1, 2. 1) ¿Imatá wakin gobiernos Jehovaj testigosninpa contranpi ruwanku, chanta imatá hermanosninchej ruwanku? 2) ¿Imajtintaj kusisqa kasunman qhatiykachasqa kaspapis? (Tapapi fotosmantapis parlariy).

 KAY tiempopi mundo enteropi treintamanta astawan suyuspi, lugarespi ima Jehovaj testigosnin prohibisqa kashanku. Chay lugaresmanta wakinpeqa autoridades carcelman wisqʼaykunku hermanosninchejta, hermanasninchejta ima. ¿Imarayku? Paykunaqa Jehovaj ñaupaqenpi ni ima juchatapis ruwankuchu. Paykunataqa juchachanku Bibliata leesqankumanta, estudiasqankumanta, wajkunaman predicasqankumanta, tantakuykunamanpis risqankumanta. Chantapis mana politicaman chhapukunkuchu. Pero Jehovaj testigosnenqa sinchʼi qhatiykachasqa kaspapis, Jehovata tukuy sonqo kasukullankupuni. b Rikuchinkutaj Jehovallata yupaychasqankuta, chaywantaj may kusisqas kanku.

² Carcelpi kashaj wakin hermanospa fotosninkupi qhawarqankichá imaynatachus paykuna asirishasqankuta. Jehovaqa kusisqa kashan paykuna tukuy sonqo kasukusqankumanta, chayta yachaspataj paykunapis mayta kusikullankutaj (1 Cró. 29:17 qallariynin). Jesús nerqa: ‘Kusisqa kanku cheqan kajrayku qhatiykachasqa kajkunaqa. Kusikuychej jatun kusiywan, tʼinkaykichejqa jatun’, nispa (Mat. 5:10-12).

3. Hechos 4:19, 20 nisqanman jina, ¿imatataj apóstoles ruwarqanku qhatiykachasqa kashaspa, imajtintaj chayta ruwarqanku?

³ Kay tiempomanta hermanosninchejqa apóstoles jina qhatiykachasqa kashanku. Apostolestaqa qhatiykacharqanku Jesusmanta  willasqankurayku. Ashkha kutispi judiospa Jatun Juntankumanta juecesqa “amaña Jesuspa sutinpi parlanankuta kamacherqanku” (Hech. 4:18; 5:27, 28, 40). ¿Imatataj apóstoles ruwarqanku? (Hechos 4:19, 20 leey). Paykunaqa yacharqanku aswan atiyniyoj autoridad predicanankuta kamachisqanta, Cristomantataj allinta sutʼinchanankuta (Hech. 10:42). Pedrowan Juanwanqa tukuynin apostolespa sutinpi mana manchachikuspa nerqanku Diosta kasukunankuta, manataj paykunatachu. Chantapis nillarqankutaj Jesusmanta parlanallankutapuni. Judío juecestaqa kaytapis tapushankuman jina karqa: “¿Diosmanta aswan atiyniyoj kasqaykichejtachu yuyakushankichej?”, nispa.

4. Hechos 5:27-29 nisqanman jina, ¿imatataj apóstoles ruwarqanku, imaynatataj tukuy cristianos paykuna jina ruwasunman?

⁴ Chay kutimantapacha tukuy cristianos apóstoles jina ruwanku, paykunaqa nerqanku: “Noqaykoqa Diostapuni kamachejniykuta jina kasunayku tiyan runasta kasunaykumantaqa”, nispa (Hechos 5:27-29 leey). Jehovata tukuy sonqo kasukusqankurayku jasutʼisqa kasqankutawan, Jatun Juntaj “ñaupaqenmanta kusisqas riporqanku, Jesuspa sutinrayku ñakʼarisqankumanta”, predicallarqankupunitaj (Hech. 5:40-42).

5. ¿Ima tapuykunasmantaj kutichinanchej tiyan?

⁵ Imatachus apóstoles ruwasqankumanta ichapis kay tapuykuna kanman: Apóstoles runasta kasukunankumantaqa Diostapuni kasukorqanku, chayta ruwaspapis, ¿imaynatataj ‘autoridadesta kasukullarqankutaj’? (Rom. 13:1). Apóstol Pabloqa nerqa ‘kamachejkunata kasukunata, jinallataj autoridadestapis’. Paykunata kasukuspapis, ¿imaynatataj Tukuy Atiyniyoj Kamachejninchej Diostapuni tukuy sonqo kasukusunman? (Tito 3:1).

6. 1) Romanos 13:1 ‘autoridadesmanta’ parlaspa, ¿pikunamantataj parlashan, chanta imaynatataj paykunata qhawananchej tiyan? 2) ¿Gobiernos tukuy imapajchu atiyniyoj kanku?

