1-3. 1) ¿Imatá ñaupajman churananchej tiyan? 2) ¿Imaspí rikukunku waj parlaypi kaj congregacionpi kajkuna, ima tapuykunataj chaymanta kanman? (Patapi kaj dibujota qhawariy).

KUNANQA Jehovaj ashkha testigosnin mayta yanapakushanku Apocalipsis 14:6 versiculopi kaj profecía juntʼakunanpaj. Chay versiculopi nin: ‘Sumaj willaykuna tukuy llajtasman, ayllusman, waj parlayniyojkunaman, tukuy nacionesman ima willakunanta’, nispa. Qanrí, ¿waj parlaytachu yachakushanki? Wakenqa misioneros jina Jehovapaj llankʼashanku chayri pisi willajkuna kanku chay suyuspi willashanku. Wakintaj suyullankupitaj waj parlaypi kaj congregacionman rishanku.

² Diospa kamachisnenqa Diosmanta astawan yachakuyta ñaupajman churananchej tiyan, familianchejmanpis Diosmanta yachachinanchej tiyan (Mat. 5:3). Chaywanpis wakin kutisqa mana tiempoyoj kasqanchejrayku, Bibliata mana sumajta estudiayta atillasunchu. Waj parlaypi kaj congregacionman ripojkunataj, astawanraj mana estudiayta atinkuchu.

³ Waj parlaypi kaj congregacionpi kajkunaqa, uj mosoj parlayta yachakunanku tiyan. Chantapis kallpachakunanku tiyan ‘Diospa mana taripay atina yachayninmanta’ yachakunallankupajpuni  (1 Cor. 2:10). ¿Imaynatá yachakunkuman congregacionpi yachachikusqanta mana sutʼita entiendesparí? Waj parlaypi kaj congregacionpi sirvej tatas wawasninkoj sonqonman cheqa kaj chayananpaj, ¿imaraykú sumajta qhawarikunanku tiyan?

4. ¿Imaraykú Jehovamanta karunchakusunman? Sutʼinchay.

⁴ Bibliaj yachachiykunasninta waj parlaypi mana sutʼita entiendespaqa, Jehovamanta karunchakusunman. Nehemiasqa Jerusalenman kutispa repararqa wakin wawas hebreota mana parlayta atisqankuta (Nehemías 13:23, 24 leey). Chay wawasqa Diospa Palabranta mana sutʼita entienderqankuchu. Chayraykutaj Diosmanta karunchakorqanku (Neh. 8:2, 8).

5, 6. Waj parlaypi kaj congregacionpi sirvej tatas, ¿imatá reparanku, ima chʼampaytaj kanman?

⁵ Waj parlaypi kaj congregacionpi sirvej tatasqa, reparanku wawasninku Jehovamanta karunchakushasqankuta. Wawasninkoqa tantakuykunapi yachachikusqanta mana allintachu entiendenku, imatachus yachachikusqanwantaj mana yanapachikunkuchu. Pedroqa, familianwan Sudamericamanta Australiaman riporqa. ^[1] Pay nin: “Bibliataqa mana leenallachu tiyan, manaqa yachachikusqanta jatunpaj qhawananchej tiyan, Bibliamanta yachachikusqantataj entiendenanchej tiyan. Ajinallamanta yachakusqanchejman jina kausakusun”, nispa (Luc. 24:32).

⁶ Waj parlaypi Bibliata leesqanchejqa, ichapis mana parlayninchejpi jinachu sonqonchejman chayanman. Chantapis waj parlaypi wajkunawan parlarikuyta mana atillanchejchu. Chayrayku ichá saykʼusunman, chaytaj Jehovata yupaychayninchejpi mana yanapawasunmanchu. Chayrayku waj parlaypi kaj congregacionpi Jehovata sirviyta munaspaqa, Jehovawan amisgollapuni kanapaj mayta kallpachakunanchej tiyan (Mat. 4:4).

7. ¿Imaynatá babilonios Danielta tanqarqanku costumbresninkuman jina, religionninkuman jinataj ruwananpaj?

⁷ Daniel, amigosnin ima Babiloniapi presos kashajtinku, babiloniosqa paykunata tanqayta munarqanku costumbresninkuman jina, religionninkuman jina ruwanankupaj. Chayrayku “caldeospa parlayninkuta” paykunaman yachacherqanku, reypa kamachina tiyananpi sirvejkunamanta kurajnintaj paykunaman babilonio sutista churarqa (Dan. 1:3-7). Danielman churarqa chay suteqa, Bel sutiman rijchʼakorqa. Beltaj Babiloniamanta rejsisqa dios karqa. Rey Nabucodonosorqa ichapis Danielta creechiyta munarqa Jehová Diosmanta nisqaqa, babiloniospa diosninku aswan atiyniyoj kasqanta (Dan. 4:8, 9).

