1. ¿Imastataj Jehová Dios munayninta juntʼananpaj ruwayta atinman?

JEHOVÁ DIOSQA munayninta juntʼananpaj imallamanpis tukuyta atinman. Payqa wakin kutis tukorqa: Yachachejman, Sonqochajman, sumaj willaykunata Willajman ima (Isa. 48:17; 2 Cor. 7:6; Gál. 3:8). Jinapis Jehová Diosqa, munayninta juntʼananpaj ashkha kutispi runasmanta valekun (Mat. 24:14; 28:19, 20; 2 Cor. 1:3, 4). Payqa yachayta, kallpatawan qowasunman. Jinamanta munayninta noqanchejnejta juntʼananpaj. Wakin yachayniyoj runasqa ninku, chay tukuy imas Diospa sutin imachus niyta munasqanman jina kasqanta.

2. 1) ¿Imajtintaj Jehová Diospaj niña valesqanchejta yuyasunman? 2) ¿Imastá kay yachaqanapi yachakusun?

² Tukuypis Jehová Diospaj llankʼayta munanchej. Jinapis machitusña kasqanchejrayku, imaynachus kausayninchej kasqanrayku chayri wakin imasta mana ruwayta atisqanchejrayku, ichá yuyanchej Jehová Diospaj niña valesqanchejta. Wakenqa imaynatachus Diosta sirvishasqankuwan kusisqa kanku, nitaj paypaj astawan llankʼayta munankuñachu. Kay yachaqanapeqa, yachakusun imaynatachus Jehová Dios munayninta juntʼananpaj wakichiwasqanchejta. Yachakullasuntaj ñaupa tiempopi wakin qharismanta, wakin warmismantawan. Paykunataqa Jehová Dios yanaparqa, ruwayta munanankupaj, ruwayta atinankupajtaj. Chantá yachakullasuntaj, imatachus ruwanata Jehová Dios munayninta noqanchejnejta juntʼananpaj.

3. Filipenses 2:13 nisqanman jina, ¿imaynatataj Jehová Dios ruwayta munanapaj yanapawasunman?

³ (Filipenses 2:13 leey). * Jehová Diosqa ruwayta munanapaj yanapayta atiwanchej. Ichá reparanchej, congregacionninchejpi  wakin imasta ruwanapaj yanapa necesitakusqanta. Chayrí sucursalpa apachimusqan cartapi willakun, waj lugarpi yanapa necesitakusqanta. Chayta uyarispa, ichá yanapakunapaj imatachus ruwananchejpi piensarinchej. Chayrí mana atinapaj jina ruwayta japʼispa, mana sumajtachu ruwananchejmanta manchikunchej. Manachayrí Bibliata leeshaspa, chay versiculoswan wajkunata yanapariyta munanchej. Jehová Diosqa mana imata ruwanapajpis obligawanchejchu. Jinapis paypaj astawan llankʼayta munasqanchejta rikuspa, chayta ruwananchejpaj yanapawasun.

4. ¿Imaynatá Jehová Dios imatapis ruwanapaj atiyta qowasunman?

⁴ Jehová Diosqa ruwananchejpaj atiyta qowasunman (Isa. 40:29). Payqa imastachus ruwayta yachasqanchejta, astawan sumajta ruwanapaj atiyninwan yanapawasunman (Éxo. 35:30-35). Chantapis wakin ruwaykunata juntʼanapaj, llajtannejta yachachiwasunman. Diospa llajtanpi ima llankʼaytapis mana ruwayta atinchejchu chayqa, yanapata mañakuna. Mañakunallataj Tatanchej Jehovamanta ‘may sumaj atiyninta’ (2 Cor. 4:7; Luc. 11:13). Bibliaqa willawanchej, Jehová Dios ashkha qharista, warmista ima ruwayta munanankupaj, ruwayta atinankupajtaj yanapasqanta. Qhepan parrafospi wakinmanta yachakusun. Yachakushaspataj, piensarina imaynatachus Jehová Dios paykunata jina yanapanawanchejpi.

5. 1) ¿Maykʼajtaj Jehová Moisesta Egiptoman kacharqa? 2) ¿Pikunallamantaj Jehová Dios ima ruwaytapis qon?

