1, 2. 1) ¿Imaraykutaj kunallanraj casarakojkuna Jehovapi atienekunanku tiyan? (Salmo 37:3, 4). 2) ¿Imastataj kay yachaqanapi yachakusun?

ICHÁ casarakunaykipajña kashanki chayrí kunallanraj casarakunki. Jina kajtenqa ichá munasqetaykiwan kusisqa kausakuyta munashanki. Jinapis qhariwarmi kausaypeqa wakin problemas kanqapuni. Chayrayku qallariymantapacha allin imasta ajllanaykichej kanqa. Ajinallamanta aswan qhepamanpis kusisqa kausakunkichej. Jehovapi atienekunkichej chayqa allin imasta ajllankichej, qhariwarmi jinataj sumaj ujchasqa, aswan kusisqastaj kausakunkichej. Diospa yuyaychasqanta mana kasukojtiykichejqa, qhariwarmi kausayniykichejpi ichá problemas kanqa, llakiyllapitaj kausakunkichej (Salmo 37:3, 4 leey).

² Kay yachaqana kunallanraj casarakojkunapaj kajtinpis, tukuy qhariwarmis ima llakiykunasniyojchus kasqankumanta parlallanqataj. Kay yachaqanapeqa yachakusun Diospa ñaupa tiempo kamachisninmanta. Paykunaj kausayninkutaj tukuyta yanapawasunman, qhariwarmistapis. Chantá yachakullasuntaj kay tiempomanta wakin qhariwarmispa experienciasninkumanta.

3, 4. ¿Imaspitaj rikukunkuman kunallanraj casarakojkuna?

³ Wakin lugarespi tatasqa chayri wakin familiaresninkoqa kunallanraj casarakojkunata ninkuman wawasniyoj kanankutapacha. Chayri amigosninku, waj familiaresninku ima allinninkuta munaspa, uj wasita, tukuy imatataj rantikunankupaj tanqankuman.

⁴ Ichá kunallanraj casarakojkunaqa, paykunata kasuspa ashkhata manuchaykukunkuman. Manunkuta juntʼanankupaj iskayninku trabajajtinkutaj, mana tiemponku kanqachu sapallankupi Bibliata estudianankupaj, familiapi Diosta yupaychanankupaj, nitaj predicanankupajpis. Ichá astawan gananankurayku chayri trabajonkumanta mana wijchʼuchikunankurayku, astawan trabajananku kanqa, reunionesmantapis faltakunanku kanqa. Jinamantataj mana atenqankuchu Jehovaj llajtanpi sumajta yanapakuyta.

5. ¿Imatá yachakunchej Claudiomanta Marisamantawan?

⁵ Ashkha qhariwarmisqa reparakorqanku, tukuy imayoj kanankupaj trabajaspapis mana kusisqachu kasqankuta. Claudiomanta, Marisamantawan parlarina. * Paykunaqa casarakuytawan semanantinta trabajaj kanku, tukuy imayoj kanankupaj. Jinapis mana kusisqachu kausakoj kanku. Claudio nin: “Tukuy imayoj karqayku, jinapis kausayniykoqa llakiylla karqa. Nitaj kallpachakusharqaykuchu Jehovapaj astawan llankʼanaykupaj”, nispa. Ichá qanpis reparakorqanki tukuy imayoj kaspapis mana sonqo juntʼasqachu kasqaykita. Chaywanpis wajkuna allin imasta ruwasqankumanta mayta yachakuwaj. Ñaupajtaqa parlarisun imastachus qosas rey Jehosafatmanta yachakuyta atisqankuta.

6. Proverbios 3:5, 6 nisqanman jina, ¿imatá Jehosafat ruwarqa llakiypi rikukuspa?

⁶ Qosas, ichá llakisqa kashankichej familiaykichejta uywanaykichejmanta. Jina kajtenqa rey Jehosafatmanta mayta yachakuwajchej. Rey Jehosafatqa Judá nacionpa allinninta maskʼanan karqa. Chayrayku payqa Judá llajtapi sumaj jarkʼachasqa lugaresta ruwacherqa. Chantapis 1.160.000 kuraj soldadosta tantarqa (2 Cró. 17:12-19). Jinapis Jehosafatqa aswan qhepaman uj jatun llakiypi rikukorqa. Imajtinchus ammonitaswan, moabitaswan, Seír orqosmanta runaswan, paypa, familianpa, nacionninpa contranpi ima maqanakoj rerqanku (2 Cró. 20:1, 2). Jehosafattaj Jehovamanta yanapata, kallpata ima mañakorqa. Payqa Proverbios 3:5, 6 (leey) nisqanman jina ruwasharqa. Jehosafatqa Jehovamanta llampʼu sonqowan mañakuspa rikucherqa maytapuni paypi atienekusqanta (2 Cró. 20: 5-12). ¿Jehovarí Jehosafatpa mañakusqanta uyarerqachu? Chaymanta qhepan parrafospi yachakusun.

