1. ¿Imatataj Jehová Dios ajllajta saqewanchej?

JEHOVÁ DIOSQA kausayninchejpi imatachus ruwanata ajllajta saqewanchej. Payqa imatapis allinta ajllanapaj yachachiwanchej. Chay ajllasqanchej paypa munayninman jina kajtintaj, allin rinawanchejpaj yanapawanchej (Sal. 119:173). Diospa Palabranpi nisqanta kasukusun chayqa, imastachus ruwananchejta sumajta ajllasun (Heb. 5:14).

2. Imatachus ruwanata ajllaytawan, ¿imatá mana ruwayta atillasunmanchu?

² Imatachus ruwananchejta sumajta ajllaspapis, ichá mana juntʼayta atillanchejchu. Wakin hermanosmanta parlarina. Uj joven hermanoqa tukuynin Bibliata leenanta nin. Jinapis uj mashkha semanasta leeytawan saqepun. Waj hermanataj precursora regular kananta nin, pero ni jaykʼaj qallarinchu. Uj congregacionmanta ancianos uj yuyaylla ninku, hermanosta kallpachanankupaj visitarinankuta. Jinapis killas pasan, manataj ni mayqen hermanotapis visitankurajchu. Tukuynin chay hermanos imatachus ruwanankuta ninkuña. Jinapis ni mayqenninku juntʼankuchu. Ñaupa tiempopi Corinto llajtamanta cristianosqa, chayman rijchʼakoj problemayoj karqanku. Qhepan parrafospi paykunamanta yachakusun.

3. ¿Imatá Corintomanta hermanos nerqanku, juntʼarqankutajchu?

³ Kay 55 wata chaynejta, Corinto llajtamanta hermanosqa Jerusalenmanta Judeamantawan hermanos, manchay llakiypi kashasqankuta uyarerqanku. Chayrayku waj congregaciones jinallataj, paykunapis chay hermanosta yanapanankupaj qolqeta tantanankuta nerqanku. Paykunaqa chayta ruwayta munarqanku manchay kʼachas, munakuyniyojtaj kasqankurayku. Chayrayku apóstol Pablota tapurerqanku imaynatachus qolqeta tantanankuta. Pablotajrí imaynatachus chayta ruwanankuta kamacherqa, paykunata yanapananpajtaj Titota kacharqa (1 Cor. 16:1; 2 Cor. 8:6). Jinapis killasninman jina, Pabloqa uyarisqa Corintomanta hermanos ni imata tantasqankuta. Kutinanpajtaj  ichá mana wakichisqachu kankuman karqa. Apóstol Pablotaj yanapankuta mana apanmanchu karqa. Imaraykuchus congregacionespa yanapankutaqa pay Jerusalenman apanan karqa (2 Cor. 9:4, 5).

4. Kay 2 Corintios 8:7, 10, 11 nisqanman jina, ¿imatataj Pablo Corintomanta hermanosta ruwanankuta nerqa?

⁴ Corintomanta hermanosqa, uj sumaj imata ruwayta munarqanku. Apóstol Pablotaj kʼachas kasqankumanta nerqa: ‘Sumajta ruwashankichej, creeyniykichejpis sinchʼi’, nispa. Jinapis paykunaman nillarqataj: “Ruwayta qallarisqaykichejta tukuchaychej”, nispa (2 Corintios 8:7, 10, 11 leey). ¿Imatá chaymanta yachakusunman? Diosta tukuy sonqo yupaychaj cristianospis, imatachus ruwayta munasqankuta mana juntʼayta atillasqankuta.

5. ¿Ima tapuykunamantaj kay yachaqanapi kutichisun?

⁵ Corintomanta hermanos jina, ichá noqanchejpis imatachus ruwayta munasqanchejta mana juntʼayta atillanchejchu. Pantaj runas kasqanchejrayku, imatapis qhepapaj saqeyman yachasqa kanchej. Chayrí mana suyashajtillanchej imapis kajtin, ruwayta munasqanchejta manallataj juntʼayta atinchejchu (Ecl. 9:12; Rom. 7:18). Chayrayku kay yachaqanapi kay tapuykunaman kutichisun: ¿Imataj yanapawasunman imatachus ruwananchejta sumajta ajllanapaj, chayri chay ajllasqanchejta qhawaykunapaj? ¿Imastaj yanapawasunman ruwayta qallarisqanchejta tukuchanapaj?

6. ¿Imaraykutaj imatachus ruwayta munasqanchejta ichá cambiananchej kanqa?

⁶ Kausayninchejpeqa wakin imasta mana cambiayta atisunmanchu. Casarakushaspa chayri Jehová Diosman qokushaspa imatachus nisqanchejtaqa, juntʼanapuni tiyan (Mat. 16:24; 19:6). Jinapis ichá wakin kuteqa, kausayninchej niña kikinchu kanqa. Chayraykutaj imatachus ruwayta munasqanchejta cambiananchej kanqa. Qhepan parrafospi yachakusun imaschus yanapanawanchejta.

