1. ¿Imaspi piensaspataj manchachikusunman?

YACHANCHEJ llulla religión chinkachisqa kananta, Magogmanta Gog Diospa llajtanpa contranpi oqharikunanta, Armagedón guerra chamunanta ima. Chaykunapi piensarispataj ichá tumpata manchachikusunman. Jinapis chay llakiy tiempos chamojtin, ¿creeyninchej sinchʼillapunichu kanqa? Chay imaspi piensashanchej chayqa, Jesús kay yachaqanapaj textopi nisqanta estudiay mayta yanapawasunman. Jesusqa discipulosninman nerqa: “Ama sonqoykichej sinchʼita llakikuchunchu. Diospi creeychej”, nispa (Juan 14:1). Sinchʼi creeyniyoj kaspaqa, jamoj tiempopi llakiykunata mana manchachikusunchu.

2. ¿Imaynasmantá creeyninchejta astawan sinchʼiyachisunman, chanta imastá kay yachaqanapi yachakusun?

² Jamoj tiempopi llakiykunata aguantanapajqa, creeyninchejta sinchʼiyachina. Chaypajqa imaynatachus kay tiempopi llakiykunata aguantasqanchejpi piensarina. Ajinamanta yachasun imaspichus creeyninchejta astawan kallpachananchej kasqanta. Sapa kuti uj llakiyta atipajtinchejqa, creeyninchej astawan sinchʼiyan. Sinchʼi creeyniyoj kaspataj, jamoj tiempopi llakiykunata aguantallasun. Jesuspa discipulosninpis ñaupa tiempopi, tawa imaspi astawan creeyniyoj kayta necesitarqanku. Kay yachaqanapitaj chayta yachakusun. Yachakullasuntaj kay tiempopi kikin llakiykunapi kaspa imaynatachus aguantananchejta. Imaynatatajchus chay llakiykuna jamoj tiempopaj wakichiwasqanchejta.

3. Mateo 6:30, 33 versiculospi, ¿imatataj Jesús yachachiwarqanchej?

³ Tataqa wawasninman, señoranman ima mana faltachiyta munanchu mikhunata, ropata, wasita ima. Jinapis kay  tiempopeqa mana facilchu. Wakin hermanosqa mana trabajoyoj rikhurinku, mayta kallpachakuspapis mana waj trabajota tarikuyta atillankuchu. Ashkha hermanostaj mana cristianospaj jina kaj trabajostaqa mana japʼikunkuchu. Ajinapi rikukuspaqa mana iskayrayanachu necesitasqanchej imasta Jehová qonawanchejmanta. Jesusqa Orqopi Yachachishaspa discipulosninman chayta sutʼita yachacherqa (Mateo 6:30, 33 leey). Jehová mana saqerpanawanchejpi atienekuspaqa, payta tukuy sonqo sirvillasunpuni. Tukuy ima necesitasqanchejta Jehová qoshawasqanchejta reparaspaqa, astawan payman qayllaykusun, creeyninchejpis astawan sinchʼiyanqa.

4, 5. ¿Imataj uj familiata yanaparqa ni imayoj qhepakojtinku mana anchata llakikunankupaj?

⁴ Venezuelapi tiyakoj familia Castromanta parlarina. Paykunaqa kausakunankupaj jallpʼitankupi tarpukoj kanku, animalitostataj uywakoj kanku. Jinallapi pandilleros jallpʼankuman yaykuykuspa qhechusqanku, paykunatataj wijchʼusqanku. Chay jinapi rikukuspaqa sutʼita repararqanku Jehová ni imata faltachisqanta. Chay familiamanta tataqa Miguel sutikun. Paytaj nin: “Kunanqa uj juchʼuy jallpʼitapi tarpukusqaykuwan kausakuyku. Chay jallpʼataj mana noqaykojtachu. Sapa paqarin Jehovamanta mañakuni chay día ni imata faltachinawaykuta”, nispa. Familia Castroj kausaynenqa llakiylla. Jinapis paykunaqa mayta atienekunku Tatanchej Jehová sapa día necesitasqanku imasta qonanpi. Chayrayku reunionesman, predicacionmanpis mana faltakunkuchu. Paykunaqa Jehovata sirviyta kausayninkupi ñaupajman churanku. Jehovataj ni imata paykunaman faltachinchu.