7. ¿Imaynatá Jehová Jehosafatman nisqanta juntʼarqa?

⁷ Jehovaqa levita Jahazielnejta Jehosafatman nerqa: “Lugarniykichejpi mana kuyurispa sayaykuychej, rikuychejtaj imaynatachus Jehová Dios salvasusqaykichejta”, nispa (2 Cró. 20:13-17). Tʼukunapaj jina kajtinpis, Jehovapuni chayta ruwanankuta kamachisharqa. Jehosafatqa Jehovapi tukuy sonqo atienekusqanrayku, nisqanman jinapuni ruwarqa. Paytaj enemigosninkuwan maqanakoj rishaspa, takejkunata ajllarqa soldadosninpa ñaupaqenkuta rinankupaj. Jehovaqa Jehosafatman nisqanta juntʼarqa, enemigosnintataj atiparqa (2 Cró. 20:18-23).

8. ¿Imatataj qosas Jehosafatmanta yachakunkuman?

⁸ Qosas, Jehosafatmantaqa mayta yachakuwajchej. Qankunaqa familiaykichejta uywanaykichej tiyan. Chayrayku mayta kallpachakunkichej paykunata yanapanaykichejpaj, tukuy ima necesitasqankutataj qonaykichejpaj. Problemaspi rikukuspa sapallaykichej allinchayta munaspapis, ama qankunallapi atienekuychejchu. Astawanpis sapallaykichejpi, jinallataj señoraykichejwan khuska tukuy sonqo Jehovamanta yanapata mañakuychej. Chantapis Jehová yanapasunaykichejpajqa Bibliata, publicacionesta ima estudiaychej, chaykunapi yuyaychasqanman jinataj ruwaychej. Ichá wakenqa Bibliaj nisqanman jina ruwasqaykichejta mana allinpajchu qhawankuman, wampu kasqaykichejtataj ninkuman. Chantapis ichá ninkuman qolqeyoj, tukuy imayojtaj kaspalla familiaykichejta sumajta yanapanaykichejta. Jinapis Jehosafatmanta yuyarikuychej. Payqa Jehovapi atienekorqa, chaytataj ruwasqanwan rikucherqa. Jehovaqa mana payta saqerparqachu, nillataj qankunatapis saqerpasonqachejchu (Sal. 37:28; Heb. 13:5). Qhariwarmis kusisqa kausakunankupaj imastachus ruwanankumanta qhepan parrafospi yachakusun.

9. ¿Imatá profeta Isaiaswan señoranwan ruwarqanku?

⁹ Isaiaswan señoranwanqa Jehovata sirviyta kausayninkupi ñaupajman churarqanku. Isaiasqa Diospa profetan karqa. Señoranpis ichá pay jinallataj Diospaj ruwanasninta ruwarqa. Imajtinchus Bibliaqa ‘profetisa’ kasqanta nin (Isa. 8:1-4). Isaiaswan señoranwanqa Jehovata sirviyta ñaupajman churarqanku. Chayrayku kay tiempomanta qhariwarmisqa paykunamanta mayta yachakunkuman.

10. ¿Imaynatá qhariwarmista yanapanman profeciasta estudiay Jehovapaj astawan llankʼayta munanankupaj?

¹⁰ Qhariwarmisqa Isaiaswan señoranwan jina tukuy atisqankuta Jehovapaj llankʼankuman. Jehovapi astawan creeyninkuta sinchʼiyachinankupajtaj khuska Bibliaj profeciasninta estudiankuman, imaynatachus chay profecías juntʼakushasqantataj reparankuman (Tito 1:2). * Chantapis piensarillankumantaj wakin profecías juntʼakunanpaj imaynatachus yanapakunankupi. Chaypajqa ichá piensarinkuman imatachus Jesús nisqanpi. Jesusqa nerqa Diospa Gobiernonmanta sumaj willaykuna Jallpʼantinpi willakunanta, niraj tukukuy jamushajtin (Mat. 24:14). Qhariwarmisqa Bibliaj profeciasnin  juntʼakushasqanta rikuspa, astawan Jehovapaj llankʼayta munanqanku.

