1. Kay 2 Corintios 3:1-3 nisqanman jina, ¿imaraykutaj uj runata bautismoman chayachiy may sumaj? (Kay revistaj tapanpi fotota qhawariy).

PILLAPIS congregacionninchejmanta bautizakojtenqa, mayta kusikunchej (Mat. 28:19). Noqanchej payman Bibliamanta yachacherqanchej chaytaj, astawanraj kusikunchej (1 Tes. 2:19, 20). Bautizakoj runataqa mana yachachejnillanchu bautizakunanpaj yanapan, manaqa tukuynin congregación. Chayrayku bautizakoj runaqa, yachachejninmanta, congregacionmantapis ‘allinta parlaj carta’ jina (2 Corintios 3:1-3 leey).

2. 1) ¿Imatataj usqhayllata ruwananchej tiyan, chanta imaraykutaj? 2) ¿Maykʼajtaj uj runa estudionchejña kasqanta ninchej? (Sutʼinchayninmanta kutichiy).

² Pasaj tawa wataspeqa, mundontinpi sapa killa 10 millones runasta jina Bibliamanta yachacherqanchej. * Chay kikin tiempollapitaj, sapa wata 280 milmanta astawan bautizakorqanku. Rikunchej jina, may chhika runasraj bautismoman chayayta atinkuman. Jehová Diosqa pacienciayoj kasqanrayku, chay runas Jesuspa discipulosninman tukunankuta munan. Jinapis pisi tiempollaña tiyan. Chayrayku tukuy atisqanchejta ruwana, paykunata usqhayllata bautismoman chayachinapaj (1 Cor. 7:29 qallariynin; 1 Ped. 4:7).

3. ¿Imatá kay yachaqanapi yachakusun?

³ Diospa Llajtanta Kamachejkunaqa, estudiosta usqhayllata bautismoman chayachina kasqanta yachanku. Chaypi yanapanawanchejpajtaj sucursalesmanta wakin hermanosta tapurisqanku.  Chayrayku kay yachaqanapi, qhepan yachaqanapiwan, congregacionesta waturej hermanosmanta, misionerosmanta, unaytaña precursores kajkunamanta ima yachakusun (Pro. 11:14; 15:22). * Paykunamanta yachakoyqa, mana noqallanchejtachu yanapawasun, manaqa estudiosninchejtapis ñauparinankupaj yanapanqa. Kay yachaqanapeqa, imaynatachus estudionchejta bautizakunanpaj yanapanata yachakusun.

4. Wasi punkullapi Bibliamanta yachakojkuna, ¿bautismoman chayayta atinkumanchu?

⁴ Ashkha hermanosqa, runasman wasi punkullankupi Bibliamanta yachachinku. Qallariypi ajinata yachachiy allillan kajtinpis, mana paykunaman unayta yachachiyta atisunmanchu, nitaj sapa semana visitayta atisunmanchu. Chayrayku wakin hermanosqa, wasi punkullapi yachakojkunata yanapanankupaj, numeronta jaywachikunku. * Chantá Bibliamanta imitallatapis yacharichinankupaj wajyarinku, chayri mensajesta apachinku. Wakin hermanosqa ajinata killasta yachachinku, yachakojtaj pisillata ñauparin. Ajina pisisitullata Diospa Palabranta estudiaj runasqa, ichá mana kausayninkuta Diosman jaywaponqankuchu, nitaj bautizakonqankuchu.

5. ¿Imatataj Jesús yachacherqa Lucas 14:27-33 versiculospi?

⁵ Jesusqa discipulosnin kayta munajkuna imatachus ruwanankuta nerqa. Chaypajqa wasita ruwakuyta munaj runamanta, guerraman yaykuyta munaj reymantawan parlarqa. Jesusqa wasita ruwakuyta munaj runamanta nerqa: “Ñaupajtaqa tiyaykukuspa qolqentaraj qhawarikun, wasinta tukuchananpaj kapunchus manachus, chayta”, nispa. Guerraman yaykuyta munaj reymantataj nerqa: ‘Ñaupajtaqa tiyaykukuspa yuyaychachikunraj, soldadosninwan atipayta atenqachus manachus chayta’, nispa (Lucas 14:27-33 leey). ¿Imatataj Jesús chaywan yachachiyta munarqa? Discipulonman tukuyta munajqa, imatachus ruwanan kasqanpi piensarinan kasqanta. Chayrayku estudiosninchejta sapa semana estudianankuta nina. Qhepan parrafopi chaymanta yachakusun.

