Imachus chay kutipi pasawasqaykuta niraj willarishaspa, cuentarisqaykichej imachus Jehová Diospaj astawan llankʼanaypaj yanapawasqanta.

Caribepi Curazao nisqa kʼachitu islapi 1942 watapi nacekorqani. Tatayqa Surinampi nacekusqa, jinapis trabajaj ripusqa Curazaoman, nacekusqaymantataj uj mashkha watas ñaupajta bautizakusqa. Payqa Curazaopi ñaupaj kaj testigosmanta ujnin karqa. a Tukuynin wawasninman sapa semana Bibliata estudiachiwaj kayku. Noqaykoqa phishqa wawas karqayku, jinapis mana Bibliata estudiayta munallajchu kayku. 14 watasniyoj kashajtiytaj, tatayqa Surinamman pusakapuwarqayku, chaypi mamanta cuidanaykupaj, payqa awelitaña karqa.

Surinampi kaspaqa Jehovata tukuy sonqo sirvej joveneswan amigos ruwakorqani. Paykunaqa noqamanta tumpa kuraj karqanku, precursores regularestaj karqanku. Predicacionpi imaynachus risqanmantaqa may kusiywan parlarej kanku. Tantakuy tukukusqantawantaj Bibliamanta parlariy gustawaj kayku. Wakin kutistaj estrellasta qhawarispa parlarej kayku. Chay jina amigosniyoj kasqayrayku, Jehovapaj llankʼayta munasqayta reparakorqani. Chayrayku 16 watasniyoj kashaspa bautizakorqani. 18 watasniyoj kashaspataj precursor regular kayta qallarerqani.

Precursor kaspaqa ashkha imasta yachakorqani. Chaytaj kunankama Jehová Diospaj astawan llankʼasqaypi yanapawan. Ujtaqa yachakorqani hermanosta wakichinapuni kasqanta. Precursor kayta qallarishajteyqa, uj misionero Willem van Seijl sutiyoj mayta yanapawarqa. b Payqa yachachiwarqa imaynatachus congregacionpi ruwanasta juntʼana kasqanta. Chay tiempopeqa ni yuyallarqanipischu chay yachachiwasqan  mashkhatachus yanapanawanta. Watanmanqa precursor especial kanaypaj churawarqanku. Chaymantatataj Surinam monte ukhuspi, karupi kaj grupitosmanta encargakunay karqa. ¡Mayta agradecekuni hermanos sumajta wakichiwasqankumanta! Chaymantapacha noqapis wajkunata wakichinaypaj tiempochakuni.

Chantapis yachakullarqanitaj sumajta midirikuspa pisi imasllawan kausakuyta. Killa qallariytaqa imastachus qhepan semanas mikhunaykuta, imastachus apakunaykutapis ujnin precursor especialwan qhawarejña kayku. Chaymantataj karuta viajaspa capitalkama ujniyku rej kayku chay necesitasqaykuta rantikoj. Diospa llajtan qolqesituta qowasqaykuta, imastachus rantikusqaykuta ima killantinpaj alcanzachikunayku karqa. Imastachus rantikusqayku monte ukhupi tukukapunman karqa chayqa, nichá pipis yanapariyta atiwaykumanchu karqa. Jovencituymantapacha sumajta midirikuspa pisi imasllawan kausakuyta yachakorqani, chaytaj Jehovata sirvinallaypajpuni yanapawarqa.

Kaytapis yachakullarqanitaj: Runasmanqa Bibliamanta parlayninkupi yachachiy aswan sumaj kasqanta. Wawamantapacha parlaj kani holandesta, inglesta, papiamentota, surinamesta ima (chay parlaytaqa sranan sutiwan rejsikullantaj). Chay parlaytaqa Surinampi astawan parlanku. Monte ukhupi predicaspataj repararqani, runasqa idiomankupi predicajtinchej aswan sumajta uyarikoj kasqankuta. Chay lugarmanta wakin idiomastaqa mana parlayta atillajchu kani. Chaykunamanta ujqa karqa saramacano nisqa parlay. Jinapis mana qhasillatachu kallpachakorqani. Watas pasasqanman jina, ashkha runasta Jehovata rejsinankupaj yanaparqani.

Waj parlayta yachakushajtiy ashkha kutista pantarqani, pʼenqaypitaj rikhurej kani. Uj kutipi Bibliamanta yachakoj uj warmita, tapuriyta munarqani imaynachus kashasqanta, imaraykuchus wijsa nanaywan kasharqa. Jinapis “¿onqojkuchu kashanki?” nispalla tapuykusqani. Ajinata tapuspataj pʼenqarpachillarqani. Ajinasta pantajtiypis, kallpachakullarqanipuni runaspa parlayninkuta parlanaypaj.

