Chay wataqa Diospa llajtan wakin cambiosta ruwarqa. Chaytaj Bibliamanta Yachaqajkunata yanaparqa Jehovata aswan ujchasqa yupaychanankupaj. Sapa semana Mañakunapaj, Jatunchanapaj, Willanapaj Tantakuypi uj textota ukhunchaj kanku. Chay textomantataj uj sutʼinchayta The Watch Tower revistapi orqhoyta qallarerqanku. Chantapis Bibliamanta Yachaqajkunaqa uj calendariota orqhoj kanku. Chaypeqa sapa semanapaj texto kasharqa, sapa día takinapaj uj alabanza ima. Chay takiykunatataj takiyta atej kanku sapallankupi chayri familiankuwan estudiashaspa.

Bibliamanta Yachaqajkunaqa reunionespi “willanarikoj” kanku, nisunman imaynachus predicacionpi risqanmanta cuentanarikoj kanku, Jehovaman agradecekoj kanku, takiykunata takej kanku, oraciontapis ruwaj kanku. Eva Barneyqa 1923 watapi bautizakorqa, 15 watasniyoj kashajtin. Pay nerqa: “Pillapis willariyta munaj chayqa, sayarikuytawan kay jinata parlayta qallarej: ‘Señorman agradecekuyta munani noqawan may kʼacha kasqanmanta…’, nispa”. Wakin hermanosmanqa ajinata willariy maytapuni gustaj. Hermananchej Barneyqa nerqa: “Munasqa hermanonchej Godwinqa kuraj hermanito karqa. Payqa tukuy imamantapuni Señorman agradecekuyta munaj. Pero reunionta apaykachaj hermano uj jinayajtin, warmenqa ropanmanta aysarej, paytaj chukojpacha”, nispa.

Killapi uj kutita sapa congregación Mañakunapaj, Jatunchanapaj, Willanapaj Tantakuyta ruwaj kanku, chaytaj may sumaj karqa. The Watch Tower 1 de abril de 1923 watamanta revistaqa, imatachus chay tantakuypi ruwakusqanmanta nerqa: “Khuskan reunionqa predicacionmanta willanarikunapaj, llankʼajkunatapis kallpacharinapaj kanan tiyan […]. Tantakuykunapi chayta tukuy ruwasun chayqa, amigosninchejwan sapa kuti aswan ujchasqa kasun”, nispa.

Chay tantakuykunaqa Charles Martinta maytapuni yanaparqa. Payqa publicador karqa, Vancouvermanta (Canadá), 19 watasniyojtaj. Pay nerqa: “Chaypi yachakorqani punkusman chayaspa imatachus ninayta. Tantakuykunapeqa pipis willarejpuni wasimanta wasi predicashajtin imaynachus risqanmanta. Chay yanapawaj imatachus predicacionpi ninayta yachanaypaj, runas mana uyariyta munawajtinkupis imatachus ninaypaj”, nispa.

“Predicanapaj diaspis” hermanosta mayta yanapallarqataj aswan ujchasqa kanankupaj.  The Watch Tower 1 de abril de 1923 watamanta revistapi nerqa: “Tukuyninchej kikin llankʼaypi ujchasqa kananchejpaj […], 1923 watapi martes 1 de mayoqa tukuyninchej predicanapaj pʼunchay kanqa. Ajinallapunitaj kanqa sapa killaj ñaupaj kaj martesnin. Congregacionmanta tukuy hermanosqa chay pʼunchay imaynallamantapis predicananku kanqa”, nispa.

Aswan jovenllaraj kajkunapis predicallajtaj kanku. 1923 watapi hermananchej Hazel Burfordqa 16 watitasniyoj karqa. Pay nerqa: “Bulletin nisqa publicacionpeqa predicanapaj yuyaychaykuna karqa, chaytataj de memoria yachakunayku karqa. a Aweloywan noqawanqa sonqo kʼajaywan tukuy chay jinasmanta predicaj kayku”, nispa. Jinapis uj hermanoqa chay predicasqanta mana allinpajchu qhawarqa. Hazel nerqa: “Uj kuraj hermanitoqa manapuni munajchu creenciasniymanta wajkunaman parlarinayta. Chay tiempopi wakin hermanosqa, mana entiendejchu kanku tukuy Bibliamanta Yachaqajkuna willananku kasqanta, ‘waynuchuspis, sipaskunapis’ Ruwawajninchej Jatun Diosninchejta jatunchananku kasqanta”, nispa (Sal. 148:12, 13). Jinapis Hazelqa predicallarqapuni. Watasninmantaj Galaad Escuelaman rerqa, iskay kaj claseman, Panamapitaj misionera jina sirverqa. Tiemponmantaj chay hermanosqa jóvenes predicanankumanta manaña ajinatachu yuyarqanku.

