1. ¿Imaynatá yuyaynillanchejpipuni kasunman? (2 Timoteo 4:5).

 PRUEBASPI kajtinchej Jehovamanta, llajtanmantapis karunchakuyta atisunman. ¿Imataj yanapawasunman mana karunchakunapaj? Yuyayninchejpi kana, rijchʼarisqallapuni kana, creeypitaj sinchʼita sayana (2 Timoteo 4:5 leey). ¿Imaynatá yuyaynillanchejpipuni kasunman? Sonqo tiyasqallapuni kaspa, sumajta piensarispa, Jehová jinataj imatapis qhawanapaj kallpachakuspa. Chayta ruwasun chayqa, mana imaynachus kashasqanchejman jinallachu imatapis ruwarpasun.

2. ¿Imatá kay yachaqanapi yachakusun?

² Ñaupaj yachaqanapi yachakorqanchej kinsa imas Jehovamanta karunchayta atiwasqanchejta, chay imastaj mana congregacionpichu kanman. Kay yachaqanapitaj yachakusun, ima kinsa imaschus congregación ukhupi Jehovamanta karunchayta atiwasqanchejta. Chaykunataj kanku: uj hermano sonqonchejta nanachiwasqanchejta yuyajtinchej, cheqanchasqa kajtinchej, Diospa llajtanpi cambios kasqanman mana yachaykukuyta atillajtinchej. Ajinapi rikukuspa, ¿imatá ruwasunman yuyaynillanchejpipuni kanapaj, chantá Jehovamanta, llajtanmantapis mana karunchakunapaj?

3. ¿Imataj pasanman uj hermano sonqonchejta nanachiwasqanchejta yuyashanchej chay?

³ Ichá maykʼajllapis uj hermano sonqonchejta nanachiwarqanchej, chay hermanotaj ichapis uj anciano karqa. Ichapis chay hermanoqa mana sonqonchejta nanachiytapunichu munarqa (Rom. 3:23; Sant. 3:2). Jinapis mayta sonqonchej nanawarqanchej. Ichapis chay piensarisqalla kasqanchejrayku ni puñukuytapis  aterqanchejchu, nerqanchejtaj: “Uj hermano ajinata ruwawan chay, ¿Diospa llajtanpunichu kay kanman?”, nispa. Satanasqa chaytapuni yuyananchejta munan (2 Cor. 2:11). Ajinasta yuyasqanchejtaj Jehovamanta, llajtanmantapis karunchawasunman. Uj hermano chayri uj hermana sonqonchejta nanachiwasqanchejta yuyajtinchej, ¿imatá ruwasunman yuyaynillanchejpipuni kanapaj, nitaj Satanás munasqanman jina yuyanapaj?

4. 1) ¿Imatataj José ruwarqa yuyaynillanpipuni kananpaj hermanosnin sufrichejtinkupis? (Génesis 50:19-21). 2) ¿Imatá Josemanta yachakunchej?

⁴ Ama phiñakuywan atipachikunachu. Josetaqa jovencitullaraj kashajtin kuraj hermanosnin sufricherqanku. Mayta chejnikorqanku, wakin hermanosnintaj wañuchiyta ima munarqanku (Gén. 37:4, 18-22). Chantataj esclavota jina vendeykorqanku. Chayrayku Joseqa 13 watasta jinapuni, imaymana sinchʼi pruebaspi rikukorqa. Joseqa yuyayta atinman karqa Jehová mana munakusqanta, llakiypi kashajtintaj saqerparisqanta. Jinapis mana phiñakuywan atipachikorqachu. Astawanpis yuyaynillanpipuni karqa, sonqo tiyasqallapunitaj karqa. Hermanosninmanta vengakuyta atispañataj, mana vengakorqachu. Astawanpis paykunata munakusqanta rikucherqa, perdonarqataj (Gén. 45:4, 5). ¿Imajtín chayta ruwarqa? Sumajta piensarisqanrayku. Problemasnillanpi yuyananmantaqa, imachus Jehovaj munaynin kasqanpi astawan yuyarqa (Génesis 50:19-21 leey). ¿Imatá Josemanta yachakunchej? Pillapis sonqonchejta nanachiwanchej chayqa, ama Jehovapaj phiñakunachu, nitaj yuyanachu Jehová noqanchejmanta qonqapusqanta. Astawanpis imaynatachus Jehová llakiyninchejta aguantanapaj yanapashawasqanchejpi tʼukurina. Chantapis perdonanapaj wakichisqa kana, yuyarikunataj ‘munakoyqa ashkha juchasta pʼampasqanta’ (1 Ped. 4:8).

