1, 2. 1) ¿Ima tʼinkatataj ajllasqa cristianos suyakushanku? 2) Waj ovejasmanta kajkuna, ¿ima tʼinkatataj suyakushanku? 3) ¿Imapitaj tʼukurinanchej kanman mana waj imaspi musphaykachanapaj? (Patapi kaj dibujota qhawariy).

UJ KUTI apóstol Pablo, jinata nerqa: ‘Mayta kallpachakushani tʼinkata japʼinaypaj. Chay tʼinkataj cielopi kausay’, nispa. Kay tiempopipis ajllasqa cristianosqa, Pablo jinallataj cielopi kausakuyta suyakushanku (Fili. 3:14). Ajllasqa cristianosqa, mayta suyashanku Cristowan kamachimuyta. Runastataj yanapayta cheqan runasman tukunankupaj (Apo. 20:6). Waj ovejasmanta kajkunatajrí, mosoj jallpʼata suyakushanku. Chaypi wiñaypaj kausakunankupaj (2 Ped. 3:13).

² Chantapis apóstol Pabloqa, ajllasqa cristianosman jinata yuyaycharerqa: “Yuyayniykichejqa cielopi kaj imasllapipuni kachun”, nispa. Chayta yuyaycharqa, premionkuta japʼinankupaj, Diosta sirvinallankupajpunitaj (Col. 3:2). Chayrayku ajllasqa cristianosqa, mana waj imaspi musphashanankuchu karqa (Col. 1:4, 5). Arí, cielopi kausakuyta suyakunallapajpuni, chayri mosoj jallpʼapi  kausakuyta suyakunallapajpuni, ama waj imaspi musphaykachanachu. Astawanqa ima tʼinkatachus Jehová Dios qonawanchejpi tʼukurina (1 Cor. 9:24).

3. Apóstol Pablo, ¿imatataj Colosasmanta cristianosman nisqa?

³ Chantapis apóstol Pabloqa, Colosasmanta cristianosman, jinata nerqa: “Ama piwanpis japʼinaykichej kashan chay tʼinkata qhechuchikuychejchu”, nispa. Chayta nerqa, hermanos nichikojkunawan ama engañachikunankupaj. Imaraykuchus chay jina runasqa, Diospa kamachisqasninta juntʼajman rijchʼakoj kanku. Manataj Jesuspi creejchu kanku (Col. 2:16-18). Chantá Pablo Colosasmanta cristianosman nillarqataj, imatachus ruwanankuta millay imasta munapayaywan mana atipachikunankupaj. Jinallataj congregación ukhupi, familia ukhupipis chʼajwasta mana rikhurichinankupaj. Ajinamanta tʼinkankuta japʼinankupaj. Kunantaj astawan yachakuna, imatachus Pablo chay cristianosman yuyaychasqanmanta.

4. ¿Millay imasta munapayay Jehová Diosmanta karunchawasunmanchu?

⁴ Apóstol Pablo Colosasmanta cristianosman jatun tʼinkata japʼinankuta yuyarichiytawan, jinata nerqa: “Wañuchiychej qankunapi kaj sajra imasta. Ama kaykunapi urmanaykichejpaj: khuchichakuy juchapi, millay imasta ruwaypi, qʼoñirisqa kaypi, sajra kajta moqʼeypi, jinallataj munapayaypipis”, nispa (Col. 3:5). Millay imasta munapayayqa, Jehová Diosmanta karunchawasunman. Suyakusqanchej tʼinkatapis pierdesunman. Uj hermanomanta parlarina. Payqa sajra imasta munapayasqanrayku congregacionmanta karunchakusqa. Kutinpuspataj, jinata nerqa: “Pisimanta pisi millay sajra imasta astawan munapayasqayrayku, mana yuyayniyman churakuyta atillarqanichu”, nispa.

5. ¿Imatataj ruwananchej kasqa millay imasta ruwaypi mana urmanapaj?

