1. ¿Imaynatá yachanchej Jehová qayllanchejpi kayta munasqanta?

 JEHOVAQA niwanchej payman qayllaykunanchejta (Sant. 4:8). Payqa munan Diosninchej, Tatanchej, amigonchejtaj kayta. Mañakusqanchejman kutichiwanchej, problemasniyoj kajtinchejtaj yanapawanchej. Chantapis llajtannejta yachachiwanchej, cuidawanchejtaj. Jinapis, ¿imatá ruwasunman Jehovaj qayllallanpipuni kanapaj?

2. ¿Imaynatá Jehovaman qayllaykusunman?

² Jehovaman qayllaykusunman orakuspa, Palabranta leespa, chaypitaj tʼukurispa. Chayta ruwaspaqa payta astawan munakusun, agradecekusuntaj. Chantapis payta kasukuyta, jatunchaytataj munasunchej, paylla chaypaj jina kasqanrayku (Apo. 4:11). Jehovata astawan rejsispaqa paypi astawan atienekusun, jinallataj llajtanpipis, mayqentachus cuidanawanchejpaj churan.

3. 1) ¿Imaynatá Jehovamanta Diablo tʼaqayta munawanchej? 2) ¿Imatá necesitanchej Jehovamanta, llajtanmantapis ni jaykʼaj tʼaqakunapaj? (Salmo 31:13, 14).

³ Diabloqa Jehovamanta tʼaqayta munawanchej, astawanraj problemaspi kashajtinchej. ¿Imaynamanta? Payqa tukuy imata ruwan pisimanta pisi Jehovapi, llajtanpipis niña atienekunanchejpaj. Jinapis Diabloj contranpi sayaykuyta atinchej. Sichus sinchʼi creeyniyoj kasun chay, Jehovapitaj tukuy sonqo atienekusun chay, mana paymanta, nitaj llajtanmantapis tʼaqakusunchu (Salmo 31:13, 14 leey).

4. ¿Imastataj kay yachaqanapi qhawarisun?

⁴ Kay yachaqanapi kinsa imasta qhawarisun, mayqenkunachus Jehovapi, llajtanpipis atienekusqanchejta pisimanta pisi chinkachinman. Chaytaj mana congregación ukhupichu rikhurin.  ¿Imaynatá chay imas Jehovamanta tʼaqawasunman? Chanta, ¿imatá ruwasunman Satanaspa contranpi sayaykunapaj?

5. ¿Imaynatá llakiykunapi rikukusqanchej Jehovapi, llajtanpipis atienekusqanchejta pisiyachinman?

⁵ Ichá wakin kutispi familiaresninchej churanakuwasunman chayri trabajonchejta pierdesunman. Ajina llakiykunapi rikukuspa, ichapis Jehovaj llajtanpi niña atienekusunmanchu, paymantapis karunchakusunman. Unayña uj problemapi rikukojtinchejqa, ichapis yuyasunman niña allinchakunanta, desanimakusunmantaj. Satanasqa chay imasmanta valekuspa yuyachiwasunman Jehová mana munakuwasqanchejta. Payqa yuyachiyta munawanchej Jehovata sirvikusqanchejrayku chayri llajtanpi kasqanchejrayku ajinapi rikukushasqanchejta. Wakin israelitaspis Egiptopi kashajtinku ajinallapitaj rikukorqanku. Qallariypeqa mana iskayrayarqankuchu Moisesta, Aarontawan Jehová ajllasqanmanta, paykunanejta esclavos kasqankumanta kacharichinanpaj (Éxo. 4:29-31). Jinapis faraón paykunata astawan sufrichejtin, Moisestawan Aarontawan juchacharqanku, nerqankutaj: “Qankuna juchayoj kankichej faraonwan kamachisninwan chejninawaykupaj. Qankuna juchayoj kankichej wañuchiyta munanawaykupaj”, nispa (Éxo. 5:19-21). Diospa ajllasqan kamachisninta ajinata tumpasqankoqa manapuni allinchu karqa. Qanpis unayña llakiykunapi kashanki chayqa, ¿imatá ruwawaj tukuy sonqo Jehovapi, llajtanpipis atienekunallaykipajpuni?

