1, 2. 1) ¿Imataj llakiykunasninchejta aguantanapaj yanapawanchej? 2) ¿Imatá kay yachaqanapi yachakusun?

ICHAPIS sinchʼita onqoykusqanchejrayku chayri familianchejmanta pillapis wañupusqanrayku, uj jatun llakiypi karqanchej. Chay llakiy pasasqantawan, ichá nerqanchej: “Sapallaymantaqa mana chay llakiyta aguantaymanchu karqa”, nispa. Chay jina llakiykunataqa, Jehová Dios ‘may sumaj atiyninta’ qowasqanchejraykulla aguantarqanchej (2 Cor. 4:7-9).

² Diospa atiyninta necesitallanchejtaj, kay sajra mundoj yuyayninwan mana chimpachikunapaj (1 Juan 5:19). “Cielopi kaj supaykunawan” maqanakunapajpis, yanapata necesitallanchejtaj (Efe. 6:12). ¿Imataj yanapawasunman? Diospa atiynin. Kay yachaqanapeqa, Diospa atiynin iskaynejmanta yanapawasqanchejta yachakusun. Yachakullasuntaj Diospa atiyninwan sumajta yanapachikunapaj, imastachus ruwananchejta.

3. ¿Imaynatá Diospa atiynin yanapawanchej?

³ Diospa atiynenqa, llakiykuna kajtinpis ruwanasninchejta juntʼanapaj kallpachawanchej. Apóstol Pabloqa ima llakiypi rikukuspapis, ‘Cristoj atiynin’ yanapasqanrayku Jehová Diosta sirvillarqapuni (2 Cor. 12:9). Misionero jina iskay kaj viajenpi, payqa mana Diosmanta willanallanpajchu kallpachakorqa, manaqa gastosninpaj trabajananpajpis. Pabloqa Corinto llajtapi kashaspa, uj qhariwarmej wasinkupi qhepakorqa. Paykunaqa Aquilawan Priscilawan karqanku, toldosta ruwaspataj llankʼaj kanku. Pablopis kikin oficioyoj kasqanrayku, paykunawan casi semanantinta trabajaj (Hech. 18:1-4). Diospa atiynenqa apóstol Pablota mayta yanaparqa trabajananpaj, Diosmanta willananpajpis.

4. Apóstol Pablo “aychaypi khishkayoj jina kani” nispa, ¿imatá niyta munasharqa?

 ⁴ (2 Corintios 12:7 khuskanninmantapacha 9 versiculokama leey). Apóstol Pablo “aychaypi khishkayoj jina kani” nispa, ¿imamantá parlasharqa? Khishka yaykuwajtinchejqa, mayta nanachiwanchej. Chayrayku Pabloqa ‘aychaypi khishkayoj kani’ nispa, uj problemayoj chayri uj llakiyniyoj kasqanmantachá parlasharqa. Pay nerqa chay llakeyqa “Satanaspa angelnin jina” kasqanta, ñakʼarichishasqantataj (chayri Bibliaj sutʼinchayninman jina, ‘maqashasqanta’). Ichapis mana Satanaschu, nitaj sajra angelesninchu chay llakiyta Pablopaj rikhuricherqanku. Jinapis paykunaqa chay llakiymanta valekuspa, Pablota astawan ñakʼaricherqanku, nisunman chay “khishkawan” astawan tʼojsiykorqanku. Qhepan parrafopi, imatachus Pablo ruwasqanta yachakusun.

5. ¿Jehová Dios Pabloj mañakuyninta uyarerqachu?

⁵ Apóstol Pabloqa “khishka” jina kaj llakiynin chinkananta munarqa. Pay nerqa: ‘Kinsa kutita Señor Jehová Diosmanta mañakorqani, chay khishkata orqhonawanta’, nispa. Jehová Diosta mayta rogakojtinpis, llakiynenqa mana chinkarqachu. ¿Chay ninayarqachu Jehová Dios Pabloj mañakuyninta mana uyarisqanta? Mana. Payqa mañakuyninta uyarerqapuni. Llakiyninta mana chinkachejtinpis, aguantananpaj kallpata qorqa. Jehová Dios Pabloman nerqa: “Atiyneyqa pisi kallpayoj kasqaykipi astawan rikuchikun”, nispa (2 Cor. 12:8, 9). Pabloqa Jehová Dios yanapasqanrayku, kusisqallapuni, sonqo tiyasqataj karqa (Fili. 4:4-7).

