1. ¿Imaraykutaj ninchej runasta Jesuspa yachachisqasninman tukuchispa salvakunankupaj yanapasqanchejta?

RUNASTA Jesuspa yachachisqasninman tukuchispaqa, salvakunankupaj yanapanchej. ¿Imaraykutaj chayta ninchej? Jesusqa Mateo 28:19, 20 versiculospi nerqa: “Rispa, tukuy laya runasta yachachisqasniyman tukuchimuychej, bautizaspa”, nispa. Bautizakunapajqa Jesusnejllata salvacionta tarisqanchejpi creena tiyan. Chayrayku bautizakuyta munajqa, creenan tiyan Jesús noqanchejrayku wañusqanpi, kausarimusqanpi ima. Chayta ruwajtillan bautizakuyta atinman. Bautizakuspataj salvacionta tariyta atinman. ¿Imaynapí chayta yachanchej? Apóstol Pedro cristianosman nerqa: “Bautismomin qankunatapis salvashasunkichej, Jesucristoj kausarimuyninnejta”, nispa (1 Ped. 3:21). Arí, uj runaqa bautizakusqanmantapacha wiñay kausayta suyakuyta atin.

2. Kay 2 Timoteo 4:1, 2 nisqanman jina, ¿imayna yachachejkunataj kananchej tiyan?

² Runasta Jesuspa discipulosninman tukuchinapajqa, ‘sumaj yachachejkuna’ kananchej tiyan (2 Timoteo 4:1, 2 leey). ¿Imaraykutaj sumaj yachachejkuna kananchej tiyan? Jesús nerqa: ‘Rispa, runasta yachachisqasniyman tukuchimuychej, yachachimuychejtaj’, nispa. Apóstol Pablopis, Timoteoman nerqa runasman “mana saykʼuspa” yachachinanta. ¿Imaraykutaj Timoteo chayta ruwanan karqa? Pablollataj payman nerqa: “Imaraykuchus chayta ruwaspaqa, qan kikiykita salvakunki, jinallataj uyarisojkunatapis”, nispa. Chayraykuchá payman yuyaycharqa: “Imatachus yachachisqaykitapis sapa kuti allinta  qhawarikuy”, nispa (1 Tim. 4:16). Rikunchej jina, runasta Jesuspa discipulosninman tukuchinapajqa paykunaman yachachimuna tiyan. Chayrayku aswan sumajta yachachinapaj, kallpachakunanchej tiyan.

3. ¿Imatá kay yachaqanapi yachakusun?

³ Sapa semana mundontinpi may chhika runasman Bibliamanta yachachinchej. Ñaupaj yachaqanapi yachakorqanchej jinataj, paykunata bautismoman chayachiyta munanchej. Chayrayku kay yachaqanapeqa, estudiosninchejta bautismoman chayachinapaj phishqa imastawan yachakusun.

4. ¿Imaraykutaj Bibliamanta yachachishaspa mana ashkhata parlanachu tiyan? (Sutʼinchayninpi kaj publicacionmantawan kutichiy).

⁴ Tukuypis Diospa Palabranmanta mayta yachachiyta munanchej. Chayrayku runasman Bibliamanta yachachishaspaqa, ashkhata parlaykuyta munasunman. Jinapis pisillata parlananchej tiyan. Torremanta Qhawaj revistamanta yachachej hermano, Bibliamanta Yachaqanapaj tantakuypi yachachejpis, mana ashkhatachu parlanku. Pitapis estudiachishaspaqa, manallataj ashkhata parlanachu tiyan. Astawanpis Bibliapipuni imatapis rikuchina tiyan. Chaypajqa mana tukuy imatachu ujllapi yachachinanchej tiyan, nitaj uj versiculomanta tukuy imitatapunichu sutʼinchananchej tiyan (Juan 16:12). * Noqanchejpis bautizakushaspa, mana tukuy imatachu Bibliamanta entienderqanchej (Heb. 6:1). Ichá kunanqa watas pasasqanrayku astawanña entiendenchej. Jinapis Bibliamanta yachakushallanchejpuni. Chayrayku estudiosninchejmanpis, ama ujllapi tukuy imata yachachinachu.