⁶ (Romanos 13:1 leey). Kay versiculopi ‘autoridades’ nispaqa parlashan gobiernosmanta, pikunachus runasta kamachinankupaj  atiyniyoj kanku chaykunamanta. Cristianostaj chay autoridadesta kasukunanchej tiyan. Paykunaqa chʼajwas kananta mana saqenkuchu, leyestapis juntʼachinku, wakin kuteqa Diospa llajtantapis yanapanku (Apo. 12:16). Chayrayku Diosqa kamachiwanchej paykunaman impuestota pagananchejta, imamanta pagota mañawajtinchejpis pagananchejta, kasukunata munajtataj kasukunanchejta, respetanata munajtataj respetananchejta (Rom. 13:7). Jinapis chay gobiernosqa Jehová saqesqanraykulla atiyniyoj kanku. Chaytataj sutʼita Jesús nerqa Romamanta Poncio Pilato tapojtin. Pilato nerqa: ‘¿Manachu yachanki atiyniyoj kasqayta kacharichisunaypajpis chayri wañuchichisunaypajpis?’, nispa. Jesustaj nerqa: “Manachus Dios atiyta qosunkiman chayqa, mana imatapis ruwayta atiwankimanchu”, nispa (Juan 19:11). Kay tiempomanta tukuy gobiernos, politicospis Pilato jinallataj mana tukuy imapajchu atiyniyoj kanku.

7. ¿Ima kutispitaj gobiernosta mana kasukunanchejchu tiyan, chanta imatataj paykuna yachananku tiyan?

⁷ Cristianosqa gobiernos churasqanku leyesta kasukunanchej tiyan, Jehovaj leyesninman mana churanakojtin. Jinapis gobiernosqa imatachus Dios mana ruwananchejta munanchu, chayta ruwachiyta munawasunman, chayri imatachus Dios niwanchej ruwananchejta, chayta ruwajta mana saqewasunmanchu. Jina kajtenqa mana paykunata kasunchejchu. Por ejemplo, jovenesta obligankuman nacionninkurayku guerraman rinankuta maqanakunankupaj. c Chayri prohibinkuman Biblianchejta, publicacionesninchejta, predicananchejta, tantakuyman rinatapis. Gobiernos atiyninkuman atienekuspa Cristoj discipulosninta qhatiykachasqankumanta, Diosman cuentata qonanku tiyan. Jehovaqa ruwasqankuta qhawamushan (Ecl. 5:8).

8. ¿Imapitaj mana kikinchu kanku autoridadeswan Jehovawan, chanta imajtintaj chayta yachananchej tiyan?

⁸ ‘Autoridadesqa’ atiyniyoj kankuman, ashkha allin imasta ruwankuman, wajkunatapis kamachinkuman. Jinapis chayqa mana niyta munanchu mana pantaj runas kasqankuta, aswan patapi kasqankutapis. Jehová Dioslla mana pantayniyoj, tukuymantataj aswan patapi kashan. Bibliapeqa tawa kutista nin Jehovaqa ‘Patapi kaj Dios’ kasqanta (Dan. 7:18, 22, 25, 27).

9. ¿Imastataj profeta Daniel mosqoypi jina rikorqa?

⁹ Profeta Danielpa mosqoypi jina rikusqanqa, sutʼita reparachiwanchej Jehová Dioslla tukuy autoridadesmanta aswan patapi kasqanta. Ñaupajta rikorqa tawa jatuchaj animalesta, pikunachus kikinchakun atiyniyoj gobiernoswan, ñaupa tiempomantapacha kunankama. Chaykuna kashanku Babilonia, Medopersia, Grecia, Roma, chantá Reino Unidowan Estados Unidoswan ima, paykunaqa uj atiyniyoj gobiernolla kanku, kay tiempopitaj kamachishanku (Dan. 7:1-3, 17). Chantá Daniel Jehovata rikorqa kamachina tiyananpi tiyasqata, Juzgana Tribunalpi (Dan. 7:9, 10, sutʼinchaynin). Chaymanta qhepaman Daniel imatachus rikusqanqa, sutʼinchan kay tiempomanta gobiernosta imachus pasananta.

10. Daniel 7:13, 14, 27 nisqanman jina, ¿pikunamantaj Jehová atiyta qon jallpʼa patapi, chanta imatá chay paymanta yachachiwanchej?