5. ¿Imaynatá Miqueas yuyaynillanpipuni karqa sonqonta mayta nanarpachisqankuta yuyajtinpis?

⁵ Sudamericamanta Miqueas sutiyoj ancianomanta parlarina. b Uj pacha payqa, yuyarqa Diospa llajtanpi ashkha ruwanasniyoj hermanos, allinninmantapuni sonqonta nanarpachisqankuta. Pay nin: “Ni jaykʼaj ajinapi rikukorqanichu. May llakisqapuni kasharqani, mana puñukuytapis aterqanichu. Ni imata ruwayta atispataj waqarikoj kani”, nispa. Jinapis Miqueasqa yuyaynillanpipuni karqa, maytataj kallpachakorqa mana sonqo nanasqallapuni kananpaj. Payqa chayta aguantananpaj maytapuni Jehovamanta mañakorqa espíritu santonta, kallpatapis. Chantapis publicacionesninchejpi yuyaychaykunata maskʼaj. ¿Imatá paymanta yachakunchej? Uj hermano chayri uj hermana sonqonchejta nanachiwasqanchejta yuyanchej chayqa, kallpachakuna sonqo tiyasqallapuni kanapaj, nitaj mana allin imasta yuyanapaj. Noqanchejqa mana yachanchejchu imaraykuchus chay hermano imatapis niwasqanchejta chayri ruwawasqanchejta. Chayrayku tukuy imata Jehovaman willakuna, mañakunataj chay hermano jina yuyanapaj yanapanawanchejta. Chayta ruwasun chayqa, mana yuyasunchu sonqonchejta nanachiyta munaspapuni chayta niwasqanchejta chayri ruwawasqanchejta, chay hermanotataj perdonayta atillasun (Pro. 19:11). Amapuni qonqanachu Jehová tukuy imata qhawamushasqanta, aguantanapajtaj kallpata qonawanchejta (2 Cró. 16:9; Ecl. 5:8).

6. ¿Imaraykutaj yuyarikunanchejpuni tiyan Jehovaqa munakuwasqanchejrayku cheqanchawasqanchejta? (Hebreos 12:5, 6, 11).

⁶ Cheqanchasqa kajtinchejqa mayta sonqonchej nanawasunman. Chay yuyasqalla  kasunman chaytaj, yuyasunman qhasimanta cheqanchawasqanchejta, nitaj noqanchejpaj jinachu chay cheqanchay kasqanta. Chantapis qonqapusunman Jehovaqa munakuwasqanchejrayku cheqanchawasqanchejta (Hebreos 12:5, 6, 11 leey). Sonqo nanasqallapuni kasunman chayqa, Satanás chaymanta valekunman urmachinawanchejpaj. Payqa Jehová cheqanchawasqanchejta mana japʼikunanchejta munanchu, astawanqa Jehovamanta, congregacionmantapis karunchakunanchejta munan. Qan cheqanchasqa karqanki chay, ¿imatá ruwawaj yuyaynillaykipipuni kanaykipaj?

7. 1) Dibujospi rikunchej jina, ¿ima ruwaykunatataj Jehová Pedroman qorqa cheqanchasqa kayta japʼikusqanrayku? 2) ¿Imatá Pedromanta yachakusunman?

⁷ Cheqanchawasqanchejta japʼikuna, necesitakusqanman jinataj cambiana. Jesusqa ashkha kutispi Pedrota kʼamerqa waj apostolespa ñaupaqenkupi (Mar. 8:33; Luc. 22:31-34). Pedropajqa pʼenqaychá karqa. Jinapis manapuni Jesusmanta karunchakorqachu, astawanpis kʼamichikusqanta japʼikorqa, pantasqasninmantataj yachakorqa. Chayrayku Jehovaqa Pedrota bendicerqa, congregacionpitaj jatuchaj ruwaykunata qorqa (Juan 21:15-17; Hech. 10:24-33; 1 Ped. 1:1). ¿Imatá Pedromanta yachakunchej? Pʼenqaypi rikhurisqallanchejpi yuyanamantaqa, cheqanchawasqanchejta japʼikuna, necesitakusqanman jinataj cambiana. Chaytaj allinninchejpaj, wajkunaj allinninkupaj ima. Ajinamanta Jehovaqa llajtanpi astawan ruwanasta qowasun, hermanosninchejtapis astawan yanapakusun.

