Bibliamanta imachus gustasunkichej chayta uj chhikitallantapis ukhunchariwajchej. Chayqa yanapasonqachej, iskayniykichej astawan munanakunaykichejpaj, Jehovatataj khuska yupaychayta munanaykichejpaj.

9. ¿Imaraykutaj casarasqa kajkuna kallpachakunanku tiyan astawan khuska kanankupaj?

⁹ Casados astawan khuska kankichej chayqa, astawan munanakunkichej. Chayta ruwankichej chayqa, yachayta atinkichej qosaykichej chayri warmiykichej imatachus yuyasqanta, imaynachus kashasqantapis (Gén. 2:24). Liliamantawan Ruslanmantawan parlarina. Paykunaqa 15 watasmanta astawanña casados kanku. Lilia nin: “Casarakuytawanqa repararqayku mana yuyasqaykuman jinachu ashkha tiempota khuska kayta atisqaykuta. Imajtinchus trabajowan wasipi ruwanaswan ocupasqalla kasharqayku, wawasniyoj kaspataj astawanraj. Repararqayku khuska kanaykupaj mana tiempochakojtiykoqa munakuyniyku chiriyapunanta”.

10. ¿Imaynatá casados ruwankuman Efesios 5:15, 16 nisqanman jina?

¹⁰ ¿Imatá casados ruwankuman khuska aswan tiempota kanankupaj? Khuska karikunankupaj tiempochakunanku tiyan, sumajtataj parlarikunanku tiyan ima ratoschus khuska karikunankupaj  (Efesios 5:15, 16 leey). Nigeriamanta hermanonchej Uzondu nin: “Imastachus ruwanaypaj uj horariota ruwakushaspaqa, chayman churallanitaj ima ratoschus warmisitaywan khuska kanaytapis. Chaytataj mana imawanpis cambianichu” (Fili. 1:10). Hermananchej Anastasiamanta parlarina. Payqa Moldavia suyupi qosanwan khuska congregacionesta waturinku. Pay nin: “Qosay ruwanasninta ruwanankama noqapis ruwanasniyta ruwallanitaj. Ajinamanta ruwanasniykuta tukuytawan khuska karikuyta atiyku”, nispa. Jinapis ichá ashkha ruwanasniyoj kasqaykichejrayku khuska karikunaykichejpaj mana tiempochakuyta atillankichejchu. Jina kajtin, ¿imatá ruwawajchej?

11. ¿Imastataj Aquilawan Priscilawan khuska ruwaj kanku?

¹¹ Casadosqa Aquilamantawan Priscilamantawan mayta yachakunkuman. Chay qhariwarmeqa ñaupa tiempomanta cristianospaj may munasqa karqanku (Rom. 16:3, 4). Bibliapeqa mana anchata qhariwarmi kausayninkumanta parlanchu. Pero nin paykunaqa khuska trabajasqankuta, khuska predicasqankuta, wajkunatapis khuska yanapasqankuta (Hech. 18:2, 3, 24-26). Bibliaqa paykunamanta parlaspa iskayninkumantapuni parlan.

12. Casados kajkuna, ¿imatá ruwawajchej aswan tiempota khuska kanaykichejpaj? (Fototawan qhawariy).

¹² Casados kajkuna, ¿imaynatá Áquila jina, Priscila jina ruwankuman? ¿Ima ruwanastaj sapa ujniykichejpata tiyapusunkichej? ¿Chaykunamanta wakillantapis khuska ruwayta atiwajchejchu? Aquilawan Priscilawanqa khuska predicaj kanku. Qankunapis, ¿paykuna jinachu khuska predicankichej? Aquilawan Priscilawanqa khuskallataj trabajaj kanku. Ichapis qankunaqa mana kikin trabajoyojchu kankichej. Jinapis wasipi ruwanasta khuska ruwayta atiwajchej (Ecl. 4:9). Purajmanta yanapanakuspa imatapis khuska ruwankichej chayqa, astawan parlarikuyta atinkichej. Robertwan Lindawanqa 50 watasmanta astawanña casados kanku. Robert nin: “Khuska kusirikunaykupaj mana tiempoyku kallanchu. Jinapis platosta mayllashajtiy warmisitay chʼakichin, jardinpi trabajashajtiytaj pay yanapariwan. Chaytaj mayta kusichiwan. Ashkha imasta khuska ruwasqaykurayku astawan ujchasqa kayku, astawantaj munanakuyku”, nispa.