11. ¿Imapitaj Aquilawan Priscilawan rikukorqanku, chanta imatá ruwallarqankupuni?

¹¹ Kunallanraj casarakoj jovenesqa Priscilamantawan Aquilamantawan mayta yachakunkuman. Paykunaqa judíos karqanku, Roma llajtapitaj tiyakorqanku. Priscilawan Aquilawanqa Jesusmanta sumaj willaykunata uyarispa cristianosman tukorqanku. Paykunaqa kusisqachá kausakusharqanku. Jinallapi kamachej Claudio tukuy judiosta Romamanta ripunankuta kamacherqa. Waj lugarman ripoyqa nichá facilchu karqa. Imajtinchus paykunaqa rejsisqanku lugarta saqenanku karqa, waj wasita maskʼakunanku karqa, toldo ruwananku negocionkutapis waj llajtapi sayachinanku karqa. Yachanchej jina Priscilawan Aquilawanqa ajinapi rikukuspapis, tukuy atisqankuta Jehovapaj llankʼallarqankupuni. Corintopiña kashaspataj congregacionmanta hermanosta yanaparqanku, apóstol Pablowan khuskataj paykunata kallpacharqanku. Aswan qhepamantaj waj llajtasmanpis predicaj rillarqankutaj (Hech. 18:18-21; Rom. 16:3-5). Paykunaqa Jehová Diospaj llankʼaspa may kusisqachá kausakorqanku.

12. ¿Imaraykutaj qhariwarmis imastachus Jehovapaj ruwayta munasqankumanta parlarinanku tiyan?

¹² Kay tiempomanta qhariwarmisqa, Priscilawan Aquilawan jina kausayninkupi Diospa Gobiernonta ñaupajman churankuman. Imastachus Jehovapaj ruwayta munasqankumantaqa novios kashaspa parlarinanku tiyan. Iskayninku imaynatachus Jehovapaj llankʼayta munasqankumanta parlarikojtinku, chayta juntʼanankupaj kallpachakojtinkutaj, sutʼita reparanqanku Jehovaj espíritu santon paykunata yanapasqanta (Ecl. 4:9, 12). Russellmanta señoran Elizabethmantawan parlarina. Russell nin: “Manaraj casarakushaspa imastachus Jehovapaj ruwanaykumanta sumajta parlarikorqayku”, nispa. Elizabethtaj nin: “Chay imasmantaqa parlarerqayku kausayniyku cambiajtinpis,  Diospaj ruwanasniykutaqa juntʼanaykupajpuni”, nispa. Russellwan Elizabethwanqa, Micronesiaman predicacionpi yanapakoj riporqanku. Imajtinchus chaypeqa pisi willajkunalla karqanku.

13. Salmo 28:7 nisqanman jina, ¿imaraykutaj Jehovapi atienekunanchej tiyan?

¹³ Ashkha qhariwarmisqa, Russellwan Elizabethwan jina pisi imasllawan kausakuyta ajllanku astawan predicanankupaj, yachachinankupaj ima. Qhariwarmis Jehovapaj astawan llankʼanankumanta parlarejtinku, chayta juntʼanankupajtaj kallpachakojtinku, ashkha bendicionesta japʼenqanku. Chantapis paypi astawan atienekonqanku, aswan kusisqa kanqanku, reparanqankutaj Jehová paykunata cuidasqanta (Salmo 28:7 leey).

14. ¿Imaynatá apóstol Pedrowan señoranwan ima Mateo 6:25, 31-34 nisqanpi atienekusqankuta rikucherqanku?

¹⁴ Qhariwarmisqa, apóstol Pedromanta señoranmanta ima mayta yachakullankumantaj. Apóstol Pedroqa, Jesusta rejsisqanmanta sojta killanman jina ancha kaspa watanman jina, imatachus ruwananta ajllanan karqa. Payqa pescadosta japʼispa trabajaj. Chayrayku Jesús paypa qhepanta rinanpaj wajyarejtin, piensarerqachá imaynatachus familianta uywananpi (Luc. 5:1-11). Pedroqa mana iskayrayaspa Jesuswan khuska predicaj rerqa. Chayta ruwasqantaj allinpuni karqa, señoranpis apoyarqa. Imajtinchus Bibliaqa nin, Jesús kausarimusqantawan Pedrowan khuska uj tiempota viajasqanta (1 Cor. 9:5). Chantapis Pedroqa señoran sumaj warmi kasqanrayku, mana manchachikuspa yuyaycharqa cristiano qosasman, warmisman ima (1 Ped. 3:1-7). Reparanchej jina, Pedrowan señoranwanqa Diospa Gobiernonta ñaupajman churajtinku Jehová ni imata faltachinanpi atienekorqanku (Mateo 6:25, 31-34 leey).

