1, 2. 1) ¿Imatá kay yachaqanapi qhawarisun? 2) ¿Imaynapí reparanchej Jehová yanapaytapuni munawasqanchejta?

 JEHOVAQA problemasta aguantanapaj, kusiywantaj payta sirvinapaj yanapayta atiwanchej. Kay yachaqanapi qhawarisun imaynatachus Jehová chayta ruwasqanta, chantá imatachus ruwananchej kasqanta paywan sumajta yanapachikunapaj. Jinapis ñaupajtaqa kay tapuyman kutichina: ¿Cheqamantapunichu Jehová yanapayta munawanchej?

² Chay tapuyman kutichinapajqa, qhawarina ima palabratachus apóstol Pablo Hebreosman Cartanpi oqharisqanta. Chaypi qhelqarqa: “Jehová Diosmin yanapawajneyqa, mana manchachikusajchu. ¿Imanawanqataj runari?”, nispa (Heb. 13:6). Bibliata sutʼinchaj wakin diccionariosqa ninku, kay versiculopi “yanapawajneyqa” nisqa palabra, pipis yanapata mañakojtin chay rato yanapananpaj correj runamanta parlashasqanta. Tʼukurina pillapis llakiypi kashajtin, Jehová salvananpaj chay rato correshasqanpi. Chaypi tʼukurispa reparanchej Jehovaqa mana yanapallaytachu munawasqanchejta, manachayqa tukuy sonqo yanapayta munawasqanchejta. Jehová yanapawajtinchej ima pruebatapis kusiywan aguantayta atinchej.

3. ¿Imaynasmantá Jehová kusiywan aguantanapaj yanapawanchej?

³ ¿Imaynasmantá Jehová kusiywan aguantanapaj yanapawanchej? Isaías libropi chay tapuypa kutichiyninta tarinchej. Jehová Isaiasman sutʼinchasqan ashkha profeciasqa, kay tiempomanta Diospa kamachisninpi juntʼakullantaj. Chantapis Isaiasqa Jehovamanta parlananpaj, ashkha kutispi entiendeyta atinapaj jinalla palabrasta oqharin. Isaiasqa 30 capitulopi  kʼachitusta kikinchan imaynatachus Jehová llajtanta yanapasqanta. Chaypeqa nin Jehovaqa 1) mañakusqanchejta sumajta uyariwasqanchejta, kutichiwasqanchejtapis, 2) pusaykachawasqanchejta, 3) kunan bendeciwasqanchejta, qhepamanpis bendecinawanchejta. Chay kinsata ujmanta uj qhawarina.

4. 1) ¿Imatataj Jehová nerqa Isaiaspa tiemponpi judiosmanta, chanta ima qhatirinantataj saqerqa? 2) ¿Ima suyakuytataj Jehová kasukoj judiosman qorqa? (Isaías 30:18, 19).

⁴ Isaías 30 capituloj qallariyninpi, Jehovaqa judiosta nerqa ‘kʼullukoj wawas’ kasqankuta, nillarqataj “juchankuman astawan juchata” yapasqankuta. Chaymantataj nerqa: ‘Paykunaqa kʼullu runas kanku, Jehová Diospa leyninta mana uyariyta munankuchu’, nispa (Isa. 30:1, 9). Isaiasqa nerqa mana kasukusqankurayku Jehovaqa jatun llakiy qhatirejta saqenanta (Isa. 30:5, 17; Jer. 25:8-11). Ajinapunitaj karqa. Babiloniosqa paykunata presosta jina apakaporqanku. Jinapis chay judíos ukhupeqa Diosta kasukoj wakin runas kallarqankutaj. Profeta Isaiastaj paykunata nerqa uj pʼunchay Jehová paykunawan watejmanta kʼacha kananta. Chaytaj sumaj suyakuypuni karqa (Isaías 30:18, 19 leey). Chay nisqantaj juntʼakorqapuni. Jehovaqa paykunata Babiloniamanta kacharicherqa, jinapis mana chay ratochu. ‘Jehová Diosqa pacienciawan suyakushan qankunawan kʼacha kananpaj’ nispa Isaías nisqanqa, kasukoj judíos kacharichisqas kanankupaj uj tiemporaj pasanan kasqanta entiendecherqa. Jehovaqa 70 watasninmanraj saqerqa wakin judíos Jerusalenman kutipunankuta (Isa. 10:21; Jer. 29:10). Israelitasqa Babiloniapi presos kashaspa llakiymanta waqarqanku, jallpʼankuman kutipuspataj kusiymanta waqarqanku.

5. ¿Imatataj Isaías 30:19 sutʼita reparachiwanchej?

