1. ¿Imaraykutaj ashkha runas mana yachankuchu mayqenchus cheqa religión kasqanta?

 KAY tiempopeqa may chhika religiones tiyan. Chay religionesmanta kajkunataj ninku cristianos kasqankuta, Diostataj munayninman jina yupaychasqankuta. Ashkha runasqa chayraykuchá mana yachankuchu mayqenchus cheqa religión kasqanta chayri mayqen religiontachus Dios allinpaj qhawasqanta. Noqanchejrí, ¿sutʼitachu yachanchej Jehovaj testigosnin cheqa kajtapuni yachachisqanchejta? ¿Sutʼitachu yachanchej noqanchejpa yupaychasqallanchejta Dios allinpaj qhawasqanta? ¿Chayta sutʼita yachayta atisunmanchu? Chaypajqa wakin imasta qhawarina.

2. Kay 1 Tesalonicenses 1:5 nisqanman jina, ¿imaraykutaj apóstol Pablo yacharqa Diosmanta yachakusqan cheqapuni kasqanta?

² Apóstol Pabloqa yacharqa Diosmanta yachakusqan cheqapuni kasqanta (1 Tesalonicenses 1:5 leey). Payqa Diospa Palabranta sumajta estudiasqanrayku yacharqa cheqapuni kasqanta. Yachallarqataj ‘Diosmanta tukuy Qhelqasqaqa paypa yuyaychasqan’ kasqanta (2 Tim. 3:16). Pabloqa Diospa Palabranta sumajta estudiaspa repararqa Jesuspuni Mesías kasqanta. Chaywanpis judiospa religionninkuta kamachejkunaqa mana Pablo jinachu Diospa Palabranta estudiarqanku. Paykunaqa runasman Diosmanta cheqa kajta yachachisqankuta nej kanku, jinapis Diospa chejnisqan imasta ruwaj kanku (Tito 1:16). Apóstol Pablotaj Diospa Palabranpi tukuy ima nisqanta creerqa, manataj wakillanpichu. Payqa wakichisqa kasharqa ‘Diospa tukuy munayninta’ yachachinanpaj, chayman jinataj kausakunanpaj (Hech. 20:27).

3. Diosmanta yachakusqanchej cheqapuni kasqanta sutʼita yachanapaj, ¿tukuy imatapunichu yachananchej tiyan? (“ Diospa ruwasqasninta, yuyasqanta ima mana rejsiyta tukusunmanchu” nisqa recuadrota leeriy).

 ³ Wakin runasqa yuyanku cheqa religionmanta kajkuna Bibliamanta tukuy imatapuni yachananku kasqanta, imastachus Biblia mana sutʼitachu nin chaykunatapis. ¿Tukuy imatapunichu yachananku tiyan? Apóstol Pablomanta parlarina. Payqa cristianosman nerqa: ‘Tukuy imata allinta reparaychej, imachus allin kasqanta yachanaykichejpaj’, nispa. Jinapis Pabloqa yacharqa mana tukuy imatapunichu entiendesqanta (1 Tes. 5:21). Pay sutʼincharqa ‘wakillanta yachasqanchejta, ayphullatataj rikusqanchejta ayphu espejopi jina’ (1 Cor. 13:9, 12). Reparanchej jina, Pabloqa mana tukuy imatapunichu yacharqa, nillataj noqanchejpis. Jinapis payqa, Jehovamanta ashkha imasta sutʼita entienderqa. Chayrayku payqa mana iskayrayarqachu Diosmanta yachakusqan cheqapuni kasqanmanta.

4. ¿Imatá ruwasunman Diosmanta yachakusqanchej cheqapuni kasqanta sutʼita yachanapaj, chanta imastá kay yachaqanapi yachakusun?

⁴ Diosmanta yachakusqanchej cheqapuni kasqanta sutʼita yachanapajqa, kikincharina imaynatachus Jesús Diosta yupaychasqanta, imaynatachus kay tiempopi Jehovaj testigosnin Diosta yupaychasqanchejwan. Kay yachaqanapi yachakusun cheqa cristianosqa mana santosta yupaychasqanchejta, Jehovaj sutinta jatunpaj qhawasqanchejta, cheqa kajta yachakusqanchejman jina kausakusqanchejta, purajmantataj mayta munanakusqanchejta.

5. ¿Imatataj Jesús yachacherqa chanta imaynatá pay jina ruwasunman?

