1, 2. Kay 1 Pedro 4:7, 8 nisqanman jina, ¿imataj yanapawasun llakiykunata aguantanapaj?

‘QHEPA pʼunchaykunaj’ tukukuyninman qayllaykusqanchejman jina, ichapis astawan llakiykunapi rikukusun (2 Tim. 3:1). Africaj ujnin suyunpi votaciones pasasqantawan, chay suyupi manchay chʼajwas, maqanakuykuna ima karqa. Chay lugarmanta hermanosninchejtaj, sojta killasmanta astawan manchay llakiypi karqanku. ¿Imaynatá chay llakiy tiempota aguantarqanku? Wakin hermanosqa, chay chʼajwasmanta karitupi tiyakoj hermanospa wasinkuman riporqanku. Uj hermano nin: “Chaypachaqa mayta kusikorqani sumaj amigosniyoj kasqaymanta. Paykunawan purajmanta kallpachanakorqayku”, nispa.

² ‘Manchay ñakʼariy’ qallarejtin, sumaj amigosniyoj kasqanchejmanta kusikusunchej (Apo. 7:14). Chayrayku kunanmantapacha sumaj amigosniyoj kanapaj kallpachakuna (1 Pedro 4:7, 8 leey). Jeremiaspa kausayninmanta mayta yachakusunman. Jerusalén thuñisqa kanan qayllata, paytaqa amigosnin mayta yanaparqanku. * Qhepan parrafospi qhawarisun imaynatachus Jeremías jina ruwanata.

3. 1) ¿Imayna runas chaupipitaj Jeremías kausarqa? 2) ¿Imaynapitaj Jeremiaswan Barucwan sumaj amigosman tukorqanku?

³ Jeremiasqa Jehová Diosta wasanchaj runas chaupipi, 40 watasta jina kausakorqa. Chay runas ukhupi kasharqanku Anatotmanta llajtamasisnin, ichapis wakin familiaresnin ima (Jer. 11:21, 22; 12:6). Jinapis Jeremiasqa mana wajkunamanta karunchakorqachu. Astawanpis imaschus sonqonpi kasqanta qhelqerin Barucman willarerqa. Chay willarisqantaj Bibliapi qhelqasqa kashan (Jer. 8:21; 9:1; 20:14-18; 45:1-3). Barucqa  Jeremiaspa kausayninmanta qhelqashaspa, unayta Jeremiaswan khuska karqa. Chayrayku paykunaqa may sumaj amigosmanchá tukorqanku (Jer. 20:1, 2; 26:7-11).

4. 1) Jehová Dios, ¿imata ruwanantataj Jeremiasta nerqa? 2) ¿Imaynatá Jeremiasta Baructawan khuska llankʼasqanku yanaparqa?

⁴ Jeremiasqa mana manchachikuspa ashkha watasta israelitasman willarqa, Jerusalén thuñisqa kananta (Jer. 25:2, 3). Jehová Diosqa israelitas payman kutirikunankuta mayta munasqanrayku, Jeremiasman nerqa uj kʼuyuna libropi qhelqananta ñakʼariykunata apachinanta (Jer. 36:1-4). Jeremiasqa Jehová Diospa kamachisqanta juntʼananpaj, Barucwan khuska llankʼarqa. Chaytataj ashkha killaspichá tukorqanku. Khuska llankʼaspaqa sumajtachá parlarikorqanku, creeyninkupis maytachá sinchʼiyarqa.

5. ¿Imajtintaj nisunman Barucwan Jeremiaswan sumaj amigospuni kasqankuta?

⁵ Kʼuyuna librota qhelqayta tukusqankutawan, Jeremiasqa amigon Baructa kacharqa chay qhelqasqanta israelitaspaj leepunanpaj (Jer. 36:5, 6). Baructaj kausayninta wañuy pataman churaspapis, temploj pationman rerqa. Chaypitaj chay qhelqasqanta mana manchachikuspa “tukuy runaspa uyarinanta leeykorqa”. Jeremiasqa Barucpa ruwasqanmanta maytachá kusikorqa (Jer. 36:8-10). Reypa wasinpi kurajkunaqa, imatachus Baruc ruwasqanta yachaytawan paykunapajpis leeripunanta kamacherqanku (Jer. 36:14, 15). Chantá paykunaqa ninakorqanku: “Chay tukuy imastaqa reyman willananchej tiyan”, nispa. Chaymantataj Baructa khuyakusqankurayku nerqanku: “Qanwan, Jeremiaswan rispa pakakamuychej, amataj pipis yachachunchu maypichus kasqaykichejta”, nispa (Jer. 36:16-19).