8. ¿Imatá Daniel ruwarqa Jehovawan sumaj amigosllapuni kananpaj?

⁸ Danielman reypa mikhunanta jaywajtinkupis, payqa “sonqompi” nikorqa Diospa leyesninta mana pʼakinanta (Dan. 1:8). Imaraykuchus payqa “Diospa palabranta” parlayninpi estudiarqa. Waj llajtapi tiyakushaspapis, Dioswan sumaj amigosllapuni kananpaj mayta kallpachakorqa (Dan. 9:2). Danielqa Babiloniapi 70 watastaña kashaspapis, Daniel sutillawanpuni rejsisqa karqa, chay sutintaj hebreo parlaypi karqa (Dan. 5:13).

9. ¿Imaynatá Salmo 119 capitulota qhelqaj Diospa Palabranta qhawarqa?

⁹ Salmo 119 capitulota qhelqajqa atiyniyoj kuraj runas contranpi rimasqankuta aguantarqa. Diospa Palabranta leespataj kallpachakorqa, chaytaj yanaparqa mana wajkuna jinachu kananpaj (Sal. 119:23, 61). Saqerqataj Diospa Palabran sonqon ukhukamapuni chayananta (Salmo 119:11, 46 leey).

10, 11. 1) ¿Imapajtaj Bibliata estudiananchej tiyan? 2) ¿Imaynatá chayta ruwasunman? Uj kikinchaywan sutʼinchay.

¹⁰ Congregacionpi ashkha ruwanasniyoj kaspapis, kausanapaj llankʼana kajtinpis, tukuyninchej tiempochakunanchej tiyan sapallanchejpi Bibliata estudianapaj, familiapi Diosta yupaychanapaj ima (Efe. 5:15, 16). Chantapis mana Bibliaj ashkha paginasninta leeyllachu, nitaj tantakuypi tapuykunaman kutichinapaj wakichikuyllachu. Manaqa Bibliata estudiananchej tiyan sonqonchej ukhukama chayananpaj, creeyninchejta kallpachananpaj ima.

¹¹ Chayta ruwanapajqa, sumajta tʼukurina. Bibliata estudiaspaqa mana yuyanachu imatachus wajkuna necesitasqallankupi. Manaqa yuyananchej tiyan imatachus necesitasqanchejpi (Fili. 1:9, 10). Predicanapaj, tantakuypaj chayri umallirichinapaj wakichikushaspaqa, ichapis mana yuyanchejchu imatachus necesitasqanchejpi. Waykʼoj runapi tʼukurina. Payqa waykʼushaspa mikhunata llamirin. Jinapis mana llamirisqallanwanchu kausanqa. Manaqa kallpachasqa kananpaj jina sumaj mikhunasta waykʼukunan tiyan. Noqanchejpis, Jehovawan sumaj amigosllapuni kanapajqa, Bibliata mana saqespa estudiananchej tiyan. Ajinamantataj Diosman astawan qayllaykusun.

12, 13. ¿Imaraykú ashkha hermanos ninku parlayninkupi Bibliata estudiay yanapasqanta?

¹² Waj parlaypi kaj congregacionpi sirvej ashkha hermanos ninku, ‘parlayninchejpi’ Bibliata mana saqespa estudiay sumaj kasqanta (Hech. 2:8). Misionerospis yachanku waj suyupi sirvinallankupajpuneqa, mana tantakuykunapi yachachikusqanta uyarinallankuchu kasqanta.

¹³ Alain sutiyoj hermanoqa, pusaj watata  jina persa parlayta yachakorqa. Pay nin: “Persa parlaypi tantakuykunapaj wakichikuspaqa, chay parlayllapi astawan yuyani. Nitaj wakichikushasqay sonqoyman chayanchu. Chayrayku tiempochakuni parlayniypi Bibliata, publicacionesta ima estudianaypaj”, nispa.

14. ¿Imatataj tatas sumajta qhawarikunanku tiyan, imaraykutaj?

¹⁴ Cristiano tatasqa sumajta qhawarinanku tiyan wawasninkoj sonqosninkuman, yuyayninkuman ima cheqa kaj chayashasqantachus manachus. Sergepi, warmin Murielpi ima tʼukurina. Paykunaqa waj parlaypi kaj congregacionpi, kinsa wata kurajta karqanku. Repararqankutaj wawanku willaypi, tantakuykunapi ima mana kusisqachu kashasqanta, chaypacha wawanku 17 watasniyoj kasharqa. Muriel nin: “Wawaykoqa waj parlaypi predicaj riyta mana munajchu. Francespi predicaj riytataj mayta munaj”, nispa. Serge nin: “Wawayku congregacionpi mana ñauparishasqanta reparasqaykurayku, ñaupaj congregacionniykuman kutipuyta ajllarqayku”, nispa.