1970 watapeqa congregacionesta waturinaypaj churawarqanku. Chay watapi monte ukhupi kaj grupitospi uj discursota qorqani. Chaytaj karqa diapositivaswan, sutikorqataj “Jehovaj testigosninpa centralninkuta visitarispa”. Chay grupitosta visitanaykupajqa, waj hermanoswan khuska mayusninta viajaj kayku maderamanta botepi. Apakojtaj kayku corrienteta rikhurichinapaj motorta, gasolinayoj tanqueta, querosenwan kʼanchaj lamparasta, chay diapositivasta rikuchinaykupaj aparatosta ima. Uj lugarman botepi chayaytawantaj, tukuy chayta chakillapiña apanayku karqa maypichus diapositivasta rikuchinayku karqa chaykama. Chay lugaresman risqaykumantaqa, astawan yuyarikuni Bibliamanta yachachisqaykumanta runas mayta agradecekusqankuta. May kusisqa kaj kani Jehovata, llajtantapis rejsinankupaj runasta yanapasqaymanta. Mayta kusikuni runasta Jehová Diosman qayllaykunankupaj yanapasqaymanta. Chay ruwayqa ni imawan kikinchakunchu.

Yacharqani soltero jina congregacionesta waturiy sumaj kasqanta. Jinapis casarakuytapuni munarqani. Chayrayku Jehovamanta mañakorqani monte ukhupi noqawan khuska sirviyta munaj warmita, chay llankʼaywantaj gustachikunanta. Watanman jinataj Ethelwan rejsinakuyta qallarerqani. Payqa precursora especial karqa, Jehovapajtaj sinchʼita llankʼarqa mana atinanpaj jina kajtinpis. Ethelqa jovencitanmantapacha apóstol Pablota jatunpaj qhawasqa, pay jinataj tukuy atisqanta willayta munasqa. Paywan casarakorqani septiembre de 1971 watapi, khuskataj congregacionesta waturispa karqayku.

Ethelqa mana qhapaj familiamantachu karqa. Chayrayku montepi congregacionesta waturiymanqa yachaykukuyta atillarqa. Montepi aswan karu congregacionesta visitanayku kajtin, mana ashkha imastachu apakoj kayku. Ropasniykutaqa tʼajsakullaj kayku, mayuspitaj bañakoj kayku. Chantapis yachaykukunayku karqa hermanos imatachá qoriwaj kayku chayta mikhunaykupaj. Wakin kuteqa iguanasta, pirañasta chayri waj animalesta japʼej kanku chayri pescaj kanku, chaytataj waykʼupuwaj kayku. Platos mana kajtenqa plátano laqhespi mikhoj kayku. Cucharas mana kajtintaj makisniykuwan mikhoj kayku. Jehovapaj tukuy chay imasta warmiywan khuska ruwasqaykoqa, yanapawarqayku kinsa qʼaytusmanta sumaj kʼantisqa qʼaytu jina kanaykupaj (Ecl. 4:12). Mana imawanpis tukuy chay ruwasqaykuta cambiaykumanchu.

Imatachus qallariypi willarerqaykichej chayqa, chay montespi visitasqaykumanta kutinpushajtiyku pasarqa. Yaku usqhayllata rin chaynejpi boteyku chinkaykojtinpis, chay rato tuyturpamullarqataj. Walejtapuni salvavida chalecosniyoj karqayku, nitaj botemanta urmaykorqaykuchu. Jinapis boteykoqa yakuwan juntʼa kasharqa. Chayrayku imaspichus mikhunata apakusharqayku chaykunata qʼalata yakuman thallirarqayku, chaykunawan boteykumanta yakuta qhallinaykupaj.

 Mana mikhunayoj qhepakusqaykuraykutaj, mayunta botepi uraykushaspa pescaj churakorqayku, nitaj ni uj pescadollatapis japʼerqaykuchu. Chayrayku Jehovamanta mañakorqayku chay diapaj mikhunata qonawaykuta. Orakusqaykutawankamataj, ujnin hermanoqa anzuelota choqaykorqa, uj pescadotataj japʼerqa. Chayta chay tuta phishqantiyku mikhorqayku, tukuyniykutaj sumajta sajsakorqayku.

Phishqa watastaña señoraywan congregacionesta waturishajtiyku, yacharqayku wawitayoj kanaykuta, chaytataj mana suyasharqaykuchu. Noqaqa chaymanta kusisqa kasharqani. Jinapis mana yacharqanichu imaynatachus kausayniykuta chay cambiananta. Ethelwan noqawanqa, tukuy sonqo munarqayku atikojtenqa Jehovapaj astawan llankʼallaytapuni. 1976 watapeqa kuraj wawayku nacekorqa. Payqa sutikun Ethniël. Iskay wata khuskanninmantaj wawayku Giovanniñataj nacekorqa.