⁵ Ajina llakiypi kashaspa hermano Miguelwan señoran Yuraiwanqa, sumajta repararqanku imaynasmantachus Jehová paykunata cuidasqanta. Wakin kutispi hermanosqa yanaparqanku necesitasqanku imaswan, hermano Migueltapis trabajitota tarikunanpaj yanapallarqankutaj. Waj kutispitaj sucursalmanta hermanos wakin imaswan paykunata yanaparqanku. Arí, Jehovaqa chay hermanosnejta paykunaman ni imata faltacherqachu. Ajinamanta paykunaj creeyninkoqa astawan sinchʼiyarqa. Kuraj warmi wawanku Yoselinqa, imaynatachus Jehová paykunata yanapasqanmanta parlaytawan, kayta nin: “Jehová imaynatachus yanapawasqaykuta rikuspaqa aswan kallpachasqa kani. Jehovaqa sumaj amigoy, yanapawanqapunitaj. Chantapis llakiykunapi rikukusqaykoqa, yanapawayku jamoj tiempopi sinchʼi llakiykunata aguantanaykupaj”, nispa.

6. ¿Imaynatá qolqemanta pisisqa kashaspapis creeyniykita astawan sinchʼiyachiwaj?

⁶ Qolqemanta pisisqa kashanki chayqa, llakisqachá kashanki. Ajina llakiypi kashaspaqa, creeyniykita astawan sinchʼiyachiwaj. Chantapis Jehovamanta mañakuy, Jesús imastachus Mateo 6:25-34 versiculospi nisqanta  leeriy, chaypitaj tʼukuriy. Jehovaqa kay tiempopi paypaj astawan llankʼajkunaman ni imata faltachinchu. Chaypi tʼukureyqa mayta yanapasunkiman (1 Cor. 15:58). Imaynatachus Jehová kay tiempopi hermanosta yanapasqanta reparaspaqa, qantapis kikillantataj yanapasunanpi atienekunki. Payqa yachan imatachus necesitasqaykita, chaytataj qosonqapuni. Jehová yanapasusqanta reparaspaqa, creeyniyki astawan yapakonqa, jamoj tiempopi sinchʼi llakiykunatataj aguantallanki (Hab. 3:17, 18).

7. Mateo 8:23-26 nisqanman jina, ¿imaynatá Jesuspa discipulosnin pisi creeyniyoj kasqankuta rikucherqanku?

⁷ Uj pacha Jesuswan discipulosninwan canoapi viajasharqanku. Jinallapitaj sinchʼi wayra oqharikorqa. Chay kutipi Jesusqa discipulosninman yachacherqa, aswan creeyniyoj kananku kasqanta (Mateo 8:23-26 leey). Yakoqa mayta qhollchoqeyaspa canoaman juntʼaykusharqa. Jesustaj puñusharqa, discipulosnintaj manchariywan rijchʼaricherqanku: “Señor, ¡salvawayku!”, nispa. Jesustaj paykunata nerqa: “Pisi creeyniyoj runas, ¿imaraykutaj kay jinatapuni manchachikunkichejri?”, nispa. Paykunaqa reparananku karqa, Jehová ima llakiymantapis Jesusta jarkʼayta atisqanta, jinallataj paywan kajkunatapis. ¿Imatá yachakunchej? Sinchʼi creeyniyoj kaspaqa, imaymana sinchʼi llakiykunatapis aguantayta atisqanchejta.

8, 9. ¿Ima llakiypitaj hermana Anel rikukorqa, chanta imataj payta yanaparqa?

