1. Jehová Diosman takiy, ¿imapajtaj yanapawasunchej?

UJ KUTI, takiykunata qhelqaj runa, ajinata nerqa: “Pillapis imata niwajtinchejqa, mana sonqonchejta kuyurichillanmanchu. Takiykunatajrí sonqonchejta kuyurichinman”, nispa. Jehová Diosman takispataj, payta alabanchej, astawantaj payta munakunchej, qayllaykunchejtaj. Chaykunata yachaytaj reparachiwanchej Jehová Diosman tukuy sonqo takina kasqanta. Chantapis sapallanchej chayri hermanoswan takispaqa, Jehová Diosta yupaychanchej.

2, 3. 1) ¿Imaraykutaj wakin hermanos congregacionpi takiyta pʼenqakunkuman? 2) ¿Imastataj qhepan parrafospi yachakusunchej?

² Wakin lugarespi qharisqa, pʼenqakunku runaspa ñaupaqenkupi takiyta. Chayrayku ichá wakin hermanospis, congregacionpi takiyta pʼenqakullankumantaj. Sichus congregacionmanta ancianos jatunmanta takiyta pʼenqakunkuman chayqa chayri takina horaspipuni imatapis ruwaj churakunkuman chayqa, congregacionmanta hermanosqa, manaña tukuy sonqochu Jehová Diosman takinkuman (Sal. 30:12).

³ Jehová Diosman takispaqa payta jatunchanchej. Chayrayku  tantakuypi takishaspaqa, ama waj imasta ruwanachu. Qhepan parrafospitaj, yachakusunchej imaynatachus mana manchachikuspa Jehová Diosman takinata, imaynatatajchus tukuy sonqo takinatapis.

4, 5. Israelitas Davidpa tiemponpi jinallataj Salomonpa tiemponpipis, ¿Jehová Diosman takejchu kanku?

⁴ Unay tiempomantapacha Diospa kamachisnenqa takispa Diosta alabarqanku. Israelitasqa Jehová Diosta yupaychanankupaj takejpuni kanku. Rey Davidmanta parlarina. Payqa Diospa templon ruwakunanpaj tukuy imata wakichishajtin, 4.000 levitasta churarqa, Jehová “Diosta yupaychanankupaj tocanasninkuwan”. ‘Takinasmanta sumajta yachajkunataj’, 288 karqanku (1 Cró. 23:5; 25:7).

⁵ Salomón templota Jehová Diosman jaywapushajtinpis, mayta takillarqankutaj. Bibliaqa nin: ‘Chaypacha cornetasta waqachej tukuyninku churakorqanku, tukuyninkutaj uj kunkalla takerqanku Jehová Diosta yupaychaspa, graciasta qospataj. Cornetasta, platillosta, waj tocanastapis chʼajwarichispa, takisharqanku. Chay jinata takishajtinkutaj, Tata Diospa jatun kaynenqa temploman juntʼaykorqa’, nispa. Israelitas chayta rikuspa, maytachá kallpachakorqanku (2 Cró. 5:13, 14; 7:6).

6. Nehemías Jerusalén perqata ruwachishajtin, ¿imapajtaj levitasta wakichisqa?

⁶ Nehemías Jerusalén llajtata gobernashajtin, Jerusalenpa perqasninta watejmanta ruwacherqa. Chantapis levitasta wakicherqa Jehová Diosman takinankupaj, platillosta, arpasta, lirastawan tocarispa. “Jerusalén perqata Diosman jaywapuna” pʼunchay chayamojtintaj, levitasqa kusiywan tocarqanku takerqankutaj. Chay kutipi Nehemiasqa takejkunata iskay qotusman tʼaqarqa. Chay ujnin kaj qotoqa perqa patanta rerqa pañaman, chay iskay kaj qotutaj lloqʼeman. Chaymantataj iskaynin qotus takejkunaqa, Diospa templonman chayamorqanku. Chaypacha Jerusalenpi kusikusqankoqa karumantapacha uyarikorqa (Neh. 12:27-29, 31, 38, 40, 43). Jehová Diospis chay día maytachá kusikullarqataj, kamachisninta tukuy sonqo takejta uyarispa.

7. ¿Imatataj Jesús yachachisqasninwan ruwasqanku?

⁷ Wañupunanpaj uj chʼisillaña faltashajtin Jesusqa yachachisqasninwan Cenarqa. Chantá Jesusqa, yachachisqasninwan Jehová Diosman alabanzasta takerqanku. Reparanchej jina, Jesuspa tiemponpipis Jehová Diosta takispa alabajpuni kanku (Mateo 26:30 leey).

8. Ñaupa tiempomanta cristianos, ¿imaynatataj Jehová Diosman takej kanku?

