1, 2. ¿Ima sajra imastataj wajkuna ruwawasunman?

 JESUSQA uj kikinchaypi nerqa, uj viudaqa juezman rispa kutin kutita “justiciata ruwapuway” nispa mañakusqanta. Jesuspa discipulosnenqa sumajtachá entienderqanku imaynachus chay viuda sientekusqanta, imajtinchus jaqay tiempopeqa ashkha runaspaj mana justicia kajchu (Luc. 18:1-5). Noqanchejpis imaynachus chay viuda sientekusqanta entiendeyta atillanchejtaj, imajtinchus tukuyta ima sajratapis ruwawanchejpuni.

² Ashkha runasqa wajkunamanta malta piensanku, sajras kanku, paykunallapajtaj imatapis munanku. Chayrayku ima sajratapis ruwawasunpuni (Ecl. 5:8). Chaywanpis uj hermano chayri uj hermana ima sajratapis ruwawajtinchejqa, sonqonchej astawanraj nanawasunman. Jinapis hermanosninchejqa mana noqanchejman churanakojkuna jinachu kanku. Pero pantaj runas kasqankurayku maykʼajllapis ima sajratapis ruwawasunman. Jesusmantaqa mayta yachakusunman, payta sajra imasta ruwajtinku imaynatachus kutichisqanmanta. Sichus enemigosninchej ima sajratapis ruwawajtinchej pacienciakunchej chayqa, ¿imaynatataj mana hermanosninchejwan pacienciakusunmanchuri? Uj hermanonchej chayri waj runa ima sajratapis ruwawajtinchej, ¿Jehová Diosninchej llakikunmanchu?

3. ¿Sajra imasta ruwawasqanchejta Dios qhawamushanchu?

³ Jehovaqa wajkuna sajra imasta ruwawasqanchejta qhawamushan. Payqa “justiciata munakun” (Sal. 37:28). Jesusqa nerqa, Diosninchej maychus tiemponpi kamachisninpaj ‘usqhayllata justiciata ruwachipunanta’ (Luc. 18:7, 8). Diosqa tumpamantawan tukuy sajra imasta chinkachenqa, manataj saqenqañachu ni pipis sajra imasta ruwanawanchejta (Sal. 72:1, 2).

4. ¿Imaynatá Jehová yanapawanchej?

⁴ Maypachachus cheqan kausaylla kanqa chay tiempo chayamunankamaqa  Jehová yachachiwanchej imatachus ruwanata pillapis ima sajrata ruwawajtinchej (2 Ped. 3:13). Payqa niwanchej imatachus ruwananchejta mana uj chʼampayta astawan jatunyachinapaj. Jehovaqa Bibliapi qhelqacherqa imatachus Wawan ruwasqanta sajra imasta ruwajtinku, kikinta noqanchejpis ruwananchejpaj. Chantapis Bibliapi waj sumaj yuyaychaykunastawan qollawanchejtaj, sajrata pipis ruwawajtinchej imatachus ruwanata yachanapaj.

¿IMATÁ RUWASUNMAN PIPIS SAJRATA RUWAWAJTINCHEJ?

5. ¿Imamantataj sumajta qhawarikunanchej tiyan pipis sajrata ruwawajtinchej?

⁵ Pillapis ima sajrata ruwawajtinchejqa mayta sonqonchej nanawasunman, llakikusunmantaj (Ecl. 7:7). Jobpis chantá Habacucpis ajinallapitaj rikukorqanku (Job 6:2, 3; Hab. 1:1-3). Tukuyta chay pasawasunman, mana yuyaychakuspallataj imatapis ruwarpasunman. Chayrayku sumajta qhawarikunanchej tiyan ama imatapis ruwarpanallapaj.

6. ¿Imatá Absalonmanta yachakunchej? (Dibujotawan qhawariy).