⁵ Jesusqa Jehovata maytapuni munakusqanrayku pay sapallanta yupaycharqa, cielopi  kashaspa, kay Jallpʼapi kashaspapis (Luc. 4:8). Discipulosninmanpis chayllatataj yachacherqa. Jesuswan discipulosninwanqa mana santosta apaykacharqankuchu Diosta yupaychanankupaj. Diosqa mana rikukoj cuerpoyoj. Chayrayku runaspa ima santota ruwasqankupis manapuni payman rijchʼakuyta atinmanchu (Isa. 46:5). ¿Allinchu kanman wakin runas santos kasqankuta yuyaspa chay runasman rijchʼakoj lantista ruway, paykunamantaj rezakuy? Chunka Kamachiykunamanta iskay kajpi Jehová nerqa: ‘Ama ima santotapis chayri waj imastapis ruwakunkichu yupaychanaykipaj, ni cielopi kajman rijchʼakojta, ni kay jallpʼapi kajman rijchʼakojta. Ama chaykunaman qonqorikunkichu’, nispa (Éxo. 20:4, 5). Arí, Diosqa mana munanchu santosta yupaychananchejta, noqanchejtaj chayta sumajta yachanchej.

6. ¿Pikuna jinataj Jehovaj testigosnin Diosta yupaychanchej?

⁶ Ñaupa tiempomanta qhelqaj runasqa ninku, apostolespa tiemponmanta cristianosqa Diosllata yupaychasqankuta. Uj libropi nisqanman jina, chay cristianosqa ni yuyallankumanpischu karqa Diosta yupaychananku lugarespi santosta sayachiyta. Kay tiempopipis Jehovaj testigosnenqa ñaupa tiempomanta cristianos jinallataj Diosta yupaychanchej. Noqanchejqa mana santosman, angelesman, nitaj Jesusmanpis orakunchejchu. Nillataj lugarninchejmanta banderata, gobiernota chayri waj imasta jatunchanchejchu. Runas imata ruwachiyta munawajtinchejpis, Jesuspa nisqantapuni kasukunchej. Pay nerqa: “Jehová Diosniykita yupaychanayki tiyan”, nispa (Mat. 4:10).

7. ¿Imaspitaj Jehovaj testigosnin waj religioneswan mana kikinchu kanchej?

⁷ Kay tiempopi ashkha runasqa, sumaj rejsisqa pastoresta, tata curasta ima mayta uyariyta munanku, yupaychayllata mana yupaychankuchu. Paykunaqa iglesiasninkuman rinku, librosninkuta rantikunku, may chhika qolqetataj churanku yanapanankupaj. Wakintaj tukuy ima nisqankuta creenku. Chay iglesiasman rejkunaqa, ni Jesusta rikuspapis ajinatapuni kusikunkumanchu. Chaywanpis Jehovaj kamachisnenqa mana uj runatachu qhatikunchej. Diospa llajtanta ñaupajman apajkunata kasukuspapis, Jesuspa nisqanta sumajta japʼikunchej. Pay nerqa: ‘Tukuyniykichej hermanos kankichej’, nispa (Mat. 23:8-10). Chayrayku runastaqa religionesta kamachejkuna kajtinkupis chayri gobiernos kajtinkupis mana Diosta jinachu yupaychanchej. Paykunataqa mana apoyanchejchu, mana politicaman, nitaj kay mundoj imasninmanpis chhapukunchejchu. Cristiano nichikoj religionesmantaqa tukuy imapi waj jina kanchej (Juan 18:36).

8. ¿Imaynamantá yachanchej Jehová sutinta jatunchananchejta, wajkunamantaj rejsichinanchejta munasqanta?

⁸ Uj pacha Jesusqa orakushaspa nerqa: “Tatáy, sutiykita jatunchay”, nispa. Jehová Diostaj cielomantapacha nimorqa sutinta jatunchananta (Juan 12:28). Jesusqa kay Jallpʼapi kashaspa Tatanpa sutinta jatuncharqa (Juan 17:26). Chayrayku cheqa cristianosqa Diospa sutinta oqharispa, wajkunamantaj rejsichispa maytapuni kusikunchej.

9. ¿Imaynamantataj ñaupa tiempomanta cristianos Diospa sutinta jatunpaj qhawasqankuta rikucherqanku?

⁹ Apostolespa tiemponpi congregación cristiana rikhurisqanmanta pisi tiemponman, Jehovaqa ‘mana judío kajkunatapis khuyakorqa, paykuna ukhumantataj uj llajtata ajllakorqa, paypa sutinta apanankupaj’ (Hech. 15:14).  Paykunaqa kusiywan Diospa sutinta oqharej kanku, wajkunamantaj yachachej kanku. * Jesuspa apostolesninwan discipulosninwanqa Diosmanta willashaspa, Bibliata qhelqashaspapis Diospa sutinta oqharejpuni kanku. Ajinamanta paykunaqa Diospa sutinta aparqanku (Hech. 2:14, 21).