7. ¿Imatataj Diosmanta mañakuna tiyan?

⁷ Diosmanta yachayta mañakuna. Jehová Diosqa Santiagoman yuyaycharqa jinata qhelqananpaj: “Sichus qankunamanta pillapis pisi yachayniyoj chayqa, Diosmanta mañakullachunpuni. Diostaj yachayta payman qonqa. Imaraykuchus Diosqa tukuyman mana michʼakuspa qon” (Sant. 1:5). Tukuyninchej imallapipis “pisi yachayniyoj” kanchej. Chayrayku kausayninchejpi imata ajllanapajpis, chayri chay ajllasqanchejta cambianapajpis Jehová Diospa yanapayninta mañakuna. Paytajrí sumajta ajllanapaj yanapawasun.

8. ¿Imastá ruwana tiyan niraj imatapis ruwashaspa?

⁸ Allintaraj yachana. Imatapis ruwanapajqa Diospa Palabranta, publicacionesta ima leerina. Chantapis pipichus atienekunchej chayta yuyaycharinawanchejta nina (Pro. 20:18). Waj trabajota maskʼaypi chayri waj lugarman ripuypi piensashanchej chayqa, tukuy chay imasta ruwanapuni tiyan. Ajinallatataj ruwananchej tiyan, Diosta sirvinallapajpuni ima oficioyojchus kaypi tʼukurishanchej chayqa.

9. ¿Imaraykutaj chʼuwa sonqowanpuni imatapis ruwananchej tiyan?

⁹ Ima yuyaywanchus ruwayta munasqanchejta qhawarikuna. Jehová Diosqa ima yuyaywanchus imatapis ruwasqanchejta sumajta qhawan (Pro. 16:2). Payqa imatapis chʼuwa sonqowan ruwananchejta munan. Chayrayku ima yuyaywanchus imatapis ruwayta munasqanchejta qhawarikuna, amataj wajkunatapis engañanachu. Mana chʼuwa sonqowanchu imatapis ruwasun chayqa, ichapis mana juntʼayta atisunchu. Uj joven, precursor regularta orqhosqanpi piensarina. Payqa uj mashkha killasta predicaytawan mana horasninta juntʼanchu, niñataj kusisqachu predican. Ichá  payqa yuyarqa, Jehová Diosta kusichiyta munasqanrayku precursor kasqanta. Jinapis ichá tatasninta chayri wajkunata kusichiyta munasqanraykulla precursor karqa.

10. ¿Imataj yanapawasunman kausayninchejta cambianapaj?

¹⁰ Kaypiñataj tʼukurina. Bibliamanta yachakoj runa niña cigarrota pitananta nin. Uj iskay semanasta jina mana pitaytawan watejmanta pitaj churakullantaj. Jinapis Jehová Diosta munakusqanrayku, payta kusichiyta munasqanrayku ima, cigarro pitayta qonqapun (Col. 1:10; 3:23).

11. ¿Imaraykutaj imatachus ruwayta munasqanchejta sutʼita yachananchej tiyan?

¹¹ Imatachus ruwayta munasqanchejta sutʼita yachana. Chayta yachayqa imatachus nisqanchejta juntʼanapaj yanapawasun. Ichapis Bibliata sapa día leenanchejta ninchej. Jinapis mashkhatachus, ima ratotajchus leenanchejta mana yachanchejchu chayqa, ichá mana leesunchu. * Kaypiñataj tʼukurina: Uj congregacionmanta ancianos ninku, hermanosta kallpachanankupaj visitarinankuta. Jinapis killas pasan, manataj ni mayqen hermanotapis visitankurajchu. ¿Imatá ruwankuman nisqankuta juntʼanankupaj? Uj listapi anotankuman mayqen hermanostachus visitarinankuta. Chantá maykʼajchus paykunata visitarej rinankupaj fechata churakunkuman.

12. ¿Imatataj wakin kutis ruwananchej kanqa?

¹² Atisqallanchejta ruwana. Ni mayqenninchejpis tukuy ima munasqanchejta ruwayta atisunmanchu. Imaraykuchus tiemponchej, kallpanchej, kapuyninchejpis mana tukuypatachu kikin. Chayrayku imastachus ruwayta atisqanchejta reparakuna, atisqallanchejtataj ruwana. Ichapis imatachus ruwayta munasqanchejta cambiananchej kanqa (Ecl. 3:6). Chayta cambianchejña chay, ¿imatá ruwasunman juntʼanapaj? Qhepan parrafospi phishqa yuyaychaykunata qhawarisun.

13. ¿Imatataj ruwasunman imatachus nisqanchejta ruwanapaj?

¹³ Diosmanta kallpata mañakuna. Jehová Diosqa imatachus nisqanchejta ‘ruwayta atinanchejpaj’ kallpata qowasunman (Fili. 2:13). Chayrayku ruwaj churakunapaj Jehová Diosmanta atiyninta mañakuna. Mana chay rato uyariwajtinchejpis mañakunallapuni. Jesús nerqa: Diospa atiyninta “mañakullaychejpuni qosonqachejtaj”, nispa (Luc. 11:9, 13).