5. 1) Kay 1 Tesalonicenses 2:13 nisqanman jina, ¿imatá estudionchej entiendenan tiyan? 2) ¿Imatá ruwasunman estudionchej imatapunichus yuyasqanta yachanapaj?

⁵ Estudionchejqa Bibliamantapuni yachakushasqanta entiendenan tiyan (1 Tesalonicenses 2:13 leey). Chaypajqa yachakusqanmanta imatapunichus yuyasqanta yachananchej tiyan. ¿Imaynatá chayta yachasunman? Bibliaj versiculosninta noqallanchej sutʼinchanamantaqa, estudionchejta nina payñataj sutʼincharinawanchejta. Chantapis tapurisunman: “¿Imaynatá kay versículo nisqanman jina ruwawaj?”, nispa. Leesqan textosmanta imatachus piensasqanta yachanapajtaj, willarinawanchejpaj jina tapuykunata ruwasunman (Luc. 10:25-28). Wakin tapuykuna kanman: “¿Imatá kay versículo Jehová Diosmanta yachachiwanchej?”, “¿Imaynatá kay versiculoj nisqan yanapasunkiman?”, “¿Imatá niwaj kay yachakusqaykimanta?” (Pro. 20:5). Estudionchejqa mana Bibliaj nisqasninta yachanallanchu tiyan, manaqa  chay yachachiykunata sonqonpi japʼikunan tiyan, chayman jinataj kausakunan tiyan.

6. ¿Imaynatá experienciayoj hermanos yanapawasunman?

⁶ Experienciayoj hermanosta estudiosninchejman pusayta yachanchej chayqa, paykunata tapurisunman allillantachus manachus yachachisqanchejta. Chantapis tapurillasunmantaj, Bibliawanpunichus manachus yachachisqanchejta. Paykuna yuyaychariwajtinchejtaj, kʼumuykukoj sonqowan japʼikuna (Hechos 18:24-26, kikinchay). Chantapis chay hermanota tapurisunman, estudionchej entiendeshasqantachus manachus. Estudionchejman unaysituta mana riyta atisunchu chaytaj, chay hermanota kachasunman cuentanchejmanta yachachimunanpaj. Ajinamanta estudionchejqa Bibliamanta yachakullanqapuni, yachakusqantataj jatunpaj qhawanqa. Amapuni jaykʼajpis estudiosta dueñochakunachu, nitaj yuyanachu noqallanchej paykunaman yachachinanchej kasqanta. Astawanqa paykunaj allinninkuta maskʼana, ñauparinankupajtaj yanapana.

7. ¿Imatá ruwananchej tiyan estudionchej astawan yachakuyta munananpaj?

⁷ Estudionchejman yachachishaspaqa, kusiywan, tukuy sonqotaj Bibliamanta yachachina. Ajinamanta estudionchejqa, yachachisqanchejpi creesqanchejta reparanqa (1 Tes. 1:5). Chaytaj astawan yachakuyta munananpaj yanapanqa. Chayrayku payman willarisunman, imaynatachus Biblia kausayninchejpi yanapawasqanchejta. Chayta ruwajtinchej, estudionchejqa paytapis Biblia yanapayta atisqanta reparanqa.

8. ¿Imatataj ruwasunman estudionchejta yanapanapaj?

⁸ Ichapis estudionchejqa, uj viciota chayri costumbresta mana qonqayta atishanchu. Manachayrí kausayninpi waj problemas tiyapun. Jina kajtin, wakin hermanospa experienciankuta willarisunman. Congregacionninchejmanta mayqen hermanoj kausayninpis estudionchejta yanapanman chayqa, paywan yachachej risunman. Jw.org^® nisqapipis, ashkha hermanospa experienciankumanta videos, yachaqanas ima tiyan. Estudionchej chay experienciasta leerenqa chayri qhawarenqa chayqa, Bibliaj yachachiykunasnin mayta yanapawasqanchejta reparanqa. Chay experienciastaqa, “Bibliaqa cambianankupaj yanaparqa” nisqa seccionpi tarisunman. *

9. ¿Imaynatá estudionchejta yachachisunman, yachakusqanta wajkunaman willarinanpaj?