10. ¿Imaraykutaj ninchej Jehovaj testigosnin Diospa sutinta apasqanchejta?

¹⁰ Jehovaj testigosnenqa Diospa sutinta apanchej. Imaraykuchus chayta nisqanchejta qhawarina. Kay tiempomanta religionesta kamachejkunaqa, tukuy imata ruwanku Diospa sutinta chinkachinankupaj. Chayrayku paykunaqa Bibliasninkumanta Diospa sutinta orqhorpanku, wakin kutistaj mana munankuchu Diospa sutin iglesiasninkupi oqharikunanta. * Jinapis Jehovaj testigosnillan Diospa sutinta maychus kasqanman jina jatunchanchej. Ni mayqen religionpis noqanchej jina Diospa sutinta runasman rejsichinkuchu. Chantapis mayta kallpachakunchej Jehovaj testigosnin sutiwan rejsisqa kasqanchejman jina kausakunapaj (Isa. 43:10-12). Diospa Palabran nisqa Bibliatapis 240 millones kurajta imprimerqanchej. Chay Bibliapeqa Jehovaj sutin maychus kananpi kashan. Waj Bibliasta traducejkunataj Diospa sutinta orqhorpanku. Bibliamanta orqhosqa publicacionesninchejtapis 1.000  kuraj parlaykunapiña orqhonchej. Chaykunapipis Jehovaj sutin kashallantaj.

11. ¿Imaynatá ñaupa tiempomanta cristianos cheqa kajta sonqonkupi japʼikusqankuta rikucherqanku?

¹¹ Jesusqa, Diosmanta, imachus munaynin kasqanmantapis cheqa kaj yachachiykunata jatunpaj qhawarqa. Chayrayku chayman jina kausakorqa, wajkunamanpis willarqa (Juan 18:37). Jesuspa discipulosninpis pay jinallataj Diosmanta cheqa kajta yachakusqankuta sonqonkupi japʼikorqanku (Juan 4:23, 24). Chayrayku apóstol Pedropis ‘cheqa kaj ñanmanta’ parlaspa, cheqa cristianosmanta parlasharqa (2 Ped. 2:2). Ñaupa tiempomanta cristianosqa Diosmanta, imachus munaynin kasqanmanta ima cheqa kaj yachachiykunata sonqonkupi japʼikorqanku. Chayrayku qhesacharqanku religionespa llulla yachachiykunasninkuta, costumbresninkuta, cheqa kajmanta qʼewisqata parlasqankuta ima (Col. 2:8). Ajinallatataj kay tiempomanta cheqa cristianospis mayta kallpachakushanchej ‘cheqa kajpi’ purinallanchejpajpuni (3 Juan 3, 4). Imajtinchus Diospa Palabranman jina kausakunchej, chaypitaj creenchej.

12. ¿Imatataj ruwanku Diospa Llajtanta Kamachejkuna Bibliamanta wakin yachachiykunata pantasqata entiendeshasqanchejta reparaspa, chanta imaraykú chayta ruwanku?

¹² Jehovaj testigosnenqa mana ninchejchu Bibliaj nisqanta tukuysituntapuni entiendesqanchejta. Wakin kuteqa, Bibliaj wakin yachachiykunasninta sutʼinchaspa chayri Diospa llajtanpi wakin imasta ruwaspa pantaykorqanchej. Jinapis mana tʼukunanchejchu tiyan, imajtinchus Bibliaqa nin Diospa llajtan pisimanta pisi cheqa kajta entiendenanchejta (Col. 1:9, 10). Jehovaqa cheqa kajta pisimanta pisi sutʼinchan. Chayrayku pacienciakuna cheqa kajta aswan allinta entiendenapaj (Pro. 4:18). Diospa Llajtanta Kamachejkunaqa Bibliaj wakin yachachiykunasninta pantasqata entiendeshasqanchejta chayri mana allintachu ruwashasqanchejta reparaspa, chay rato allinchanku. Kay tiempomanta ashkha iglesiaspitaj yachachiykunasninkuta cambianku runasta kusichiyta munaspa chayri allinpaj qhawasqa kayta munaspa. Jinapis Jehovaj testigosnenqa wakin imasta waj jinamanta ruwanchej, astawan Jehovaman qayllaykunapaj, Jesuspa yachachisqanman jinataj Diosta yupaychanapaj (Sant. 4:4). Wakin imastaqa mana kay mundomanta runas cambiashasqankuraykuchu cambianchej, manaqa Bibliata aswan sumajta entiendesqanchejrayku. Arí, Diosmanta, imachus munaynin kasqanmanta ima cheqa kaj yachachiykunata sonqonchejpi japʼikunchej (1 Tes. 2:3, 4).