6. ¿Imatá Habacucmanta yachakunchej? (Habacuc 3:17-19).

⁶ Imachus sonqonchejpi kasqanta Jehovaman willakuna, yanapaynintataj maskʼana. Profeta Habacucqa ashkha llakiykunapi rikukorqa. Uj pacha, paymanta Jehová mana llakikusqantasina yuyarqa. Chayrayku imaynachus kashasqanta Jehovaman willakorqa, pay nerqa: ‘Jehová Diosníy, ¿maykʼajkamataj yanapata mañakuspa qhaparikamusqaykiri? ¿Imaraykutaj runasta ñakʼarichisqankuta qhawakullankiri?’, nispa (Hab. 1:2, 3). Jehovaqa tukuy sonqo mañakusqanta uyarerqa (Hab. 2:2, 3). Habacucqa imaynatachus Jehová llajtanta yanapasqanpi piensariytawan, watejmanta kusisqa karqa. Chaywantaj convencekorqa Jehová paymanta llakikusqanta, ima llakiyta aguantananpajpis yanapananta (Habacuc 3:17-19 leey). ¿Imatá Habacucmanta yachakunchej? Llakiykunapi kashaspa Jehovaman orakunata, imaynachus kashasqanchejta willakunata, yanapaynintataj maskʼanata. Chayta ruwajtinchej Jehovaqa kallpata qowasunpuni aguantanapaj. Yanapawasqanchejta rikojtinchejtaj, creeyninchej astawan sinchʼiyanqa.

7. ¿Imatá Shirleyta ujnin familiarnin yuyachiyta munarqa, chanta imataj yanaparqa Jehovallapipuni atienekunanpaj?

⁷ Imaschus Jehovaj qayllanpi kanapaj yanapawanchej chay imasta ruwanallapuni. Chayta ruwarqa hermananchej Shirley problemaspi rikukuspa. b Payqa Papúa Nueva Guinea suyumanta. Familianqa pobres karqanku, wakin kutitaj ni mikhunankupajpis trabajota tariyta atejchu kanku. Ujnin familiarnintaj niña Jehovapi atienekunanta munaspa kayta nerqa: “Diospa espíritu santon yanapawan ninkeqa. ¿Maytaj chay yanapari? Qankunaqa wajchasllapuni kankichej. Tiempollaykita predicaspa usuchishanki”, nispa. ¿Imatá pay ruwarqa? Shirley nin: “Kay jinata yuyarqani: ‘Ciertopunisina Jehová noqaykumanta mana llakikuwaykuchu’, nispa. Ajinata yuyashajtiytaj, chay rato Jehovamanta mañakorqani, imachus sonqoypi kajtataj payman  willakorqani. Bibliata, publicacionestapis leellarqanipuni, manataj predicacionmanpis, nitaj reunionesmanpis faltakorqanichu”, nispa. Familianmanqa mikhunanku mana faltasharqachu, kusisqataj kasharqanku. Chaytaj Shirleyta reparacherqa Jehová familianta cuidashasqanta. Shirley nin: “Sutʼita repararqani Jehová mañakusqasniyta uyariwasqanta”, nispa (1 Tim. 6:6-8). Jehovaj qayllanpi kanapaj imaschus yanapawanchej chay imasta ruwallasunpuni chayqa, mana saqesunchu ni problemaspis, ni iskayrayayta qallarisqanchejpis Jehovamanta tʼaqanawanchejta.

8. ¿Imaspitaj rikukunkuman ñaupajman apaj hermanos?