13. ¿Imatá casados ruwankuman aswan ujchasqa kanankupaj?

¹³ Kayta ama qonqaychejchu: Khuska kaywan ujchasqa kaywanqa mana kikinchu. Brasilmanta uj hermananchej nin: “May ocupasqas kasqanchejrayku yuyasunman uj wasillapi tiyakuspaqa khuskaña kashasqanchejta. Jinapis reparani khuska kayqa mana uj wasipi tiyakuyllachu kasqanta. Astawanpis qosaywan karikunaypaj, paywan parlarikunaypaj tiempochakunay tiyan”, nispa. Qhawarina imatachus Brunowan Tayswan khuska kashaspa ruwasqankuta. Bruno nin: “Khuska karikuspa  kusirikunaykupajqa, celularesniykuta uj ladoman churayku”, nispa.

14. Casados khuska kaspa manaña kusisqachu kanku chay, ¿imatá ruwankuman?

¹⁴ Khuska kaspa manaña kusisqachu kankichej chayrí, ¿imatá ruwawajchej? Ichapis mana kikin imaschu gustasunkichej chayri ichapis wakin kutis phiñanakunkichej. Jina kajtin, ¿imatá ruwawajchej? Qallariypi nina lauraymanta parlarisqanchejpi piensarina. Nina japʼikuyta qallarejtin lauraynenqa juchʼuysitulla. Chay nina sumajta, astawantaj laurarinanpajqa pisimanta pisi llantʼata yapana tiyan. Ajinallatataj qankunapis kallpachakuychej sapa día uj ratitullatapis khuska karikunaykichejpaj. Ama ruwaychejchu imachus phiñanachisunkichejman chaytaqa. Astawanpis kallpachakuychej imachus iskayniykichejman gustasunkichej chayta ruwanaykichejpaj (Sant. 3:18). Ajinata juchʼuy imitasta khuska ruwayta qallarinkichej chayqa, munakuyniykichejqa watejmanta nina jina laurarenqa.

15. ¿Imaraykutaj casados respetanakunankupuni tiyan?

¹⁵ Matrimoniopeqa respeto kananpuni tiyan. Nina lauranallanpajpuneqa aire (oxígeno) necesitakun. Aire mana kajtenqa ninaqa chay rato wañupunman. Matrimoniopipis mana respeto kajtenqa munakoyqa usqhayllata chiriyapunman. Sichus casados purajmanta respetanakullankichejpuni chayqa, munakuyniykichejqa nina jina laurarillanqapuni. Pero yuyarikuna, mana qanchu ninayki tiyan, “noqaqa qosayta chayri warmiyta respetanipuni” nispaqa. Manaqa pay ninan tiyan respetasqaykitachus manachus. Pennywan Aretwanqa 25 watas kurajña casados kanku. Penny nin: “Purajmanta respetanakusqaykurayku kʼachituta kausakuyku. Mana manchachikuspa imatachus piensasqaykuta, imachus sonqoykupi kasqantapis ninakuyku, imajtinchus imatachus sapa uj nisqaykutaqa jatunpaj qhawayku”, nispa. ¿Imatá ruwawaj qosayki chayri warmiyki respetasqaykita sutʼita reparananpaj? Imatachus Abrahanwan Sarawan ruwasqankuta qhawarina.

16. ¿Imatá qosas Abrahanmanta yachakunkuman? (1 Pedro 3:7; fototawan qhawariy).

