1. ¿Imaynatá apóstol Pablo siervos ministerialesta qhawaj?

 SIERVOS ministerialesqa maytapuni congregacionespi yanapakunku. Apóstol Pabloqa siervos ministerialesta may sumajpaj qhawaj. Chayrayku Filiposmanta cristianosman cartata apachisqanpi siervos ministerialesta, ancianostawan khuska saludarqa (Fili. 1:1).

2. ¿Ima nintaj Luis siervo ministerial kasqanmanta?

² Ashkha bautizasqa qharisqa may kusiywan siervos ministeriales jina sirvishanku. Wakenqa kanku jóvenes, wakintaj machitus. Devan sutiyoj hermanitonchejqa 18 watasnillayojraj kashaspa siervo ministerial kayta qallarerqa. Luis sutiyoj hermanonchejtaj 50 watasninta pasaytawanña siervo ministerial karqa. Tukuy siervos ministerialeschá Luis jina ninkuman. Pay nin: “Maytapuni kusikuni siervo ministerial kasqaymanta, astawanraj hermanosniy maytapuni munakuwasqankupi piensarispa”, nispa.

3. ¿Ima tapuykunamantaj kay yachaqanapi kutichisun?

³ Sichus bautizasqaña kanki chay, manarajtaj siervo ministerialchu kanki chay, ¿kallpachakuwajchu siervo ministerial kanaykipaj? ¿Imataj sonqoykita aysanan tiyan siervo ministerial kayta munanaykipaj? Biblia nisqanman jina, ¿imastataj ruwanayki tiyan siervo ministerial kanaykipaj? Kay yachaqanapi chay tapuykunaman kutichisun. Chaywanpis ñaupajtaqa parlarina imastachus siervos ministeriales ruwasqankumanta.

¿IMASTATAJ SIERVOS MINISTERIALES RUWANKU?

4. ¿Imastataj siervos ministeriales ruwanku? (Fotostawan qhawariy).

⁴ Siervos ministerialesqa bautizasqa hermanos kanku. Espíritu santo paykunata churan congregacionpi wakin ruwanaswan ancianosta yanapanankupaj. Wakin siervos ministerialesqa  predicanapaj territoriosta wakichinku, publicacionestapis congregacionpaj mañanku. Wakintaj yanapakunku Tantakuna Wasita llimphuchaypi, mantenimientota ruwaypi ima. Wakintaj tantakuykunapi acomodadores kanku, audio y videopitaj yanapakunku. Ashkha imaspi yanapakuspapis astawanqa Jehovata munakunku, paytataj kasukunku. Chantapis hermanosninkuta maytapuni munakunku (Mat. 22:37-39). ¿Imatataj uj bautizasqa hermano ruwanan tiyan siervo ministerial kananpaj?

5. ¿Imatá ruwanayki tiyan siervo ministerial kanaykipaj?

⁵ Bibliapi sutʼita willashan siervos ministeriales kanankupaj imatachus ruwanankuta (1 Tim. 3:8-10, 12, 13). Chay nisqanta sumajta estudianaykipaj, chayman jinataj ruwanaykipaj kallpachakunki chayqa, qanpis siervo ministerial kayta atiwaj. Chaywanpis ñaupajtaqa qhawarikunayki tiyan imaraykuchus siervo ministerial kayta munasqaykita.

¿IMARAYKUTAJ SIERVO MINISTERIAL KAYTA MUNANKI?

6. ¿Imataj uj hermanoj sonqonta aysanan tiyan siervo ministerial kayta munananpaj? (Mateo 20:28; dibujotawan qhawariy).

⁶ Jesucristopi piensarina. Payqa Tatanta munakusqanrayku, runastapis munakusqanrayku, mayta kallpachakorqa wajkunapaj ashkha imasta ruwapunanpaj (Mateo 20:28 leey; Juan 13:5, 14, 15). Qanpis Jehovatawan runastawan munakusqaykirayku siervo ministerial kayta munanki chayqa, Jehová bendecisonqa, yanapasonqataj siervo ministerial kanaykipaj (1 Cor. 16:14; 1 Ped. 5:5).

7. ¿Imaraykutaj mana allinchu kanman alabachikuyta munaspalla uj hermano siervo ministerial kayta munanan?

⁷ Runasqa may jatunpaj qhawanku ruwasqasninkumanta alabakoj runasta. Jehovaj llajtanpitajrí mana ajinachu. Jesús jina wajkunata munakoj hermanoqa mana atiyniyoj kaytachu maskʼan, nitaj aswan sumajpaj qhawasqa kaytachu. Alabachikuyta munaj runachus congregacionpi ñaupajta apajkunamanta ujnin kanman chayqa, nichá wakin imasta ruwayta munanmanchu Jehovaj ovejitasninta cuidananpaj, yuyanmantaj chay imasta ruwayqa pisipaj qhawachisqanta (Juan 10:12). Jehovataj ajinata jatunchakoj runasta, paykunallapaj imatapis munaj runasta ni jaykʼaj bendicenqachu (1 Cor. 10:24, 33; 13:4, 5).