15. ¿Imatá Santiagomanta Esthermanta ima yachakunchej?

¹⁵ Unayña casarakorqankichej chaypis, ¿imaynatá Jehová Diospaj astawan llankʼanaykichejpaj kallpachakullawajchejpuni? Chaypajqa waj qhariwarmispa experienciasninkuwan yanapachikuwajchej. Chantapis “Tukuy sonqo ruwarqanku” nisqa yachaqanasta leeriwajchej. Santiagomanta Esthermantawan parlarina. Paykunaqa Brasilmanta kanku. Chay yachaqanasta leeriytawantaj maypichus pisi willajkunalla kanku chayman yanapakoj riporqanku. Santiago nin: “Jehová kay tiempopi kamachisninta imaynatachus yanapasqanmanta leerispa, noqaykupis kausayninkupi chayta rikuyta munarqayku”, nispa. Tiemponmantaj paykunaqa 2014 watapi Paraguayman riporqanku portugués parlaypi yanapakoj. Esther nin: “Iskayniykuman Efesios 3:20 nisqan mayta gustawayku. Ashkha kutispitaj rikorqayku chay versiculospi nisqan Jehovata sirvisqaykupi juntʼakusqantapuni”, nispa. Pabloqa Efesios libropi nerqa mañakusqanchejmantapis astawanraj Jehová qonawanchejta. Chaytaj juntʼakunpuni.

16. Kunallanraj casarakojkuna Jehovapaj astawan llankʼayta munashanku chay, ¿pikunawantaj yuyaycharichikunkuman?

¹⁶ Kunallanraj casarakojkuna, mayta yachakunkuman Jehovapi atienekojkunaj experienciasninkumanta. Wakin qhariwarmisqa ashkha watasta Jehová Diospaj tiempo juntʼasqata llankʼarqanku. Qankunapis Jehovapaj astawan llankʼayta munashankichej chayqa, paykunawan yuyaycharichikuwajchej.  Chayta ruwaspaqa, Jehovapi atienekusqaykichejta rikuchishallankichejtaj (Pro. 22:17, 19). Ancianospis yanapallasunkichejmantaj Jehová Diospaj astawan llankʼayta munanaykichejpaj, chayta juntʼanankichejpajtaj.

17. ¿Imapitaj Claudiowan Marisawan rikukorqanku, imatataj paykunamanta yachakusunman?

¹⁷ Wakin kutisqa, Jehovapaj astawan ruwayta munajtinchejpis mana suyasqanchejman jinapunichu kanman. Ajinapi rikukorqanku Claudiowan Marisawan. Paykunamantaqa qallariypiña parlarerqanchej. Paykunaqa casarakusqankumanta kinsa watanman wasinkumanta riporqanku, Finlandia sucursalpitaj construccionpi yanapakusharqanku. Sojta killasllata chaypi yanapakunankuta nejtinkutaj llakikorqanku. Jinapis pisi tiemponmanqa árabe parlayta yachakunankupaj invitasqas karqanku. Kunantaj kusisqa kashanku waj suyupi árabe parlaypi predicaspa. Chaymanta parlaspa Marisa nin: “Wasinchejta saqey, Jehovapitaj atienekoyqa mana atikullanchu. Jinapis Jehovaqa necesitashajtiykupuni yanapawarqayku. Kunantaj astawan Jehová Diospi atienekuni”, nispa. Paykunaj kausayninkupi reparanchej, Jehovaqa paypi tukuy sonqo atienekojtinchej yanapanawanchejtapuni.

18. ¿Imatataj qhariwarmis Jehovapi atienekunallankupajpuni ruwankuman?

¹⁸ Qhariwarmi kausayqa Jehovamanta uj sumaj bendición (Mat. 19:5, 6). Jehovaqa munan qhariwarmis kajkuna kusisqa kausakunankuta (Pro. 5:18). Kunallanraj casarakojkuna, sumajta qhawarikuychej imatachus kausayniykichejwan ruwashasqaykichejta. Mayta kallpachakuychej Jehovaman agradecekunaykichejpaj tukuy imata qosusqaykichejmanta. Paywan parlariychej, necesitasqaykichejman jina Palabranpi sumaj yuyaychaykunata maskʼaychej, chayman jinataj ruwaychej. Qhariwarmi kausayniykichejpi Jehová Diosta sirviyta ñaupajman churankichej chayqa, kusisqa kausakunkichej.