1. ¿Imatataj sapa uj ajllananchej tiyan?

IMATACHÁ tatamamas kausayninkupi ajllanku, chayman jinallataj wawasninkupis kausanku. Tatawan mamawan mana allin imastachu ruwanku chayqa, wawasninkoqa llakiykunallapi rikhurinku. Allin imasta ruwajtinkurí, wawasninkuta kusisqa kausakunankupaj yanapanku. Jinapis wawaspuni kausayninkupi allin imasta ajllananku tiyan. Chayrayku may allinpuni kanman, Jehová Diosta sirviyta ajllakunanku. Imaraykuchus munakuyniyoj Tatanchej Jehovata sirveyqa, manchay sumajpuni (Sal. 73:28).

2. Josewan Mariawan Jesuswan ima, ¿imasta ruwaytataj ajllarqanku?

² Josewan Mariawanqa, wawasninkuta Jehová Diosta sirvinankupaj yanapayta munarqanku. Paykunapajqa Jehovata sirviy kausayninkupi ñaupajpi karqa. Chayqa imatachus ruwayta ajllasqankupi sutʼi rikukorqa (Luc. 2:40, 41, 52). Jesuspis allin imasta ruwayta ajllarqa. Chaytaj Jehová Diospa munayninta juntʼananpaj yanaparqa (Mat. 4:1-10). Jesusqa wiñarqospa kʼacha, cheqa sonqo, mana manchachikoj runataj karqa. Jehová Diosta munakoj tatasqa, chay jina wawayoj kaspa mayta kusikunkuman.

3. ¿Ima tapuykunamantaj kay yachaqanapi kutichisun?

³ Kay yachaqanapeqa kay tapuykunaman kutichisun: ¿Imastataj Jehová Dios Jesuspaj ajllarqa? ¿Imatataj cristiano tatamamas, Josemanta Mariamantawan yachakunkuman? ¿Imatataj cristiano jóvenes Jesusmanta yachakunkuman?

4. ¿Imatataj Jehová Dios Jesuspaj ajllaporqa?

⁴ Jehová Diosqa Jesuspaj sumaj tatasta ajllaporqa (Mat. 1:18-23; Luc. 1:26-38). Mariaqa Jehová Diosta, Palabrantapis mayta  munakorqa. Chaytataj reparanchej, Mariaj nisqasninta Bibliapi leespa (Luc. 1:46-55). Josepis Jehová Diosta munakullarqataj, kusichiytataj munarqa. Chayta reparanchej, Diospa kamachisqanta chay rato kasukusqanpi (Mat. 1:24).

5, 6. ¿Imasmantataj Jehová Dios Wawanta mana jarkʼarqachu?

⁵ Jehová Diosqa, mana qhapaj tatastachu Jesuspaj ajllaporqa. ¿Imaynapí chayta yachanchej? Israelitasqa uj wawa nacekojtin, uj jaywanata temploman apananku karqa. Josewan Mariawantaj, Jesús nacekojtin “iskay jurkʼutasta” temploman aparqanku. Chaytataj pobre runaslla jaywaj kanku (Luc. 2:24). Paykunaqa Nazaretpi tiyakorqanku. Joseqa ichá wasin ladollapi carpinteriayoj karqa. Jinapis nichá qolqeqa familianpaj alcanzallajchu. Imajtinchus qanchis chayri astawan wawasniyoj karqanku (Mat. 13:55, 56).

⁶ Jehová Diosqa mana tukuy llakiykunamantachu Jesusta jarkʼarqa (Mat. 2:13-15). ¿Imastaj chay llakiykuna kanman karqa? Jesusqa mana creej familiaresniyoj karqa. Wakin familiaresnenqa, mana pay Mesías kasqanta qallariypi creerqankuchu. Chaytaj Jesusta maytachá llakicherqa (Mar. 3:21; Juan 7:5). Chantapis ichá jovencitollaraj kashajtin, tatan José wañuporqa. Chaymantapis maytachá sonqon nanarqa. Kuraj wawa kasqanraykutaj, Jesusqa ichá Josej cuentanmanta carpinteriapi trabajarqa (Mar. 6:3). Payqa mamanta, hermanitosnintawan yanapananpaj maytachá trabajarqa. Chayrayku Jesusqa, trabajaspa imaynachus saykʼuna kasqanta yacharqa.

