¿MANACHU sapa semana Bibliata estudiayta atillanki? ¿Estudiaspa usqhayllatachu aburrikapunki? Tukuyta chay wakin kutis pasawanchej. Ashkha imasta sapa día ruwanchejpuni, tiempopaj kajtinpis, mayta kallpachakuna kajtinpis. Chaykunamanta ujnenqa sapa día bañakuy kashan. Bañakuytaj allinninchejpaj, ¿icharí? Bibliata estudiaypis allinnillanchejpajtaj. Estudiashaspaqa ‘yakuwanpis mayllakushasunman jina’ (Efe. 5:26). Chayta ruwanapaj kay yuyaychaykunas yanapawasunman.

• Uj horariota ruwakuy. Uj cristianoqa Bibliata estudiayta manapuni qonqakunanchu tiyan, chayta ruway “aswan allin” imasmanta kasqanrayku (Fili. 1:10). Estudiayta mana qonqakunaykipaj horarioykita sutʼiman churay. Ichapis imaman chayri heladeraman kʼaskaykuchiwaj. Manachayrí celularniykipi alarmata churakuwaj ñaupajsitutaña yuyarichisunanpaj.

• Imaynatachus estudianaykipi tʼukuriy. Wakinmanqa ujllapi ashkhata estudiay gustan. Wakinmantajrí pisisitullata estudiay gustan, chayraykutaj ashkha kutista pisisitullata estudianku. Qanmanrí, ¿mayqentaj gustasunki? Chayman jina horarioykita ruwakuy. Estudianayki horas chayamojtin mana estudiayta munankichu chayqa, 10 minutosllatapis estudiay. Aswan sumaj pisisitullatapis estudianayki, mana estudianaykimantaqa. Ichapis estudiayta qallariytawanqa astawanraj estudiayta munanki (Fili. 2:13).

• Ñaupajmantaña niy imatachus estudianaykita. Estudianaykipaj chukuykusparaj imatachus estudianaykita qhawarinki chayqa, ‘tiempollaykita usuchinki’ (Efe. 5:16). Uj listata ruwakuwaj imastachus estudiayta munasqaykimanta. Kaymanta jinalla umaykiman ima tapuypis jamojtin, anotakuypacha. Estudiashaspa imatapis astawan yachayta munaspataj, chaytapis anotakullaytaj.

• Mana atispaqa waj jinamanta ruway. Sapa semana estudiaypuni. Uj día mana atispaqa waj día estudiay, uj hora mana atispaqa waj hora estudiay, mana ashkhata estudiayta atispaqa pisillata estudiay, amataj kikin imasllatachu.

Sapa semana Bibliata estudiankipuni chayqa, Jehovaman astawan qayllaykunki, imatapis aswan allinta ajllanki, kallpachasqataj kanki (Jos. 1:8).