PHUYUS manchayta yanayaykurejtin, runasqa yachanku loco para jamushasqanta. Chay ratotaj willanakunkupacha ni pi chay loco parawan japʼichikunanpaj.

Jehová Diospis ajinallatataj tukuy runasman willachishan, loco paramantapis aswan jatun ñakʼariy jamushasqanta. ¿Imaynatá chay ñakʼariymanta willachishan? Runas kasukunankupaj, ¿tiempowanchu willachishan? Chayta yachanapajqa, imastachus Jehová Dios ñaupa tiempopi willachisqanta yachakuna.

Ñaupa tiempopi Jehová Diosqa, kamachiykunasninta yachashaspa mana kasukojkunata castigananta nerqa. Chaytataj mana uj kutillatachu willacherqa (Pro. 10:25; Jer. 30:23). Jehová Diosqa niraj ima castigotapis apachishaspa, ñaupajmantaña willachej. Ajinamanta runas sajra ruwayninkuta saqespa, payman kutirikunankupaj (2 Rey. 17:12-15; Neh. 9:29, 30). Chaypajtaj ima castigotachus apachinanta kamachisninwan willachej. Chantapis runasman usqhayllata kasukunankuta entiendechej (Amós 3:7).

Diospa ujnin kamachenqa Noé karqa. Paypa tiemponpi runasqa millay kausayniyoj, may sajrastaj karqanku. Noetaj paykunaman ashkha watasta willarqa, tukuy sajra runasta Dios jatun parawan chinkachinanta (Gén. 6:9-13, 17). Noeqa chay runasman nillarqataj, mana wañunankupaj imastachus ruwanankuta. Chayta mana saykʼuspa willasqanrayku, Noeqa “cheqan kajta willaj” jina rejsisqa karqa (2 Ped. 2:5).

Noé Diospa nisqanta mana saykʼuspa willajtinpis, tiemponmanta runasqa mana creerqankuchu, nitaj kasukorqankuchu. Chayrayku ‘Jatun Para chayamojtin, tukuyninku chinkachisqa karqanku’ (Mat. 24:39; Heb. 11:7). Paykunaqa mana niyta atinkumanchu karqa Dios mana willachisqanta.

Jehová Diosqa ima castigotapis apachinanpaj runasman tiempota qojpuni, wakin kutis mana ancha ñaupajmantachu willachejtinpis. Chayta ruwarqa Egiptoman chunka castigosta apachishaspa. Qanchis kaj castigoqa, manchay jatuchaj granizos karqa. Jehová Diosqa niraj chay castigota apachishaspa, Moisestawan Aarontawan kacharqa, faraonman llajtanmanwan willachinanpaj. Chay willachisqanmanta qʼayantinraj granizamunan karqa. Chayrayku paykunaqa chay castigomanta jarkʼakuyta aterqanku. Biblia nin: “Faraonpa wakin yanapajkunampis Tata Diospa nisqasninta uyarispa, mancharikorqanku. Chayrayku kamachisninkuta, uywasninkutapis wasisninkupi pakarqanku. Piskunachus mana kasuta ruwarqankuchu Tata Diospa nisqasninta, chaykunaqa kamachisninkuta, uywasninkutapis campopi saqellarqanku”, nispa (Éxo. 9:18-21). Rikunchej jina, Jehová Diosqa chay castigomanta willacherqa runas usqhayllata kasukunankupaj. Kasukojkunataj kamachisninkuta, uywasninkutapis salvarqanku.

Jehová Diosqa niraj chunka kaj castigota apachishajtin, faraonman, kamachisninmanwan willachillarqataj. Jinapis paykunaqa mana kasukorqankuchu (Éxo. 4:22, 23). Chayrayku kuraj wawasninku wañorqanku. Chayqa, ¡manchay llakiypuni karqa! (Éxo. 11:4-10; 12:29). Paykuna chay willayta kasukunankupaj, ¿tiempo karqachu? Arí. ¿Imaynatá chayta yachanchej? Moisesqa israelitasman chay castigo jamushasqanta willarqa, nerqataj familianku salvakunanpaj imatachus ruwanankuta (Éxo. 12:21-28). ¿Mashkhastaj  Moisesta kasukuspa chay castigomanta librakorqanku? Tanteakusqanman jina, 3 millones chayri astawan ashkha runas. Tukuyninkutaj Egiptomanta llojsiporqanku. Chay runas ukhupi kasharqanku: israelitas, “imaymana rijchʼaj ashkha runas” ima, nisunman mana israelitas, egipciospiwan (Éxo. 12:38).

Rikunchej jina, Jehová Diosqa niraj ima castigotapis apachishaspa, runas kasukunankupaj tiempowanpuni willachej (Deu. 32:4). ¿Imaraykutaj Jehová Dios ajinata ruwaj? Apóstol Pedroqa Jehová Diosmanta nerqa: “Mana munanchu ni pi chinkachisqa kananta. Astawanqa munan tukuy pesachikunankuta”, nispa (2 Ped. 3:9). Arí, Jehová Diosqa runasmanta llakikorqa. Payqa munarqa, niraj ima castigotapis apachishajtin runas pesachikunankuta, kasukunankutataj (Isa. 48:17, 18; Rom. 2:4).

Jesusqa kay jallpʼapi kashaspa, “manchay ñakʼariy” kananta willarqa, chaypitaj sajra runas chinkachisqa kananku karqa. Chay willayqa jallpʼantinpi willakushan, runastaj usqhayllata kasukunanku tiyan (Mat. 24:21). Jesusqa yachachisqasninman nerqa, chay manchay ñakʼariy qayllamusqanman jina imastachus rikunankuta. Nillarqataj yachachisqasnin imaspichus rikukunankuta. Payqa mundontinpi tʼukuna imas kananta nerqa. Chaytaj kay tiempopi juntʼakushan (Mat. 24:3-12; Luc. 21:10-13).

Chayrayku Jehová Diosqa, tukuy runasta payta sirvinankuta, kasukunankuta ima nishan. Payqa munan kay tiempopiña kusisqa kausakunanchejta, qhepamantaj paraisopi ashkha bendicionesta japʼinanchejta (2 Ped. 3:13). Jehová Diosqa, ‘Gobiernonmanta sumaj willaykunata’ willachishan. Ajinamanta runas paypa nisqasninpi creenankupaj, salvakunankupajtaj. Jesús nisqanman jinataj, chayqa ‘jallpʼantinpi willakunan karqa tukuy laya runas yachanankupaj’ (Mat. 24:14). Jehová Diosqa chay willayta 240 suyuspi, llajtaspi ima kamachisninwan willachishan. Payqa munan tukuy runas willachisqanta uyarinankuta, kʼajaj phiñakuyninmantataj salvakunankuta (Sof. 1:14, 15; 2:2, 3).

Jehová Diosqa niraj ima castigotapis apachishaspa tiempowanpuni willachin. Chaymantataj mana iskayrayananchejchu tiyan. Chayrayku sapa runamanta kashan, tiempo kashajtillanraj Diospa willachisqanta kasukunanqa. Diospa kamachisnin kasqanchejrayku, runasta yanapanallapuni kay sajra mundoj tukukuyninpi mana wañunankupaj.