6. 1) ¿Imaynatá Jehová Dios mañakuyninchejman kutichiwasunman? 2) Kay parrafopi rikhurisqan textos, ¿kallpachawasunmanchu?

⁶ Pablo jina, noqanchejpis ichá Jehová Diosta mayta rogakorqanchej ima llakiyninchejtapis chinkachinanta. Jinapis llakiyninchejqa mana chinkarqachu chayri astawan yapakorqa. Chayrayku ichá yuyarqanchej Jehová Dios niña allinpajchu qhawawasqanchejta. Ajina kajtin, apóstol Pablomanta yuyarikuna. Jehová Diosqa payman jinallataj mañakuyninchejman kutichiyta atiwanchej. Llakiyninchejta mana chinkachejtinpis, aguantanapaj atiyninwan yanapawasun (Sal. 61:3, 4). Ichapis llakiykunaqa urmachiwasunman. Jinapis Jehová Diosqa ni jaykʼaj saqerpariwasunchu (2 Cor. 4:8, 9; Fili. 4:13).

7, 8. 1) ¿Imaraykutaj Diospa atiynin wayrawan kikinchakun? 2) ¿Imaynatá apóstol Pedro Diospa atiyninpa yanapayninta sutʼincharqa?

⁷ ¿Imaynatá Diospa atiynin yanapallawanchejtaj? Diospa atiynintaqa wayrawan kikinchasunman. Barcota purichejkunaqa, may ladomanchus riyta munasqankuman jina wayrawan yanapachikunku. Sumajta yanapachikuspaqa, loco paras kajtinpis maymanchus chayanankuman chayanku. Diospa atiynenqa ajinallatataj yanapawanchej, llakiykuna kajtinpis payta sirvinallapajpuni. Ajinamanta paraisoman chayananchejpaj.

⁸ Apóstol Pedroqa pescador kasqanrayku, imaynatachus barcota purichiyta sumajta yacharqa. Chayraykuchá payqa imaynatachus Diospa atiynin yanapawasqanchejta sutʼinchananpaj, barcota purichejkuna oqharisqanku palabrata oqharerqa. Pay nerqa: “Diospa willasqanqa mana runaj munayninmantachu jamorqa. Astawanqa runas, Diospa atiyninwan yuyaychasqa kaspa paymanta parlarqanku”, nispa. Kay versículo griego parlaypi qhelqakushajtin, “yuyaychasqa” ninapaj “pusachikuy” chayri “apachikuy” palabrata oqharikorqa (2 Ped. 1:21).

9. Apóstol Pedro “pusachikuy” nispa, ¿imapi yuyananchejtataj munarqa?

⁹ Apóstol Pedro “pusachikuy” nispa, ¿imapi  yuyananchejtataj munarqa? Lucasqa chayman rijchʼakoj palabrallatataj Hechos libropi oqharerqa. Chaypeqa uj barco wayrawan apachikusqanmanta parlarqa (Hech. 27:15). Bibliamanta yachaj runa nerqa: “Pedroqa Bibliata qhelqajkuna Diospa atiyninwan ‘pusachikusqankuta’ nispa, imaynatachus barco purisqanpi piensananchejta munarqa”, nispa. ¿Imatá apóstol Pedro niyta munasharqa? Diospa atiynin Bibliata qhelqajkunata yanapasqanta, imaynatachus wayra uj barcota maymanpis chayananpaj yanapan, ajinata. Chay runa nillarqataj: “Profetasqa barco purichinanku carpata kicharerqanku wayrata japʼinankupaj”, nispa. Jehová Diosqa “wayrachimorqa”, nisunman Bibliata qhelqajkunaman atiyninta qorqa. Paykunataj chay atiywan yanapachikuspa llankʼayninkuta juntʼarqanku.

10, 11. ¿Ima iskay imastataj ruwana tiyan Diospa atiyninwan yanapachikunapaj? Uj kikinchaywan sutʼinchay.

¹⁰ Jehová Diosqa manaña kay tiempopi atiyninwan Bibliata qhelqachishanchu. Jinapis payqa kamachisninta atiyninwan ñaupajman pusashallanpuni. Arí, Jehová Diosqa yanapashallawanchejpuni. Diospa atiyninwan sumajta yanapachikunapajqa, mana jinallachu kananchej tiyan. ¿Imatá chaypaj ruwasunman?