8. ¿Imatataj Jesús apostolesninta nerqa?

⁸ Wakin kutisqa Jesuspa amigosninpis imata japʼiyta munaspalla wakin imasta ruwarqanku.  Ajina karqa apóstol Santiagowan apóstol Juanwan ima. Paykunaqa Jesusmanta mañakorqanku Gobiernonpi uj sumaj puestota qonanta. Jesustajrí mana nerqachu allillanta ruwashasqankuta, astawanpis 12 apostolesnintinta nerqa: “Pichus qankunamanta kuraj kayta munajqa, wajkunata sirvinan tiyan. Pichus qankunamanta ñaupajpi kayta munajqa, tukuyniykichejpa esclavoykichej kanan tiyan”, nispa (Mar. 10:35-37, 43, 44). Wajkunata sirviyta munaspa congregacionpi ima ruwaytapis japʼinankupaj kallpachakoj hermanosqa, sumaj bendición kanku congregacionpaj (1 Tes. 2:8).

¿IMATÁ RUWAWAJ WAJKUNATA ASTAWAN SIRVIYTA MUNANAYKIPAJ?

9. ¿Imatá ruwawaj wajkunata astawan sirviyta munanaykipaj?

⁹ Maytachá Jehovata munakunki, hermanosniykitapis maytachá sirviyta munanki. Jinapis ichá manaraj munankichu siervo ministerial kayta, paykuna ashkha imasta ruwasqankurayku. ¿Imatá ruwawaj hermanosrayku astawan ruwayta munanaykipaj? Hermanosta sirviy mayta kusichiwasqanchejpi piensariwaj. Jesús nerqa jinapuni “aswan kusisqa kanchej wajman qorispa, qorichikunamanta nisqaqa” (Hech. 20:35). Jesusqa chayta ruwasqanrayku may kusisqa karqa wajkunata sirvispa, qanpis ajina kusisqallataj kawaj.

10. ¿Imatataj Jesús ruwarqa wajkunata sirvispa kusikusqanrayku? (Marcos 6:31-34).

¹⁰ Jesús wajkunata sirvispa may kusisqa kasqanmanta parlarina (Marcos 6:31-34 leey). Uj kuti Jesuswan apostolesninwan may saykʼusqas kasharqanku, samarikunankupajtaj chʼinnejman rerqanku. Ashkha runastaj paykunamanta ñaupajta chayman chayarqanku, Jesuspa yachachisqanta uyariyta munaspa. Jesuswan discipulosninwanqa, “mana mikhunallankupajpis tiempoyojchu karqanku”. Chayrayku Jesusqa ichapis chay runasta ninman karqa ripunallankuta, chayri uj mashkha imasllata yachachiytawan kachapunman karqa. Chaywanpis mana chaytachu ruwarqa. Runasta munakusqanrayku ‘ashkha imasta’ paykunaman yachacherqa, chaymantaraj repararqa tardeyaykusqantaña (Mar. 6:35). Chaytaqa mana obligasqa jinachu Jesús ruwarqa, manachayqa ‘khuyakusqanrayku’. Chay runasta munakusqanrayku paykunaman yachachiyta munarqa. Arí, wajkunata sirveyqa Jesusta maytapuni kusichej.

11. ¿Imatataj Jesús ruwaporqa yachachisqanta uyarejkunapaj? (Fotostawan qhawariy).

¹¹ Jesusqa chay runasman mana yachachillarqachu, manachayqa imatachus necesitasqankutapis qollarqataj. Uj milagrota ruwaspa tʼantata ashkhayacherqa, chaytataj discipulosninman jaywarqa, paykunataj runasman jaywararqanku (Mar. 6:41). Chaywan discipulosninta yachachisharqa imaynachus wajkunata sirviy kasqanta. Chantapis rikuchillarqataj wajkunapaj imatapis ruwapoyqa may allin kasqanta. Siervos ministerialestaj chaytapuni wajkunapaj ruwanku. Apostolesninpis maytachá kusikorqanku tʼantata runasman jaywaysispa. “Jinapi tukuyninku sajsakunankukama mikhorqanku” (Mar. 6:42). Jesusqa mana chay kutillachu wajkunaj allinninkuta maskʼarqa. Payqa kay jallpʼapi kashaspa runasta yanapaspallapuni kaj (Mat. 4:23; 8:16). Jesusqa maytapuni kusikoj wajkunaman yachachispa, necesitasqankuta qospa ima. Qanpis siervo ministerial kaspa wajkunata yanapanki chayqa, Jesús jinallataj may kusisqa kanki.