 ⁹ Estudionchejpa qosan chayri señoran mana Bibliata estudiashanchu chayqa, paytapis estudiachiyta atisqanchejta nisunman. Chantapis estudionchejta yachachisunman, imatachus yachakusqanta familianman, rejsisqasninmanpis willarinanpaj (Juan 1:40-45). Chaypajqa payman nisunman: “¿Imaynatá kayta familiaykiman entiendechiwaj?”, “Rejsisqasniykiman kayta entiendechinaykipaj, ¿ima textotataj leeripuwaj?”, nispa. Chayta ruwaspaqa estudionchejta wajkunaman yachachinanpaj wakichishanchejña. Chantapis congregacionwan predicaj llojsinanpaj, wakichisqaña kanqa. Estudionchejta tapurillasunmantaj: “¿Mayqen rejsisqaykipis Bibliamanta yachakuyta munanmanchu?”, nispa. “Arí” niwajtinchejtaj, chay rejsisqanwan chay rato parlarina. Paymantaj ¿Imaynatá Bibliamanta yachachiyku? nisqa videota rikuchisunman. *

10. Kay 1 Tesalonicenses 2:7, 8 nisqanman jina, ¿imaynatá Pablo jina ruwasunman?

¹⁰ Estudiosninchejta tukuy sonqo munakuna. Paykunatataj hermanosninchejta jinaña qhawana (1 Tesalonicenses 2:7, 8 leey). Wakenqa Jehová Diosta sirvinankupaj, mundomanta amigosninkuta saqepunanku tiyan. Jinapis ichá sapallanku rikhuriyta manchachikuspa, mana chayta ruwayta atillankuchu. Chayrayku congregacionpi amigosta tarinankupaj yanapananchej tiyan. Chantapis noqanchejpuni paykunawan amigos kananchej tiyan. Estudionchejwan amigos kanapajqa, mana estudiachinchej chay diasllachu paypaj tiempochakuna. Ichapis waj días telefonopi wajyarisunman, mensajesta apachisunman chayri uj ratito visitarej risunman.

11. ¿Imata ruwananpajtaj estudionchejta yanapananchej tiyan?

¹¹ Uj runa Jesuspa discipulonman tukunanpajqa, tukuynin congregación yanapakun. Chayrayku experienciayoj hermanosqa, estudionkuta hermanosman rejsichinkupuni. Hermanostaj yachakojta Diosman astawan qayllaykunanpaj yanaparinku, problemasniyoj kajtintaj sonqocharinku. Estudionchejqa congregacionpi munasqa kasqanta, familianchejta jinataj qhawasqanchejta reparanan tiyan. Hermanosta munakunanpaj yanapasun chayqa, paykunawan amigosta ruwakonqa. Paykunataj Jehová Diosta astawan munakunanpaj yanapanqanku (Pro. 13:20). Chantapis estudionchejqa, Jehová Diospa llajtanpi sumaj amigosta tariyta atisqanta yachanqa. Mundomanta  amigosnin saqerpajtinkutaj, manaña llakikonqachu (Mar. 10:29, 30; 1 Ped. 4:4).

12. ¿Imaraykutaj estudiosninchejwan bautismomanta parlarinapuni tiyan?

¹² Estudioswanqa Diosman kausayninkuta qopunankumanta, bautizakunankumanta ima parlarinapuni tiyan. Imaraykuchus chay yuyaywanpuni paykunaman yachachimunchej. Sichus estudionchej killastaña yachakushan, reunionesmanpis jamushanña chayqa, Jehovaj testigon kananpaj yachachishasqanchejta yachanan tiyan.

13. ¿Imastataj Bibliamanta yachakoj bautismoman chayananpaj ruwan?