⁵ Kay tiempopipis Isaiaspa kay nisqanqa mayta kallpachallawanchejtaj: “Yanapata mañakuspa qhaparikojtiyki khuyakusonqapuni” (Isa. 30:19). Chay nisqanqa sutʼita reparachiwanchej, Jehovaqa mañakusqanchejta sumajta uyarinanta, usqhayllatataj kutichinawanchejta. Isaiasqa nillarqataj: “Uyarimusuytawankama kutichimusonqa”, nispa. Chaytaj yuyarichiwanchej Tatanchej Jehovaqa yanapata mañakojkunata mana yanapallaytachu munasqanta, manachayqa tukuy sonqo yanapayta munasqanta. Chayta yachayqa kusiywan aguantanapaj yanapawanchej, ¿icharí?

6. ¿Imaynatataj Isaiaspa nisqan rikuchin Jehová sapa uj kamachinpa mañakusqanta uyarisqanta?

⁶ Kay versiculoqa sutʼita reparachillawanchejtaj Jehovaqa sapa ujninchejpa mañakusqanchejta sumajta uyarisqanta. ¿Imajtín chayta ninchej? Isaías 30 capituloj ñaupaj kaj partenpi, Jehovaqa ‘qankuna’ nispa nin, tukuynin llajtanman parlashasqanrayku. Jinapis 19 versiculopeqa sapa uj kamachinman parlashasqanrayku ‘qan’ nispa nin. Isaías nin: “Qanqa manaña waqankichu”, “payqa khuyakusonqapuni”, “kutichimusonqa”, nispa. Jehovaqa munakuyniyoj Tata kasqanrayku, ujnin wawan desanimasqa kashajtin mana ninchu: “Hermanoyki jina aguantanayki tiyan á”, nispa. Astawanpis sapa ujninchejmanta llakikun, paypunitaj mañakusqanchejta uyariwanchej (Sal. 116:1; Isa. 57:15).

7. Isaiaspa nisqan, Jesuspa nisqanpis, ¿imaynatataj rikuchin kutin kutitapuni mañakunanchej kasqanta?

⁷ Ima llakiyninchej kajtin Diosninchejmanta mañakojtinchej, payqa ichapis ñaupajta aguantanapaj kallpataraj qowasun. Chay llakiyninchej munasqanchejman jina mana chay rato chinkajtintaj, ichapis chayta aguantanapaj kutin kutita kallpata mañakunanchej kanqa. Jehovataj chaytapuni ruwananchejta  niwanchej. Chaytataj reparanchej Isaiaspa kay nisqanpi: ‘Payta ama samarichiychejchu’, nisunman Jehovata (Isa. 62:7). ¿Ima niytá munan chay? Jehovamanta kutin kutita mañakunanchej kasqanta, chaytaj manapis samarichishasunmanchu jina kanman. Chayqa yuyarichiwanchej imatachus Jesús Lucas 11:8-10, 13 versiculospi mañakuymanta nisqanta. Ashkha kikinchaykunata oqharispa niwarqanchej ‘anchata mañakunanchejta’, espíritu santotapis mañakunallanchejtapuni. Chantapis Jehovamanta mañakullasunmantaj imatapis allinta ajllanapaj yanapanawanchejta.

8. ¿Imaynatá Isaías 30:20, 21 versiculospi nisqan ñaupa tiempopi juntʼakorqa?

⁸ (Isaías 30:20, 21 leey). Babiloniaj ejercitonqa Jerusalenta wata khuskanniyojta muyuykorqa. Tukuy chay tiempopi judíos maytapuni sufrisqankoqa, sapa día tʼanta jina, yaku jina karqa. Jinapis 20, 21 versículos nisqanman jina, Jehovaqa paykunata salvananta nerqa. Chaytataj ruwanman karqa arrepientekojtillanku, cambiajtillanku. Isaiasqa nerqa Jehovaqa llajtanpaj ‘Sumaj Yachachejnin’ kasqanta, payta munasqanman jina yupaychanankupajtaj yachachinanta. Chay nisqantaj judíos Babiloniamanta kacharichisqa kajtinku juntʼakorqa. Jehovaqa chaypacha rikucherqa Sumaj Yachachejninku kasqanta. Jehová judiosta ajinata yanapasqanrayku, watejmanta payllata yupaychayta aterqanku. Kunanpis Jehovaqa Sumaj Yachachejnillanchejtaj, chaytaj maytapuni kusichiwanchej.

9. ¿Imaynamantá Jehová kay tiempopi pusashawanchej?