⁵ Khuchichakuy juchapi chayri millay imasta munapayaypi mana urmanapajqa, allinta qhawarikunanchej tiyan. Casarakunankupaj rejsinakojkunaqa, qallariymantapacha parlarikunanku tiyan, mana muchʼanakushanankupaj, nitaj ojllanakushanankupaj. Jinallataj mana iskaynitullanku purishanankupaj (Pro. 22:3). Millay imasta ruwanapaj tanqasqa kallasunmantaj, trabajorayku karuman viajajtinchej. Chantapis uj hermano khuchichakuy juchapi urmallanmantaj, uj warmiwan trabajajtin. Jinallataj uj hermanapis, uj qhariwan trabajajtin (Pro. 2:10-12, 16). Ajinapi rikukuspaqa, qallariymantapacha Jehovaj testigosnin jina rejsichikunanchej tiyan. Nitaj coqueteananchejchu tiyan. Chantapis phutisqa kashajtinchej chayri sapayakojtinchej, allinta qhawarikunallanchejtaj tiyan. Imaraykuchus sapayakuspaqa sajra munayninchejwan atipachikusunman. Chantá pillapis waturikuwajtinchej ichá sonqonchejpi yuyasunman pay qhawakushawasqanchejta. Ajinapi rikukuspaqa, khuchichakuy juchapi mana urmanapaj, Jehová Diospa yanapayninta mañakuna, hermanospa yanapaynintapis maskʼana (Salmo 34:18; Proverbios 13:20 leey).

6. ¿Ima videollatapis qhawanallachu kasqa?

⁶ Noqanchejpi kaj sajra imasta wañuchinapajqa, ama millay imasta qhawanachu. Kay tiempopeqa, may chhika videospi, videojuegospi, waj imaspipis manchay millay khuchichakuy imaslla tiyan. Chay millay imasqa, “Sodoma, Gomorra llajtaspi” runaspa ruwasqankuman rijchʼakun (Jud. 7). Chay jina videosta ruwajkunaqa, khuchichakuyta mana juchata jinachu rikuchinku. Chayrayku noqanchejqa, mana ima videollatapis qhawananchejchu tiyan. Imajtinchus chay millay imasta qhawaspaqa, Diosmanta karunchakusunman, niñataj tʼinkanchejta japʼisunmanchu (Pro. 4:23).

7. ¿Imataj wakin kutis congregación ukhupi kanman?

⁷ Diospa llajtanpi kasqanchejmanta, may kusisqa kashanchej. Imaraykuchus hermanosqa yanapawanchej ima tʼinkatachá suyakushanchej, chayta japʼinapaj. Diospa Palabranmanta tantakuykunapi yachakuypis, yanapallawanchejtaj tʼinkanchejta japʼinapaj. Jinapis ichá wakin kutis, congregación ukhupi pi hermanollawanpis phiñanarpakusunman. Chay hermanowan mana allinyakojtinchejtaj, ichapis manchay phiñasqallapuni kasunman (1 Pedro 3:8, 9 leey).

8, 9. 1) ¿Imaswantaj pʼachawan jina pʼachallikunanchej kasqa tʼinkata japʼinapaj? 2) Wajkuna sonqonchejta nanachiwajtinchej, ¿imatataj allin kanman yuyarikunanchej?

⁸ Phiñakuywan atipachikusunchej chayqa, tʼinkanchejta mana japʼiyta atisunchu. Chayrayku apóstol Pablo, jinata nerqa: “Qankunaqa Diospa ajllasqasnin kankichej, paypaj tʼaqasqas, may munasqastaj. Chayrayku kay imaswan pʼachawan jina pʼachallikuychej: khuyakuywan, munakuywan, kʼacha kaywan, kʼumuykukoj sonqo kaywan, llampʼu sonqoyoj kaywan, pacienciawan ima. Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej. Chantapis munakuywan pʼachawan jina pʼachallikuychej. Imaraykuchus munakoyqa, runasta sumajta ujchan”, nispa (Col. 3:12-14).

⁹ Hermanosta tukuy sonqo munakusunchej chayqa, perdonayta atillasunchej. Wajkuna sonqonchejta nanachiwajtinchejqa, allin kanman yuyarikunanchej, mashkha kutistachus noqanchejpis waj runaspa sonqonkuta nanachisqanchejta. Chay kutipi perdonanawanchejta munasqanchejtapis. Chayta yuyarikuspaqa, perdonayta atillasunchej (Eclesiastés 7:21, 22 leey). Tukuyninchej Jesusman may agradecesqas kashanchej, uj sonqolla kananchejpaj yanapawasqanchejmanta (Col. 3:15). Arí, tukuyninchej Jehová Diosllata yupaychanchej, tukuyninchejtaj Diospa Gobiernonmanta willamunchej. Jinallataj tukuyninchej casi kikin llakiykunapi rikukunchej. Chayrayku tukuyninchej perdonanakojtinchejqa, congregación aswan ujchasqa kanqa. Ajinamanta, hermanoswan phiñanakushanamantaqa, tʼinkanchejta japʼinanchejpi yuyasunchej.

