1, 2. 1) ¿Imatá wakin runas ninku imaynatachus Diosta yupaychanamanta? 2) ¿Imatataj kay yachaqanapi yachakusun?

WAKIN runasqa ninku: “Dioswan allinpi kayllata necesitanchej, nitaj uj iglesiamanpunichu rina tiyan”, nispa. ¿Chayqa jinachu? ¿Imatataj Biblia nin?

² Kay yachaqanapeqa yachakusunchej, imaynatachus Jehová tukuy imata maychus kajtapuni ruwasqanta, kamachisnintataj uj llajtata jina ujchasqanta. Yachakullasuntaj Diospa llajtan kamachiwajtinchej, imatachus ruwananchej kasqanta (1 Cor. 14:32, 33, 40). Apostolespa tiemponkupi, cristianosqa Diospa Palabran nisqanman jina ruwarqanku. Chayrayku sumaj willaykunata tukuynejpi willarqanku. Noqanchejpis paykuna jinallataj Bibliaj nisqanta kasukunchej, Diospa llajtan kamachiwasqanchejtapis. Chayrayku Jallpʼantinpi sumaj willaykunata willashanchej. Chantapis yanapakunchej congregación llimphu, ujchasqataj kananpaj, hermanospura allinta kausakunapaj ima.

3. ¿Imaraykú niwaj Jehová imallatapis mana patan urantachu ruwasqanta?

³ Jehovaj ruwasqasninta qhawarispaqa, sutʼita reparanchej payqa mana imatapis patan urantachu ruwasqanta. Jehovaqa “kay pachata ruwarqa sumaj yachaywan, cielotapis sayacherqa  sumaj yuyaywan” (Pro. 3:19). Jehovaj ruwasqasninmantaqa, ‘uj chhichiyta jinalla’ yachanchej (Job 26:14). Ajina pisillata yachaspapis, sutʼita reparanchej tukuy ima maychus kananpi kashasqanta (Sal. 8:3, 4). Cielopi may chhika chʼaskas tiyan, chaykunataj mana takanakuspa kuyushanku. Jallpʼanchej, waj planetaspis intita muyushanku mana takanakuspalla. Chay tukuy imasqa ajina, Jehová planetasta, chʼaskastawan maynintachus purinankuta kamachisqanrayku. Cielota, Jallpʼata ima tʼukunapaj jina ruwasqanrayku, Payta jatunchayta, cheqa sonqowan yupaychayta ima munanchej (Sal. 136:1, 5-9).

4. ¿Imaraykú científicos runaj tapuyninman mana kutichiyta atinkuchu?

⁴ Cientificosqa cielopi, Jallpʼapi imaschus kasqanta qhawarispa, tukuy imata runasta yanapanankupaj jina ruwanku. Jinapis runaspa tapuykunasninkuman mana kutichiyta atinkuchu. Cientificosqa mana niyta atinkuchu, imaynatachus kausay qallarisqanta, imaraykuchus kay Jallpʼallapi runas, plantas, animales ima kausasqankutapis. Casi tukuy runastaj mana yachankuchu, imaraykuchus tukuypis wiñaypaj kausayta munasqanchejta (Ecl. 3:11). ¿Imaraykú runas chay imasta mana yachankuchu? Científicos, waj runas ima, Dios mana kasqanta, kausay jinallamanta rikhurisqanta nisqankurayku ima. Diosrí chay tapuykunaman Palabranpi kutichiwanchej.

5. ¿Imaynatá runas Jehovaj churasqan leyeswan yanapachikunku?

⁵ Jehovaqa Jallpʼapi, cielopi kaj tukuy imaspaj, leyesta jina churarqa. Chay leyestaj kikillanpuni kanku. Luzta, yakuta instalajkuna, ingenieros, avionta apaykachajkuna, doctores, wajkuna ima, chay leyesman jina trabajanku. Sutʼinchanapaj, doctoresqa yachanku maypichus runaj sonqon kashasqanta, nitaj maskʼanankurajchu tiyan. Tukuytaj yachanku, uj runa alto patamanta phinkimojtin, pampaman urmamunanta, wañuytataj atisqanta. Chayta yachasqanchejrayku, mana chay imasta ruwanchejchu.

6. ¿Imaynatá Jehová yupaychananchejta munan? Sutʼinchay.

⁶ Jallpʼapi, cielopi kaj imasqa maychus kajpi churasqa kashanku. Chayrayku Jehovaqa munan, kamachisnin maychus kajta yupaychanankuta. Payqa Bibliata qowanchej, imaynatachus yupaychanata yachachinawanchejpaj. Biblianejta, llajtannejta ima kamachiwasqanchejta kasukuspalla kusisqa, sonqo juntʼasqataj kausakusun.

