1, 2. ¿Ima ‘sumaj ruwanastataj’ ancianos ruwanku?

 UNAYTAÑA siervo ministerial kashanki chayqa, ichapis anciano kanaykipaj ashkha imastaña ruwashanki. Anciano kayqa ‘sumaj ruwana’. Chayrayku anciano kanaykipaj, ¿imastawantaj ruwawaj? (1 Tim. 3:1).

² ¿Imastataj uj anciano ruwan? Predicacionpi ñaupajpipuni kashan, mayta kallpachakun hermanosta waturinanpaj, yachachinanpaj ima. Chantapis congregacionta kallpachan parlasqanwan, ruwasqanwan ima. Chayraykuchá Biblia nin ancianosqa ‘regalos jina’ kasqankuta (Efe. 4:8).

3. ¿Imastá uj hermano ruwanan tiyan anciano kananpaj? (1 Timoteo 3:1-7; Tito 1:5-9).

³ ¿Imatá ruwawaj anciano kanaykipaj? Anciano kayqa mana uj trabajota maskʼay jinachu. Trabajota tarinapajqa wakin imasllata ruwayta yachana tiyan. Chayta ruwayta yachajtinchejtaj trabajota tarinchejpacha. Anciano kanapajtaj mana willayllatachu, nitaj yachachiyllatachu yachananchej tiyan. Astawanpis 1 Timoteo 3:1-7, chantá Tito 1:5-9 (leey) nisqanta ruwana tiyan. Kay yachaqanapi yachakusun ancianos kay kinsa imasta ruwanankupuni kasqanta: congregacionpipis jawapipis allinpaj qhawasqa kananku tiyan, sumaj qosas, sumaj tatas kananku tiyan, congregacionraykutaj imatapis tukuy sonqo ruwananku tiyan.

ALLINPAJ QHAWASQA KANANKU TIYAN

4. ¿Ima niytá munan “mana kʼamina” kay?

⁴ Uj hermano anciano kayta munan chayqa, “mana kʼamina” kanan tiyan. Chayqa niyta munan congregacionpi ni pi imamantapis tumpananpaj jina kausakunanta. Chantapis “mana creejkuna chaupipi allinpaj qhawasqa kanan tiyan”. Ichapis jawamanta runasqa creenciasninrayku paymanta mana allintachu parlankuman. Chaywanpis ni jaykʼaj razonta qonanchu tiyan  runas paymanta mana allinta parlanankupaj. Ni jaykʼaj suwakunanchu tiyan, nitaj llullakunanchu tiyan, chantapis kʼachapuni kanan tiyan (Dan. 6:4, 5). Kayta tapurikuy: “Congregacionpi, jawapipis, ¿allinpaj qhawasqachu kani?”, nispa.

5. ¿Ima niytá munan ‘allin kajta munakuy’?

⁵ Anciano kayta munajqa ‘allin kajta munakunan’ tiyan, nisunman wajkunaj allin ruwasqasninkuta qhawanan tiyan, chaymantataj felicitanan tiyan. Chantapis kusikunan tiyan wajkunapaj allin imasta ruwapuspa, imatachus ruwanan kashan chaymanta astawanraj ruwajtinpis (1 Tes. 2:8). ¿Imaraykutaj ancianos ajinapuni kananku tiyan? Paykunaqa congregacionmanta hermanosta waturikunankupaj, ruwayninkuta juntʼanankupaj ashkha tiempota churananku tiyan. Chaytataj kusiywan ruwananku tiyan (1 Ped. 5:1-3). Wajkunata sirvispa kusiyta tarisqankutaj, imamantapis aswan sumajraj (Hech. 20:35).

6. ¿Imastataj ruwan “wajyarikuyta” yachaj runa? (Hebreos 13:2, 16; fototawan qhawariy).

⁶ Pichus “wasinman wajyarikuyta” yachajqa, mana amigosnillanpajchu allin imasta ruwapun (1 Ped. 4:9). Uj libro nisqanman jina, wajyarikoj runajtaqa “wasinpis sonqonpis, mana rejsisqaspaj kicharisqa kashan”. Kayta tapurikuy: “¿Chunka makiwanpunichu japʼikuni congregacionniyman jamojkunata?”, nispa (Hebreos 13:2, 16 leey). Pichus wajyarikuyta yachajqa imachus kapusqanmanta wajkunaman qorinpuni, pisi kapuyniyoj kajkunaman, hermanosrayku ashkhata llankʼajkunaman ima. Paykuna kankuman congregacionesta waturejkuna, discursantes ima (Gén. 18:2-8; Pro. 3:27; Luc. 14:13, 14; Hech. 16:15; Rom. 12:13).