¹⁰ (Daniel 7:13, 14, 27 leey). Danielqa rikorqa Jehová Dios tukuy atiyta qhechusqanta gobiernosmanta, qosqantataj piskunachus atiyta japʼinapaj jina kanku, aswan atiyniyojtaj kanku chaykunaman. ¿Pikunataj paykuna kanku? ‘Runaj wawanman rijchʼakoj’, nisunman Jesucristo, chantá ‘Patapi kaj Diospa santosnin’, nisunman  144.000 ajllasqas. Paykunaqa gobernanqanku “wiñaypaj wiñaynintinpaj” (Dan. 7:18). Chaytaqa Jehovalla ruwayta atin, chayrayku sutʼita yachanchej Jehovalla Patapi kaj Dios kasqanta.

11. ¿Imatawantaj Daniel Jehovamanta nerqa?

¹¹ Imatachus profeta Daniel mosqoypi jina rikusqanqa, ñaupajpiña nisqanman jina karqa. Daniel nerqa: ‘Cielopi kaj Diosqa Reyesta churantaj, orqhontaj’, nispa. Pay nillarqataj “Aswan Patapi kaj Kamachejqa tukuy runaspa gobiernosninta kamachisqanta, pimanchus munasqanmantaj qopusqanta” (Dan. 2:19-21; 4:17). ¿Maykʼajllapis Jehová Dios reyesta churarqachu chanta orqhorqachu? Arí.

12. Imaynatachus ñaupajpi Jehová Dios reyesta orqhosqanmanta parlariy (dibujota qhawariy).

¹² Jehovaqa sutʼita rikucherqa ‘autoridadesmantaqa’ aswan patapipuni kashasqanta. Kinsamanta parlarina. Egiptomanta faraonqa esclavosta jina Diospa llajtanta trabajachej, kutin kutita mana munajchu kachariyta. Jehová Diostaj kacharicherqa llajtanta, faraontataj Puka mar qochapi yakuwan pʼampaykorqa (Éxo. 14:26-28; Sal. 136:15). Babiloniamanta rey Belsasar uj jatun fiestata wakicherqa, ‘cielospi kaj Señormantaj sayaykorqa’. Jehovata alabananmantataj ‘qolqemanta ruwasqa diosesta, chantá qorimanta’ ruwasqa diosesta alabarqa (Dan. 5:22, 23). Jinapis Jehová Diosqa chay machu machu runata kʼumuykachacherqa. Chay chʼisipacha Belsasarqa wañuchisqa karqa, gobiernontataj medosmanwan persasmanwan qoporqa (Dan. 5:28, 30, 31). Palestinamanta rey Herodes Agripa I apóstol Santiagota wañucherqa, chantá apóstol Pedrota presocharqa wañuchinallanpajtaj. Diostaj mana saqerqachu chayta ruwajta. “Jehová Diospa angelnenqa Herodesta onqoykucherqa”, Herodestaj wañorqa (Hech. 12:1-5, 21-23).

13. Imaynatachus Jehová Dios qʼalata ujchasqa reyesta chinkarpachisqanmanta parlariy.

¹³ Jehovaqa rikuchillarqataj ujchasqa gobiernosmanta aswan patapi kasqanta. Jehovaqa maqanakorqa israelitasrayku, yanaparqataj atipanankupaj ujchasqa 31 cananeo reyesta, ajinamanta sumaj jallpʼamanta casi tukuyninta japʼikapunankupaj (Jos. 11:4-6, 20; 12:1, 7, 24). Diosqa yanapallarqataj atipasqata atipanankupaj rey Ben-Hadadta, jinallataj siriosmanta 32 reyestapis, Israelpa contranpi maqanakoj rejtinku (1 Rey. 20:1, 26-29).

14, 15. 1) ¿Imatataj rey Nabucodonosorwan rey Dariowan nerqanku Jehovalla kamachej kasqanmanta? 2) ¿Imatataj uj salmista nerqa Jehovamanta, llajtanmantawan?

 ¹⁴ Jehová Diosqa kutin kutita rikucherqa Patapi kaj Dios kasqanta. Babiloniamanta rey Nabucodonosorqa mayta creekorqa kallpayoj kasqanmanta, atiyniyoj kasqanmanta, jatunchasqa kasqanmantapis. Nitaj kʼumuykukoj sonqowan reconocerqachu Jehovalla jatunchanapaj jina kasqanta. Chayrayku Jehová Diosqa locoyacherqa. Yuyayninman kutispataj, Nabucodonosorqa “Patapi kaj Diosta” alabarqa. Repararqataj “kamachiynenqa wiñaypaj” kasqanta, “manataj pipis jarkʼayta” atisqanta imata ruwananpajpis (Dan. 4:30, 33-35). Daniel tukuy sonqo kasukusqanrayku leonespa tʼoqonkuman wijchʼuykusqa karqa. Jehová Danielta leonesmanta salvasqantawan rey Darioqa kayta kamacherqa: ‘Tukuy runas Danielpa Diosninpa ñaupaqenpi manchariywan kharkatichunku. Paymin kausaj Diosqa, wiñay wiñaypajtaj kausallanqapuni. Gobiernonqa ni jaykʼaj tukuchisqachu kanqa, kamachiyninpis wiñaypaj kallanqapuni’, nispa (Dan. 6:7-10, 19-22, 26, 27).