7. 1) Qhariwarmi kajkuna, ¿ima tapuykunapitaj piensarinanku kanman? 2) Proverbios 2:1-6 nisqanman jina, ¿imatataj tatamamas wawasninkuman yachachinkuman?

⁷ Wawasniyoj kayta munaj qhariwarmisqa, allin kanman sonqonkupi tapurikunanku: “¿Llampʼu sonqo runaschu kanchej? ¿Jehová Diosta, Palabrantapis munakunchejchu? ¿Jehová Dios uj wawitata uywanapaj confiawasunmanchu?” (Sal. 127:3, 4). Wawasniyojña kajkunatajrí, kay tapuykunapi piensarinkuman: “¿Wawasniyta trabajayta yachachinichu?” (Ecl. 3:12, 13). “¿Wawasniyta Satanaspa mundonpi sajra imasmanta jarkʼanichu?” (Pro. 22:3). Tatamamasqa mana tukuy imamantapunichu wawasninkuta jarkʼayta atenqanku. Jinapis wawasninkuta yachachinkuman, kay mundoj imasninta atipanankupaj. Chaypajtaj llakiykunapi tarikuspa, Bibliapipuni  yanapata maskʼayta yachachinkuman (Proverbios 2:1-6 leey). ¿Imaynatá chayta ruwankuman? Ichá familiamanta pillapis, Jehová Diosta yupaychayta saqepun. Jina kajtin, tatasqa wawasninkuman Bibliapi rikuchinkuman, imajtinchus Jehová Diosta kasukuy aswan allin kasqanta (Sal. 31:23). Mayqen familiarninku wañupojtintaj, wawasninkuta yanapankuman Bibliapi sonqochayta tarinankupaj (2 Cor. 1:3, 4; 2 Tim. 3:16).

8. Josewan Mariawan, ¿Deuteronomio 6:6, 7 nisqanta kasukorqankuchu?

⁸ Josewan Mariawanqa, imatachus Jehová Dios tatamamasman kamachisqanta kasukorqanku. Chayrayku Jesusta Diospa ñaupaqenpi allinpaj qhawasqa kananpaj yanaparqanku (Deuteronomio 6:6, 7 leey). Josewan Mariawanqa, Jehová Diosta mayta munakorqanku. Paykunaqa munarqanku, wawasninkupis paykuna jinallataj Jehová Diosta munakunankuta. Chayta ruwanankupajtaj kallpachakorqanku.

9. ¿Imastataj Josewan Mariawan ruwaj kanku?

⁹ Josewan Mariawanqa, Jehová Diosta yupaychayta ñaupajman churarqanku. Paykunaqa Nazaretpi sinagogaman sapa semana wawasninkuta pusaj kanku. Chantapis sapa wata, tukuynin familia Pascuapaj Jerusalenman rej kanku (Luc. 2:41; 4:16). Josewan Mariawanqa, ajinata viajashaspa wawasninkuman ashkha imastachá yachacherqanku. Ichapis paykunaman willarej kanku, imachus Diospa llajtanwan unay kasqanta. Chantapis ichá Diospa Palabran oqharisqan lugaresta pasaj kanku. Josej familian wiñasqanman jina, ichá Diosta yupaychanapaj mana tukuy imata ruwayta atillarqankuchu. Jinapis Josewan Mariawanqa, Jehová Diosta yupaychayta ñaupajmanpuni churarqanku. Chayrayku familiankoqa, mana Jehovamanta karunchakorqachu.

10. ¿Imatá tatamamas Josemanta Mariamantawan yachakunkuman?