12. ¿Imaraykutaj mana yuyananchejchu tiyan congregacionpi ni imaynamanta yanapakuyta atisqanchejta?

¹² Ichapis yuyawaj congregacionpi ni imaynamanta yanapakuyta atisqaykita. Jina kajtenqa ama dasanimakuychu. Congregaciontaqa imaynamantapis yanapayta atiwajpupi. Chayta ruwayta atinaykipaj Jehovamanta mañakuy, 1 Corintios 12:12-30 versiculostataj leeriy. Chaypi Pabloqa sutʼita nerqa congregacionpi  tukuyninchej yanapakuyta atisqanchejta, may valorniyojtaj kasqanchejta. Chayrayku manaraj siervo ministerial kayta atinkichu chayqa, kallpachakullaypuni. Tukuy atisqaykita ruway Jehovapaj, hermanospajpis. Ancianosqa niraj ima ruwaytapis qoshasuspa, imastachus ruwayta atisqaykitaraj qhawarenqanku (Rom. 12:4-8).

13. ¿Imaraykutaj nisunman siervo ministerial kay atinapaj jinalla kasqanta?

¹³ Bibliapi imastachus siervos ministeriales ruwanankuta nisqanmanta casi tukuynintaqa, tukuy cristianos ruwananchej tiyan. Tukuy cristianos Jehovaman qayllaykunanchej tiyan, wajkunaman qorispa kusikunanchej tiyan, sumaj cristianostaj kananchej tiyan. Qantaj ichapis chay imasmanta casi tukuynintaña ruwashanki. Chaywanpis astawan ruwaykunata japʼinaykipaj, ¿imaspitaj astawan kallpachakunayki tiyan?

¿IMASTATAJ RUWANAYKI TIYAN SIERVO MINISTERIAL KANAYKIPAJ?

14. ¿Imataj niyta munan “respetanapaj jina” kay? (1 Timoteo 3:8-10, 12).

¹⁴ Bibliapi 1 Timoteo 3:8-10, 12 (leey) versiculospi sutʼita willashan imastachus ruwananku kasqanta siervos ministeriales kayta munajkuna. Siervos ministerialesqa “respetanapaj jina kananku tiyan”. Chayqa niyta munan “atienekunapaj jina” kananku kasqanta, “jatunpaj qhawanapaj jinataj”. Chaytaj mana niyta munanchu mana asinankuta, nitaj chanzasta ruwanankuta (Ecl. 3:1, 4). Ajinapis paykunaqa mayta kallpachakunanku tiyan tukuy ruwanasninkuta sumajta juntʼanankupaj, de confianzataj kanankupaj. Ajinamanta congregacionmanta tukuy hermanos paykunata respetanqanku.

15. ¿Ima niytá munan ‘mana iskayta parlay’, nitaj ‘imatapis munapayay’?

¹⁵ “Mana iskayta parlajkunachu” kananku tiyan. Chayqa niyta munan cabalta parlananku kasqanta, mana llullakunankuchu kasqanta, atienekunapaj jinataj kananku kasqanta. Paykunaqa nisqankuta juntʼanankupuni tiyan, nitaj pitapis engañanankuchu tiyan (Pro. 3:32). “Nillataj mana pʼenqakuspa imatapis munapayajkunachu” kananku tiyan. Chayqa niyta munan negociosta ruwaspa, chayri congregacionpa qolqenta apaykachaspa mana engañanankuchu kasqanta. Nitaj hermanosninkumanta aprovechakunankuchu tiyan qolqeta ganayta munaspa.

16. 1) Biblia mana “vinota anchata tomajkunachu” kanata nispa, ¿ima niytá munan? 2) ¿Ima niytá munan ‘llimphu sonqoyoj’ kay?

¹⁶ Mana “vinota anchata tomajkunachu”  kananku tiyan. Mana macharinankukamachu tomananku tiyan, nitaj wajkunata yuyachinankuchu tiyan anchata tomasqankuta. Chantapis ‘llimphu sonqoyoj’ kananku tiyan. Chayqa niyta munan Jehovaj kamachiykunasninman jina kausakunanku kasqanta. Tukuypis pantaj runaspuni kanchej, chaywanpis atikun Dioswan allinpi kaspa allinta kausakuy.

17. ¿Imaynamantataj ancianos allintaraj qhawaykurinkuman uj hermano uj llankʼaypaj jinachus manachus kasqanta? (1 Timoteo 3:10; fototawan qhawariy).