⁸ Hermana Anelmanta parlarina. Payqa soltera, Puerto Ricopitaj tiyakun. Payqa uj jatun llakiypi rikukorqa, creeynintaj astawan sinchʼiyarqa. 2017 watapi uj sinchʼi wayra paypa wasinta urmaykucherqa, mana trabajoyojtaj rikhurerqa. Hermana Anel nin: “Chay jina llakiypi rikukuspaqa maytapuni phutikorqani. Chaypi repararqani Jehovaman mañakuynejta astawan qayllaykunay kasqanta. Kallpachakorqanitaj mana llakiyniywan atipachikunaypaj”, nispa.

⁹ Hermana Aneltaqa kasukuyta yachasqan sinchʼi llakiypi kashajtin yanapallarqataj. Pay nin: “Diospa llajtan kamachisqanta kasukusqayrayku, mana anchata llakikorqanichu. Hermanosqa mayta kallpachawarqanku, imastachus necesitasqaytapis qowarqanku. Chaypi repararqani Jehovaqa yuyasqaymantapis astawanraj yanapawasqanta. Ajinamantataj creeyneyqa astawan sinchʼiyarqa”, nispa.

10. Jatun llakiypi rikukushanki chay, ¿imatá ruwawaj?

¹⁰ Ichá qanpis uj sinchʼi llakiypi kashanki, tiyakunki chaynejpi uj desastre natural kasqanrayku chayri sinchʼi onqosqa kasqaykirayku. Nitaj yachankichu imatachus ruwanaykita. Jinapis Jehová Diospi atienekullaypuni. Jehovaman imaynachus kashasqaykita willakuy. Chantapis imaynatachus ñaupajkunapi Jehová yanapasusqanpi piensariy. Chaytaj creeyniykita astawan kallpachanqa (Sal. 77:11, 12).  Jehová Diosqa ni jaykʼaj saqerpasonqachu.

11. ¿Imaraykutaj Diospa llajtanta ñaupajman apajkunata kasukunanchej tiyan?

¹¹ Llakiykunapi kashajtiyki, ¿imataj yanapallasunkimantaj? Hermana Anel nerqa jina kasukuyta yachay. Jehovawan Jesuswanqa llajtanta ñaupajman apajkunata churanku, paykunapitaj confianku. Chay hermanos imastachus ruwananchejta niwasqanchejqa, ichá wakin kutis mana allinchu rijchʼawasunman. Jinapis paykunapi confiana. Imaraykuchus Jehovaqa kasukojtinchej bendeciwanchej. Palabranpi, kasukoj kamachisninpa experienciasninkupi ima sutʼita reparanchej kasukoyqa allinninchejpajpuni kasqanta (Éxo. 14:1-4; 2 Cró. 20:17). Chaykunapi piensariy. Ajinamanta imatachus Jehová llajtannejta kamachiwasqanchejta, kay tiempopi jinallataj qhepamanpis kasukuyta atillanki (Heb. 13:17). Chayta ruwanki chayqa, mana manchachikunkichu tumpamantawan jatun ñakʼariy tiempo chayamojtin (Pro. 3:25).

12. ¿Imaynatá Lucas 18:1-8 rikuchiwanchej creeyniyoj kaspa qhasimanta ñakʼarichiwajtinchej aguantayta atisqanchejta?

¹² Jesusqa yacharqa discipulosnin qhasimanta ñakʼarichisqa kajtinku, creeyninku pisiyananta. Paykunata yanapananpajtaj uj kikinchaymanta parlarqa. Chaytaj Lucas libropi kashan. Jesusqa nerqa, uj viuda kutin kutita mana uyariyta munaj juezpaman rispa justiciata mañakusqanta. Chay viudaqa yacharqa mañakullajtinpuni chay juez uyarinanta. Ajinapunitaj karqa. Chay kikinchaymanta yachakunchej Jehová Diosqa cheqan kajtapuni ruwasqanta. Chayrayku Jesús nerqa: “¿Manachu Diosqa ajllasqasninpaj justiciata ruwaponqa tuta pʼunchay paymanta mañakojtinku?”, nispa (Lucas 18:1-8 leey). Pay nillarqapuni: “Chaywanpis noqa jamojtiy, ¿tarisajchu kay jallpʼapi chay jina creeyniyoj runasta?”, nispa. Runas qhasimanta sufrichiwajtinchejqa chay viuda jina pacienciakuna, amataj saykʼunachu. Ajinamanta sinchʼi creeyniyoj kasqanchejta rikuchisun. Chaytaj yanapawasun Jehová yanapanawanchejpipuni atienekunapaj. Nitaj iskayrayasunchu mañakusqanchejta uyarinawanchejmanta. Wakin kutisqa mañakusqanchejman tʼukunapaj jina kutichiwasun.