⁸ Enemigosninchejqa radionejta, telenejta, periodiconejta, redes socialesnejta, waj imasnejtapis, ñaupajman apaj hermanosmanta llullasta parlanku chayri paykunamanta iskayrayananchejpaj jina qʼewisqata parlanku (Sal. 31:13). Wakin hermanosqa carcelman wisqʼasqa kanku, sajra runasmantataj tumpasqa kanku. Ñaupa cristianospa tiemponkupipis ajinallapitaj rikukorqanku. Apóstol Pablotaqa qhasimanta tumpaspa wisqʼaykorqanku. Chay cristianosrí, ¿imatá ruwarqanku?

9. ¿Imatá wakin cristianos ruwarqanku Pablo presochasqa kashajtin?

⁹ Apóstol Pablo Romapi presochasqa kashajtin, wakin cristianosqa saqerparerqanku (2 Tim. 1:8, 15). ¿Pʼenqakunkumanchu karqa Pablota sajrata ruwaj runata jina qhawasqankumanta? (2 Tim. 2:8, 9). Chayri, ¿manchachikunkumanchu karqa paykunapis qhatiykachasqallataj kanankuta? Imayna kajtinpis, Pabloqa payta saqerparisqankumanta maytachá llakikorqa. Imajtinchus payqa ashkha imasta aguantarqa, paykunaraykutaj kausaynintapis wañuy pataman churarqa (Hech. 20:18-21; 2 Cor. 1:8). Amapuni Pablota saqerparej cristianos jina kanachu. Paykunaqa Pablo yanapata necesitashajtinpuni saqerparerqanku. Chayrayku ñaupajman apaj hermanosta qhatiykachajtinku, ¿imatá yuyarikunanchej kanman?

10. ¿Imatá yuyarikunanchej tiyan ñaupajman apaj hermanos qhatiykachasqas kajtinku, chanta imaraykutaj?

¹⁰ Yuyarikuna imaraykuchus qhatiykachasqa  kasqanchejta, pichus chayta ruwachisqantapis. 2 Timoteo 3:12 nin: “Cristo Jesuspa discipulosnin jina Diosta tukuy sonqo yupaychaspa kausayta munajkunaqa, tukuyninku qhatiykachasqallataj kanqanku”, nispa. Chayrayku ama tʼukunachu Satanasqa ñaupajman apaj hermanostapuni astawan qhatiykachasqanmanta. Payqa munan chay hermanos Jehovata wasanchanankuta, noqanchejtapis chaywan manchachiyta munawanchej (1 Ped. 5:8).

11. ¿Imatá Onesiforomanta yachakunchej? (2 Timoteo 1:16-18).

¹¹ Hermanosta mana wasanchaspa yanapanallapuni (2 Timoteo 1:16-18 leey). Ñaupa tiempopi, Pablo presochasqa kashajtin uj cristiano yanaparispa allinta ruwarqa. Sutenqa Onesíforo karqa. Pabloqa paymanta kayta nerqa: “Manataj carcelpi wisqʼasqa kasqaymanta pʼenqakorqachu”, nispa. Astawanpis Onesiforoqa Pablota tarinankama mayta maskʼaykorqa, taripaspañataj necesitasqanpi yanaparqa. Payrayku kausaynintapis wañuy pataman churarqa. ¿Imatá Onesiforomanta yachakunchej? Qhatiykachasqa kashanku chay hermanostaqa yanapanallapuni, mana wajkunata manchachikuspa. Tukuy atisqanchejta ruwana paykunaman kutikunapaj, yanaparinapajtaj (Pro. 17:17). Paykunaqa munakunanchejta, yanapananchejta ima necesitanku.

12. ¿Imatá yachakunchej Rusiapi kaj hermanosninchejmanta?

¹² Tʼukurina Rusiamanta hermanosninchej, hermanasninchejpis imatachus ruwasqankupi wakin hermanos presochasqa kajtinku. Chay hermanosmanta wakin juzgasqa kajtinku, ashkha hermanos juzgadoman rinku paykunawan kanankupaj. ¿Imatá paykunamanta yachakunchej? Ñaupajman apaj hermanosmanta llullasta parlajtinku, paykunata presochajtinku chayri qhatiykachajtinku ama manchachikunachu. Paykunapaj Jehovamanta mañapuna, familiasninkuta cuidana, imaynamantapis yanapariyta maskʼana (Hech. 12:5; 2 Cor. 1:10, 11).