¹⁵ Uj salmista kayta nerqa: “Jehová Diosqa nacionespa wakichisqankuta pantachin. Payqa llajtaspa yuyaychakusqankuta mana allinman tukuchin”, nispa. Nillarqataj: “Kusisqamin uj nación Jehová Dios chay nacionpa Diosnin kajtenqa. Kusisqamin uj llajtaqa sichus Dios chay llajtata paypata kananpaj ajllakun chayqa”, nispa (Sal. 33:10, 12). Chayrayku tukuy sonqo Jehová Diosta kasukuyta munanchej.

16. ¿Imamantataj seguros kashanchej chanta imaraykutaj? (Dibujota qhawariy).

¹⁶ Rikunchejña imastachus Jehová ñaupajpi ruwasqanta. Chanta, ¿imatá suyasunman Jehová ruwananta tumpamantawan? Seguros kashanchej Jehovaqa tukuy sonqo kasukoj kamachisninta “manchay ñakʼariy” tiempopi salvanawanchejtapuni (Mat. 24:21; Dan.  12:1). Chaytaqa ruwanqa maypachachus uj qotu ujchasqa naciones Magogmanta Gog sutiyoj, mundo enteropi mana khuyarikuspa Diospa kamachisninpa contranpi oqharikojtin. Naciones Unidasqa 193 suyusniyoj. Chay tukuynin suyus ujchaykukojtinkupis Jehovapaj, cielopi ejercitosninpajpis chʼuspi jinalla kanqanku. Jehová nin: “Jatun kayniyta rikuchisaj, santo Dios kasqaytapis, ashkha nacionespa rikunankuta rejsichikusaj. Yachanqankutaj noqa Jehová Dios kasqayta”, nispa (Eze. 38:14-16, 23; Sal. 46:10).

17. Biblia nisqanman jina, ¿imataj kanqa jallpʼantinpi reyeswan, chanta Jehovata tukuy sonqo kasukojkunawanpis?

¹⁷ Armagedón guerraqa qallarenqa Gog Diospa llajtanta chinkachiyta munajtin. Chay último maqanakuypi Jehová ‘jallpʼantinmanta reyesta’ chinkachenqa (Apo. 16:14, 16; 19:19-21). Chantá cheqan runaslla kay jallpʼapi tiyakonqanku, tukuy sonqo kasukojkunalla kay jallpʼapi qhepakonqanku (Pro. 2:21).

18. ¿Imatataj ashkha cristianos ruwarqanku, chanta imaraykutaj? (Daniel 3:28).

¹⁸ Unaymantapachaña ashkha cristianosqa, Tukuyta Kamachej Reyninku Jehovata munakusqankurayku carcelpi wisqʼasqa karqanku, kausayninkutapis wañuy pataman churarqanku. Chay cristianosqa Jehovata tukuy sonqo kasukullaytapuni munanku. Paykunaqa kinsa hebreos jina kanku, pikunachus laurashaj hornomanta salvakorqanku, Patapi kaj Diosta kasukusqankurayku (Daniel 3:28 leey).

19. Jehová kamachisninta juzgananpaj, ¿imatataj qhawaykonqa, chanta imatá kunan ruwananchej tiyan?

¹⁹ Davidqa yacharqa Jehovata tukuy sonqo kasukuy may importante kasqanta. Pay qhelqarqa. “Jehová Diosqa tukuy runasta juzganqa. Jehová Diosníy, justiciata ruwapuway cheqan kajta ruwasqayman jina, mana juchayoj kasqayman jinataj”, nispa (Sal. 7:8). Nillarqataj: “Mana juchachana kasqaypis cheqan kasqaypis waqaychawachun”, nispa (Sal. 25:21). Sumajta, kusisqataj kausakunapajqa Jehovata tukuy sonqo sirvinallapuni, ima kajtinpis amapuni wasanchanachu. Ajinamanta salmista jina nisun: “Kusisqamin kanku […] mana juchayoj purejkuna [chayri tukuy sonqo kasukojkuna], Jehová Diospa leyninpi purejkuna” (Sal. 119:1).