13. ¿Imaraykutaj cheqa cristianos purajmanta munanakunku, chanta imaynatá kay tiempopi Jehovaj testigosnin chayta rikuchinchej?

¹³ Ñaupa tiempomanta cristianostaqa wajkuna kʼacha runasta jina rejsej kanku. Astawanqa purajmanta mayta munanakusqanrayku. Jesús nerqa: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:34, 35). Kay tiempopipis mundontinmanta Jehovaj testigosnenqa mayta munanakunchej, ujchasqastaj kausakunchej. Waj religionesmanta nisqaqa uj familia jinapuni kanchej waj suyusmanta, waj culturasmanta kaspapis. Purajmanta munanakusqanchejqa sutʼi rikukun reunionesninchejpi, asambleasninchejpi ima. Chaytaj sutʼita reparachiwanchej noqallanchej Jehová munasqanman jina payta yupaychasqanchejta.

14. Colosenses 3:12-14 nisqanman jina, ¿imaynamantataj cheqa cristianos purajmanta mayta munanakusqanchejta rikuchinchej?

 ¹⁴ Biblia nin: ‘Purajmanta mayta munanakuychej’, nispa (1 Ped. 4:8). Chaytaqa ruwanchej imapi pantaspapis purajmanta perdonanakuspa, aguantanakuspa ima. Chantapis kallpachakunchej tukuy hermanosninchejwan, pikunachus sonqonchejta nanachiwanchej chaykunawanpis, kʼachas kanapaj, wajyarikunapaj ima (Colosenses 3:12-14 leey). Ajinamanta sutʼita rikuchinchej cheqa cristianospuni kasqanchejta.

15. ¿Imaspiwantaj rikuchinchej ñaupa tiempomanta cristianos jina Diosta yupaychasqanchejta?

¹⁵ Ñaupa tiempomanta cristianos jina Diosta yupaychasqanchejtaqa, waj imaspiwan rikuchinchej. Imajtinchus Diospa llajtanpeqa jaqay tiempopi jinallataj congregacionesta waturej hermanos, ancianos, siervos ministeriales ima tiyan (Fili. 1:1; Tito 1:5). Chantapis ñaupa tiempomanta cristianos jinallataj casado kausayta, qhari warmi jina puñuykuyta, yawarta ima jatunpaj qhawanchej. Nillataj saqenchejchu jatun juchapi urmaj hermano mana pesachikuyta munajtin, congregacionllapipuni kananta (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Imatá yachakunchej Efesios 4:4-6 versiculospi?

¹⁶ Jesusqa nerqa ashkha runas ninankuta paypa discipulosnin kasqankuta. Chayta nejkunaqa mana tukuyninkupunichu discipulosnin kananku karqa (Mat. 7:21-23). Diospa Palabranpis nillarqataj qhepa pʼunchaykunapeqa ashkha runas ‘Diosta yupaychajkunaman rijchʼakunallankuta’ (2 Tim. 3:1, 5). Jinapis Bibliaqa sutʼita nin ‘uj creeyllata’ Dios allinpaj qhawasqanta (Efesios 4:4-6 leey).

17. ¿Pikunataj kay tiempopi Jesús jina Bibliaj nisqanman jinapuni Diosta yupaychanku?

¹⁷ ¿Pikunataj kay tiempopi Bibliaj nisqanman jinapuni Diosta yupaychanku? Kay yachaqanapi yachakorqanchej imastachus cheqa cristianos ruwananku kasqanta. Chantá yachakullarqanchejtaj imaynatachus Jesús, Diosta yupaychasqanta. Ñaupa tiempomanta cristianospis chayman jina Diosta yupaychasqankuta. Chaytaj sutʼita reparachiwanchej Jehovaj testigosnillan Bibliaj nisqanman jina Diosta yupaychasqanchejta. Maytapuni kusikunchej Diospa llajtanpi kasqanchejmanta, paymanta, imachus munaynin kasqanmanta cheqa kajta yachasqanchejmanta ima. Chayrayku cheqa kajpi sinchʼita sayanallapuni.