6. ¿Imatá ruwasunman estudionchej ñauparinanpaj?

⁶ Ñaupajtaqa, punkullapi yachachishanchej chay runata, astawan unaysituta yacharichisunman. ¿Imaynatá chayta ruwasunman?  Uj textollata entiendechinamantaqa, iskay chayri kinsa versiculostawan sutʼincharisunman. Chayman yachakojtinñataj, tapurisunman: “¿Manachu wasiykiman yaykurisunman astawan sumajta yacharikunaykipaj?”, nispa. Imatachus kutichisqanqa, Bibliata estudiayta munasqantapunichus manachus reparachiwasun. Wasinpi unaysitutaña yachachispataj, tapurisunman: “Astawan ñauparinaykipaj, ¿manachu semanapi iskay kutita yachakuyta munawaj?”, nispa. Qhepan parrafospi, imatawanchus estudiosninchej ruwananku kasqanta yachakusun. 

7. ¿Imaynatá wakichikusunman estudionchejta yachachej rinapaj?

⁷ Estudionchejta sapa yachachej rinapaj, sumajta wakichikuna. Wakichikushaspaqa imatachus yachachisun chayta leena, tukuynin textostataj maskʼarina. Chantá imasmantachus chay yachaqana parlashasqanta qhawarina. Qhawaykurinallataj: titulota, subtitulosta, tapuykunata, “leey” nin chay textosta, dibujosta ima. Chantapis mayqen videochus yachachisqanchejta astawan sutʼinchanman, chaypi piensarina. Chantá estudionchejpi piensarina, tapurikunataj: “¿Imaynatá kay yachachiyta estudioyman entiendechiyman? ¿Imatá niyman yachakusqanman jina ruwananpaj?”, nispa (Neh. 8:8; Pro. 15:28 qallariynin).

8. Colosenses 1:9, 10 nisqanman jina, ¿imatataj estudionchejpaj ruwananchej tiyan?

⁸ Wakichikushaspaqa estudionchejpaj Jehová Diosmanta mañapuna. Payman willarina imaspichus estudionchej yanapata necesitasqanta. Jehová Diosmanta mañakunallataj, Bibliawan estudionchejpa sonqonman chayanapaj (Colosenses 1:9, 10 leey). Noqanchejqa estudionchejta bautizakunanpaj yanapayta munanchej. Chayrayku piensarina: “Kay yachachiymanta, ¿imatataj estudioy mana entiendeyta atillanmanchu? Chayrí, ¿imatataj mana japʼikuyta munallanmanchu?”, nispa.

9. ¿Imatá ruwasunman estudionchej sumajta yachakunanpaj?

⁹ Jehová Dioswan Jesuswanqa, tukuy imata noqanchejrayku ruwanku. Noqanchejtaj estudionchej chayta yachananta munanchej. Imajtinchus chayta yachaspaqa, ichapis Jehová Diosman Jesusmanwan agradecekonqa, astawantaj yachakuyta munanqa. Chayrayku sapa semana yachachej rinchej (Mat. 5:3, 6). Jinapis estudionchej sumajta japʼeqananpajqa, wakichikuyta yachanan tiyan. ¿Imaynatá chaypaj  yanapasunman? Imatachus estudiachisun chayta, ñaupajmanta leerinanta nina. Chantá nisunman: “Leeshaspaqa, allin kanman imaynatachus chayman jina ruwanaykipi piensarinayki”, nispa. Estudionchej wakichikuyta yachananpajqa, paywan khuska uj yachaqanata wakichikuna. * Yachachishaspaqa, imaynatachus tapuykunaj kutichiyninta tarinanta yachachina. Chay kutichiykunata rato yuyarikunanpajtaj, wakin palabrasta marcakunanta nina. Chantá tapurejtinchej, entiendesqanman jina kutichinanta nina. Ajinapi yachasun sutʼitachus manachus entiendesqanta. Imatawanchus estudionchej ruwanan kasqanta qhawarina.