¹⁰ Tatamamas, qankunapis Josewan Mariawan jina ruwaychej. Jehová Diosta tukuy sonqo munakuychej. Chaytataj parlasqaykichejwan, ruwasqaykichejwantaj wawasniykichejman rikuchiychej. Paykunaman Jehová Diosta munakuyta yachachiychej. Chayqa ima regalomantapis aswan sumaj. Wawasniykichejman yachachiychej, Bibliata estudiayta, orakuyta, reunionesman riyta, predicaytapis (1 Tim. 6: 6). Wawasniykichejpaj mikhunata, ropitatapis churapuychej (1 Tim. 5:8). Jinapis astawanqa, Jehová Dioswan amigos kanankupaj yanapaychej. Imajtinchus kay sajra mundo chinkachisqa kashajtin, chaymin salvakunankupaj yanapanqa, manataj qolqeyoj kaychu. Wawasniykichejqa Jehovata sirvispalla, paraisoman yaykonqanku (Eze. 7:19; 1 Tim. 4:8). *

11. 1) ¿Imaynatá 1 Timoteo 6:17-19 tatamamasta yanapanman? 2) ¿Imatataj cristiano familias ruwankuman, chanta ima bendicionestataj japʼinkuman? (“ ¿Imastataj familias ruwankuman?” nisqa recuadrota leeriy).

¹¹ Ashkha cristiano tatamamasqa, wawasninkuta Jehová Dioswan amigos kanankupaj yanapanku. Chay ruwasqankutaj may sumajpuni. Paykunaqa wawasninkuwan khuska Jehová Diosta yupaychanku. Chaypajqa familiantin tukuynin reunionesman rinku. Asambleasman, predicacionmanpis mana faltakunkuchu. Wakin familiasqa maypichá pisillata predicakun, chayman yanapakoj rinku. Wakin familiastaj Betel wasita rejsej rinku. Wakin familiastajrí Diosta yupaychanapaj wasista ruwaysikoj rinku. Chay imasta ruwayqa mana atikullanchu, qolqepajtaj. Jinapis chayta ruwaj familiasqa, ashkha bendicionesta Jehovamanta japʼinku (1 Timoteo 6:17-19 leey). Chay jina familiaspi wiñakoj wawasqa, jovenyaspapis ajinallatapuni Jehová Diosta sirviyta yachanku. Chantapis sumaj uywasqa kasqankumanta, tatasninkuman mayta agradecekunku (Pro. 10:22). *

12. ¿Imatataj Jesús wiñasqanman jina ruwanan karqa?

¹² Jehová Dios, José, Mariapis, allin imastapuni ruwarqanku. Jinapis Jesusqa, wiñasqanman jina paypuni allin imasta ruwayta ajllanan karqa (Gál. 6:5). Payqa imatachus ruwananta noqanchej jinallataj ajllayta aterqa. Jesusqa munaynillanta ruwayta ajllayta atinman karqa. Jinapis payqa, Diospa munayninta ruwayta ajllarqa (Juan 8:29). Jovenesqa Jesusmanta mayta yachakunkuman.

13. ¿Imatataj Jesús wawamantapacha ruwarqa?

¹³ Jesusqa wawamantapacha tatantawan mamantawan kasukorqa. Payqa ni jaykʼaj yuyarqachu tatasninmanta nisqa, astawan yachasqanta, nitaj paykunaj kamachisqankuta pisipaj qhawarqachu. Astawanpis paykunata “kasukullarqapuni” (Luc. 2:51). Chantapis Jesusqa, kuraj wawa kasqanrayku familianta maytachá yanaparqa. Payqa mamanpaj, hermanitosninpajwan trabajananpaj, tatanmanta carpintero kayta yachakorqa.

14. ¿Imaynapí yachanchej Jesús Diospa Palabranta sumajta estudiasqanta?

¹⁴ Josewan Mariawanqa, Jesusman willarqankuchá uj milagronejta nacekusqanta. Chantapis  willallarqankutajchá, imatachus ángeles, Diospa kamachisninpis paymanta nisqankuta (Luc. 2:8-19, 25-38). Jinapis Jesuspuni Diospa Palabranta sumajta estudiarqa. ¿Imaynapí chayta yachanchej? Imaraykuchus Jesús 12 watasniyoj kashajtin, templopi “yachachejkunaj chaupinkupi” tiyasqa kasharqa. Paykunataj Jesusta uyarispa, “mayta tʼukusharqanku yachayninmanta, kutichisqasninmanta ima” (Luc. 2:46, 47). Jesusqa Diospa Palabranta estudiasqanrayku, chaypachaña yacharqa Jehová Dios Tatan kasqanta (Luc. 2:42, 43, 49).

15. ¿Imaynatá yachanchej Jesús, Diospa munayninta ruwayta ajllasqanta?

