¿Yacharqankichu?

RIKUCHIY

¿Yacharqankichu?

Ñaupa tiempopi, ¿cheqamantachu uj runaj chajranman cizaña qhorata tarpuykoj kanku?

Kay Digesto libroj copianqa 1468 watamanta, kay librotataj kamachej Justiniano qhelqarqa. Kay libroqa unay tiempopi kaj leyesmanta parlaj librosmanta ujnin.

MATEO 13:24-26 versiculospi Jesús nerqa: “Diospa janaj pacha reinonqa rijchʼakun sumaj mujuta jallpʼampi tarpoj runaman. Tarpojkuna puñuranankukamataj, tarpuchejpa enemigonqa jamuspa, cizaña nisqa qhora mujuta trigo tarpusqaman tʼakaykuytawan, ripusqa. Trigo umashajtinñaqa, cizaña qhorapis rikhurillasqataj trigowan khuska”, nispa. Wakin qhelqajkuna kay rijchʼanachina cuentolla kasqanta nejtinkupis, romanospa documentosninkoqa mana cuentollachu kasqanta rikuchin.

Bibliamanta parlaj uj diccionario nin: “Pillamantapis vengakunapaj cizaña qhorata chajrankuman tarpuykoyqa [...] Romanospa leyninkuman jina jucha karqa. Romanospa leyninkupi chaymanta parlakusqanqa rikuchin cizañata runas enemigosninkoj chajrankuman tarpuykuyta yachasqankuta”, nispa. Leyesta sumajta rejsej Alastair Kerr nin, 533 watapi Romata kamachej Justiniano, Digesto nisqa librota orqhosqanta. Chay libropeqa romanospa leyesnin pisi palabrasllapi kasharqa, jinallataj 100-250 watas chaynejpi leyesmanta yachaj runaspa qhelqasqankupis. Digesto libroqa leyesta sumajta rejsej Ulpianomanta parlan, payqa uj runa enemigonpa chajranman cizañata tarpuykuspa cosechanta pierdechisqanmanta parlarqa. Chantapis chay libro nillantaj cosechata pierdechejqa dueñonman pagananta.

Yachakunchej jina kay imasqa pasaj Roma suyoj atiyninpi. Chaytaj rikuchin Jesuspa nisqan mana cuentollachu kasqanta.

Ñaupa tiempopi Romamanta autoridades, ¿imasta ruwanankutataj saqej kanku Judeamanta autoridadesta?

UNAY tiempopi romanosqa Judeata kamachinankupaj, uj gobernadorta churarqanku, cargonpi kaj soldadostawan. Chay gobernadorqa impuestosta cobranan karqa, mana chʼajwas kanapajtaj qhawanan karqa. Romanostajrí mana leyman jinachu ruwajkunata chinkachej kanku, chʼajwata rikhurichejkunatapis juzgaj kanku. Waj juchʼuy imastataj Judeamanta autoridades allinchanankuta saqej kanku.

Judiospa Jatun Juntanku

Jatun Juntaqa judiospa juzgadosninmanta aswan patapi karqa, Jatun Juntamanta kajkunataj judiospa leyesninta juntʼachej kanku. Tukuynin Judea jallpʼapitaj ashkha juzgados karqa. Chaykunapeqa mana allin imasta ruwajkunata, runa wañuchista ima juzgaj kanku. Chayta ruwasqankumantaj romanos mana satʼikojchu kanku. Jinapis Judeamanta juzgadosqa mana niyta atejchu kanku uj suwa runa wañuchisqa kananta. Chaytaqa Romamanta autoridadeslla niyta atej kanku. Estebantatajrí Romamanta autoridadesta mana waturispalla Jatun Juntamanta kajkuna rumiswan chʼanqaykuspa wañucherqanku (Hech. 6:8-15; 7:54-60).

Qhawanchej jina Jatun Juntamanta kajkunaqa may atiyniyoj karqanku. Unay tiempomanta qhelqaj Emil Schürer nisqanman jinataj, paykunaqa “mana imanayta atejchu kanku, ima ratollapis munasqankuman jina Romamanta autoridades imatapis ruwajtinku. Chaytaj rikukoj gobiernoj contranpi mana allin imasta ruwajtinku”. Imaynatachus comandante Claudio Lisias Pablota presocharqa, chay kutipi jina. Pablotaj Roma llajtayoj karqa (Hech. 23:26-30).