Chay tiempopi Surinampi congregacionesta waturej necesitakusqanrayku, sucursalqa niwarqa noqa waturinallaytapuni. Wawasniyku juchʼuyllaraj kashajtinkoqa, pisi congregacionesniyoj circuitosllata waturej kani. Ajinamanta killapeqa iskay semanasllata congregacionesta waturej kani, iskay semanatataj congregacionnillaypi precursor jina kaj kani. Señoraywan wawasniywanqa, wasiykumanta mana karupi kaj congregacionesta visitarejtiy, noqawan rej kanku. Jinapis asambleasta ruwaj, chayri congregacionesta waturej monte ukhuman rinay kajtenqa, sapallay rej kani.

Tukuy ruwanasniyta sumajta juntʼanaypajqa, sumajta organizakunay karqa. Familiapi Diosta Yupaychanapaj tantakuytaqa sapa semana ruwajpuni kani. Monte ukhupi congregacionesta waturinaykamataj, warmiyñataj chayta ruwaj wawasniywan khuska. Sapa atispa familiapi imatapis ruwajpuni kayku. Chantapis wawasniykuwan pujllarinaykupaj chayri wasiyku qayllaspi kʼachitu lugarespi pasearimunaykupaj tiempochakojpuni kayku. Sapa kuti Diospa llajtanpi ruwanasniyta wakichikuspa tutakama qhepakoj kani. Señorayqa Proverbios 31:15 nisqanman jina sumaj warmipuni. Payqa laqha laqhataña jatarikoj chay diapaj textota khuska leerinaykupaj, khuskataj desayunanaykupaj lloqallitusniyku niraj escuelaman ripushajtinku. Maytapuni agradecekuni señoray chay jina sumaj warmi kasqanmanta. Payqa kunankama mayta yanapawan Diospa llajtanpi ruwanasniyta juntʼanaypaj.

 Iskayniyku mayta kallpachakorqayku wawasniykuman yachachinaykupaj Jehovata munakuyta, predicaywanpis gustachikunankupaj. Chantapis Jehovapaj astawan llankʼanankuta munarqayku. Jinapis mana noqayku nisqaykuraykuchu, manachayqa paykuna munasqankurayku chayta ruwanankuta. Paykunamanqa parlarejpuni kayku Jehovapaj astawan llankʼaspa imayna kusisqachus kanankumanta. Jehovapaj llankʼaspa ima llakiykunapichus rikukusqaykumanta parlajtiykupis, astawan parlaj kayku imaynatachus Jehová yanapawasqaykumanta, familiaykutapis bendecisqanmanta. Chantapis tukuy imata ruwaj kayku, wawasniyku Jehovata sirviyta ñaupajman churaj hermanoswan masichakunankupaj.

Jehovaqa ni jaykʼaj imatapis faltachiwarqaykuchu. Tata jinaqa kallpachakorqanipuni familiayman necesitasqanta qonaypaj. Soltero kashaspa monte ukhupi precursor jina sirvisqaypi, yachakorqani sumajta midirikuspa tukuy imapaj qolqeta alcanzachikuyta. Jinapis wakin kutisqa mayta kallpachakojtiykupis, mana alcanzachikuyta atillajchu kayku. Mana iskayrayaspa niyman chay kutispeqa Jehovapuni yanapawasqaykuta. 1986 watamanta 1992 watakama Surinampi guerra civil karqa. Chayrayku wakin kuteqa ni sapa diapaj necesitasqaykutapis tariyta atillajchu kayku. Jinapis Jehovaqa cuidawarqaykupuni (Mat. 6:32).

Jehovaqa ni jaykʼaj saqerpariwarqaykuchu, yanapawarqaykutaj kusisqa, sonqo juntʼasqa kausakunaykupaj. Wawasniykoqa sumaj bendicionpuni noqaykupaj kanku, maytataj agradecekuyku Jehovata sirviyta paykunaman yachachisqaykumanta. Maytapuni kusikuyku kunankama Jehovapaj astawan llankʼashasqankumanta. Ethniëlwan Giovanniwanqa, Diospa llajtanpi escuelasmanta graduakorqanku, kunantaj señorasninkuwan khuska Surinam sucursalpi sirvishanku.

Ethelwan noqawanqa machitusña kayku. Jinapis precursores especiales jina Jehovapaj llankʼashallaykupuni. Diospa llajtanpi ruwanaswan may ocupasqa kasqaykurayku, kunankama nipuni nadaytapis yachakunirajchu. Jinapis imastachus Jehovapaj ruwasqaymanta manapuni arrepientekunichu. Kausayniypi tʼukurispa, tukuy sonqo niyman jovencitoymantapacha Jehovapaj astawan llankʼayta qallarispaqa, may sumajtapuni ajllasqayta.