Asambleaspis hermanosta yanaparqa aswan ujchasqa kanankupaj. Ashkha asambleaspeqa wakin días tʼaqasqa karqa predicanapaj. Chaykunamanta ujnin asambleaqa Winnipegpi karqa (Canadapi). Chay asambleaman tukuy rejkunaqa, invitasqa karqanku 31 de marzopi chay llajtapi predicanankupaj, may sumajpunitaj paykunata rerqa. 5 de agostopitaj Winnipeg llajtallapitaj uj jatun tantakuy ruwakorqa, chaymantaj 7.000 jina runaspuni rerqanku. Chaypachaskamaqa manaraj Canadapi chay chhika runas uj asambleaman risqankurajchu.

1923 watapi 18 de agostomanta 26 de agostokama, Californiapi Los Ángeles llajtapi uj sumaj jatun tantakuy ruwakorqa. Chay tantakuypaj semanas faltashajtintaj, periodicospi asamblea kananta willakorqa. Bibliamanta Yachaqajkunataj 500.000 invitacionesmanta astawan jaywarqanku. Chantapis  jatun tantakuymanta letrerosta autosninkupi churarqanku, pasajerosta apaj autosmanpis churallarqankutaj.

Hermano Rutherfordqa sábado 25 de agostopi uj discursota qorqa, sutikorqataj “Ovejaswan cabraswan”. Chay discursonpitaj sutʼincharqa “ovejasqa” allin sonqoyoj runaswan ninakusqanta, paykunataj kay jallpʼapi uj paraisopi tiyakunankuta. Chantapis “Kʼaminapaj” nisqa documentota leerqa. Chaypitaj nisharqa cristiano nichikojkunaqa mana allintachu ruwashasqankuta, allin sonqoyoj runastaj ‘Jatun Babiloniamanta’ llojsipunankuta (Apo. 18:2, 4). Tiemponmantaj chay documentota uj tratadopi imprimikorqa, Bibliamanta Yachaqajkunataj mundontinpi sonqo kʼajaywan chay tratadosta may chhika runasman jaywarqanku.

Chay asambleaj último dianpitaj, hermano Rutherfordpa discursonta 30.000 runasmanta aswan ashkha uyarerqanku. Chay discursontaj sutikorqa: “Tukuy naciones Armagedonman rishanku, may chhika runastaj kunan kausajkuna wiñaypaj kausanqanku”. Bibliamanta Yachaqajkunaqa yacharqanku ashkha runas chay tantakuyman jamunankuta. Chayrayku Coliseo de Los Angelesta alquilakorqanku, chay coliseotaj mosojsitullaraj kasharqa. Asambleata tukuy sumajta uyarinankupajtaj, hermanosqa chay coliseomanta parlantesta mañakorqanku. Chay jina parlantesqa chaypachasllaraj rikhurerqa. Ashkha runastaj chay asambleata radiopi uyarerqanku.

1923 watapi Africapi, Europapi, Indiapi, Sudamericapi ima astawan predicakorqa. India suyupeqa Adavimannathu Josephqa yanapakorqa kay parlaykunapi publicaciones orqhokunanpaj: hindipi, tamilpi, telugupi, urdupi ima. Payqa casado karqa, sojta wawasniyojtaj.