8, 9. ¿Imaynataj Bernardo kasharqa cheqanchasqa kasqantawan, chanta imataj yanaparqa yuyayninta cambiananpaj?

⁸ Mozambiquemanta Bernardo sutiyoj hermanomanta parlarina. Payqa anciano karqa, jinapis nerqanku manaña ancianochu kananta. Chayrayku, ¿imaynataj qallariypi kasharqa? Pay nin: “May sonqo nanasqapuni kasharqani cheqanchawasqanku mana gustawasqanrayku”, nispa. Payqa astawan llakikorqa congregacionninmanta hermanos imatachus paymanta ninankumanta. Bernardo nin: “Killasninmanraj repararqani cheqanchawasqankoqa allillan kasqanta, chantapis Jehovapi, llajtanpi ima watejmanta atienekuyta aterqani”, nispa. ¿Imataj chaypaj yanaparqa?

⁹ Bernardoqa imatachus yuyasqanta cambiarqa. Pay nin: “Anciano kashaspaqa Hebreos 12:7 versiculowan hermanosta yanapaj kani, Jehovaj cheqanchayninta allin ñawiwan qhawanankupaj.  Chantá tapukorqani: ‘¿Pikunataj kay versiculoj nisqanta kasukunanku tiyan?’, nispa. Noqallataj kutichikorqani: ‘Tukuy Jehovaj kamachisnin, noqapis chay ukhullapitaj kashani’, nispa”. Bernardoqa Jehovapi, llajtanpipis astawan atienekunanpaj kayta ruwarqa: Bibliata leerinanpaj, chaypitaj sumajta tʼukurinanpaj astawan tiempochakorqa. Hermanos paymanta imatachus yuyanankumanta llakikojtinrajpis, paykunawan khuska predicaj, tantakuykunamanpis rej. Tiemponmantaj watejmanta anciano karqa. Sichus qanpis cheqanchasqa karqanki chayqa, hermano Bernardo jina ruway. Ama pʼenqaypi rikhurisqallaykipichu yuyay, astawanqa imatachus yuyaychasusqankuta japʼikuy, necesitakusqanman jinataj cambiay (Pro. 8:33; 22:4). c Chayta ruwanki chayqa, Jehovaqa bendecisonqapuni paymanta, llajtanmantapis mana karunchakusqaykirayku.

10. ¿Ima cambiotaj wakin israelitasta pruebaman churananpaj jina karqa?

¹⁰ Diospa llajtanpi cambios kajtin, ichapis mana kasukuyta atillasunmanchu. Mana allinta qhawarikuspaqa Jehovamantapis karunchakusunman. Moisespa Leynin rikhurisqantawan imaschus wakin israelitaspaj cambiasqanpi tʼukurina. Niraj chay Ley rikhurishajtin, sapa familiamanta uma kajkuna wasinkupi sacerdotes kaj kanku. Paykuna altaresta ruwaj kanku, Jehovamanpis familiankurayku ofrendasta jaywaj kanku (Gén. 8:20, 21; 12:7; 26:25; 35:1, 6, 7; Job 1:5). Jinapis Ley rikhurisqantawanqa, familiamanta umasqa niña chayta ruwayta aterqankuchu. Jehovaqa ofrendasta jaywanankupaj Aaronpa familianmanta kajkunata sacerdotesta churarqa. Chay kutimantapacha, Aaronpa familianmanta kajkunalla ofrendasta jaywayta aterqanku. Waj familiasmanta uma kajkuna chayta ruwajtinkutaj, wañuchisqa kananku karqa (Lev. 17:3-6, 8, 9). d ¿Chayraykuchu Corewan, Datanwan, Abiramwan, Israelmanta 250 kamachejkunawan Moisespa contranta, Aaronpa contranta ima oqharikunkuman karqa? (Núm. 16:1-3). Mana yachanchejchu. Imayna kajtinpis, Corewan pay parte kajkunawanqa, mana Jehovaj nisqanta kasukorqankuchu. ¿Imatá ruwasunman Diospa llajtanpi uj cambio kajtin mana kasukuyta atillajtinchej?