7. ¿Imaynapí yachakun uj anciano mana “qolqemanta wañusqachu” kasqanta?

⁷ “Nitaj qolqemanta wañusqachu” kanan tiyan. Chayqa niyta munan mana kapuyniyoj kayllapichu yuyanan kasqanta. Qhapaj kaspapis wajcha kaspapis, tukuy kausayninpi Diospa Gobiernonta ñaupajman churanan tiyan (Mat. 6:33). Chantapis tiemponta, kallpanta, kapuyninta ima churanan tiyan Jehovata yupaychananpaj, familianta cuidananpaj, congregacionmanta hermanosta yanapananpaj ima (Mat. 6:24; 1 Juan 2:15-17). Tapurikuy: “¿Qolqechu noqapaj aswan importante? ¿Kapuwasqan imaswan sonqo juntʼasqachu kani?  Chayri, ¿qolqeta ganayllapichu, astawan kapuyniyoj kayllapichu yuyani?”, nispa (1 Tim. 6:6, 17-19).

8. ¿Imaynapitaj yachakun pipis mana munayninwan atipachikusqanta?

⁸ “Munayninwan mana atipachikoj” kasqanqa, tukuy kausayninpi sutʼi rikukunan tiyan. Munayninwan mana atipachikojqa mikhushaspa, ujyashaspapis midirikuyta yachan. Maychus kajta vistikun, maychus kajtataj kʼachanchakun. Samarikunan tiempotapis sumaj yuyaywan apaykachan. Chantapis mana kay mundomanta runas jinachu kausakun (Luc. 21:34; Sant. 4:4). Pipis phiñachiyta munajtintaj, mana phiñakuyninwan atipachikunchu. Uj ancianoqa “mana machaj runachu kanan tiyan”, nitaj anchata tomasqanmantachu rejsisqa kanan tiyan. Kayta tapurikuy: “¿Kausayniypi sutʼichu rikukun mana munayniywan atipachikusqay?”, nispa.

9. ¿Ima niytá munan “allin yuyayniyoj” kay, chanta mana imatapis ‘patan uranta ruway’?

⁹ Uj ancianoqa “allin yuyayniyoj” kanan tiyan. Allin yuyayniyoj kasqantataj rikuchin imata ruwananpajpis Bibliaj yuyaychaykunasnintapuni qhawaykurispa. Sumajta tʼukurin imaynatachus Biblia nisqanman jina ruwananpi. Sutʼita yachaspañataj allin yuyaywan ajllan imatachus ruwananta. Mana usqhay usqhayllatachu imatapis ajllan, manaqa sumajtaraj imatapis qhawaykurin (Pro. 18:13). Ajinamanta allintapuni imatapis ajllan Jehovata kusichinanpaj jina. Chantapis ancianoqa “ruwanasninta mana patan uranta ruwaj” kanan tiyan. Chayqa niyta munan ima ruwanantapis sumajta wakichisqanta, maychus tiempopitaj tukusqanta, maymanpis horanpipuni chayasqanta. Tukuy reparanku atienekunapaj jina kasqanta, kamachiykunaman jinapunitaj imatapis ruwasqanta. Ajina kasqanraykutaj tukuy allinpaj qhawanku. Kunantaj yachakuna Biblia nisqanman jina imatachus ruwananta familianmanta sumaj uma kananpaj.

FAMILIANKUPI SUMAJ UMA KANANKU TIYAN

10. ¿Imatá ruwanan tiyan familianta sumajta kamachej hermano?

¹⁰ Uj casarasqa hermano anciano kananpajqa, familian sumajpaj qhawasqa kanan tiyan. Chayrayku “familianta sumajta kamachinan tiyan”. Tukuy reparananku tiyan familianta munakusqanta, ruwanasnintapis sumajta juntʼasqanta. Familianta sumajta yanapanan tiyan Diosta yupaychayta ñaupajman churanankupaj. ¿Imaraykutaj chayta ruwananpuni tiyan? Apóstol Pablo nerqa: “Sichus uj runa ni familiantapis kamachiyta atinchu chayqa, ¿imaynatataj Diospa congregacionninta qhawanqari?”, nispa (1 Tim. 3:5).