15. 1) ¿Imataj tatasta yanapanman waj congregacionman ripuytachus manachus ajllanankupaj? 2) ¿Ima yuyaychaytaj tiyan tataspaj Deuteronomio 6:5-7 versiculospi?

¹⁵ ¿Imapitaj tatas tʼukurinanku tiyan, ima parlaytachus wawasninku astawan entiendenku, chay congregacionman ripunankupaj? Uj kaj, sumajta tʼukurinanku tiyan wawasninkuman Diosmanta yachachinankupaj, waj parlayta yachachinankupaj ima, tiemponku kananpichus, manachus. Iskay kaj, ichapis tatasqa reparanqanku wawasninku willayman llojsiyta, tantakuykunaman riyta, waj parlaypi kaj congregacionpi Diosta sirviyta ima mana munasqankuta. Ajinapi rikukuspa tatasqa, ima parlaytachus wawasninku astawan entiendenku, chay congregacionman ripuyta ajllanqanku. Wawasninku Jehovawan sumajta masichakusqankutawan, ichapis tatasqa waj parlaypi kaj congregacionman kutipuyta ajllanqanku (Deuteronomio 6:5-7 leey).

16, 17. ¿Imataj wakin tatasta yanapan Jehovamanta wawasninkuman yachachinankupaj?

¹⁶ Wakin tatasqa waj parlaypi kaj congregacionpi chayri grupopi kashaspa, Jehovamanta wawasninkuman, waj jinasmanta parlayninkupi yachachinku. Hermano Charlesqa kinsa warmi wawasniyoj, ujnin 9 watasniyoj, ujnintaj 12 watasniyoj, ujnintaj 13 watasniyoj. Paykunaqa lingala parlaypi kaj grupopi kashanku. Charles nin: “Familiapi Diosta yupaychanapaj tantakuyta parlayniykupi ruwanaykuta, wawasniykumanpis Bibliamanta parlayniykupi yachachinaykuta nerqayku. Chantapis predicanaykupaj, tapuykunaman kutichinaykupaj lingala parlaypi wakichikuyku, wawasniykuwan pujllashaspapis lingalata parlayku. Ajinamanta wawasniyku chay parlayta kusirikuspa yachakunku”, nispa.

¹⁷ Kevinqa iskay warmi wawitasniyoj. Ujnenqa 5 watasniyoj, ujnintaj 8 watasniyoj. Payqa familianwan waj parlaypi kaj congregacionpi kashan. Maytataj kallpachakun wawasninman Diosmanta yachachinanpaj. Imaraykuchus wawasnenqa waj parlaypi tantakuykunata niraj sumajta entiendenkuchu. Kevin nin: “Warmiywanqa francespi wawasniykuman Diosmanta yachachiyku. Chantapis francespi tantakuyman killapi ujta riyku. Vacacionespitaj francespi jatun tantakuyman riyku”, nispa.

18. 1) ¿Imaynatá Romanos 15:1, 2 tatasta yanapanman wawasninkuta yanapanankupaj? 2) ¿Imastataj wakin tatas ninku? (Sutʼinchayninta qhawariy).

¹⁸ Tatasqa sumajta ajllananku tiyan imachus wawasninkupaj aswan allin kasqanta, ajinamanta Jehovawan amigosllapuni kanankupaj (Gál. 6:5). ^[2] Murielqa qosanwan waj parlaypi kaj congregacionpi sirviyta munaspallapunipis, ñaupaj congregacionninkuman  kutiporqanku, wawankuta Jehovata munakunallanpajpuni yanapanankupaj (Romanos 15:1, 2 leey). Hermano Sergepis parlayninkupi kaj congregacionman kutipuspa allinta ruwasqankuta reparan. Pay nin: “Francespi kaj congregacionman kutipusqaykumantapacha, wawaykoqa ñaupariyta qallarerqa, bautizakorqataj. Kunantaj precursor regular. Tʼukurishantaj waj parlaypi kaj grupoman yanapakoj ripuypi”, nispa.

19, 20. ¿Imaynatá rikuchisunman Diospa Palabranta jatunpaj qhawasqanchejta?

¹⁹ Jehovaqa tukuy runasta munakun. Chayrayku ashkha parlaykunapi Biblia kananta saqen, “tukuy runas” cheqa kajta rejsinankupaj (1 Tim. 2:4). Yachantaj paywan sumaj amigosllapuni kanapaj, parlayninchejpi Bibliata leenanchej kasqanta.

²⁰ Tukuypis mayta kallpachakunanchej tiyan Jehovawan amigosllapuni kanapaj. Chaypajtaj parlayninchejpi Bibliata mana saqespa estudiananchej tiyan. Ajinamanta familianchejta Dioswan amigosllapuni kanankupaj yanapayta atisunchej. Rikuchisuntaj Diospa Palabranta jatunpaj qhawasqanchejta (Sal. 119:11).