Sierra Leonapeqa Alfred Joseph, Leonard Blackmanwan Brooklynmanta (Nueva York) centralninchejman yanapata mañakuspa escribikorqanku. 14 de abril de 1923 watapitaj, mañakusqankuman jina yanapata kacharqanku. Alfred nerqa: “Sábado tutaña karqa, chayllapitaj mana suyashajtillay wajyamuwarqanku”, nispa. Telefonopitaj kay jinata uj runa jatunmanta tapusqa: “¿Qanchu Sociedad Watch Towerman willajkunata mañakuspa escribimorqanki?”, nispa. Alfredtaj “arí” nispa kutichisqa. Paytaj nisqa: “Noqata kachamuwanku”, nispa. Chay runaqa William Brown kasqa. Payqa chay diallaraj Caribemanta chayamusqa, señoran Antoniawan, warmi wawitasnin Louisewan Lucywan ima. Hermanostaj niraj imapi paykunawan tinkorqanku.

Alfred nillarqataj: “Qʼayantenqa Leonardwan noqawan Bibliata sapa semana jina estudiasharqayku.  Chayllapitaj punkupi uj jatun runa rikhurimorqa, hermano William Brown kasqa. Payqa maytapuni Bibliamanta willayta munaj, chayrayku qʼayantinpacha uj discursota qoyta munarqa”, nispa. Niraj killapi hermano Brownqa apakorqa chay publicacionesta tukurparqapacha. Pisi tiemponmantaj 5.000 librostawan apachimorqanku, chaytapis chay rato tukurpallarqataj. Chaywanpis runasqa mana librosta vendej runata jinachu rejserqanku. Jehovata sirverqa tukuy chay tiempopeqa, discursosninta Bibliawanpuni qoj. Chayrayku paytaqa Bibliawan purej runata jina rejserqanku.

Alemaniapitaj Barmen llajtapi sucursalqa ancha juchʼuyña karqa hermanospaj, chay llajtamantaj Franciamanta soldados yaykuykunankupajña kasharqanku. Bibliamanta Yachaqajkunaqa Magdeburgo llajtapi wasista tarerqanku, chaykunataj sumaj karqa publicacionesta impriminapaj. 19 de juniopajtaj hermanosqa tukuy imata qʼepichayta tukorqankuña, imprentatapis. Chaymantataj Magdeburgopi kaj mosoj Betelman riporqanku. Astakuyta tukusqankuta centralninchejman willasqankumanta uj dianmantaj, periodicosqa willarqanku Franciamanta soldadosqa Barmen llajtaman yaykuykusqankuta. Hermanosqa chaypi repararqanku Jehová bendecishasqanta, jarkʼashasqanta ima.

George Youngtaj Brasilnintinta viajarqa sumaj willaykunata predicaspa. Chaypitaj uj sucursalta sayaricherqa, portugués parlaypitaj The Watch Tower revistata orqhoyta qallarerqa. Uj mashkha killasllapi 7.000 publicacionesmanta astawanña runasman jaywasqa. Chay hermano Brasilman chayasqanqa, Sarah Fergusonpaj may sumajpuni karqa. Imajtinchus chay hermanaqa The Watch Tower revistata 1899 watamantapachaña leeshasqa, nitaj bautizakuyta atisqachu. George Young chayasqanmanta uj mashkha killasninmantaj, paywan tawantin wawasninwan bautizakorqanku.

1923 wata tukukuyta The Watch Tower 15 de diciembre de 1923 watamanta revistapi uj sumaj willay llojserqa. Chaypi willakorqa reunionesta, predicacionta, asambleastapis waj jinamanta ruwakusqan imaynatachus Bibliamanta Yachaqajkunata yanapasqanta. Chay revistapi nerqa: “Sutʼita reparanchej congregacionesqa Diosta yupaychaypi sinchʼi sayasqa kashasqankuta. Maqanakuna pʼachanchejwan pʼachallikuna, chayamushanña chay watapitaj Diosta sirvinallapuni sonqo kʼajaywan, jatun kusiywantaj”, nispa.

1924 wataqa Bibliamanta Yachaqajkunapaj may sumajpuni karqa. Brooklynpi centralninchejmanta hermanosninchejqa Staten Islandpi ashkha killastaña wasista ruwasharqanku, chaytaj Brooklyn qayllitallapi karqa. Chay wasista ruwaytataj 1924 wata qallariyta tukorqanku. Chay wasistaj hermanosta astawan ujcharqa, yanaparqataj mana yuyasqankuman jina waj jinasmantañataj predicanankupaj.