⁹ Jehová yachachiwasqanchejqa may sumajpuni. Kay versiculospi Isaiasqa yachakojkunawan kikinchawanchej, pikunamanchus Jehová iskaynejmanta yachachin. Ñaupajta Isaiasqa kayta nin: “Sumaj Yachachejniykitaqa ñawisniykiwanpuni rikunki”, nispa. Kay kikinchaypi yachachejqa yachakojkunaj ñaupaqenpi sayashan. ¿Imaynamantá Jehová kay tiempopi yachachiwanchej? Llajtannejta. Maytapuni agradecekunchej llajtan reunionesnejta, asambleasnejta, publicacionesnejta, videosnejta, waj imasnejtawan sutʼita yachachiwasqanchejmanta. Ajinata Jehová pusashawasqanchejqa, llakiy tiempospi kusiywan aguantanapaj yanapawanchej.

10. ¿Imaynamantá Diospa parlasqanta ‘wasanchejmanta uyarinchej’?

¹⁰ Isaiasqa nillarqataj imaynamantawanchus Jehová yachachiwasqanchejta. Pay nerqa: “Wasaykimanta kayta nishajta uyarinki”, nispa. Kaywan Isaiasqa Jehovata kikinchasharqa  yachakojkunaj qhepankuta rej yachachejwan, purisqankuta sumajta qhawaspa, maynintachus rinankuta sutʼita rikuchispa ima. ¿Imaynamantataj kay tiempopi Diospa parlasqanta wasanchejmanta uyarinchej? Bibliata leespa. Bibliapeqa Diospa nisqasnin ashkha watas ñaupajtaña qhelqakorqa. Chayrayku Bibliata leespaqa, ñaupa tiempopi qhelqachisqanta uyarishanchej, chaytaj Jehovaj parlasqanta wasanchejmantapis uyarishasunman jina (Isa. 51:4).

11. ¿Imatá ruwananchej tiyan kusiywan aguantanapaj, chanta imaraykutaj?

¹¹ ¿Imatá ruwasunman Jehová llajtannejta, Palabrannejta pusashawasqanchejwan sumajta yanapachikunapaj? Isaiasqa iskay imasmanta parlarqa. Ñaupajta nerqa: “Kaymin cheqan ñanqa”, nispa. Chantá nerqa: “Kayninta riy”, nispa (Isa. 30:21). Chayrayku mana ‘ñanta’ rejsinallanchejchu tiyan, manachayqa chayninta ‘rinanchej’ tiyan. Diospa Palabranpi, llajtan imastachus sutʼinchawasqanchejpipis yachakunchej, imatachus Jehová ruwananchejta munasqanta, imaynatachus chay yachakusqanchejman jina ruwanatapis. Chay iskay imasta ruwananchej tiyan Jehovata sirvispa kusiywan aguantanallapajpuni. Ajinallamanta mana iskayrayasunchu Jehová bendecinawanchejmanta.

12. Isaías 30:23-26 nisqanman jina, ¿imaynatá Jehová llajtanta bendecinman karqa?

¹² (Isaías 30:23-26 leey). ¿Imaynatá kay profecía ñaupa tiempopi juntʼakorqa? Babiloniamanta Israelman kutinpoj judiosqa, ashkha bendicionesta Jehovamanta japʼerqanku kausakunankupaj, paytapis sirvinallankupajpuni. Jehovaqa kausakunankupaj ashkha mikhunata paykunaman qorqa. Astawanqa payman qayllaykunankupaj, watejmantataj payllata yupaychayta qallarinankupaj tukuy ima necesitasqankuta qorqa. Diospa llajtanqa chay tiempokama, manaraj chay jina ashkha bendicionesta japʼisqarajchu. Versículo 26 nisqanman jina, Jehovaqa paykunata yanaparqa Palabranta entiendenankupaj, chaytaj astawanpis kʼanchayta qonman jina karqa (Isa. 60:2). Ajinata bendecisqanrayku Diospa kamachisnenqa kusisqa, kallpayojtaj kasharqanku payta sirvinallankupajpuni. Arí, maytapuni ‘sonqonku tʼikarisharqa’ (Isa. 65:14).

13. ¿Imaynatá kay tiemponchejpi juntʼakun Jehovallata watejmanta yupaychaymanta profecía?

¹³ Jehovallata watejmanta yupaychaymanta profecía, ¿kay tiemponchejpi juntʼakullantajchu? Arí. 1919 watamantapacha may chhika runas Jatun Babiloniamanta, nisunman mundontinpi llulla religionesmanta kacharichisqa  karqanku. Paykunaqa Sumaj Jallpʼamanta nisqa, aswan sumaj lugarman apasqa karqanku. Chaytaj uj paraíso jina (Isa. 51:3; 66:8). ¿Imataj chay paraíso?

14. ¿Imataj uj paraíso jina, pikunataj chaypi kay tiempopi kashanku? (Sutʼinchayninta qhawariy).

¹⁴ Ajllasqa cristianosqa 1919 watamantapacha chay paraisoman yaykunku. b Tiempo pasasqanman jinataj, waj ovejasmanta kajkunapis nisunman kay jallpʼapi kausakuyta suyakoj cristianospis, chay paraisoman yaykullankutaj, may chhika bendicionestataj Jehovamanta japʼinku (Juan 10:16; Isa. 25:6; 65:13).