10, 11. 1) ¿Envidiakuy allinchu kasqa? 2) Sonqonchejpi envidiakuy mana saphichakunanpaj, ¿imatataj ruwananchej kanman?

¹⁰ Hermanosninchejmanta envidiakusunchej chayqa, Dios qonawanchej kashan chay premiota mana japʼisunchu. Bibliataj wakin runas envidiakusqankumanta parlan. Chaykunamanta ujnenqa Caín karqa. Payqa envidiakusqanrayku hermanon Abelta wañucherqa. Corewan Datanwan Abiramwantaj envidiakusqankurayku, Moisespa contranpi oqharikorqanku. Rey Saulpis, envidiakusqanrayku Davidta wañuchinanpaj qhatiykacharqa. Reparanchej jina, envidiakoyqa manapuni allinchu. Chayrayku Biblia nin: “Maypichá envidiakuykuna, churanakuykuna ima kan chayqa, chaypi kallantaj chʼajwas, imaymana sajra kajtaj”, nispa (Sant. 3:16).

¹¹ Hermanosta tukuy sonqo munakusunchej, khuyakusunchejtaj chayqa, mana envidianakusunchu. Diospa Palabran nin: “Munakuyniyoj runaqa pacienciayoj, kʼachataj. Munakuyniyoj runaqa mana envidiakunchu”, nispa (1 Cor. 13:4). Sonqonchejpi envidiakuy mana saphichakunanpajqa, Jehová Dios jina hermanosta munakunanchej tiyan. Imaraykuchus congregacionmanta hermanosninchejwanqa, uj cuerpo jinalla kanchej. Bibliataj niwanchej: “Sitajchus ujnin allinpaj qhawasqa chayqa, tukuyninku chay ujwan khuska kusikunku”, nispa (1 Cor. 12:16-18, 26). Mayqen hermanollapis Diospa llajtanpi astawan ruwanasta japʼejtenqa, ama  envidiakunachu. Astawanqa paywan kusikuna. Rey Saulpa wawan Jonatán jina ruwanapajtaj kallpachakuna. Jonatanqa mana envidiakorqachu, cuentanmanta David rey jina churasqa kananta nejtinku. Astawanqa Davidta kallpacharqa, yanaparqataj munakusqanrayku (1 Sam. 23:16-18).

12. Familia ukhupi allinta kausakunapaj, ¿imatataj apóstol Pablo nisqa?

¹² Familia ukhupi Bibliaj yuyaychaykunasninman jina kausakojtinchejqa, allin riwasunchej, kusisqataj kasunchej. Chaytaj yanapawasun Jehová Dios qonawanchej kashan, chay premiota japʼinapaj. Chayrayku apóstol Pabloqa familia ukhupi allinta kausakunapaj, jinata nerqa: “Casarasqa warmis, qosaykichejman kʼumuykukoj sonqo kaychej. Imaraykuchus chaymin allin Señorpi kajkunapajqa. Qosas, warmiykichejta munakullaychejpuni, amataj paykunapaj sinchʼita phiñakuychejchu. Wawas, tataykichejta mamaykichejtawan tukuy imapi kasuychej. Imaraykuchus chayqa, Señorta mayta kusichin. Tatas, ama wawasniykichejta phiñachiychejchu, ama llakisqalla kanankupaj”, nispa (Col. 3:18-21).

13. Mana testigo qosayoj hermanas, ¿imatataj ruwankuman qosanku Diosta sirviyta qallarinankupaj?

¹³ Wakin hermanaspa qosankoqa, mana Jehovaj testigonchu kanku. Ajinapi tarikoj hermanataqa, ichá qosan mana respetanmanchu. Chayrayku  ichá qosanwan discutiyta qallarinman, respetananta munaspa. Discutispataj ichá qosanta atipanman. Jinapis ichá chaynejta qosanqa, mana Jehovaj testigonman tukunmanchu. Chayrayku hermanasqa, qosankuman kʼumuykukoj sonqo kananku tiyan. Ajinamantataj Jehová Diosta kusichenqanku, familia ukhupipis kusisqa kausakonqanku, nitaj chʼajwaspis kanqachu. Qosan warminpa llimphu kausayninta rikuspa, Jehová Diosta sirviyta qallarinman. Ajinamanta hermanaqa qosanwan sumaj kausayta japʼiyta atenqa (1 Pedro 3:1, 2 leey).