13. ¿Imaynatá uj familiata wawankoj orakusqan yanaparqa?

¹³ Kunanqa hermana Veromanta parlarina. Payqa República Democrática del Congo nisqapi tiyakun. Qosanqa mana testigochu, warmi wawantaj 15 watasniyoj. Paykunaj ranchitonkumanqa soldados juntʼaykorqanku, chayraykutaj ayqekorqanku. Ñanpitaj uj qotu soldados paykunata jarkʼaykorqanku, wañuchiytataj munarqanku. Hermana Vero waqayta qallarejtintaj, warmi wawanqa sonqochayta munaspa, Jehovaj sutinta ashkha kutista oqharispa jatunmanta orakorqa.  Tukusqantawantaj comandanteqa nerqa: “Jovencita, ¿pitaj orakuyta yachachisorqa?”, nispa. Paytaj kuticherqa: “Mamay yachachiwarqa Mateo 6:9-13 nisqanman jina orakunayta”, nispa. Comandantetaj nerqa: “Jovencita, ama llakikuspa tatasniykiwan khuska ripuy, Jehová Diosniykitaj cuidasuchun”, nispa.

14. Jehová mañakuyninchejman mana usqhayllatachu kutichiwajtinchej, ¿imatá ruwasunman?

¹⁴ Chay jina experienciasmantaqa yachakunchej Jehová Diosmanta mañakunanchejpuni kasqanta. Jinapis Dios mañakusqanchejta mana usqhayllatachu uyariwajtinchej chayri mana munasqanchejman jinachu kutichiwajtinchej, ¿imatá ruwasunman? Jesuspa kikinchayninmanta viuda jina mañakunallapuni, atienekunataj Jehová Dios ni jaykʼaj saqerparinawanchejpi. Payqa maychus tiemponpi imaynallamantapis uyariwasunpuni. Chayrayku Jehovamanta espíritu santonta mañakunallapuni (Fili. 4:13). Jehovaqa tumpamantawan may jinata bendeciwasun. Chaypitaj niña kay tiempopi sufrisqanchejmanta yuyarikusunchu. Chaykamataj kay tiempopi llakiykunata Jehovaj yanapayninwan aguantanallapuni. Ajinamanta jamoj llakiykunapaj wakichisqa kasun (1 Ped. 1:6, 7).

15. Mateo 17:19, 20 nisqanman jina, ¿ima llakiypitaj Jesuspa discipulosnin rikukorqanku?

¹⁵ Jesusqa discipulosninman yachacherqa creeyniyoj kaspa llakiykunata aguantayta atinankuta (Mateo 17:19, 20 leey). Paykunaqa ashkha kutispi supaykunata qharqorqanku. Jinapis uj pachaqa mana aterqankuchu. ¿Imaraykutaj mana aterqankuchu? Jesús nerqa pisi creeyniyoj kasqankurayku. Nillarqataj sinchʼi creeyniyoj kaspaqa, jatuchaj llakiykunatapis atipayta atinankuta. Noqanchejpis kay tiempopeqa mana atipay atina llakiykunata aguantayta atisunman.

16. ¿Imaynatataj hermana Geydita creeyniyoj kasqan yanaparqa?