13. ¿Imaynatá wajkuna burlakuwasqanchej Jehovamanta, llajtanmantapis iskayrayachiwasunman?

¹³ Ichá wakin mana testigo familiaresninchej, trabajomanta chayri escuelamanta compañerosninchej, predicasqanchejrayku chayri Jehovaj kamachiykunasninman jina kausakusqanchejrayku burlakuwasunman (1 Ped. 4:4). Ichapis niwasunman: “Qanqa kʼacha runalla kankipis. Religionnillayki ima religionchus ari, ni imata ruwajta saqesunkichejchu”, nispa. Wakintaj congregacionmanta qharqosqa kajkunawan mana parlasqanchejrayku niwasunman: “Runata munakuni ninkeqa. Chanta, ¿imajtín paykunata mana parlapayankichuri?”, nispa. Ajinata niwasqanchejqa ichá iskayrayachiwasunman, yuyachiwasunmantaj Jehová anchata mañawasqanchejta, llajtanpis mana atiy ruwanasta ruwachiyta munawasqanchejta. Ajinapi rikukushanchej chay, ¿imatá ruwasunman Jehovamanta, llajtanmantapis mana karunchakunapaj?

14. Jehovaj kamachiykunasninta kasukusqanchejrayku wajkuna burlakuwajtinchej, ¿imatá ruwasunman? (Salmo 119:50-52).

¹⁴ Jehovaj kamachiykunasninman jina kausakunallapuni. Jobqa wajkuna paymanta burlakojtinkupis, Jehovaj kamachiykunasninman jinapuni kausakorqa. Ujnin mana allin amigontaj, ajinata kausakunanpaj kallpachakusqanqa Diospaj qhasilla kasqanta yuyachiyta munarqa (Job 4:17, 18; 22:3). Jinapis Jobqa mana chay imasta creerqachu. Yacharqa imachus allin, imatajchus mana allin kasqanmanta Jehovaj kamachisqanqa allinpuni kasqanta. Chayman jinapunitaj kausakorqa. Wajkuna imata nejtinkupis, Diospa ñaupaqenpi mana juchayojllapuni kausakorqa (Job 27:5, 6). ¿Imatá Jobmanta yachakunchej? Wajkuna  burlakuwajtinchejpis amapuni Jehovaj kamachiykunasninmanta iskayrayanachu. Jehovaj kamachiykunasninta kasukusqanchejrayku imaynachus kunankama riwasqanchejpi piensarina. ¿Kutin kutitacharí rikorqanchej chay kamachiykuna mayta yanapawasqanchejta? Diospa llajtanqa Jehovaj kamachiykunasninman jina kausakunanchejta niwanchej. Noqanchejtaj chay niwasqanchejta tukuy sonqo kasukunallapuni. Ajinamanta runas mashkhata burlakuwajtinchejpis, ni jaykʼaj Jehovamanta tʼaqayta atiwasunchu (Salmo 119:50-52 leey).

15. ¿Imajtín Brizitpa familiaresnin paymanta burlakorqanku?