14. ¿Imatataj uj qosa ruwanman warmin mana respetajtin?

¹⁴ Wakin hermanospa señorankoqa, mana Jehovaj testigonchu kanku. Ichapis ajinapi tarikoj hermanotaqa, warmin mana respetanmanchu. Jinapis hermanoqa warmin respetananpaj, mana qhaparqachananchu tiyan. Imaraykuchus Jehová Diosqa, qosas Jesús jina kʼachas kanankuta munan (Efe. 5:23). Jesusqa Diospa llajtanta munakuywan, pacienciakuspataj ñaupajman pusan (Luc. 9:46-48). Uj casarasqa hermano warminwan kʼacha kajtenqa, warmin Diosta sirviyta qallarinman.

15. ¿Imaynataj warminta munakoj qosa?

¹⁵ Jehová Diosqa, qosasman jinata nin: “Qosas, warmiykichejta munakullaychejpuni, amataj paykunapaj sinchʼita phiñakuychejchu”, nispa (Col. 3:19). Munakuyniyoj qosaqa, warminta sumajpaj qhawan. Imata ruwananpajpis warminwan parlarin, sumajtataj uyarin (1 Ped. 3:7). Qosa wakin imasta mana warminpa nisqanman jinapunichu ruwajtinpis, warminta uyarejtenqa, imata ruwajtinpis allin renqa (Pro. 15:22). Uj warmeqa qonsanta respetayta atillanqa, qosan paywan kʼacha kajtin, munakojtin ima. Arí, uj qosa warminta jinallataj wawasnintapis munakojtenqa, familia ukhupi Jehová Diosta kusisqa sirvenqanku. Premionkutapis kusisqa suyakullanqankupuni.

16, 17. ¿Imata ruwanankupajtaj jóvenes kallpachakunanku kasqa?

¹⁶ Jovenesmantañataj parlarina. Joven, ichá yuyanki tatasniyki anchata kʼamisusqankuta, chayri ñawillankupi purichisusqankuta. Chayrayku ichapis mayta phiñakuwaj. Diosmantataj karunchakuyta munawaj. Jinapis Jehová Diosmanta karunchakojtiykeqa, mana allinchu risonqa. Imajtinchus reparanki runas mayta chejnikususqankuta, tatasniykiwan hermanosllawantaj mayta munakususqankuta.

¹⁷ Joven, tatasniykeqa munakususqankurayku jasutʼisunku. Manachus munakusunkuman chayqa, mana jasutʼisunkumanchu (Heb. 12:8). Tatasniykeqa ichapis mana munasqaykiman jinapunichu jasutʼisonqanku. Jinapis kallpachakuy reparanaykipaj, imajtinpunichus jasutʼisusqankuta. Amataj usqhayta phiñarparikuychu. Imajtinchus Bibliaqa, jinata nin: ‘Yuyayniyoj runaqa mana usqhayta phiñarparikunchu’, nispa (Pro. 17:27). Joven, ama uña wawita jina imallamantapis phiñakuychu. Astawanqa tatasniykej kʼamisusqanta uyariy, amataj pisipaj qhawaychu (Pro. 1:8). Chantapis amapuni qonqaychu tatasniyki Jehovaj testigosnin kasqankoqa, uj sumaj bendición kasqanta. Tatasniykeqa munanku, uj sumaj kausayta tʼinkata jina japʼinaykita.

18. Tʼinkanchejta japʼinapaj, ¿imatataj ruwananchej kasqa?

¹⁸ Jehová Diosqa sumaj tʼinkata qonawanchejta niwarqanchej. Paytaj nisqanta juntʼanpuni. Wakenqa suyakushanchej cielopi tiyakuyta. Wakintaj suyakushanchej mosoj jallpʼapi wiñaypaj tiyakuyta. Bibliataj niwanchej: “Tukuy jallpʼaqa Tata Diosta rejsiywan juntʼa kanqa”, nispa (Isa. 11:9). Tumpamantawanqa tukuyninchej Jehová Diosta sumajta rejsisunchej. Chayrayku kallpachakunallapuni Jehová Dios tʼinkata qonawanchejpaj. Amataj waj imaspi musphaykachashanachu.