¹⁶ Hermana Geydimanta parlarina. Payqa Guatemala suyumanta, qosantaj Edi sutikorqa. Uj pacha reunionmanta kutipushajtinku suwas qosanta wañurpachisqanku. Hermana Geyditaqa sinchʼi creeyniyoj kasqan mayta yanaparqa chay llakiyninta aguantananpaj. Pay nin: “Jehová Diosman llakiyniyta willakuni, paytaj sonqoyta tiyaykuchin. Sutʼitataj reparani Jehovaqa familiaynejta, congregacionmanta hermanosnejta ima cuidawasqanta. Jehovapaj astawan llankʼaspaqa mana anchata llakikunichu, nitaj imachus qʼaya kananmantapis phutikunichu. Kay jina llakiykunata aguantasqayqa, jamoj tiempopi llakiykunata aguantanaypaj wakichiwan. Qhepamanqa Jehovaj yanapayninwan, Jesuspa yanapayninwan, hermanospa yanapayninwan ima aguantayta atillasaj”, nispa.

17. ¿Imastataj ruwasunman uj jatun llakiypi rikukuspa?

¹⁷ Ichapis llakisqa kashanki munasqa familiarniyki wañupusqanrayku. Bibliaqa parlan  ashkha runas kausarichisqa kasqankumanta. Chaykunata leenaykipaj tiempochakuspaqa creeyniykita astawan sinchʼiyachinki. Chayri ichá congregacionmanta mayqen familiarniyki qharqosqa kasqanrayku llakisqa kashanki. Jina kajtenqa, allin kanman Bibliata estudianayki imaraykuchus Jehová juchallikojta jasutʼisqanta qanpuni yachanaykipaj. Ima llakiypi kaspapis astawan creeyniykita sinchʼiyachinaykipaj kallpachakuy. Chantapis Jehovaman tukuy llakiyniykita willakuy, amataj hermanosmanta karunchakuychu (Pro. 18:1). Kallpachakuytaj aguantanaykipaj yanapasonqa chay imasta ruwanaykipaj, waqan waqan ruwanayki kajtinpis (Sal. 126:5, 6). Reunionesman, predicacionmanpis amapuni faltakuychu, Bibliatapis leellaypuni. Jehová may sumaj bendicionesta tumpamantawan qonawanchejpitaj piensarillaypuni. Imaynatachus Jehová yanapasusqanta reparaspaqa, aswan sinchʼi creeyniyoj kanki.

18. Pisi creeyniyoj kasqaykita reparakunki chay, ¿imastá ruwawaj?

¹⁸ Ñaupajpi chayri kunallanraj llakiykunapi kaspa, ichá pisi creeyniyoj kasqaykita reparakunki. Jinapis ama desanimakuychu. Manaqa astawan creeyniykita kallpachallawajpuni. Chantapis Jesuspa apostolesnin jina mañakuy: “Yanapawayku astawan creenaykupaj”, nispa (Luc. 17:5). Chantá kay yachaqanapi yachakusqanchej experienciaspi piensarillawajtaj. Miguelwan, Yuraiwan jina, ima kutispichus Jehová yanapasusqanta yuyarikuy. Hermana Veroj warmi wawan jina, hermana Anel jinataj, sinchʼi llakiykunapi kashaspa tukuy sonqo Jehovamanta mañakuy. Chantapis hermana Geydi jina saqey Jehová familiaykinejta chayri hermanosnejta yanapasunanta. Llakiykunapi kashaspa Jehovawan yanapachikunki chayqa, aswan qhepaman llakiykunapi kashaspapis, yanapasunanpi atienekunki.

19. ¿Imastataj Jesús yacharqa, chanta imatataj noqanchejpis yachanchej?

¹⁹ Jesusqa discipulosnin imaspichus creeyninkuta astawan kallpachananku kasqanta nerqa. Jinapis yacharqa Jehovaj yanapayninwan aswan qhepaman llakiykunata atipayta atinankuta (Juan 14:1; 16:33). Payqa yachallarqataj may chhika runas sinchʼi creeyniyoj kasqankurayku manchay ñakʼariy tiempopi mana wañunankuta (Apo. 7:9, 14). Noqanchejpis yachanchej Jehovaj yanapayninwanqa chay may chhika runasmanta ujnin kananchejta. Chaypajtaj kunanmantapacha creeyninchejta astawan sinchʼiyachinapaj kallpachakuna (Heb. 10:39).