⁶ Pillapis sajra imasta ruwawajtinchej chayri wajkunata sajra imasta ruwasqankuta rikojtinchej, ichapis pagachikuyta munasunman chayri kikinta ruwarpayta munasunman. Chayta ruwaspaqa ichapis astawan jatun problemaman churakusunman. Rey Davidpa wawan Absalonmanta parlarina. Payqa mayta phiñakorqa hermanon Amnón hermanan Tamarta abusasqanta yachaspa. Moisespa Leynin nisqanman jina, Amnonqa chay juchanmanta wañuchisqa kanan karqa (Lev. 20:17). Absalonqa phiñakunallanta phiñakorqa, jinapis mana paychu justiciata ruwanan karqa (2 Sam. 13:20-23, 28, 29).

7. Uj salmista sajra imasta rikuspa, ¿imaynataj kasharqa?

⁷ Wakin runas sajra imasta ruwasqankumanta mana castigasqa kajtinkoqa, ichapis yuyasunman allin kajta ruwayqa qhasilla kasqanta. Salmistaqa rikorqa sajra runas cheqan runasta sufrichejtinkupis kusisqas kausakusqankuta. Chayrayku nerqa: “Sajra runas kanku, paykunapaj kausayqa fácil”, nispa (Sal. 73:12). Sajra imasta ruwasqankuta rikuspa mayta llakikorqa, casi qonqaporqa Jehovata sirviy aswan sumaj kasqanta. Pay nerqa: “Chay imasta entiendeyta munarqani, nitaj entienderqanichu”, nispa (Sal. 73:14, 16). Chantapis nillarqataj: “Noqatajrí casipuni cheqan ñanmanta wistʼuykaporqani. Yaqhapuni lluskʼarqani”, nispa  (Sal. 73:2). Hermano Albertopis a ajinallapitaj rikukorqa.

8. ¿Imatá uj hermano ruwarqa qhasillamanta tumpaykojtinku?

⁸ Hermano Albertotaqa “congregacionpa qolqenta suwakun” nispa qhasillamanta tumpaykorqanku. Chayraykutaj niña ancianochu karqa, chay tumpasqankuta yachaj hermanostaj niña allinpajchu qhawaj kanku. Pay nin: “Llakisqataj rabiasqataj kasharqani”, nispa. Ajina sientesqa kashasqanraykutaj Jehovamanta karunchakorqa, 5 watasta jinataj chiriyasqa karqa. Chay hermanoj kausaynin rikuchiwanchej imapichus rikukunanchejta wajkuna ima sajratapis ruwawasqanchejrayku phiñakuyninchejwan atipachikojtinchej.

JESÚS JINA RUWANA

9. ¿Imastá Jesús aguantarqa? (Dibujostawan qhawariy).

⁹ Jesusmantaqa mayta yachakusunman, paytaqa ashkha runas sajra imasta ruwarqanku. Wakin familiaresnenqa Mesías kasqanta mana creerqankuchu, locoyapusqantataj nerqanku. Religionta kamachejkunaqa supaykunaj atiyninwan milagrosta ruwasqanta nerqanku. Romamanta soldadostaj asipayarqanku, maqarqanku, wañucherqankutaj (Mar. 3:21, 22; 14:55; 15:16-20, 35-37). Jinapis Jesusqa mana kutichikorqachu, tukuy chayta aguantarqa. ¿Imatá paymanta yachakusunman?

10. ¿Imatá Jesús ruwarqa paymanta llullata nejtinku? (1 Pedro 2:21-23).

 ¹⁰ (1 Pedro 2:21-23 leey). b Sajra imasta ruwawajtinchejqa Jesús jina ruwasunman. Payqa sumajta yacharqa ima ratochus parlananta, ima ratochus chʼinlla kananta (Mat. 26:62-64). Paymanta llullasta nejtinkoqa wakin kutis mana imatapis nejchu (Mat. 11:19). Wakin kutis kutichispataj mana phiña simiwanchu kutichej, nitaj enemigosninta manchaykuchinanpaj jinachu. Jesusqa ajina karqa, ‘pichus cheqa kajman jina juzgan, chaypa makinman churakusqanrayku’. Payqa yacharqa chay tukuy imasta Jehová qhawamushasqanta, atienekorqataj Jehová maychus tiemponpi chayta allinchananpi.