10. 1) ¿Imaraykutaj estudiosninchej Bibliata sapa día leenanku tiyan? 2) Estudionchej Bibliapi leesqanwan yanapachikunanpaj, ¿imatá ruwanan tiyan?

¹⁰ Estudionchejta sapa semana yachachejtinchejpis, wakin imastaqa sapallanmanta ruwanan tiyan. Payqa Jehová Dioswan parlarinan tiyan, uyarinantaj tiyan. ¿Imaynatá Jehová Diosta uyarinman? Bibliata sapa día leespa (Jos. 1:8; Sal. 1:1-3). Chayrayku estudionchejman, Bibliata leenapaj wakichikusqan hojitaman jina Bibliata leeyta yachachina. Chay hojitaqa jw.org nisqapi kashan, impriminapajtaj. * Leesqanwan yanapachikunanpajtaj, estudionchejman nisunman: “Bibliata leeshaspaqa, imatachus Jehová Diosmanta yachachisusqanpi piensariy. Piensarillaytaj imaynatachus kausayniykipi yanapasunanpi”, nispa (Hech. 17:11; Sant. 1:25).

11. 1) ¿Imaynatá estudionchejta Jehová Diosmanta mañakuyta yachachisunman? 2) ¿Imaraykutaj estudionchej sapa día orakunan tiyan?

¹¹ Estudionchejta Jehová Dioswan parlarikunanta nina. Chaytataj paymanta sapa día mañakuspa ruwanman. ¿Imaynatá estudionchejta mañakuyta yachachisunman? Bibliamanta yachachinapaj, yachachiyta tukuytawanpis, sonqomantapacha Jehová Diosmanta mañakuna. Mañakushaspataj paymantawan parlarina. Ajinata mañakojtinchej, estudionchejpis sonqomantapacha orakuyta yachakonqa. Chantapis mañakuyninta Jesuspa sutinpi tukuchayta yachakonqa (Mat. 6:9; Juan 15:16). Estudionchej Bibliata sapa día leenqa, Diosmantataj sapa día mañakonqa chayqa, Jehovaman astawan qayllaykonqa (Sant. 4:8). Chaykunata ruwayman yachaykukuspataj, Jehová Diosta astawan munakonqa.  Chaytaj kausayninta payman qopunanpaj, bautizakunanpaj ima yanapanqa. Qhepan parrafospi chaymanta astawan yachakusun.

12. ¿Imaynatá estudionchejta yanapasunman Jehová Diosta Tatanta jina, Amigonta jinataj qhawananpaj?

¹² Estudionchejqa mana Bibliata rejsinallanpajchu estudianan tiyan, manaqa yachakusqanta sonqonpi japʼikunan tiyan. Bibliaj yachachiykunasnin sonqonman chayanqa chayqa, chayman jina kausakonqa. Jesusqa mana sumaj yachachejllachu karqa, manaqa yachachisqanwan runaj sonqonmanpuni chayaj. Chayrayku runasqa payta qhatej kanku (Luc. 24:15, 27, 32). Estudionchejqa Jehová Dios kasqantapuni creenan tiyan. Chantapis payta Tatanta jina, Diosninta jina, Amigonta jinataj qhawanan tiyan (Sal. 25:4, 5). Chayrayku Bibliamanta yachachishaspa, imayna kʼachachus Jehová Dios kasqanmanta parlarinapuni (Éxo. 34:5, 6; 1 Ped. 5:6, 7). Estudionchejman imamanta yachachishaspapis, imaynachus Jehová kasqanta willarina. Payman yachachina may munakuyniyoj, kʼacha, khuyakoj Diostaj kasqanta. Jesús nerqa: “Jehová Diosniykitaqa munakunayki tiyan tukuy sonqoykiwan [...]. Chaymin aswan kuraj, ñaupaj kaj kamachisqataj”, nispa (Mat. 22:37, 38). Chayrayku tukuy atisqanchejta ruwana, estudionchej Jehová Diosta sonqomantapacha munakunanpaj.