⁵ Jehová Diosqa Moisesman atiyta qorqa, israelitasta Egiptomanta kacharichinanpaj. Ichapis Moisesqa “egipcio runaspa tukuy yachachiyninkupi” yachachisqa kasqanrayku, israelitasta kacharichinanpaj wakichisqaña kasqanta yuyarqa. Jinapis Jehovaqa, mana chaypachachu Moisesman israelitasta kacharichinanta nerqa (Hech. 7:22-25). Ñaupajtaqa Moisesta llampʼu sonqo kayta, kʼumuykukoj sonqo kaytawan yachacherqa. Chaymantaraj Egiptoman kacharqa (Hech. 7:30, 34-36). Chantapis Jehová Diosqa Moisesta kallpacharqa, mana manchachikuspa Egiptopi atiyniyoj kamachejwan parlamunanpaj (Éxo. 9:13-19). Maykʼajchus, imaynatatajchus Jehová Dios Moisesnejta israelitasta kacharichisqanmanta, ¿imatá yachakunchej? Jehová Diosqa, pikunachus pay jina kanankupaj kallpachakunku, paypitaj atienekunku, chaykunallaman ima ruwaytapis qosqanta (Fili. 4:13). 

6. ¿Imatataj yachakunchej Jehová Dios rey Davidta Barzilaiwan yanapachisqanmanta?

⁶ Moisespa tiemponmanta ashkha unayninman, Jehová Diosqa Davidta Barzilaiwan yanapacherqa. Rey Davidwan kamachisninwanqa wawan Absalonmanta ayqekusharqanku. Paykunaqa “saykʼusqa, yarqhasqa, chʼakisqataj” kasharqanku. Barzilaitaj viejitoña kaspapis, wajkunawan khuska, rey Davidman mikhunata aparqa. Chaytataj ruwarqanku kausayninkuta wañuy pataman churaspa. Barzilaiqa mana yuyarqachu, viejitoña kasqanrayku Jehová Diospaj niña valesqanta. Astawanpis payqa, qorikuyta yachasqanrayku, Diospa kamachisninta kapuyninwan yanaparqa (2 Sam. 17:27-29). ¿Imatataj yachakunchej? Jehová Diosqa noqanchejnejta mundontinmanta hermanosta yanapariyta atisqanta. Arí, ima edadniyoj kajtinchejpis hermanosninchejta necesitasqankupi yanaparisunman (Pro. 3:27, 28; 19:17). Ichapis paykunaman, mana imallatapis makinchejwanpuni jaywariyta atinchejchu. Jinapis qolqesitunchejmanta Jallpʼantinpi Willakunanpaj nisqa cajitasman churasunman. Imaraykuchus chaymanta llojsin, necesitaj hermanosta ima ratollapis chayri mayllapipis yanapanapaj (2 Cor. 8:14, 15; 9:11).

7. 1) ¿Ima bendiciontataj Jehová Dios Simeonman qorqa? 2) ¿Imamantá Jehová Diosman agradecekusunman?

⁷ Jehová Diosqa Jerusalenmanta Simeonman nerqa, niraj wañupushajtin Mesiasta rikunanta.  Chayqa Simeonta maytachá kallpacharqa. Imaraykuchus payqa viejitoña karqa, ashkha watastataj Mesías chayamunanta suyakusharqa. Jehová Diosqa payta creeyninrayku, unayta suyakusqanraykutaj bendicerqa. ¿Imaynatá chayta ruwarqa? “Diospa atiynenqa Simeonta temploman pusarqa”, chaypitaj payqa Jesusta rikorqa. Chantá Jehová Diosqa Simeonman atiyninta qorqa, wawita Jesusmanta uj profeciata willananpaj. Jesusqa aswan qhepaman Cristo kanan karqa (Luc. 2:25-35). Simeonqa ichapis wañuporqa Jesús niraj Diospa Gobiernonmanta willayta qallarishajtin. Jinapis mayta agradecekorqa, Jehová Dios paywan uj profeciata willachisqanmanta. Payqa aswan qhepaman ashkha bendicionesta japʼenqa. Chantapis paraisopi Jesús kamachimushajtin, kay jallpʼamanta tukuy familiasta bendecisqanta rikonqa (Gén. 22:18). Noqanchejpis Jehová Diosman agradecekusunman, payta imaynallamantapis sirvejta saqewasqanchejmanta.