11, 12. Uj hermano anciano kananpaj, ¿imaynataj familian kanan tiyan? (Fototawan qhawariy).

¹¹ Uj hermanojta wawasnin menores de edad kanku chayqa, “kasukunanku tiyan, allintataj purinanku tiyan”. Tatasqa munakuywan yachachinanku, educananku ima tiyan. Wawasmanqa gustanpuni asirikuy, pujllay ima. Pero wawasninkuman allinta yachachejtinkoqa, kasukoj wawas kanqanku, respetayta yachanqanku, allintataj portakonqanku. Chantapis tatasqa wawasninkuta yanapananku tiyan Jehovaj sumaj amigosnin kanankupaj, Bibliaj yuyaychaykunasninman jina kausakunankupaj, bautizakunankupaj ima.

¹² “Creyente wawasninpis mana juchachanas kananku tiyan, ni millay kausaymanta, nitaj mana kasukoj kaymantapis”. Jinapis, ¿imataj kanman wasinpi tiyakoj creyente wawan jatun juchata ruwajtin? Chay wawanta mana sumajta educarqachu, nitaj kʼamerqachu chayqa, ichapis chay tataqa mana anciano kayta atenqachu (kay revistata leeriy: La Atalaya del 15 de octubre de 1996, página 21, párrafos 6, 7).

 CONGREGACIONTA SIRVINANKU TIYAN

13. ¿Imaynatataj uj hermano rikuchin “llampʼu sonqo” kasqanta, nitaj “kʼullu runachu” kasqanta?

¹³ Kʼacha kaykunasniyoj hermanosqa congregacionpi uj sumaj bendición kanku. Uj hermano “llampʼu sonqo” chayqa, congregacionpi kʼachituta kausakunankupaj yanapakun. Qanpis llampʼu sonqo kayta munanki chayqa, wajkunata uyariyta yachanayki tiyan, nisqankutataj valechinayki tiyan. Tukuynin ancianos tantakushajtiykichej, la mayoría uj imata ajllan chay, chay ajllasqankutaj mana Bibliaj yuyaychaykunasninta, nitaj leyesnintapis pʼakinchu chay, ¿tukuy sonqochu chay ajllasqankuta apoyawaj mana de acuerdochu kaspapis? Ancianoqa “mana kʼullu runachu kanan tiyan”. Chayqa niyta munan, mana nisqanman jinapunichu imatapis ruwachiyta munasqanta. Astawanpis reparan ashkhaspa yuyaychayninwanpuni imapis allin llojsisqanta (Gén. 13:8, 9; Pro. 15:22). “Manallataj phiñanakusta maskʼaj runachu kanan tiyan”, “nitaj usqhayllata phiñarparikojchu”. Ajina runaqa wajkunata respetan, nitaj siminakunchu. Chantapis wajkunawan kʼacha, allinta yuyaychakuspataj parlan. “Allin kausayta” maskʼasqanrayku, payrajpuni piwanpis allinyakuyta maskʼan, mana atinapaj jinallachu kajtinpis (Sant. 3:17, 18). Kʼacha simiwanpuni parlasqanrayku wajkunata yanapan phiñakuyninkuta tiyaykuchinankupaj, willasqanchejman churanakojkunatapis (Jue. 8:1-3; Pro. 20:3; 25:15; Mat. 5:23, 24).

14. 1) ¿Imaraykutaj uj anciano “mana mosoj cristianochu kanan tiyan”? 2) ¿Imaynatá uj anciano rikuchin ‘Diosta mana wasanchasqanta’?

¹⁴ Ancianoqa “mana mosoj cristianochu kanan tiyan”. Mana ashkha watas bautizasqapunichu kanan kajtinpis, tiempota necesitan wiñay tukusqa cristianoman tukunanpaj. Niraj anciano kashaspa Jesús jina kʼumuykukoj sonqo kanan tiyan, suyanantaj tiyan Jehová ninanta maykʼajchus imapipis yanapakunanta (Mat. 20:23; Fili. 2:5-8). Chantapis ‘Diosta mana wasanchaspa’ paymanta chʼipakunan tiyan. Kamachiykunasninta, llajtanpa kamachiykunasnintapis kasukunan tiyan (1 Tim. 4:15).