¹⁶ Abrahanqa Sarata respetajpuni. Imatachus yuyasqanta willajtin, imaynachus sientekusqanta willarejtinpis sumajta uyarej. Uj kuti Saraqa may llakisqa kasharqa, chaytataj Abrahanman phiñasqa willarqa, pay juchayoj kasqantataj nerqa. Abrahantaj mana paywan phiñakorqachu, nitaj kʼamerqachu. Abrahanqa Sarata allinta rejserqa, yacharqataj payqa respetasqantapuni, imatachus pay nisqanpipis yanapasqantapuni. Chayrayku Abrahanqa Sarata allinta uyarerqa, llakiyninta allinchananpajtaj kallpachakorqa (Gén. 16:5, 6). ¿Imatá Abrahanmanta yachakunchej? Qosaqa familiapi imachus ruwakunanta ajllayta atin (1 Cor. 11:3). Jinapis warminta munakusqanrayku, niraj imatapis ajllashaspa imatachus warmin piensasqanta  uyarenqa, astawanraj chay ajllasqan warminpaj kajtin (1 Cor. 13:4, 5). Chantapis warmisitanqa ichá wakin kutis manchay saykʼusqa kasqanrayku qosanwan parlariyta necesitanqa. Ajina kajtin, ¿warmiykichejta respetowanchu sumajta uyarinkichej? (1 Pedro 3:7 leey). Angelawan Dimitriwanqa 30 watas jinaña casados kanku. Angelaqa sutʼita reparan qosan respetasqanta. Pay nin: “Dimitriyqa mana allinchu riwajtin chayri imamantapis parlarillayta munajtiy sumajtapuni uyariwan. Payqa mayta pacienciakuwan phiñasqa kashajtiypis”, nispa.

17. ¿Imatá qosayoj warmis Saramanta yachakunkuman? (1 Pedro 3:5, 6).

¹⁷ Saraqa qosan Abrahanta respetasqanrayku imatachus ajllasqanpi yanapajpuni (Gén. 12:5). Uj pacha, Abrahanpa wasinman mana wajyarisqalla runas chayaykorqanku. Abrahantaj paykunata wajyarikorqa. Sara ashkha ruwanasniyoj kajtinpis payta nerqa ashkha tʼantasta ruwananta (Gén. 18:6). Sarataj Abrahanta kasukuspa nisqanman jina ruwarqa. Qosayoj warmis, qankunapis Sara jina ruwawajchej, qosaykichejta imatachus ajllasqanpi yanapaspa. Chayta ruwankichej chayqa, aswan ujchasqa kankichej (1 Pedro 3:5, 6 leey). Dimitrimanta ñaupaj parrafopi parlarerqanchejña. Paytaqa warmin mayta respetan. Pay nin: “Yachani imata ajllasqaypipis warmiy yanapanawantapuni, payman mana allinchu rijchʼajtinpis. Imastachus ajllasqay mana allinchu llojsejtinpis, Angelaqa mana juchachaykuwanchu. Maytapuni agradecekuni warmiy ajina kasqanmanta”, nispa. ¿Pitaj ajina warmita chayri ajina qosata mana munakunmanchuri?

18. Qhariwarmis munakuyninkuta wiñachinankupaj kallpachakonqanku chay, ¿imataj kanqa?

¹⁸ Satanasqa munan qhariwarmis manaña munanakunankuta. Payqa yachan manaña munanakojtinku Jehovamanta karunchakunankuta. Jinapis cheqamanta munanakojtinkoqa mana imapis chay munakuyninkuta chiriyachiyta atenqachu. Chayrayku casados, munakuyniykichejqa Cantar de los Cantares nisqanman jina kachun. Casado kausayniykichejpi Jehovapuni ñaupajpi kachun. Khuska kanaykichejpaj astawan tiempochakuychej. Qosayki chayri warmiyki imaynachus kashasqanpi, imatachus necesitasqanpi piensarispataj sumajta respetanakuychej. Chayta ruwankichej chayqa, matrimonio kausayniykichejpi Jehovata jatunchankichej. Paymin qhariwarmi kausaypi ajina munakuyta rikhuricherqa. Chantapis munakuyniykichejqa sumajta laurarishaj nina jina wiñaypaj laurarillanqapuni.