6. Rey Joacim kʼuyuna librota ruphaykuchejtin, ¿imatataj Jeremiaswan Barucwan ruwarqanku?

⁶ Rey Joacimqa imatachus Jeremías qhelqachisqanta uyariytawan, mayta phiñakorqa,  chay kʼuyuna librotataj ruphaykucherqa. Chantá runasninta kamacherqa Jeremiasta, qhelqerin Baructawan presochanankuta. Jinapis Jeremiasqa mana mancharikorqachu. Astawanpis waj kʼuyuna librota japʼispa, qhelqerin Barucman jaywarqa. Chantá Jehová Diospa nisqasninta, watejmanta qhelqacherqa. Barucqa chaypi qhelqarqa, “rey Joacimpa ruphachisqan libropi qhelqasqa karqa, chay tukuyta” (Jer. 36:26-28, 32).

7. ¿Imaynatataj Jeremiastawan Baructawan khuska llankʼasqanku yanaparqa?

⁷ Uj llakiyta khuska aguantaj runasqa, aswan ujchasqa kanku, astawantaj munanakunku. Rey Joacim kʼuyuna librota ruphaykuchejtin, Jeremiasqa Barucwan waj kʼuyuna librota qhelqacherqa. Paykunaqa khuska llankʼaspa, aswan sumaj amigosmanchá tukorqanku. Chay iskay kasukoj runasmanta mayta yachakusunman.

8. 1) ¿Imaraykutaj mana sumaj amigosniyoj kayta atisunmanchu? 2) ¿Imajtintaj sumaj amigosta ruwakunanchejpuni tiyan?

⁸ Pillapis sonqonchejta nanachiwarqanchej chayqa, ichá niña pimanpis imachus sonqonchejpi kasqanta willariyta munanchejchu (Pro. 18:19, 24). Chayrí ichá ninchej: “Amigosta ruwakunaypajqa ni tiempoypis, ni ganasniypis kanchu”, nispa. Jinapis sumaj amigosta ruwakunanchejpuni tiyan. Llakiypi kashajtinchej hermanosninchej yanaparinawanchejta munanchej chayqa, paykunawan sumaj amigos kanapaj kallpachakunanchej tiyan. Chaypajtaj paykunaman imatachus yuyasqanchejta, imachus sonqonchejpi kasqantawan willarina (1 Ped. 1:22).

9. 1) ¿Imatá Jesús ruwarqa amigosninpi atienekusqanrayku? 2) Wajkunawan sumajta parlariy, ¿sumaj amigosniyoj kanapaj yanapawanchejchu? Hermana Cindymanta parlariy.

⁹ Jesusqa amigosninpi atienekusqanrayku, tukuy imata paykunaman willarej (Juan 15:15). Noqanchejpis Jesús jinallataj, hermanosninchejman willarisunman imachus kusichiwasqanchejta, llakichiwasqanchejta, phiñachiwasqanchejta ima. Paykuna imatapis willariwajtinchejtaj, sumajta uyarinanchej tiyan. Ichá paykunapis, noqanchej jinallataj kashanku chayri yuyashanku. Manachayrí Jehová Diospaj kikin imasllatataj ruwayta munanku. Hermananchej Cindymanta parlarina. Payqa 29 watasniyoj, Marie-Louise sutiyoj hermanawantaj amigasta ruwakorqa. Chay hermanaqa 60 watasniyoj. Paykunaqa sapa jueves paqarinta khuska predicanku. Chaypitaj tukuy imamanta parlarikunku. Cindy nin: “Amigasniywan sumajta parlariyta yachani. Ajinapi paykunata sumajta rejsini, entiendenitaj”, nispa. Amigosninchejwan sumajta parlarikojtinchejqa, aswan ujchasqa kanchej. Chayrayku hermananchej Cindy jina  ruwana. Sumaj amigosniyoj kayta munaspaqa, noqanchejraj paykunawan sumajta parlarinanchej tiyan (Pro. 27:9).

10. Proverbios 27:17 nisqanman jina, ¿yanapawanchejchu hermanosninchejwan khuska imatapis ruway?

¹⁰ Jeremiaswan Barucwanqa, khuska llankʼasqankurayku sumaj amigosman tukorqanku. Noqanchejpis hermanosninchejwan khuska imatapis ruwaspa, imaynachus kasqankuta yachaspa ima, paykunamanta yachakusun, aswan ujchasqastaj kasun (Proverbios 27:17 leey). Uj hermanowan predicashaspaqa, creeyninmanta tukuy sonqo parlasqanta rikunchej. Rikullanchejtaj Jehová Diosmanta, nisqasninmantapis mana iskayrayaspa parlasqanta. Chayta rikuspataj hermanonchejta astawan munakunchej.