¹⁷ Biblia nillantaj: “Ñaupajtaqa allintaraj qhawaykuriychej paykuna chay llankʼaypaj jinachus manachus kasqankuta”, nispa. Chaywanqa nishan siervos ministeriales kayta munajkunaqa, ñaupajmantaña rikuchinanku kasqanta uj ruwayta japʼinankupaj jinachus manachus kasqankuta. Chayrayku ancianos ima ruwaytapis qosunku chayqa, sumajta kallpachakunayki tiyan nisusqankuman jina, Diospa llajtanpa kamachiykunasninman jinataj ruwanaykipaj. Sutʼita yachanayki tiyan imatachus ruwanaykita, maykʼajchus chayta tukunaykitapis. Chay ruwanasta sumajta ruwanaykipaj kallpachakunki chayqa, congregacionmanta hermanosqa chayta sutʼita reparanqanku, rikonqankutaj sumajta ñauparishasqaykita. Qankunataj ancianos, sumajta qhawariychej mayqen bautizasqa hermanostachus wakichiyta atisqaykichejta (1 Timoteo 3:10 leey). Congregacionniykichejpi ichapis bautizasqaña kanku wakin jovencitos, wakin lloqallitus ima. ¿Paykuna mana saqespachu sapallankupi Bibliata estudianku? ¿Tantakuykunapi comentankupunichu? ¿Predicacionmanpis llojsinkupunichu? Chay imasta ruwashankuña chayqa, edadninkuman jina, ruwayta atisqankuman jinataj wakin ruwaykunata qowajchej. Ajinamanta ‘allinta qhawaykurinkichej chay llankʼaypaj jinachus manachus kasqankuta’. Chaywanqa ichapis chay jovencitos astawan jovenyaspaña siervos ministeriales kayta atenqanku.

18. ¿Imataj niyta munan “mana juchachana” kay?

¹⁸ Siervos ministerialesqa “mana juchachana” kananku tiyan. Chaypajqa mana ima juchatapis ruwanankuchu tiyan, ajinamanta mana pipis paykunata juchachananpaj. Cristianostaqa ichá pipis llullakuspa imamantapis tumpawasunman. Jesustapis qhasimanta tumparqanku, paytaj nerqa discipulosnintapis kikillantataj ruwanankuta (Juan 15:20). Chaywanpis hermanos Jesús jina llimphu kausaynillayojpuni kanqanku chayqa, congregacionpi allinpaj qhawasqa kanqanku (Mat. 11:19).

19. ¿Ima niytá munan “uj warmiyojlla” kay?

 ¹⁹ Pikunachus siervos ministeriales kayta munanku, casadostaj kanku chayqa, “uj warmiyojlla” kananku tiyan. Jehovaqa qallariymantapacha nerqa uj qhariwan, uj warmillawan casarakuyta atisqankuta. Chaytataj kasukunankupuni tiyan (Mat. 19:3-9). Uj cristianoqa ni jaykʼaj khuchichakuy juchapi urmananchu tiyan (Heb. 13:4). Mana chayllachu, uj cristianoqa warmillanpaj sonqoyoj kanan tiyan, nitaj waj warmista qhawakunanchu tiyan (Job 31:1).

20. ¿Imatataj ruwanan tiyan wawasninta, familiantapis sumajta kamachej qhari?

²⁰ Biblia nillantaj: “Sumajta kamachichunku wawasninkuta, familiankutapis”, nispa. Familiankumanta uma kajkunaqa imatachus familiankupaj ruwanankuta sumajta juntʼananku tiyan. Sapa semana Familiapi Diosta Yupaychanapaj tantakuyta ruwananku tiyan. Atisqankuman jinataj familiankumanta sapa ujwan predicanankupuni tiyan. Chantapis wawasninkuta yanapananku tiyan Jehovaj amigosnin kanankupaj (Efe. 6:4). Pichus familianta sumajta cuidajqa congregaciontapis sumajllatataj cuidanqa (1 Timoteo 3:5, kikinchay).

21. ¿Imatá ruwawaj manaraj siervo ministerialchu kanki chay?

²¹ Manaraj siervo ministerialchu kanki chayqa, Jehovamanta mañakuy, kay yachaqanatataj astawan ukhunchariy. Sumajta qhawaykuriy imastachus ruwanayki kasqanta siervo ministerial kanaykipaj, chayta ruwanaykipajtaj kallpachakuy. Jehovata, hermanostapis may jinatapunichus munakusqaykipi tʼukuriy. Hermanosta astawan munakuy, piensariytaj imaraykuchus paykunata astawan sirviyta munasqaykipi (1 Ped. 4:8, 10). Ajinamanta hermanosta sirvispa may kusisqa kanki. Siervo ministerial kanaykipaj kallpachakusqaykita Jehová bendecichun (Fili. 2:13).