7. ¿Imayna ruwasqataj Biblia kashan?

⁷ Bibliaqa Diospa may sumaj regalon. Wakin yachayniyoj runasqa ninku: “Bibliataqa runaslla rikhuricherqanku, judiospa qhelqasqankuta, cristianospa qhelqasqankutawan ujllaman tantaykuspa”, nispa. Chaytaj mana jinachu. Imaraykuchus Dios kamacherqa, pikunachus, maykʼajchus, imatachus Bibliapi qhelqanankuta. Chayrayku Bibliapi uj yuyaylla tiyan. Génesis libromanta Apocalipsis librokama, uj ‘miraymanta’ parlan. Chay miraytaj Jallpʼata uj paraisoman tukuchenqa. Yachakusqanchejman jina, chay ‘mirayqa’ Jesucristo. Gobiernontaj sutʼita rikuchenqa Jehovalla sumaj Kamachej kasqanta (Génesis 3:15; Mateo 6:10; Apocalipsis 11:15 leey).

8. ¿Imaraykú ninchej israelitas imatachus ruwanankuta yachasqankuta?

⁸ Diosqa israelitasman Leyninta qorqa, imatachus ruwanankuta yachanankupaj. Chayrayku wakin warmis “Dioswan Tinkukuna Toldo punkupi” sirvej kanku (Éxo. 38:8). Israelitasqa Dioswan Tinkukuna Toldota, toldosninkutapis oqharinankupaj kamachiykunata japʼerqanku. Aswan qhepaman,  rey Davidqa levitasta, sacerdotestawan templopi ruwanasninkuman jina rakʼirarqa (1 Cró. 23:1-6; 24:1-3). Israelitas Jehovata kasukojtinku, tukuy ima maychus kajta ruwakorqa. Chantapis ujchasqas, allintataj kausakoj kanku (Deu. 11:26, 27; 28:1-14).

9. ¿Munayninkutachu ruwaj kanku ñaupa tiempopi congregaciones? Sutʼinchay.

⁹ Ñaupa tiemponmanta congregacionesqa, mana munayninkutachu ruwaj kanku. Astawanpis uj junta directiva jina karqa, congregacionesta imatachus ruwanankuta kamachinanpaj. Qallariypeqa chay juntapi apostoleslla karqanku. Aswan qhepamantaj, waj ancianospis chay juntaman yaykullarqankutaj (Hech. 6:1-6; 15:6). Chay juntamanta, paykunata yanapakojkunamanta ima wakenqa cartasta qhelqarqanku. Paykunataqa Jehová yuyaycharqa. Congregacionesqa chay cartasnejta yuyaychaykunata, kamachiykunata ima japʼej kanku (1 Tim. 3:1-13; Tito 1:5-9). ¿Imaynatá chay kamachiykuna congregacionesta yanaparqa?

10. Apostoleswan ancianoswan kamachisqankuta kasukojtinku, ¿imaynataj congregacionesta rerqa? (9 paginapi dibujota qhawariy).

¹⁰ (Hechos 16:4, 5 leey). Ñaupa tiempopi wakin hermanosqa congregacionesta waturej kanku, “imatachus Jerusalenpi apóstoles, ancianoswan kamachisqankuta” willanankupaj. Congregacionesqa chay kamachiykunata kasukoj kanku. Chayraykutaj cristianosqa “creesqankupi kallpachakorqanku, sapa pʼunchaytaj astawan ashkhayarqanku”. ¿Imatá paykunamanta yachakusunman? ¿Imaynatá congregacionninchejpi chayman jina ruwasunman?

11. ¿Imaynatá Diospa llajtanpa kamachisqanta japʼikunanchej tiyan?

¹¹ Sucursalespi kamachejkuna, Comité de País nisqapi kajkuna, congregacionesta waturejkuna, ancianospis, Diospa llajtanpa kamachisqanta kasukunanku tiyan. Diospa Palabranqa congregacionta ñaupajman apajkunata kasukunata niwanchej (Deu. 30:16; Heb. 13:7, 17). Diosman cheqa sonqo kajkunaqa, llajtanpa kamachisqanta mana thutuspa kasukunku. Ama Diótrefes jina kanachu. Payqa congregacionta ñaupajman apajkunata mana valechejchu (3 Juan 9, 10 leey). Diospa llajtanpa kamachisqanta kasukojtinchej, hermanoswan allinta kausakunapaj, ujchasqas kanapajtaj yanapakunchej. Tapurikuna: “¿Hermanosta kallpachanichu Jehovaman cheqa sonqollapuni kanankupaj? ¿Jehovaj kamachisqanta chay ratochu kasukuni?”, nispa.