11. Hermana Adelineta amiganwan khuska predicasqan, ¿imaynatá yanapasqa?

¹¹ Iskay experienciasmanta parlarina. Chaypitaj reparasun hermanosninchejwan predicay ujchawasqanchejta. Hermana Adelineqa 23 watasniyoj. Payqa amigan Candiceta nerqa, mana anchata predicakojchu chay lugarman yanapakoj rinankuta. Adeline nin: “Noqaykoqa aswan kusiywan, sonqo kʼajaywantaj predicayta munarqayku. Chantapis Jehovata sirvinallaykupajpuni kallpachasqa kayta necesitarqayku”, nispa. ¿Imaynatá paykunata yanaparqa khuska predicasqanku? Adeline nin: “Diantinta predicaytawan, amigaywan parlarikoj kayku imaynachus riwasqaykumanta. Parlarillajtaj kayku pikunachus sumajta uyariwasqaykumanta, imaynatachus Jehová Dios chay día yanapawasqaykumanta ima. Amigaywan parlariy mayta gustawaj, astawantaj rejsinakorqayku”, nispa.

12. Hermana Laïlatawan Mariannetawan khuska predicasqanku, ¿yanaparqachu?

¹² Hermananchej Laïlawan Mariannewanqa, Franciamanta kanku, solterastaj kanku. Paykunaqa 5 semanasta Bangui llajtaman predicaj riporqanku. Chay jatun llajtaqa República Centroafricanapi kashan. Laïla nin: “Mariannewan noqawanqa, mana allinta apanakuyta  atillarqaykuchu. Jinapis sumajta parlarinakusqaykurayku, sumaj amigasman tukorqayku. Marianneqa imamanpis chayri mayllamanpis yachaykukullaj, chay suyumanta runasta munakoj, kusiywantaj predicaj. Chayrayku payta astawan munakorqani”, nispa. Piwanpis sumaj amigosta ruwakunapajqa, mana waj suyumanpunichu rinanchej tiyan. Mayqen hermanollawanpis chayri hermanallawanpis predicaj llojsispaqa, payta sumajta rejsisunman, sumaj amigostaj kasunman.

13. ¿Imataj kanman hermanoswan khuska imatapis ruwajtinchej?

¹³ Hermanosninchejwan khuska imatapis ruwaspaqa, wakin kutis mana allin ruwasqallankutachu qhawanchej, manaqa pantasqasninkutapis. Ajinapi rikukojtinchej, Jeremiaspa kausaynin yanapawasunman. Payqa wajkunaj allin ruwasqasninkuta qhawarqa, pantasqasninkutataj perdonarqa. Qhepan parrafospi chaymanta yachakusun.

14. ¿Imatá Jeremías Jehová Diosmanta yacharqa, chanta imaynatataj chay yanaparqa?

¹⁴ Jeremiasqa sutinta apaj librota qhelqarqa. Chantapis ichá qhelqallarqataj Ñaupaj kaj Reyesta, Iskay kaj Reyestawan. Chay librosta qhelqashaspa, payqa sumajtachá repararqa Jehová Dios pantaj runasmanta khuyakusqanta. Jeremiasqa yacharqa, rey Achab juchasninmanta pesachikojtin, Jehová Dios payta khuyakusqanta. Chayraykutaj Achab kausashajtin mana familianta chinkacherqachu (1 Rey. 21:27-29). Jeremiasqa yachallarqataj, Manasés Achabmanta nisqa astawan juchallejtinpis, pesachikojtin Jehová Dios perdonasqanta (2 Rey. 21:16, 17; 2 Cró. 33:10-13). Jehová Diosmanta chay imasta yachakusqanqa, maytachá Jeremiasta yanaparqa amigosninwan pacienciakunanpaj, paykunata khuyakunanpaj ima (Sal. 103:8, 9).

15. ¿Imaynatataj Jeremías Baructa yanaparerqa?

¹⁵ Jeremiaspa amigon Barucqa, uj tiempota jatuchaj imasta maskʼarqa, Diostapis niña kusisqachu yupaycharqa. ¿Imatataj Jeremías ruwarqa? Jeremiasqa mana nerqachu: “Baructa yanapaspa tiempollayta usuchisaj”, nispa. Astawanpis payta yanaparerqa. Chaypajtaj imatachus Jehová Dios Barucman munakuywan, sutʼitataj nisqanta willarqa (Jer. 45:1-5). Qhepan parrafopi, imatachus chaymanta yachakusqanchejta qhawarisun.