¹⁵ Jesusqa imatachus Jehová Dios payman kamachisqanta yachaytawan, kasukorqapacha (Juan 6:38). Payqa ashkha runas chejnikunankuta yacharqa. Chaytaj ichá llakicherqa. Jinapis Jehová Diosta kasukuyta ajllarqa. Chayrayku 29 watapi bautizakusqanmantapacha, Diospa munayninta ruwayta ñaupajman churarqa (Heb. 10:5-7). Jesusqa wañuy patapiña kashajtinpis, Jehová Diosta kasukullarqapuni (Juan 19:30).

16. ¿Imatataj wawas ruwananku tiyan?

¹⁶ Wawas, tatamamaykichejta kasukuychej. Paykunaqa Josewan Mariawan jinallataj pantaj runas kanku. Jinapis Jehová Diosqa, paykunaj makinkuman churasunkichej. Ajinamanta qankunata cuidasunaykichejpaj, yachachisunaykichejpaj, yanapasunaykichejpajtaj. Chayrayku tatasniykichejta kasukuychej, respetaychejtaj. Chayta ruwajtiykichejqa ‘allin risonqachej’ (Efe. 6:1-4).

17. Josué 24:15 nisqanman jina, ¿imatataj wawas ajllakunanku tiyan?

¹⁷ Pitachus sirvinaykichejta ajllakuychej. Wawas chayri jóvenes, qankunapuni Jehová Diosta rejsiychej. Reparaychej imachus paypa munaynin kasqanta, imaynatachus chayta ruwanaykichejtapis (Rom. 12:2). Chayta ruwaspalla, Jehovata sirviyta ajllankichej (Josué 24:15 leey; Ecl. 12:1). Bibliata sapa kuti leenkichej, estudiankichejtaj chayqa, Jehová Diosta astawan munakunkichej, astawantaj paypi creenkichej.

18. ¿Imatataj wawaspis jovenespis ajllankuman?

¹⁸ Jehová Diospa munayninta ñaupajman churayta ajllaychej. Wawas chayri jóvenes, Satanaspa mundonqa creechiyta munasunkichej munayniykichejta ruwaspa kusisqa kanaykichejta. Chayrayku imastachus ruwayta yachasqaykichejwan,  qhapajyayta maskʼanaykichejpaj tanqasunkichej. Jinapis qolqeta maskʼajkunaqa, ‘imaymana llakiykunawan ñakʼarinku’ (1 Tim. 6:9, 10). Chayrayku Jehová Diosta kasukuyta, paypa munayninta ruwayta ima ajllakuychej. Chayta ruwankichej chayqa, yachayniyojman tukunkichej, ‘tukuy ima ruwasqaykichejpitaj allin risonqachej’ (Jos. 1:8).

19. ¿Imatataj tatamamas mana qonqanankuchu tiyan?

¹⁹ Tatas, mamas, wawasniykichejta Jehová Diosta sirvinankupaj yanapaychej. Paypi atienekuychej. Tatanchej Jehovataj imatapis sumajta ruwanaykichejpaj yanapasonqachej (Pro. 3:5, 6). Ama kayta qonqaychejchu: Wawasniykichejqa parlasqaykichejta uyarejtinkupis, imastachus ruwasqaykichejta astawan qhawanku. Chayrayku Diosta kusichinapaj jinapuni imatapis ruwaychej. Ajinamanta paykunata, Diospa ñaupaqenpi allinpaj qhawasqa kanankupaj yanapankichej.

20. ¿Ima bendicionestataj jóvenes japʼenqanku Jehová Diosta sirviyta ajllakojtinku?

²⁰ Jóvenes, tatasniykichejqa kausayniykichejpi imatapis allinta ruwanaykichejpaj yanapasunkichejman. Jinapis qankunamanta kashan, Jehová Dios allinpaj qhawasunaykichejqa. Chayrayku Jesús jina ruwaychej, Tatanchej Jehovata sirviytataj ajllakuychej. Chayta ruwankichej chayqa, kay tiempopiña kusisqa, sonqo juntʼasqataj kausakunkichej (1 Tim. 4:16). Jamoj tiempopitaj, manchay sumaj kausayta japʼinkichej.