15. ¿Maypitaj chay paraíso kashan?

¹⁵ ¿Maypitaj kay tiempopi chay paraíso kashan? Diospa kamachisnin jallpʼantinpi kasqankurayku, chay paraisopis jallpʼantillanpitaj kashan. Chayrayku Jehovallata tukuy sonqo yupaychasun chayqa, maypi tiyakuspapis chay paraisopi kayta atinchej.

16. ¿Imatá ruwasunman chay paraíso kʼachitu kasqanta reparanallapajpuni?

¹⁶ Chay paraisollapipuni kananchejpajqa jallpʼantinpi Diospa llajtan kasqanmanta agradecekunallanchejpuni tiyan. ¿Imaynatá chayta ruwasunman? Hermanosninchejpa allin ruwasqasninkutapuni qhawaspa, manataj pantasqasninkutachu (Juan 17:20, 21). ¿Imajtintaj chayta ruwananchejpuni tiyan? Kay kikinchaypi piensarina. Uj kʼachitu montepi chayri uj kʼachitu jardinpeqa imaymana sachʼas tiyan. Ajinallatataj congregacionpipis chay sachʼas jina tukuy laya runas kanchej (Isa. 44:4; 61:3). Qayllanchejpi kaj sachʼas mana chaykama kʼachituschu kasqallankuta qhawasunman chayqa, mana reparayta atisunmanchu tukuynin monte may kʼachitu kasqanta. Ajinallatataj pantasqasnillanchejta, chayri congregacionmanta hermanosninchejpa pantasqasnillankuta qhawasunman chayqa, mana reparayta atisunmanchu Diospa llajtan may kʼachitu, ujchasqataj kasqanta.

17. ¿Imatá sapa ujninchej ruwasunman congregacionpi ujchasqallapuni kanapaj?

 ¹⁷ ¿Imatá sapa ujninchej ruwasunman congregacionpi ujchasqallapuni kanapaj? Tukuy atisqanchejta ruwana allin kausay kananpaj (Mat. 5:9; Rom. 12:18). Congregacionmanta hermanosninchejwan allinta apanakunapaj kallpachakojtinchejqa, chay paraíso aswan kʼachitu kananpaj yanapakunchej. Amapuni qonqakunachu chay paraisopi kajkunataqa, sapa ujta Jehovapuni chayman pusaykamusqanta payllata yupaychanankupaj (Juan 6:44). Jehovaqa maytachá kusikun tukuy kamachisnin allinpi kanapaj, ujchasqataj kanapaj kallpachakusqanchejta rikuspa. Paypajqa tukuy kamachisnin may munasqa kanchej (Isa. 26:3; Ageo 2:7).

18. ¿Imapitaj sapa kuti tʼukurinanchej tiyan, chanta imaraykutaj?

¹⁸ ¿Imatá ruwasunman Jehová kamachisninman bendicionesta qosqanwan sumajta yanapachikunapaj? Diospa Palabranpi, publicacionesninchejpipis imastachus yachakusqanchejpi sumajta piensarina. Estudiajtinchej, tʼukurejtinchejtaj kʼacha kaykunata rikuchiyta atisun. Chaytaj yanapawasun congregacionpi uj ‘familia jina tukuy sonqo munanakunapaj’ (Rom. 12:10). Jehová ima bendicionestachus kunan qowasqanchejpi piensarispaqa, astawan payman qayllaykunchej. Jehová ima bendicionestachus qhepaman qonawanchejpi tʼukurispataj, tukuy sonqo suyakullasunpuni payta wiñaypaj sirviyta. Tukuy chaytaj yanapawasun Jehovata aswan kusisqa sirvinapaj.

19. 1) Isaías 30:18 nisqanman jina, ¿imatataj sutʼita yachanchej? 2) ¿Imataj yanapawasun kusiywan aguantanapaj?

¹⁹ Jehovaqa kay mundota chinkachishajtin, yanapanawanchejpaj ‘sayarenqa’ (Isa. 30:18). ‘Justiciata ruwaj Dios’ kasqanrayku, yachanchej payqa Satanaspa mundonta maychus tiemponpipuni chinkachinanta (Isa. 25:9). Jehovapis noqanchejpis pacienciawan suyakushanchej, kacharichisqa kananchej pʼunchay chayamunanta. Chaykamataj may jatunpaj qhawayta munanchej paymanta mañakuyta, Palabranta estudiayta, chayman jina kausakuyta, bendicionesninchejpipis tʼukuriyta. Tukuy chayta ruwasun chayqa, Jehová yanapawasun payta sirvispa kusiywan aguantanallapajpuni.