11. ¿Imatá yachakunchej levita cohatitasmanta?

¹¹ Diospa llajtanpi cambios kajtin tukuy sonqo yanapakuna. Israelitas chʼin jallpʼanta rishajtinku, Cohatpa familianmanta levitasqa may sumaj llankʼayniyoj karqanku. Israelitas campamentonkuta sapa oqharinanku kajtin, wakin cohatitasqa tukuypa rikunanta Diospa trato ruwasqan arcata apaj kanku (Núm. 3:29, 31; 10:33; Jos. 3:2-4). Chayta ruwayqa may sumajpuni karqa. Jinapis israelitas Sumaj Jallpʼata japʼikapusqankutawan, manaña chay llankʼayta ruwanankuchu karqa. Chay arcataqa manaña uj lugarmanta waj lugarman apanankuchu karqa. Chayrayku Salomón kamachishajtin, wakin cohatitasqa takejkuna karqanku, wakintaj punkuta qhawajkuna, wakintaj jallchʼana wasismanta cargoyojkuna (1 Cró. 6:31-33; 26:1, 24). Cohatitasqa ñaupajta sumaj llankʼayniyoj kasqankurayku quejakunkuman karqa, chayri aswan sumaj llankʼayta mañakunkuman karqa. Jinapis Bibliaqa mana ninchu chayta ruwasqankuta. ¿Imatá paykunamanta yachakunchej? Jehovaj llajtan ima cambiota ruwajtinpis tukuy sonqo yanapakuna, chay cambiorayku  waj imastañataj ruwananchej kajtinpis. Ima llankʼayta qowajtinchejpis kusiywan ruwana. Kayta yuyarikunapuni: Jehovaqa mana llajtanpi ima ruwanayoj kasqanchejraykuchu allinpaj qhawawanchej. Paypajqa aswan sumaj kasukunanchej, ima llankʼayta ruwananchejmantapis (1 Sam. 15:22).

12. ¿Imaynataj Zaina kasharqa Betelmanta ripushajtin?

¹² Oriente Mediomanta hermananchej Zainamanta parlarina. Payqa Betelpi sirviyta may sumajpajpuni qhawarqa, 23 watastataj chaypi llankʼarqa. Jinallapi precursora especialta jina waj ladoman kacharqanku. Pay nin: “Betelmanta ripunayta yachaspa sonqo pʼakisqa kasharqani. Yuyarqani ni imapaj sirvisqayta: ‘¿Imatataj mana allinta ruwanichuri?’, nispa”. Llakikunapaj jinataj congregacionmanta wakin hermanos, wakin hermanaspis astawan sonqonta nanacherqanku. Paykuna nerqanku: “Allinta llankʼawaj karqa chayqa, nichá Diospa llajtan Betelmanta kacharisunkimanchu karqa”, nispa. Uj tiempota Zainaqa manchay desanimasqa kasqanrayku sapa tuta waqaj. Jinapis pay nin: “Ni jaykʼaj iskayrayarqanichu Jehovaj llajtanmanta, nitaj pay munakuwasqanmantapis”, nispa. ¿Imataj yanaparqa yuyaynillanpipuni kananpaj?

13. ¿Imatá Zaina ruwarqa manaña llakikunanpaj?

¹³ Zainaqa manaña ajinata llakikunanpaj, publicacionesninchejpi llakiyninman rijchʼakoj imasmanta parlaj yachaqanasta leerqa. Paytaqa astawan yanaparqa “Usted puede afrontar el desánimo” nisqa yachaqana. Chaytaj La Atalaya 1 de febrero de 2001 watamanta revistapi kashan. Chay yachaqanapeqa Bibliata qhelqaj Marcosmanta parlashan. Payqa ichapis Zaina jinallataj sientekorqa, Jehovata yupaychayninpi cambios kasqanrayku. Zaina nin: “Marcosmanta yachakoyqa yanapawarqa manaña desanimasqa kanaypaj. Chaytapuni necesitashasqani”, nispa. Zainaqa amigosninwan yanapachikorqa, manataj hermanosmanta karunchakorqachu, nitaj llakiyninpi yuyallarqapunichu. Chantá sutʼita repararqa Jehovaqa llajtanta espíritu santonwan pusashasqanta, ñaupajman apaj hermanostaj paymanta maytapuni llakikusqankuta. Reparallarqataj Jehovaj llajtanpajqa predicay aswan importante kasqanta, Jehová chayta ruwanata kamachisqanrayku.