¹⁵ Hermananchej Brizitmanta parlarina, payqa Indiamanta. Familiaresnenqa testigo kasqanrayku paymanta burlakoj kanku. Payqa 1997 watapi bautizakorqa. Pisi tiemponmantaj, qosanqa mana trabajoyoj rikhurerqa, payqa mana testigochu karqa. Chayrayku enteron familianta tatasninpaman pusakaporqa, paykunawan tiyakunankupaj. Tatasnenqa waj llajtapi tiyakorqanku. Jinapis Brizitqa aswan llakiykunapiraj rikukorqa. Qosan manapuni trabajota tarisqanrayku, payñataj semanantinta trabajanan karqa familianta mantieneysinanpaj. Chantapis aswan qaylla kaj congregacionqa 350 kilómetros karupi kasharqa. Llakikunapaj jinataj, qosanpa familiaresnin payman churanakorqanku testigo kasqanrayku. Maytapuni churanakusqankuraykutaj, Brizitwan familianwanqa waj lugarmanñataj tiyakoj riporqanku. Jinallapitaj qosan wañuporqa. Chaymantataj 12 watitasniyoj ujnin warmi wawanñataj cancerwan wañuporqa. Mana chayllachu, Brizitpa familianñataj tukuy chay llakiy qhatirisqanmanta, payllataj juchayoj kasqanta nispa kayta nerqanku: “Manachus testigo kawaj karqa chayqa, mana kay imaspi rikukushawajchu karqa”, nispa. Jinapis payqa Jehovapi atienekullarqapuni, Diospa llajtanmantapis mana karunchakorqachu.

16. ¿Ima bendicionestataj Brizit japʼerqa Jehovamanta, llajtanmantapis mana karunchakusqanrayku?

¹⁶ Brizit congregacionninmanta may karupi tiyakusqanrayku, congregacionesta waturej hermanoqa yuyaycharerqa chay lugarpi predicananta,  wasinpitaj tantakuykunata ruwananta. Qallariypeqa mana atinanta yuyarqa, jinapis waturej hermanoj yuyaycharisqanman jina ruwarqa: predicayta qallarerqa, wasinpi tantakuykunata ruwarqa, wawasninwantaj Familiapi Diosta Yupaychanapaj tantakuyta ruwarqa. Chayta ruwasqanrayku Brizitqa ashkha runasman Bibliamanta yachachiyta qallarerqa, chay runasmantataj ashkhas bautizakorqanku. 2005 watapitaj precursora regular kayta qallarerqa. Payqa Jehovapi atienekusqanrayku, Diospa llajtanmantapis mana karunchakusqanrayku, ashkha bendicionesta japʼerqa. Tukuynin warmi wawasnenqa Jehovata tukuy sonqo sirvikushanku, lugarninpitaj iskay congregacionesña tiyan. Brizitqa sutʼita repararqa Jehová kallpata qosqanta tukuy chay llakiykunata, familianpa burlakusqankutapis aguantananpaj.

17. ¿Imatataj ruwaytapuni munanchej?

¹⁷ Satanasqa yuyachiyta munawanchej llakiykunapi rikukojtinchej Jehová saqerpariwasqanchejta, llajtanpi kaytaj llakiykunallata apamuwasqanchejta. Chantapis ñaupajman apaj hermanosmanta llullasta parlajtinku, paykunata qhatiykachajtinku chayri presochajtinku manchikunanchejta munan. Chantapis wajkuna burlakuwasqanchejmanta valekun Jehovaj kamachiykunasninpi, llajtanpipis niña atienekunanchejpaj. Jinapis noqanchejqa yachanchejña Satanás ima mañasniyojchus kasqanta, nitaj chaywan engañachikunchejchu (2 Cor. 2:11). Amapuni Satanaspa llullakusqanta creenachu, nitaj jaykʼajpis wasanchanachu ni Jehovatapis, ni llajtantapis. Yuyarikunapuni Jehová ni jaykʼaj saqerparinawanchejta (Sal. 28:7). Arí, amapuni saqenachu ni ima Jehovamanta tʼaqanawanchejta (Rom. 8:35-39).

18. ¿Imatá qhepan yachaqanapi qhawarisun?

¹⁸ Kay yachaqanapi qhawarerqanchej imaschus Jehovapi, llajtanpipis atienekusqanchejta pisiyachisqanta, chaytaj mana congregación ukhupichu rikhurisqanta. Jinapis congregación ukhupipis chayman rijchʼakoj imas kallanmantaj. Qhepan yachaqanapi qhawarisun imaynatachus chaykunata atipanata.