¹¹ Barcota purichej imatachus ruwasqanpi tʼukurina. Payqa wayrawan yanapachikunanpaj, iskay imasta ruwanan tiyan. Ñaupajtaqa maypichus wayrashan chayman barcota apanan tiyan. Qocha kantullapi barcota sayachenqa chayqa, mana maymanpis riyta atenqachu. Chantá barco purichina carpasta kacharinan tiyan, wayra chay barcota tanqananpaj. Ajinallataj noqanchejwanpis. Jehová Diosta sirvinallapajpuneqa, paypa atiyninwan yanapachikunanchej tiyan. Chaypajtaj iskay imasta ruwana tiyan. Ñaupajtaqa “maypichus wayrashan chayman” rinanchej tiyan, nisunman ima ruwaykunachus Diospa atiyninta japʼinapaj yanapawanchej, chaykunata ruwananchej tiyan. Chantá “barco purichina carpasta” kacharinanchej tiyan, nisunman Diospa atiyninta japʼinapaj ruwaykunata, tukuy atisqanchejta ruwananchej  tiyan (Sal. 119:32). Chay iskay imasta ruwasun chayqa, Jehová Diospa atiynenqa payta sirvinallapajpuni yanapawasun. Chantá runas churanakuwajtinchejpis chayri ima llakiy kajtinpis, paraisoman chayasun.

12. ¿Imatá qhepan parrafospi yachakusun?

¹² Kaykama yachakunchej, Diospa atiynin iskaynejmanta yanapawasqanchejta. Ñaupajtaqa kallpachawanchej ima llakiypipis chayri ima pruebapipis sinchʼita sayanapaj. Chantapis Jehová Diospa atiynenqa, payta sirvinallapajpuni yanapawanchej. Ajinamanta wiñay kausayta japʼinanchejpaj. Qhepan parrafospitaj, Diospa atiyninwan sumajta yanapachikunapaj imastachus ruwananchejta yachakusun. Chaypajtaj tawa imasmanta parlarisun.

13. 1) 2 Timoteo 3:16, 17 nisqanman jina, ¿imaynatá Biblia yanapawasunman? 2) Diospa atiyninwan sumajta yanapachikunapaj, ¿imatataj ruwananchej tiyan?

¹³ Ñaupaj kaj, Bibliata estudiana (2 Timoteo 3:16, 17 leey). “Yuyaychasqan” palabraqa, griego parlaypi niyta munan “Diospa phukusqan” chayri “Diospa churaykusqan”. Jehová Diosqa Bibliata qhelqajkunaman atiyninwan “phukuykorqa”, nisunman imatachus qhelqanankuta paykunaj yuyayninkuman churaykorqa. Bibliata leejtinchej, chaypitaj tʼukurejtinchej, Diospa nisqasnenqa yuyayninchejman, sonqonchejmanwan yaykun. Chaytaj Diospa munayninman jina kausakunapaj tanqawasun (Heb. 4:12). Diospa atiyninwan sumajta yanapachikunapajqa, Bibliata sapa kuti estudianapaj, yachakusqanchejpi tʼukurinapaj ima tiempochakuna. Ajinamanta Diospa Palabran nisqanman jinapuni parlasun, ruwasuntaj.

14. 1) ¿Imaraykutaj reunionespi Jehová Diospa atiynin “wayra jina” kashasqanta ninchej? 2) ¿Imatá ruwasunman tantakuykunapi Diospa atiyninwan sumajta yanapachikunapaj?

¹⁴ Iskay kaj, Diosta hermanosninchejwan khuska yupaychana (Sal. 22:22). Reunionespeqa Jehová Diospa atiynin “wayra jina” kashan (Apo. 2:29). ¿Imaraykú chayta ninchej? Imaraykuchus hermanosninchejwan khuska Diosta yupaychanapaj tantakuspaqa, Diospa atiyninta mañakunchej. Chantapis Bibliamanta orqhosqa takiykunata takinchej. Yachachimuwanchej chay hermanostaj, Diospa atiyninpa yanapayninwan churasqa kanku. Diospa atiynenqa hermanasta yanapallantaj, asignacionesninkuta wakichinankupaj, chayman jinataj plataformapi rikuchinankupaj. Diospa atiyninwan sumajta yanapachikunapajqa, comentanapaj sumaj wakichisqa rinanchej tiyan. Ajinamanta “barco purichina carpata kicharisunmanpis” jina kanqa.