11. Sajra imasta ruwawajtinchej, ¿imatá ruwasunman? (Fotostawan qhawariy).

¹¹ Sajra imasta ruwawajtinchejqa parlasqanchejta Jesús jina sumajta qhawarikusunman. Chay ruwawasqanchej mana gravechu kajtenqa pasachillasunman, chayri ichapis chʼinlla kasunman mana problemata jatunyaykuchinapaj (Ecl. 3:7; Sant. 1:19, 20). Wakin kutistaj ichapis parlananchejpuni kanqa. Chaytaj kanman pitapis sajra imasta ruwasqankuta rikojtinchej, chayri imapichus creesqanchejmanta cheqata parlananchej kajtin (Hech. 6:1, 2). Jinapis kallpachakunanchej tiyan llampʼu sonqowan, sonqomantapacha respetaspataj parlanapaj (1 Ped. 3:15). c

12. ¿Imaynatá ‘pichus cheqa kajman jina juzgan, chaypa makinman churakusunman’?

¹² Jesús jina ruwallasunmantaj ‘pichus cheqa kajman jina juzgan, chaypa makinman churakuspa’. Sichus pipis noqanchejmanta malta  piensan chayri kʼumuykachachiwanchej chayqa, Jehová tukuy imata qhawamushasqanta yuyarikuna. Chayqa yanapawasunchej pipis sajra imasta ruwawajtinchej aguantanapaj. Jehovaqa maychus tiemponpi tukuy sajra ruwaykunata allinchanqa. Jehovaj makinman tukuy imata saqepusunchej chayqa, mana rabiasqallachu, nitaj phiñasqallachu kasun. Phiñasqalla kaspaqa mana piensarispalla imatapis ruwasunman, mana kusisqachu kasunman, Jehovamantapis karunchakusunman (Sal. 37:8).

13. ¿Imataj yanapawasun sajra imasta ruwawajtinchej aguantanapaj?

¹³ Mana jaykʼajpis Jesús jinapuni ruwayta atisunmanchu. Ichapis ruwasqanchejwan chayri nisqanchejwan pantasun (Sant. 3:2). Wakin sajra imasta ruwawasqanchejtaqa kay sajra mundo tukukunankama mana qonqayta atillasunchu. Sajra imasta ruwasusqankuta mana qonqayta atishankichu chayqa, Jehová chayta yachasqanta yuyarikuy. Jesuspis payta sajra imasta ruwasqankurayku imaynachus kashasqaykita sumajta entiendesunki (Heb. 4:15, 16). Jehovaqa mana Wawanpa kausaynillanmantachu Bibliapi qhelqachipuwarqanchej, manaqa waj sumaj yuyaychaykunatapis churachipuwarqanchej sajra imasta ruwawajtinchej imatachus ruwanata yachanapaj. Romanos libromanta iskay versiculosta ukhuncharina.

‘SAQEYCHEJ DIOS KʼAJAJ PHIÑAKUYNINTA RIKUCHINANTA’

14. ¿Ima niytá munan ‘Dios kʼajaj phiñakuyninta rikuchinanta’ saqey? (Romanos 12:19).

¹⁴ (Romanos 12:19 leey). Apóstol Pabloqa cristianosman nerqa: ‘Saqeychej Dios kʼajaj phiñakuyninta rikuchinanta’, nispa. ¿Imaynatá chayta ruwasunman? Jehová justiciata ruwananta saqespa, maykʼajchus, imaynatachus munasqanman jina. Ajinata ruwarqa hermanonchej John uj hermano sajrata ruwajtin. Pay nin: “Phiñakuyniyta ñitʼiykukorqani mana ima sajratapis ruwanaypaj. Chayta ruwaytaj mana atikullarqachu. Romanos 12:19 versiculotaj yanapawarqa pacienciakunaypaj, Jehovapitaj atienekunaypaj”, nispa.