¹³ Bibliamanta yachakojqa, bautismoman chayananpaj ashkha imasta ruwan. Ñaupajtaqa Jehová Diosta rejsin, munakun, paypitaj creen (Juan 3:16; 17:3). Chantá Jehovaman qayllaykun, congregacionmanta hermanostapis familianta jina qhawan (Heb. 10:24, 25; Sant. 4:8). Bibliapi yachakusqanman jinataj, manaña sajra imasta ruwanchu, juchasninmantapis pesachikun (Hech. 3:19). Chantá creeynin yapakun, Bibliapi yachakusqantataj wajkunaman willarin (2 Cor. 4:13). Chaymantataj Jehová Diosman kausayninta jaywapun, bautizakuntaj (1 Ped. 3:21; 4:2). Chayta ruwajtintaj tukuypis mayta kusikunchej. Chayrayku estudionchej ñauparejtin, sumajta ruwashasqanta nina, ñaupajman rinallanpajpunitaj kallpacharina.

14. ¿Imaynatá reparasunman estudionchej Jehová Diosta sirviyta munasqantachus manachus?

¹⁴ Uj runata bautismoman chayachinapajqa, pacienciayoj kana tiyan. Jinapis reparananchej tiyan, estudionchej Jehová Diosta sirviyta munasqantachus manachus. Chaypajtaj qhawarinanchej tiyan, Jesuspa kamachisqanta kasukushanchus manachus chayta. Ichapis estudionchejqa, Bibliata estudiay gustasqanraykulla estudiashan.

15. ¿Imaynatá yachasunman estudionchej ñauparishasqantachus manachus?

¹⁵ Estudionchej ñauparishasqantachus manachus reparana. ¿Imaynatá chayta ruwasunman? Kay tapuykunapi piensarina: Estudionchej, ¿Jehová Diosta munakusqanmanta parlanchu? ¿Paymanta mañakunchu? (Sal. 116:1, 2). ¿Bibliata leerinchu? (Sal. 119:97). ¿Reunionesman jamushanchu? (Sal. 22:22). Kausayninpi imatapis cambianan kajtin, ¿cambiashanchu? (Sal. 119:112). Bibliapi yachakusqanta,  ¿familiaresninman, rejsisqasninmanpis willarishanchu? (Sal. 9:1). ¿Jehovaj testigon kayta munanchu? (Sal. 40:8). Estudionchej mana chay imasta ruwashanchu chayqa, imachus jarkʼashasqanta kʼachallamanta tapurina. Willariwajtinchejtaj yanaparina. *

16. ¿Imaynatá yachasunman estudionchejta saqepunatachus manachus?

¹⁶ ¿Imaynatá yachasunman estudionchejta saqepunatachus manachus? Kay tapuykunapi piensarina: “Estudionchej, ¿Bibliamanta yachakunanpaj wakichikunchu? ¿Reunionesman jamuyta munanchu? ¿Diospa chejnisqan imasta saqepushanchu? ¿Iglesianmanta llojsipunñachu?”. Mana chay imasta ruwashanchu chayqa, qhasillata yachachishanchej. Payman yachachiytaj, mana tarpuyta munaj runaman jallpʼata qoy jina. Estudionchej yachakushasqanta mana valechejtin, nitaj Diosta kasukuyta munanchu chayqa, tiempollata pierdeshanchej.

17. Kay 1 Timoteo 4:16 nisqanta juntʼanapaj, ¿imatataj ruwananchej tiyan?

¹⁷ Jesusqa runasta yachachisqasninman tukuchimunata kamachiwanchej. Noqanchejtaj chayta juntʼaytapuni munanchej. Chayrayku Bibliamanta yachakojkunata bautismoman chayanankupaj yanapana. Chaypajqa Bibliawanpuni yachachina. Chantapis kusiywan, tukuy sonqotaj yachachina. Estudionchejta congregacionpi amigosta tarinanpaj yanaparina. Chantapis Diosman kausayninta qopunanmanta, bautizakunanmantawan parlarinapuni. Ñauparishasqantachus manachus sapa kuti qhawarina (“ ¿Imatá yachachejkuna ruwananchej tiyan?” nisqata leeriy). Runasta Jesuspa yachachisqasninman tukuchinapaj yanapakoyqa, ¡may sumajpuni! Chayrayku tukuy atisqanchejta ruwana, estudiosninchejta bautismoman chayachinapaj.