14. Hermanonchej Vlado, ¿ima cambiomantaj yachaykukunan karqa, imataj chaypaj yanaparqa?

¹⁴ Esloveniapi tiyakoj Vlado sutiyoj ancianomantañataj parlarina. Payqa 73 watasniyoj. Congregacionnin waj congregacionwan ujchaykukojtin,  salonninkutaj wisqʼakapojtin, manapuni chayta allinpajchu qhawarqa. Pay nin: “Manapuni entiendeyta aterqanichu imajtinchus chay jina kʼachitu salonniykuta wisqʼashasqankuta. Chay kutillaraj allinchasqaykurayku phiñakorqani. Carpintero kani, chay salonniykupajtaj wakin mueblesta ruwarqani. Chantapis congregacionniy waj congregacionwan ujchaykukusqanrayku, noqa jina machituspajqa manaña facilchu karqa”, nispa. ¿Imataj yanaparqa chay cambiota tukuy sonqo kasukunanpaj? Pay nin: “Jehovaj llajtan ima cambiotapis ruwajtin chayman yachaykukoyqa allinninchejpajpuni. Chaytaj wakichiwanchej qhepaman jamoj jatuchaj cambiospaj”, nispa. Ichá congregacionniykipis waj congregacionwan ujchaykukullarqataj, chayri Jehovaj llajtanpi waj llankʼayta japʼerqanki. Jina kajtenqa ama llakikuychu. Jehovaqa yachan imaynachus kashasqaykita. Sichus ima cambio kajtinpis tukuy sonqo yanapakunki, Jehovamanta, llajtanmantapis mana karunchakunkichu chayqa, ashkha bendicionesta japʼinki (Sal. 18:25).

15. Congregacionpi ima pruebapis kajtin, ¿imatá ruwasunman yuyaynillanchejpipuni kanapaj?

¹⁵ Kay sajra mundoj tukukuyninman qayllaykusqanchejman jina, congregacionpi kanqapuni Jehovamanta karunchachinawanchejpaj jina imas. Chayrayku yuyaynillanchejpipuni kananchej tiyan. Mayqen hermanollapis sonqonchejta nanachiwasqanchejta yuyanchej chayqa, ama phiñakuywan atipachikunachu. Cheqanchasqa kanchej chayqa, ama pʼenqaypi rikhurisqallanchejpichu yuyana. Astawanpis imastachus yuyaychawasqanchejta japʼikuna, necesitakusqanman jinataj cambiana. Jehovaj llajtanpi cambios kajtin, chaytaj mana allinchu rijchʼawajtinchejpis tukuy sonqo yanapakuna, kamachiwasqanchejman jinataj ruwana.

16. ¿Imatá ruwawaj Jehovapi, llajtanpipis atienekunallaykipajpuni?

¹⁶ Jehovamanta karunchanawanchejpaj jina ima kajtinpis, Jehovapi, llajtanpipis atienekuyta atillasunmanpuni. Chaypajtaj yuyaynillanchejpipuni kananchej tiyan, nisunman sonqo tiyasqa kananchej tiyan, sumajta piensarinanchej tiyan, Jehová jinataj imatapis qhawananchej tiyan. Noqanchej jina llakiykunapi rikukoj Diospa kamachisninmanta Bibliapi estudianapaj kallpachakuna, paykunamanta imatachus yachakusqanchejpitaj tʼukurina. Chantapis Jehovamanta yanapata mañakuna, amapunitaj hermanosninchejmanta karunchakunachu. Ajinamanta ima kajtinpis, Satanasqa mana tʼaqayta atiwasunchu ni Jehovamantapis ni llajtanmantapis (Sant. 4:7).