15. ¿Imaraykutaj aswan sumaj Jehovaj makinman imatapis saqepuy?

¹⁵ Jehová uj problemata allinchananta suyayqa aswan sumaj. Sapallanchejmanta imatapis allinchayta munaspaqa, mana atillanchejchu, aswan llakisqastaj kanchej. Jehovatajrí yanapayta munawanchej. Payqa kaytapis niwasunman jina: “Tukuy imata makisniyman saqepuy, noqa allinchallasaj”, nispa. Payqa niwanchej tukuy problemasta sumajta allinchananta. Chay nisqanpi atienekusun chayqa, mana rabiasqallapunichu kasunchej. Johnqa chayta ruwarqa. Pay nin: “Jehovaj makinpi ima problematapis saqepuspaqa, yachani noqamanta nisqaqa aswan sumajta pay allinchananta”, nispa.

“SAJRA KAJTA ALLIN KAJWAN ATIPALLAYCHEJPUNI”

16, 17. “Sajra kajta allin kajwan” atipanapaj, ¿imaynatá Jehovamanta mañakuy yanapawasunman? (Romanos 12:21).

¹⁶ (Romanos 12:21 leey). Apóstol Pabloqa nerqa: “Sajra kajta allin kajwan atipallaychejpuni”, nispa. Jesustaj Orqopi Yachachishaspa nerqa: “Enemigosniykichejtaqa munakullaychejpuni, qhatiykachasojkunapajpis Diosmanta mañapullaychejpuni”, nispa (Mat. 5:44). Paytaj chaytapuni ruwarqa. Ichá maykʼajllapis piensarerqanchej may jina nanaytachus Jesús aguantasqanpi Romamanta soldados payta kʼaspiman clavaykushajtinku. Chantapis kʼumuykachacherqanku, maytataj sufricherqanku. May jinatapunichus sufrichisqankutaqa mana yachayta atisunmanchu.

 ¹⁷ Chaywanpis Jesusqa runasta munakullarqapuni, Jehovatapis kasukullarqapuni. Chay soldadosta castigananta mañakunanmantaqa, ajinata mañakorqa: “Tatáy, paykunata perdonay. Mana yachankuchu imatachus ruwashasqankuta”, nispa (Luc. 23:34). Piskunachus sufrichiwanchej chaykunapaj mañapoyqa sonqonchejta tiyaykuchin, yanapawanchejtaj mana paykunata sajra ñawiwan qhawananchejpaj.

18. ¿Imaynatá Diosmanta mañakuy yanaparqa Albertota, Johntawan?

¹⁸ Kay yachaqanapi iskay hermanosmanta parlarerqanchej. Paykunataqa Jehovamanta mañakuy mayta yanaparqa contrankupi sajra imasta ruwajtinku. Alberto nin: “Jehovamanta mañakorqani sajrata ruwawaj hermanopaj. Ashkha kutista mañakorqani imachus pasawasqanta qonqapunaypaj”, nispa. Kunantaj Albertoqa watejmanta Diosta sirvishan. Chaytaj may sumajpuni. Johntaj nin: “Sajrata ruwawaj hermanopaj ashkha kutista mañaporqani. Chaytaj yanapawarqa payta perdonanaypaj. Chantapis Jehová yanapawarqa manaña hermanopaj phiñakunaypaj, nitaj qhawaranaypaj. Diosmanta mañakusqayqa sonqoyta tiyaykucherqa”, nispa.

19. ¿Imatá ruwananchej tiyan pipis sajrata ruwawajtinchej? (1 Pedro 3:8, 9).

¹⁹ Kay sajra mundo tukukunankamaqa pillapis sajra imasta ruwawasunpuni. Chayrayku mana saqespa Jehovaj yanapayninta mañakunallapuni. Pipis ima sajrata ruwawajtinchejqa kallpachakuna Jesús jina ruwanapaj, Bibliaj yuyaychaykunasninman jinataj. Ajinata ruwasun chayqa, Jehová bendeciwasunpuni (1 Pedro 3:8, 9 leey).