15. Uj hermano anciano kananpaj, ¿sumaj discursantepunichu kanan tiyan?

 ¹⁵ Bibliaqa sutʼita nin uj ancianoqa ‘yachachinanpaj sumaj wakichisqa’ kanan kasqanta. ¿Chay niyta munanchu sumaj discursantepuni kanan kasqanta? Mana. Ashkhasqa mana sumaj discursantes kaspapis, sumaj ancianos kanku, sumajtataj yachachinku willaypi, hermanosta waturispa ima (1 Corintios 12:28, 29; Efesios 4:11, kikinchay). Ajinapis anciano kayta munaj hermanoqa kallpachakunallanpuni tiyan sumaj yachachej kananpaj. ¿Imaynatá chayta ruwanman?

16. ¿Imaynatá uj hermano aswan sumaj yachachej kanman? (Fotostawan qhawariy).

¹⁶ “Cheqa kaj palabramanta chʼipakunan tiyan”. Uj anciano aswan sumaj yachachej kananpajqa Diospa Palabranman jinapuni yachachinan tiyan discursosta qoshaspa, uj hermanota yuyaycharishaspapis. Chantapis Bibliata, publicacionesninchejtapis sumajta estudianan tiyan (Pro. 15:28; 16:23). Estudiashaspataj sumajta reparanan tiyan imatachus publicacionesninchej uj versiculomanta sutʼinchasqanta. Ajinamanta mana yuyasqanman jinallachu entiendenanpaj. Yachachishaspataj uyarejkunaj sonqonkuman chayananpaj kallpachakunan tiyan. Aswan sumaj yachachej kananpajqa unayña ancianos kajkunata tapurikunman, nisqankuman jinataj ruwanman (1 Tim. 5:17). Uj ancianoqa wakichisqa kanan tiyan hermanosta “kallpachananpaj” wakin kuti yuyaycharinan kajtinpis, ‘pantasqankuta reparachinan’ kajtinpis. Chaytataj munakuywanpuni ruwananku tiyan. Sichus kʼachas, munakuyniyoj kanqanku, Diospa Palabranmantapunitaj yachachenqanku chayqa, sumaj yachachejkuna kanqanku, Sumaj Yachachejninchej Jesús jina ruwashasqankurayku (Mat. 11:28-30; 2 Tim. 2:24).

KALLPACHAKULLAYPUNI

17. 1) ¿Imata yuyarikuytaj siervos ministerialesta yanapanman ancianos kanankupaj? 2) ¿Imatá ancianos yuyarikunanku tiyan uj hermano anciano kananpaj jinachus manachus kasqanta qhawaykurishaspa? (“ Ancianos, ama ancha estrictos kaychejchu” nisqa recuadrota qhawariy).

¹⁷ Ancianos kanankupaj imatachus ruwanankuta estudiaytawan, ichapis wakin siervos ministerialesqa  yuyankuman ni jaykʼaj anciano kayta atinankuta. Jinapis kayta yuyarikunanku tiyan: Ni Jehovapis, ni llajtanpis suyanchu ni imitapi pantanankuta (1 Ped. 2:21). Chantapis espíritu santo paykunata yanapanman ancianos kayta atinankupaj (Fili. 2:13). Qanrí, ¿reparankichu anciano kanaykipaj imapichus astawan kallpachakunayki kasqanta? Jina kajtenqa Jehovamanta mañakuy, chayta astawan ukhunchariy, ancianostataj tapurikuy yuyaycharisunankupaj.

18. ¿Imatataj tukuy siervos ministeriales ruwananku tiyan?

¹⁸ Tukuy hermanos, ancianosña kajkunapis, kay yachaqanapi yachakusqanchejman jina ruwanankupaj kallpachakunallankupuni tiyan (Fili. 3:16). Siervo ministerialña kanki chaytaj, kallpachakullaypuni anciano kanaykipaj. Jehovamanta mañakuy yachachisunanta, wakichisunanta ima. Ajinamanta paypaj, congregacionpajpis astawan ruwayta atinaykipaj (Isa. 64:8). Jehovaqa bendicenqapuni anciano kanaykipaj kallpachakusqaykita.