16. Proverbios 17:9 nisqanman jina, ¿imatataj ruwananchej tiyan amigosninchejwan mana phiñanakunapaj?

¹⁶ Tukuypis pantaj runas kasqanchejrayku, hermanosninchejpis pantanqankupuni. Chayrayku congregacionpi amigosta ruwakuytawan, paykunawan mana phiñanakunapaj kallpachakuna tiyan. Uj amigonchej imallapipis pantan chayqa, ichapis kʼachallamanta, sutʼitataj Bibliawan yuyaycharinanchej kanqa (Sal. 141:5). Chay amigonchej sonqonchejta nanachiwanchej chaytaj, perdonananchej tiyan. Perdonaytawantaj chay pantasqanta niña yuyarichinachu tiyan, nitaj wajkunaman willaranachu tiyan (Proverbios 17:9 leey). Hermanosninchejpa pantasqasninkuta qhawanamantaqa, allin ruwasqasninkuta qhawana. Ajinamanta kay llakiy pʼunchaykunapi, paykunawan aswan ujchasqas kasunchej. Chaytataj ruwananchejpuni tiyan. Imajtinchus manchay ñakʼariy tiempopeqa, sumaj amigosta necesitasun.

17. ¿Imajtintaj nisunman Jeremías llakiy tiempopi uj sumaj amigo kasqanta?

¹⁷ Profeta Jeremiasqa, llakiy tiempopi uj sumaj amigopuni karqa. Imaynatachus amigon Ebed-melecta yanapasqanmanta parlarina. Ebed-melecqa reypa wasinpi kuraj kamachi karqa.  Payqa Jeremiasta tʼuruchasqa pujyupi wañunanmanta salvarqa. Jinapis Jeremiasta salvasqantawan, Ebed-melecqa reypa wasinpi kurajkunata manchachikorqa. Jeremiasqa chayta yachaytawan, mana jinallachu kakorqa. Nitaj nerqachu: “Salvakunanpaj imatapis ruwanqapunichá”, nispa. Carcelpi kashaspapis, Jeremiasqa Ebed-melecman Jehová Dios librananta willarqa. Ajinamanta payta kallpacharqa (Jer. 38:7-13; 39:15-18).

18. Proverbios 17:17 nisqanman jina, ¿imaynatá yanaparisunman llakiypi tarikoj hermanosta?

¹⁸ Kay tiempopi hermanosninchejqa, imaymana llakiykunapi rikukunku. Ashkha hermanosqa sufrinku para mana kasqanrayku, runas chʼajwasta rikhurichisqankurayku chayri waj llakiykunarayku. Chay jina llakiypi tarikoj hermanosninchejta, ichapis wasinchejman wajyarikusunman, chayri qolqesitunchejwan yanaparisunman. Tukuyninchejtaj Jehová Diosmanta paykunapaj mañapusunman. Uj hermanonchej llakisqa kashajtin, ichá mana yachanchejchu imatachus ninata chayri imatachus ruwayta. Jinapis tukuyninchej imaynallamantapis yanapayta atisunman. Ichá tiempocharikusunman paywan khuska karinapaj, payta sumajta uyarinapaj ima. Chantapis payman willarisunman, mayqen textochus noqanchejta sonqochawasqanchejta (Isa. 50:4). Astawanqa mayqen amigollanchejpis yanapata necesitajtin, paywan khuska kananchej tiyan (Proverbios 17:17 leey).

19. Kay tiempopi sumaj amigosta ruwakusqanchej, ¿imaynatataj aswan qhepaman yanapawasun?

¹⁹ Sumaj amigosniyoj kanapaj, paykunawantaj mana phiñanakunapaj kallpachakunanchej tiyan. ¿Imajtintaj chayta ruwananchej tiyan? Imajtinchus enemigosninchejqa, llullasta parlaspa tʼaqanachiyta munawasun. Paykunaqa tukuy imata ruwanqanku, hermanosninchejwan manaña yanapanakunanchejpaj, nitaj paykunapi atienekunanchejpaj. Jinapis chay ruwasqankoqa qhasilla kanqa. Enemigosninchejqa mana amigosninchejmanta tʼaqayta atiwasunchu. Astawanpis hermanosninchejwanqa, mana kay mundoj tukukuyninkamallachu amigos kasun, manaqa wiñay wiñaypaj.