15. ¿Imatá ruwananchej tiyan Diospa atiyninwan sumajta yanapachikunapaj?

¹⁵ Kinsa kaj, predicaj llojsina. Predicashaspa, runasman yachachishaspapis Bibliata leerinchej. Ajinamantataj Diospa atiynin yanapanawanchejta saqeshanchej (Rom. 15:18, 19). Jinapis Diospa atiyninwan sumajta yanapachikunapajqa, tukuy atisqanchejta predicaj llojsinanchej tiyan, atikusqanman jinataj runaspaj Bibliata leeripunanchej tiyan. Runaswan sumajta parlarinapajqa, Cristiano Kausayninchej folletopi yuyaychakusqanman jina predicasunman.

16. ¿Imaynatá Diospa atiyninta aswan usqhayta japʼisunman?

¹⁶ Tawa kaj, Jehová Diosmanta mañakuna (Mat. 7:7-11; Luc. 11:13). Jehová Diospa atiynintaqa paymanta mañakuspa aswan usqhayta japʼisunman. Mañakuyninchej Jehová Diosman chayananta chayri atiyninwan yanapanawanchejtaqa, ni carcelpis, ni Satanaspis jarkʼayta atinmanchu (Sant. 1:17). ¿Imaynatá orakusunman Diospa atiyninwan sumajta yanapachikunapaj? Kay tapuyman  kutichinapajqa, Lucas librollapi rikhurej kikinchaymanta yachakusun. *

17. Lucas 11:5-9, 13 versiculospi Jesuspa kikinchaynin, ¿imatataj yachachiwanchej?

¹⁷ (Lucas 11:5-9, 13 leey). Jesuspa kikinchaynenqa, imaynatachus Diospa atiyninta mañakunata yachachiwanchej. Chay kikinchaymanta runaqa, “anchata mañakusqanraykulla” tʼantata qorichikorqa. Chay runaqa chaupi tutaña kajtinpis, amigonmanta imatachus necesitasqanta mana manchachikuspa mañakorqa (Luc. 11:8). * ¿Imatá Jesús chay kikinchaywan orakuymanta yachachisharqa? Pay nerqa: “Mañakullaychejpuni qosonqachejtaj, maskʼallaychejpuni tarinkichejtaj, punkutapis takallaychejpuni kicharisonqachejtaj”, nispa. Jesuspa nisqanqa yachachiwanchej, Diospa atiyninta japʼinapajqa mana saykʼuspa Diosmanta mañakuna kasqanta.

18. ¿Imaraykú nisunman Jehová Dios atiyninta qonawanchejtapuni?

¹⁸ Jesuspa kikinchaynenqa, yanapallawanchejtaj imaraykuchus Jehová Dios atiyninta qonawanchejta entiendenapaj. Jesuspa kikinchayninmanta runaqa, amigon chaupi tutataña chayajtinpis payta sumajta atiendeyta munarqa. Payqa mikhunanpaj imallatapis jaywariyta munarqa. Jinapis ni iman kaporqachu. Jesús nisqanman jina, chay runaqa vecinonmanta anchatapuni mañakusqanraykulla tʼantata qorichikorqa. ¿Imatataj Jesús chaywan yachachiwanchej? Tatanchej Jehovaqa kutin kutita mañakojtinchej atiyninta qonawanchejtapuni. Payqa mana Jesuspa kikinchayninmanta vecino jinallachu yanapawasun, manaqa astawanraj. Chayrayku mana iskayrayaspa Jehová Diosmanta atiyninta mañakuna, paytaj qowasunpuni (Sal. 10:17; 66:19).

19. ¿Imaraykutaj nisunman Satanás mana atipanawanchejta?

¹⁹ Satanasqa churanakullawasunpuni, jinapis mana atipawasunchu. ¿Imaraykú chayta ninchej? Imaraykuchus Diospa atiynenqa iskaynejmanta yanapawanchej. Ñaupajtaqa llakiykunata chayri pruebasta aguantanapaj yanapawanchej. Chantá Diosta sirvinallapajpuni kallpachawanchej, ajinamanta paraisoman chayananchejpaj. Chayrayku Diospa atiyninwan sumajta yanapachikuna.