12. ¿Imaynatá ancianosta chayri siervos ministerialesta churakun?

¹² Kay 2014 watapi, Diospa Llajtanta Kamachejkunaqa ancianosta chayri siervo ministerialesta waj jinamanta churakunanta nerqanku. Chaytataj 15 de noviembre de 2014 Torremanta Qhawaj revistapi sutʼinchakorqa, “Leejkunaj tapuyninku” nisqapi. Chay yachaqana nisqanman jina, ñaupa tiempopi Diospa llajtanta ñaupajman apajkunaqa, congregacionesta waturejkunata kamacherqanku, ancianosta, siervos ministerialesta ima churanankupaj. Kay 2014 septiembre killamantapachataj chayman jina ruwakushan. Uj hermano, anciano chayri siervo ministerial kananpaj jina kajtin, ancianosqa congregacionesta waturej hermanoman willanku. Paytaj chay hermanota, familiantawan astawan rejsinanpaj kallpachakun. Chaypajqa ichapis paywan willayman llojsin (1 Tim. 3:4, 5). Chantá congregacionesta waturej hermanoqa, ancianoswan tantakun. Khuskataj Bibliaj nisqanta qhawaykunku, imatachus uj anciano chayri siervo ministerial  juntʼanan kasqanta (1 Tim. 3:1-10, 12, 13; 1 Ped. 5:1-3).

13. ¿Imaynatá ancianospaj yuyaychasqankuta japʼikuna?

¹³ Ancianosqa Bibliaman jina yuyaychawanchej, congregacionta jarkʼayta munasqankurayku. Noqanchejtaj chay yuyaychaykunata kasukunchej, allinninchejpaj kasqanrayku (1 Tim. 6:3, 4). Ñaupa tiempopi wakin cristianosqa, “pantasqata puri[sharqanku]”. Paykunaqa ni imapi llankʼasharqankuchu, wajkunaj ruwanasninkumantaj satʼikusharqanku. Ancianos yuyaychajtinkupis, mana kasukorqankuchu. Pabloqa chay jina hermanowan imatachus ruwanankuta nerqa: “Nipuychej qhella runa kasqanta, amataj paywan tantakuychejchu”. Paykunaqa chay runawan niña masichakunankuchu karqa. Jinapis mana enemigonkuta jinachu qhawananku karqa (2 Tes. 3:11-15). Kay tiempopi ancianosqa, Bibliaj yuyaychaykunasninta mana kasukojta yanapallankutaj. Ichá pipis Jehovata mana yupaychajwan casarakunanpaj rejsinakushanman (1 Cor. 7:39). Chay hermano mana kasukojtin, ancianosqa ichapis umallirichenqanku sutʼinchanankupaj chay hermanoj ruwasqan congregacionta mana allinpaj qhawachishasqanta. Ancianos congregacionninchejpi chayta ruwajtinku, ¿imata ruwasunchej? ¿Chay jina hermanowan masichakullasunpunichu? Chay umallirichiyta kasukuspaqa, pantasqata purej hermanota yanapasun. Ajinamanta payqa pantasqanta, Jehovatapis phiñachisqanta reparakuspa ichapis pesachikonqa. ^[1]

14. ¿Imaynatá congregación llimphu kananpaj yanapakusunman?

¹⁴ Diospa Palabranqa niwanchej, imatachus sapa uj ruwananchej kasqanta congregacionninchej “juchamanta tʼaqasqa” kananpaj. Corinto congregacionmanta parlarina. Pabloqa chay congregacionmanta hermanosta mayta munakorqa, wakinkunatapis Diosmanta yachakunankupaj yanaparqa (1 Cor. 1:1, 2). Jinapis uj hermanoqa millay juchata ruwasharqa, hermanostaj qhawashallarqanku. Chayta yachaspa Pabloqa maytachá llakikorqa, ancianostataj nerqa: “Chay runataqa Satanaspa makinman jaywaykuychej”, nispa. Paykunaqa chay hermanota congregacionmanta qharqonanku karqa (1 Cor. 5:1, 5-7, 12). Kay tiempopipis ancianosqa, juchallikoj mana pesachikojtin, congregacionmanta qharqonku. Jina kajtin, ¿Bibliaj nisqanta kasukusunchu niña chay qharqochikojwan masichakuspa? Kasukusun chayqa, congregación llimphu kananpaj yanapakusunchej. Chantá ichapis chay hermanota yanapasun, pesachikuspa Jehovamanta perdonta mañakunanpaj.