8. ¿Imasta ruwanapajtaj Jehová yanapawasunman?

⁸ Ñaupa cristianospa tiemponkupi, José sutiyoj cristiano karqa. Payqa manchay kʼachapuni karqa, Jehová Diospajtaj llankʼayta munarqa (Hech. 4:36, 37). Apostolesqa payta Bernabé nispa suticharqanku, chaytaj niyta munan “Sonqochaj Wawa”. Ichapis wajkunata sonqochasqanrayku ajinata suticharqanku. Saulo cristianoman tukojtin, ashkha cristianos payman chimpaykuyta manchachikorqanku. Imajtinchus Sauloqa, aswan ñaupajta cristianosta qhatiykacharqa. Jinapis Bernabeqa payta yanaparerqa. Sauloqa Bernabé paywan kʼacha kasqanmanta, maytachá agradecekorqa (Hech. 9:21, 26-28). Aswan qhepamantaj, Jerusalenmanta ancianosqa Antioquiamanta cristianos kallpachanata necesitasqankuta yacharqanku. Chayrayku Bernabeta chay karu lugarman kacharqanku. Payta kachasqankoqa may sumajpuni karqa. Bibliaqa nin, Bernabeqa tukuyta “kallpachayta qallarerqa, Señorta tukuy sonqo kasukunallankupajpuni” (Hech. 11:22-24). Kay tiempopipis, Jehová Diosqa hermanosninchejta sonqochanapaj yanapawasunman. Payqa yanapawasunman, familiarninku wañupusqanrayku llakisqa kajkunata sonqocharinanchejpaj. Manachayrí onqosqa chayri llakisqa hermanosta visitarinapaj, manaqa telefononejta wajyarinapaj yanapawasunman. Ajinamanta paykunata kallpacharisunman. Allin kanman Jehová Diosta Bernabé jina yanapakuyta munananchej (1 Tes. 5:14).

9. ¿Imatá yachakunchej Jehová Dios hermano Vasilyta yanapasqanmanta?

⁹ Jehová Diosqa, Vasily sutiyoj hermanota sumaj anciano kananpaj yanaparqa. Paytaqa 26 watasniyoj kashajtin, ancianota jina churarqanku. Hermano Vasilyqa, hermanosta yanapananpaj mana wakichisqachu kashasqanta yuyarqa, astawanraj problemasniyoj kajkunata. Jinapis payqa unaytaña sirvej ancianoswan yanapachikorqa. Ñaupajman Apajkunapaj Escuelapis mayta yanapallarqataj. Hermano Vasilyqa astawan wakichisqa kananpaj, mayta kallpachakorqa. Payqa imastachus ruwayta munasqanta uj listapi anotakorqa. Chaykunata ujmanta uj juntʼaspataj, manchachikuyninta atiparqa. Pay nin: “Ñaupajtaqa hermanosta mana yanapariyta atinayta yuyaj kani. Kunanrí chayta kusiywan ruwani. Uj hermanota chayri hermanata sonqocharinaypaj jina textosta tarispaqa, mayta kusikuni. Imajtinchus yachani Jehová Dios yanapawasqanta”, nispa. Hermanosníy, Vasily jina ruwaychej, Jehovaj makinpitaj churakuychej. Ajinata ruwankichej chayqa, Jehová Dios congregacionpi astawan ruwanaykichejpaj yanapasonqachej.

10. 1) ¿Imatataj Abigaíl ruwasqa? 2) ¿Imatataj Abigailmanta yachakusunman?