⁸ Ñaupa tiempomanta cristianosqa Jehová Diosta takispa yupaychajpuni kanku. Paykuna mana israelitas jinachu templopi tantakojtinkupis, wasisninkupi tukuy sonqo takej kanku. Chayraykuchá apóstol Pablo cristianosman nerqa: “Purajmanta yachachinakuychej, kallpachanakuychejtaj: salmoswan, Diosta alabanapaj takiykunawan, yupaychanapaj kʼacha takiykunawan ima. Tukuy sonqotaj Jehová Diosman takiychej”, nispa (Col. 3:16). Chayrayku noqanchejpis, Jehová Diosman tukuy sonqo takinanchej tiyan. Ajinata takinapajtaj, Jehová Diosqa “allin kamachi” yuyayniyojnejta, uj takina librota qowarqanchej,  tiemponpi mikhunata jina (Mat. 24:45).

9. 1) ¿Imaraykutaj runaspa ñaupaqenpi takiyta manchachikusunman? 2) ¿Imaynatataj Jehová Diosman takinanchej kashan? 3) ¿Pikunataj puntapi kananku kashan takishajtinchej? (3 paginapi fotota qhawariy).

⁹ Ichá runaspa ñaupaqenpi takiyta manchachikusunman, lugarninchejmanta runas takiyman mana yachasqa kasqankurayku. Chayri familianchej ukhupi takiyman mana yachasqa kasqanchejrayku. Chayri radiopi, telepi sumaj takejkunata uyariytawan, ichapis chʼaja gallo jina takisqanchejta reparaspa mayta pʼenqakusunman. Jinapis tukuyninchej Jehová Diosta jatunchanapaj takinanchejpuni tiyan. Jehová Diosman takinapajqa, takina libronchejta altota oqharina, jatunmanta, tukuy sonqotaj takina (Esd. 3:11; Salmo 147:1 leey). Kay tiempopi ashkha tantakuna wasisqa telesniyoj kanku. Chaypitaj takinapaj letrasta churakun. Chaytaj yanapawanchej tukuyninchej uj kunkalla takinapaj. Chantapis tantakuykunapi takishajtinchej, ancianosqa puntapi kananku tiyan. Imajtinchus ancianostaqa, Ñaupajman Apajkunapaj Escuelapi jatunmanta takinankuta ninku.

10. ¿Imapitaj allin kanman piensarinanchej jatunmanta takinallapajpuni?

¹⁰ Ichapis mana kʼachituta takisqanchejta yuyasqanchejrayku, jatunmanta takiyta pʼenqakusunman. Jinapis ama jatunmanta takiyta pʼenqakunachu. Imaynatachus parlashaspa ‘ashkha kutista pantajtinchejpis’, parlallanchejpuni. Ajinallatataj mana kʼachituta takejtinchejpis, jatunmanta takinallapuni (Sant. 3:2). Chantapis jatunmanta takispaqa, Jehová Diosta jatunchanchej.

11, 12. Jehová Diosman jatunmanta takinapaj, ¿imatataj ruwasunman?

 ¹¹ Ichapis jatunmanta takiyta manchachikullasunmantaj, mana takiyta yachasqanchejrayku. Jinapis qhepan parrafospi yachakusunchej imaynatachus sumajta takinanchejta. *

¹² Sumajta samasunchej chayqa, jatunmanta sumajta takisunchej. Imaynatachus corriente focota kʼanchananpaj yanapan, ajinallatataj aireta sumajta samayqa, jatunmanta takinapaj yanapawasun. Bibliaqa niwanchej: ‘Jehová Diosman kusiywan kʼachituta tocarispa takiychej’, nispa (Sal. 33:1-3). Chaypajqa imayna kallpawanchus parlanchej, ajina kallpallawantaj takina, chayri aswan kallpawan (astawan yachakunaykipajqa, “Control del volumen de aire” nisqata leeriy, kay Benefíciese de la Escuela del Ministerio Teocrático, nisqa libropi, 181-184 paginaspi).

13. ¿Imaynatá mana manchachikuspa takisunman?

¹³ Mana manchachikuspa takinaykipajqa, allin kanman familiaykiwan Diosta yupaychashajtiyki, mayta gustasusqan takiyta ajllanayki. Chantá chay takiypa letrasninta mana manchachikuspa, jatunmanta, kallpawantaj leeriwaj. Chaymantaqa chay takiypa ujnin partenta, kallpawan ujllapi leerispa wasaykuchiwaj. Chantá chay parteta imayna kallpawanchus leerqanki, ajina kallpallawantaj takiriwaj (Isa. 24:14). Arí, takishaspaqa mana manchachikunachu, nitaj pʼenqakunachu.

14. 1) ¿Imatataj ruwasunman kallpawan takinapaj? (“ Jatunmanta takinapaj”, nisqata leeriy). 2)  Mana llanitullata takinapaj, ¿ima yuyaychaykunataj Benefíciese nisqa libropi kasqa?