13. ¿Imatataj ruwasunman estudionchej Jehová Diosta munakunanpaj?

¹³ Estudionchejwan parlarishaspaqa, Jehová Diosta mayta munakusqanchejta willarina. Chayta willarejtinchej, ichá paypis Jehovaman qayllaykonqa, munakonqataj (Sal. 73:28). ¿Imaynamantawan estudionchejta yanapasunman? Ichapis estudiachishanchej chay publicacionpi chayri uj textopi, Jehová Diosta astawan munakunapaj imitallatapis tarinchej. Ichá kanman munakuyninmanta, yachayninmanta, cheqan kayninmanta chayri atiyninmanta. Jina kajtin, chayta estudionchejman willarina. Qhepan parrafospi, imatawanchus estudionchej ruwanan kasqanta yachakusun.

14. Hebreos 10:24, 25 nisqanman jina, ¿imataj estudionchejta bautismoman chayananpaj yanapanqa?

¹⁴ Tukuypis munanchej estudiosninchej bautizakunankuta. ¿Imaynatá paykunata chaypaj yanapasunman? Reunionesman jamunankupaj kallpacharina. Sumajta yachachej hermanosqa ninku: “Reunionesman ratolla jamojkunaqa, ratollataj ñaupariyta yachanku”, nispa (Sal.  111:1). Wakin hermanosqa estudionkuman ninku: “Bibliata sapa semana estudiaspa sumajta yachakunki chaypis, reunionpipuni astawanqa yachakunki”, nispa. Estudionchejta reunionman jamunanta ninapajqa, Hebreos 10:24, 25 (leey) versiculosta paywan khuska leerina. Chantá imaynatachus tantakuykuna yanaparinanta willarina. ¿Imaynataj tantakuykunasniyku? nisqa videotapis rikuchisunman. * Estudionchejta tukuynin reunionesman jamunanpaj kallpacharina.

15. ¿Imatataj ruwasunman estudionchej tukuynin reunionesman jamunanpaj?

¹⁵ Ichapis estudionchejqa manaraj ujtapis reunionman jamunchu, chayri maypi jinalla jamun. Jina kajtin, ¿imatá ruwasunman? Reunionniykuman “jamuriy” ninallamantaqa, imatachus reunionpi yachakusqanchejta willarina. Chayta uyarispa, ichá paypis reunionman jamuyta munanqa. Estudionchejman willarinallataj, imatachus qhepan reunionpi yachakusun, chayta. Chaypajqa Torremanta Qhawaj revistata, chayri Cristiano Kausayninchej folletota jaywarina. Chantá mayqentachus astawan yachakuyta munasqanta tapurina. Estudionchej tantakuypi imatachus uyarisqan, rikusqan imaqa, may sumajpuni kanqa. Chayqa ni mayqen iglesiapi rikusqanwanpis kikinchakonqachu (1 Cor. 14:24, 25). Chantapis reunionman jamuspaqa, ashkha hermanosta rejsenqa. Chay hermanostaj, estudionchejta bautizakunanpaj mayta yanapanqanku.

16. 1) ¿Imastataj ruwananchej kasqa estudionchejta bautismoman chayachinapaj? 2) ¿Imamantataj qhepan yachaqanapi parlarisun?

¹⁶ ¿Imatataj estudionchejta bautismoman chayachinapaj ruwana kasqa? Ñaupajtaqa sapa semana estudiayta munananpaj yanapana. Ajinamanta Bibliapi yachakusqanta jatunpaj qhawanqa. Chantá estudiananpaj wakichikuyta yachachina. Jehová Dioswan sapa día parlarikunanpajpis yanaparina. Chantapis Jehovata Amigonta jina qhawananpaj yanapana. Reunionesman jamunanpajpis kallpacharina (“ ¿Imatá estudionchej ruwanan tiyan?” nisqata leeriy). Jinapis estudionchejta bautismoman chayachinapajqa, phishqa imastawan ruwananchej tiyan. Qhepan yachaqanapitaj chaymanta parlarisun.