¹⁰ Rey Saúl, Davidta kamachisnintawan qhatiykachashajtin,  paykunaqa yanapata necesitarqanku. Davidpa kamachisnenqa, qhapaj israelita Nabalmanta mikhunata qorichikoj rerqanku. Paykunaqa chay runaj ovejasninta chʼin pampaspi jarkʼapusqankurayku, mana pʼenqakuspa mañakorqanku. Jinapis Nabalqa sajra karqa, nitaj paykunaman imatapis qorqachu. Davidqa mayta phiñakorqa, Nabalta, ayllunmanta tukuy qharistawantaj wañuchinanta nerqa (1 Sam. 25:3-13, 22). Chayta yachaytawan, Nabalpa warmin Abigailqa imatachus ruwananta chay rato yuyaychakorqa. Abigailqa manchay kʼachita karqa, mana manchachikoj warmitaj. Payqa Davidwan parlaj rerqa. Paywan tinkuspataj, pampaman kʼumuykukorqa. Chantá nerqa: ‘Mañarikuyki ama makiykiwan pagachikunaykita. Nabalta wañuchispaqa qanlla juchayoj rikhuriwaj. Saqey ari Jehová Dios justiciata ruwananta’, nispa. Abigaíl respetowan parlasqan, allintataj yuyaychakusqan, Davidpa sonqonta kuyuricherqa. Davidqa repararqa, Jehová Diospuni Abigailta payman kachasqanta (1 Sam. 25:23-28, 32-34). Abigailqa llampʼu sonqo, mana manchachikoj, allin yuyayniyojtaj karqa. Chayrayku Jehová Dios munayninta paynejta juntʼarqa. Kay tiempopipis, allin yuyayniyoj, sumajta reparaj hermanas tiyan. Jehová Diostaj paykunamanta valekunman, familiasninkuta, hermanostapis kallpachananpaj (Pro. 24:3; Tito 2:3-5).

11. 1) ¿Imatá Salumpa warmi wawasnin ruwasqanku? 2) ¿Pikunataj Salumpa warmi wawasnin jina kanku?

¹¹ Aswan qhepaman, judiosqa Jerusalén perqasta watejmanta sayarichisharqanku. Jehová Diostaj Salumpa warmi wawasninta yanaparqa chay llankʼaypi yanapakunankupaj (Neh. 2:20; 3:12). Paykunaj tatanku Salumqa, Jerusalén llajtaj ujnin kamachejnin karqa. Jinapis paykunaqa, Jerusalén perqasta ruwaysikorqanku. Chaytataj ruwarqanku mana atinapaj jina kajtinpis, kausayninkuta wañuy pataman churaspa ima (Neh. 4:15-18). Paykunaqa mana Tecoamanta kurajkuna jinachu karqanku. Tecoamanta kurajkunaqa, mana munarqankuchu yanapakuyta (Neh. 3:5). Jerusalén perqasqa, 52 diasllapi sayarichikorqa. Salumpa warmi wawasnenqa, chay ruwaypi yanapakusqankumanta may kusisqachá kasharqanku (Neh. 6:15). Kay tiempopipis, ashkha hermanas kusiywan yanapakunku, Jehová Diosta yupaychanapaj wasista ruwaysikuspa, allinchaysikuspa ima. Chay hermanasqa sumaj yuyayniyoj kanku, tukuy sonqo llankʼanku, kasukojkunataj kanku. Chay hermanaspa ruwasqankoqa, Diospa llajtanta mayta yanapashan.

12. ¿Imatataj Tabitamanta yachakusunman?

¹² Tabita sutiyoj cristianaqa, Jehová Diospa yanapayninwan “ashkha allin ruwanasta” ruwarqa, ‘wajchastataj yanaparqa’, astawanqa viudasta (Hech. 9:36). Tabitaqa manchay kʼacha karqa, wajkunamantaj imatapis qorejpuni. Chayrayku pay wañupojtin, ashkhas waqarqanku. Jinapis Pedro payta kausarichimojtin, mayta kusikorqanku (Hech. 9:39-41). ¿Imatataj Tabitamanta yachakusunman? Jóvenes, machitus, qharis chayri warmis kaspapis, tukuyninchej hermanosninchejta kapuyninchejwan yanaparisunman, chayri imallatapis paykunapaj ruwapusunman (Heb. 13:16).