15. ¿Imaynatá yanapakusunman congregacionpi allin kausay kananpaj?

¹⁵ Corinto congregacionpi waj chʼampay kallarqataj. Hermanospura juezkunaman apanakusharqanku. Chayrayku Pablo nerqa: “Imaraykutaj mana chʼinllamanta pacienciakunkichejchu, sajrata ruwasojtiykichej?”, nispa (1 Cor. 6:1-8). Kay tiempopi wakin hermanosqa, congregacionmanta hermanoswan negociosta ruwanku. Chay negocio mana allin rejtintaj, ashkha qolqeta pierdeykunku chayri hermanos engañasqankuta yuyanku. Wakintaj juezkama chayanku. Chayta rikuspa, runasqa Jehovamanta, llajtanmantawan sajrata parlankuman. Congregaciontapis tʼaqanachinman. Bibliatajrí niwanchej hermanosninchejwan allinta kausakunata, qolqeta pierdenanchej kajtinpis. ^[2] Jesusqa yachachiwarqanchej imaynatachus chʼampaykunata, phiñanakuykunata ima allinchanata (Mateo  5:23, 24; 18:15-17 leey). Jesuspa yuyaychasqanta kasukuspaqa, congregacionpi ujchasqa, allintataj kausakunapaj yanapakusun.

16. ¿Imaraykú Diospa kamachisnin uj sonqolla kanku?

¹⁶ Biblia nin: “May jina sumajpuni wawqepura uj sonqolla kʼachata kawsanankoqa”, nispa (Sal. 133:1). Jehovata kasukojtinku, israelitasqa ujchasqa karqanku, allintataj kausakorqanku. Diosqa kamachisninmanta nerqa: “Tantaykusaj, imaynatachus ovejasta tropaman tantaykunchej, ajinata”, nispa (Miq. 2:12). Jehová nillarqataj, paypa kamachisnenqa cheqa kajta yachakunankuta, ujchasqataj yupaychanankuta. Pay nerqa: “Chay pʼunchay chayamojtin, llimphuchasaj tukuy runaspa parlayninkuta, tukuyninku noqaj sutiyta oqharispa Diosninkupaj rejsikapunawankupaj, tukuy runastaj noqata uj sonqolla sirvinawankupaj”, nispa (Sof. 3:9). Jehovaman may agradecesqa kashanchej, payta ujchasqa yupaychasqanchejmanta.

17. ¿Imatá ancianos ruwananku tiyan uj hermano juchallikojtin?

¹⁷ Uj hermano juchallikojtin, ancianosqa chay rato munakuywan cheqanchananku tiyan. Jehovaqa munan, ancianos hermanosta sajra kajmanta jarkʼanankuta, congregaciontapis ujchasqata, llimphutataj japʼinankuta (Pro. 15:3). Pabloqa Corintomanta hermanosta munakusqanrayku, paykunata cheqanchananpaj ñaupaj kaj cartanta qhelqarqa. Ancianosqa Pabloj nisqanta chay rato kasukorqanku. Chayta yachanchej, iskay kaj cartanpi allinta ruwasqankuta nisqanrayku. Chaytataj pisi tiemponman qhelqarqa. “Pipis juchaman urman chayqa”, ancianosqa allin ñanman munakuywan kutirichinanku tiyan (Gál. 6:1).

18. 1) ¿Imaynatá Diospa Palabran yanaparqa ñaupa cristianosta? 2) ¿Imatá qhepan yachaqanapi yachakusun?

¹⁸ Ñaupa cristianosqa, Diospa Palabranta kasukojtinku ujchasqas, juchamanta tʼaqasqa, allintataj kausakorqanku (1 Cor. 1:10; Efe. 4:11-13; 1 Ped. 3:8). Chayraykutaj sumaj willaykunata “tukuy kay pachapi kajkunaman willa[rqanku]” (Col. 1:23). Kunanpis Diospa llajtanqa ujchasqa kashan, allinta kausakushan. Chayrayku sumaj willaykuna tukuynejpi willakushan. Diospa kamachisnenqa Tukuyta Kamachej Jehovata jatunchayta munanku, Palabrantapis kasukuyta. Chaytataj qhepan yachaqanapi yachakusunchej (Sal. 71:15, 16).