¹⁴ Kallpawan takinapajqa, siminchejta jatunta kicharinanchej tiyan. Llanitullata takisqanchejta reparajtinchejtaj, allin kanman leerinanchej, “Cómo superar problemas específicos”, nisqata. Chaytaqa tarisunman Benefíciese de la Escuela del Ministerio Teocrático, nisqa libropi, 184 paginapi.

15. 1) Hermanonchej Stephen Lett, ¿ima libro ruwakusqantataj nisqa? 2) ¿Imaraykutaj takina libro allinchakusqa?

¹⁵ Kay 2016 watapi, uj sumaj tantakuy ruwakorqa. Chaypitaj hermanonchej Stephen Lett nerqa, “Jehová Diosman tukuy sonqo takinachej” nisqa libro ruwakusqanta. Hermanonchej Stephenqa, Diospa Llajtanta Kamachejkunamanta ujnin. Pay nerqa, Diospa Palabran nisqa Biblia allinchakusqanrayku, “Jehová Diosman tukuy sonqo takinachej” nisqa libro ruwakusqanta. Nillarqataj chay takinapaj libroqa, mosoj Bibliaman jina chʼuwanchakusqanta. Chantapis chay takina libroman iskay takiykunastawan yapakusqanta nerqa. Ujnenqa predicacionmanta parlan, ujnintaj Jehová Dios noqanchejrayku wawanta qosqanmanta parlan. Chantapis chay takina librota Jehová Diosta jatunchanapaj apaykachasqanchejrayku, Diospa Llajtanta Kamachejkunaqa, sumaj materialmanta ruwakunanta nerqanku. Chayrayku chay mosoj takina libroj tapanqa color plomo.

16, 17. 1) Mosoj takina libro, ¿imayna ruwasqataj kashan? 2) ¿Imapajtaj mosoj takina libro allinchakusqa?

¹⁶ Kay mosoj libroj qallariyninpeqa uj lista tiyan. Chaytaj sapa takiy imamantachus parlakusqanman jina sukʼasqa kashan. Chay listaqa discursantesta mayta yanapan discursonkuman jina, uj takiyta ajllanankupaj. Wakin takiykunamanta parlarina. Ñaupaj kaj takiymanta, 12 takiykamaqa Jehová Diosmanta parlashan. Jesusmanta, kausayninta qosqanmantawantaj 13 takiymanta, 20 takiykama parlashan.

¹⁷ Kay takina libro allinchakorqa, aswan chʼuwita kananpaj, entiendekunanpaj jinataj. Ajinamanta tukuy sonqo takinanchejpaj. Uj takiymanta parlarina. “Sonqoykita waqaychay” nisqa takeyqa, “Sonqonchejta jarkʼana” nisqaman allinchakorqa. ¿Imaraykutaj kay takiy allinchakorqa? Imaraykuchus reciellanraj tantakuykunaman jamojkunata pʼenqachej, jinallataj jovenesta, hermanastapis. Imajtinchus paykunaqa chay takiyta takishajtinku, wajkunata kamachishankumanpis jina karqa.

18. Jehová Diosman takiy, ¿imaspajtaj yanapawasun?

¹⁸ “Jehová Diosman tukuy sonqo takinachej” libromanta wakin takiykunaqa, Dioswan sonqomantapacha parlarikunapaj yanapawanchej. Wakin takiykunatajrí, yanapawanchej hermanospura ‘astawan munanakunapaj, allin ruwaykunatataj ruwananchejpaj’ (Heb. 10:24). Chayrayku kay mosoj takiykunaj musicanta sumajta umanchejpi japʼina, letrasnintapis yachakuna. Chaypajqa grabasqa takiykunata uyarisunman. Chay grabacionestaqa Internetpi jw.org nisqapi tarisunman. Takiykunata wasinchejpi sumajta amañasunchej chayqa, tantakuykunapi tukuy sonqo, mana manchikuspataj takirisunchej. *

19. ¿Imatataj ruwasunman Jehová Diosta jatunchanapaj?

¹⁹ Jehová Diosta jatunchanapajqa tukuy sonqo takina. Jehová Diosta munakusqanchejqa, payman tukuy sonqo takisqanchejpi yachakun (Isaías 12:5 leey). Tukuy sonqo, kallpawantaj takirejtinchejqa, hermanospis tukuy sonqollataj takiriyta munanqanku. Arí, tukuyninchej Jehová Diosta jatunchayta atinchej takispa. Chantapis Bibliaqa niwanchej: ‘Jehová Diosman takiychej’, nispa (Sal. 96:1). Chayrayku amapuni manchachikunachu, Jehová Diosman tukuy sonqo takiyta.