13. 1) ¿Imasta ruwananpajtaj Jehová Dios hermana Ruthta yanaparqa? 2) ¿Imatá hermana Ruth Jehová Dios yanapasqanmanta nerqa?

¹³ Hermananchej Ruthqa, misionera kayta munarqa. Jinapis manchay manchiskiri karqa. Jovencitallaraj kashajtin, usqhayllata wasimanta wasi rej tratadota saqenanpaj. Pay nerqa: “Wasimanta wasi tratadosta jaywayqa, mayta gustawarqa”, nispa. Jinapis payqa, runasman Diospa Gobiernonmanta parlayta manchachikoj. Ajina manchiskiri kaspapis, 18 watasniyoj kashaspa precursora regular karqa. 1946 watapitaj Galaad Escuelaman rerqa. Chaymanta Hawai suyupi, Japonpiwan Diosta sirverqa.  Hermananchej Ruthqa, Jehová Diospa yanapayninwan, chay lugaresmanta ashkha runasman sumaj willaykunata willarqa. Casi 80 watasta jina predicaytawan, pay nerqa: “Jehová Dios kallpachawarqa. Pay yanapawarqa manchachikuyniyta atipanaypaj. Jehová Diosqa paypi atienekojtinchej, mayqennillanchejtapis paypaj llankʼanapaj yanapawasun”, nispa.

14. Colosenses 1:29 nisqanman jina, ¿imatá ruwananchej tiyan Jehová Dios atiyninwan yanapanawanchejpaj?

¹⁴ Jehová Diosqa ñaupa tiempo kamachisninnejta ashkha imasta ruwarqa. Noqanchejnejtarí, ¿ruwayta atillanmantajchu? Chayqa Diospaj mashkhatachus llankʼayta munasqanchejmanta kashan (Colosenses 1:29 leey). Jehová Diospa makinman churakusun chayqa, payqa munayninta juntʼananpaj imallamanpis tukuchiwasun. Jehovaqa atiyninwan yanapawasunman: kusiywan predicanapaj, sumajta yachachinapaj, wajkunata sonqochanapaj, sumajta llankʼanapaj, khuyakuyniyoj kanapaj ima. 

15. Kay 1 Timoteo 4:12, 15 nisqanman jina, ¿imatataj jóvenes Jehová Diosmanta mañakunanku kasqa?

¹⁵ Congregacionespeqa joven hermanosta mayta necesitakun. Paykunaqa astawan ruwanasta japʼinkuman, siervos ministerialestaj kankuman. Ashkha congregacionespeqa, astawan ancianos tiyan, siervos ministerialestaj pisilla kanku. Jovenña kashanki chay, ¿kallpachakuwajchu congregacionpi astawan yanapakuyta munanaykipaj? Wakin hermanos ninku: “Publicador kaspa kusalla kakushani”, nispa. Ajinata yuyanki chayqa, Jehová Diosmanta yanapata mañakuy siervo ministerial kayta munanaykipaj. Chantapis paymanta kallpata mañakuy, payta tukuy atisqaykita sirvinaykipaj (Ecl. 12:1). Joven, yanapariwayku (1 Timoteo 4:12, 15 leey).

16. 1) ¿Imatataj Jehová Diosmanta mañakusunman? 2) ¿Imatataj tukuyninchej ruwayta atisunman?

¹⁶ Jehová Diosqa munayninta juntʼananpaj, imallamanpis tukuchiyta atiwanchej. Chayrayku paymanta mañakuna, paypaj llankʼayta munananchejpaj yanapanawanchejta. Mañakunallataj chay llankʼayta juntʼanapaj kallpata qonawanchejta. Ima edadniyoj kaspapis Jehová Diosta jatunchana: tukuy tiemponchejwan, kallpanchejwan, imastachus ruwayta yachasqanchejwan, kapuyninchejwan ima (Ecl. 9:10). Diospa llajtanpi imallapipis yanapakunanchejta niwajtinchej, amapuni ninachu: “Noqaqa mana chayta ruwanaypaj valenichu. Wajllata niwajchej”, nispa. Pisillata chayri ashkhata ruwaspapis, tukuyninchej munakuyniyoj Tatanchej Jehovata jatunchayta atinchej.