14. ¿Imaynatá Proverbios 21:5 yanapawanchej imatachus ruwayta munasqanchejta juntʼanapaj?

¹⁴ Allinta yuyaycharikuna (Proverbios 21:5 leey). Imata ruwanallapajpis, imaynatachus chayta ruwananchejta yuyaycharikunchej. Chantataj chayman jina ruwanchej. Ajinallataj imatachus ruwayta munasqanchejwanpis. Imatachus ruwananchejta niytawanqa, imaynatachus chayta juntʼananchejta yuyaycharikuna. Mana atinapaj jina ruwanasninchejta pisimanta pisi ruwasun chayqa, juntʼayta atillasun. Apóstol Pablopis Corintomanta hermanosman nerqa: “Sapa semanaj ñaupaj kaj pʼunchayninpi, sapa ujniykichej tʼaqaychej mashkhallatapis kapuyniykichejman jina. Ajinamanta chayamojtiy, amaña tantanaykichejpaj”, nispa (1 Cor. 16:2). Ruwanasninchejta pisimanta pisi ruwasun chayqa, mana yuyasunchu mana juntʼay atina kasqanta.

15. Ruwanasninchejta juntʼanapaj, ¿imatá ruwasunman?

¹⁵ Ruwanasninchejta imaynatachus juntʼananchejta anotakusun chayqa, ruwayta atillasun (1 Cor. 14:40). Ancianospaj uj kamachiymanta parlarina. Ancianospaj libronkupi nisqanman jina, tantakushajtinku paykunamanta  ujninku anotanan tiyan imastachus ruwayta munasqankuta, pichus chayta ruwananta, mashkha tiempopichus tukunantapis. Chay kamachiyta kasukoj ancianosqa, imastachus ruwayta munasqankuta juntʼayta atillanku (1 Cor. 9:26). Noqanchejpis paykuna jinallataj ruwasunman. Sapa día imastachus ruwananchej kashan chayta uj listapi churakuna, mayqentarajchus ruwananchejtataj ñaupajman churana. Ajinamanta imastachus ruwayta munasqanchejta tukuchasun, astawan imastataj pisi tiempollapi ruwasun.

16. Romanos 12:11 nisqanman jina, ¿imatataj ruwananchej tiyan ruwanasninchejta juntʼanapaj?

¹⁶ Kallpachakuna. Yuyaychakusqanchejman jina ruwanapaj, chayta tukunapajpis kallpachakuna (Romanos 12:11 leey). Apóstol Pabloqa Timoteoman nerqa, sumaj yachachej kananpaj mana saykʼuspa kallpachakunallantapuni. Noqanchejpis Diospaj astawan llankʼayta munanchej chayqa, Pabloj yuyaychasqanman jina ruwasunman (1 Tim. 4:13, 16).

17. ¿Imaynatataj Efesios 5:15, 16 ruwanasninchejta juntʼanapaj yanapawasunman?

¹⁷ Ama tiemponchejta usuchinachu (Efesios 5:15, 16 leey). Imatachus ruwayta munasqanchejtaqa maykʼajchus qallarinanchejta yachana. Chay diataj ruwayta qallarina. Ruwanasninchejta qallarinapaj tukuy ima allillan kananta suyasun chayqa, ni jaykʼaj qallarisunchu (Ecl. 11:4). Tiemponchejta, kallpanchejtapis ama qhasi manakaj imaspi usuchinachu. Ajinamanta imastachus ruwananchejpuni kasqanta ruwallasun (Fili. 1:10). Atikojtenqa ima ratochus ni pi pantachiwasunmanchu chay horasta tʼaqana. Wajkunamanpis chay horasta ama pantachinawanchejta nina. Chantapis celularninchejta apagasunman, Internetpi kaj imastapis mana qhawasunmanchu. *

18, 19. Imatachus ruwananchejta sumajta ajllaytawan, ¿imapitaj piensasunman?

¹⁸ Bendicionespi piensana. Ruwayta tukojtinchej ima bendicioneschus kanantaqa, uj lugarman chayaywan kikinchasunman. Chay lugarman chayanapajqa ichapis mayusta pasananchej kanqa chayri qaqas chayninta rinanchej kanqa. Jinapis chayananchejrayku chay jarkʼaykunata atipanchej. Ajinallataj imastachus ruwayta munasqanchejwanpis. Ruwayta tukojtinchej ima bendicioneschus kananpi piensasun chayqa, ima jarkʼay kajtinpis ruwayta munasqanchejta juntʼasunpuni (Gál. 6:9). 

¹⁹ Imastachus ruwananchejtaqa mana sumajta ajllayta atillanchejchu, nitaj juntʼaytapis atillanchejchu. Jinapis Jehová Diosqa ruwayta qallarisqanchejta tukunapaj, yachayta, kallpatawan qowasunman.