SAPA wata, qharqochikoj hermanosmanta ashkhasqa congregacionman kutinpunku. Jehovaj munasqa ovejitasnin congregacionman kutinpojtinkoqa, cielopi ancha kusiy kan (Luc. 15:7, 10). Juchasniykimanta pesachikuspa congregacionman kutinporqanki chayqa, Jesuswan, angeleswan, Jehovawanqa maytapuni kusikunku. Jehovawan allinyakunaykipaj kallpachakushajtiyki ichá wakin imas mana saqesunkimanchu. ¿Imastaj chaykuna kanman chanta imastaj yanapasunkiman? Chaymanta qhepan parrafospi parlarisun.

Ashkha hermanostaqa sonqonku juchachallanpuni congregacionman kutinpojtinkuñapis. Rey Davidtapis ajinallatataj sonqon juchacharqa. Davidqa Jehová juchasninta perdonajtinñapis nerqa: “Pantasqasneyqa may chhika kanku”, nispa (Sal. 40:12; 65:3). Congregacionman kutinpoj hermanoqa ashkha watasta pʼenqakullanmanpuni chayri paytaqa sonqon juchachallanmanpuni. Hermananchej Isabelmanta parlarina. * Payqa 20 watas kurajta congregacionmanta qharqosqa karqa. Pay nin: “Manapuni creeyta aterqanichu juchasniymanta Jehová perdonawasqanta”, nispa. Anchata llakikuspaqa, ichá watejmanta Jehovamanta karunchakuwaj (Pro. 24:10). Chayrayku ama ajinapi rikukunaykipaj kallpachakuy.

Wakintaj llakikunku Jehovawan watejmanta allinyakapunankupaj mana wakin imasta ruwayta atinankumanta. Hermano Antonio congregacionman kutinpuytawan nerqa: “Qonqapusqaniña imastachus ñaupajpi testigo kashaspa yachakusqaymanta, ruwasqaymanta ima”, nispa. Ajinata yuyasqankurayku ichá wakenqa mana atinkuchu Jehovapaj tukuy atisqankuta ruwayta.

Uj sinchʼi muyoj wayra uj wasita urmaykuchisqanpi piensarina. Wasiyojqa chay wasinta allinchananpaj  tiempochakunan, kallpachakunantaj kanqa, chayta ruwananmanta llakisqa kashaspapis. Jatun juchapi urmasqaykirayku Jehovamanta karunchakorqanki chaypis, ajinallatataj kallpachakunayki kanqa paywan watejmanta allinyakapunaykipaj. Jinapis mana sapaykichu kashanki.

Jehovaqa kayta niwanchej: “Jamuychej, chay imasmanta parlarinachej”, nispa (Isa. 1:18). Qanqa Jehovawan allinyakapunaykipaj kallpachakunkiña. Chayraykutaj payqa munakusunki. Congregacionman kutinpusqaykirayku, Jehovaqa Satanás llulla kasqanta rikuchiyta atin (Pro. 27:11).

Jehovaman kutinpuspaqa payman qayllaykunkiña, paypis qayllaykamullasonqataj (Sant. 4:8). Congregacionman kutinpusqaykeqa may allinpuni. Jinapis waj imastawanraj ruwanayki tiyan. Jehovaqa Tataykitaj, Amigoykitaj. Payta munakunaykipajtaj kallpachakunallaykipuni tiyan. ¿Imatá chaypaj ruwawaj?

Atisqaykiman jina wakin imasta ruwanaykipaj kallpachakuwaj. Ichá yuyakushankiraj imastachus yachakusqaykita Jehovamanta, imastachus aswan qhepaman ruwananta nisqanmanta ima. Jinapis, kallpachakunallaykipuni kanqa reunionesman rinaykipaj, predicanaykipaj, hermanoswanpis karinaykipaj.

Jehová Dioswan parlariypuni. Tatayki Jehovaqa sumajta entienden sonqoyki juchachasusqanrayku mana paywan parlariyta atisqaykita (Rom. 8:26). Jinapis mana saykʼuspa Diosmanta mañakullaypuni, paypa amigonpunitaj kayta munasqaykita niy (Rom. 12:12). Andrés nin: “Sonqoyqa maytapuni juchachawarqa, pʼenqasqallataj karqani. Jinapis sapa kuti Jehovawan parlarejteyqa sonqoy tiyaykoj, manañataj chhikata llakikojchu kani”, nispa. Jehovawan imamantachus parlarinaykita mana yachankichu chayqa, imastachus David pesachikuspa Jehovaman nisqanpi piensariy. Chaytaj kashan 51 chantá 65 Salmospi.

Bibliata estudiaypuni. Bibliata estudianki chayqa, creeyniyki astawan sinchʼiyanqa, astawantaj Jehovata munakunki (Sal. 19:7-11). Felipe nin: “Bibliata leenaypaj, estudianaypajtaj mana tiempochakusqayrayku creeyniy pisiyarqa, Jehovatapis wasancharqani. Mana ujtawan Jehovata wasanchanaypajtaj Bibliata sumajta estudianaypaj kallpachakorqani”, nispa. Qanpis pay jina ruwawaj. Sapallaykipi imamantachus Bibliata estudianaykita mana yachankichu chayqa, uj experienciayoj hermanowan yanapachikuwaj.

Hermanoswan watejmanta amigos kanaykipaj kallpachakuy. Congregacionman kutinpojkunamanta wakenqa, llakikunku hermanos paykunawan phiñasqas kashasqankuta yuyaspa. Hermana Larissa nin: “Mayta pʼenqakorqani. Yuyarqanitaj hermanosta, hermanasta ima wasanchasqayta. Unayta ajina kasharqani”, nispa. Ancianoswan, creeypi sinchʼi sayasqa hermanoswanqa mayta yanapayta munasunku, Jehovawan watejmanta allinyakapunaykipaj. (“ ¿Imatá ancianos ruwankuman?” nisqa recuadrota leeriy). Paykunaqa maytapuni kusikunku kutinpusqaykimanta, kusisqa kanaykitataj munanku (Pro. 17:17).

¿Imatá ruwawaj hermanoswan ujchasqa kanaykipaj? Tukuynin reunionesman riy, sapa kutitaj hermanoswan predicay. ¿Imaynatá chaykunata ruwasqayki yanapasonqa? Félix nin: “Hermanosqa congregacionman kutipunayta maytapuni suyashasqanku. Hermanos mayta munakuwasqankuta repararqani. Tukuy hermanos yanapawarqanku congregacionpi allin sientekunaypaj, Jehová perdonawasqanta reparanaypaj, ñaupajllamanpunitaj rinaypaj”, nispa. (“ ¿Imatá ruwawaj?” nisqa recuadrota qhawariy).

Jehovawan allinyakunaykipaj kallpachakushajtiyki, Satanasqa “sinchʼi muyoj wayra jina” creeyniykita chinkachiyta munallanqapuni (Luc. 4:13). Chayrayku sumaj wakichisqa kayta munanki chayqa, astawan Jehovaman qayllaykuy.

Jehovaqa ovejitasninmanta nin: “Chinkasqasta maskʼamusaj, karunchakojkunata kutirichimusaj, nanasqasta vendaykusaj, tullusta kallpachasaj”, nispa (Eze. 34:16). Jehovaqa ashkha kamachisninta yanaparqa paywan allinyakapunankupaj. Qantapis yanapasullaytataj munan sumaj amigon kanaykipaj.