1, 2. Bibliata sumajta leenapaj, estudianapaj ima, ¿imatá ruwasunman? Kikinchariy.

 UJ WASITA rantikuyta munashasqaykipi piensariy. Niraj chay wasita rantikushaspa, ¿imastataj sumajta qhawaykuriyta munawaj? ¿Chay wasimanta uj fotollatachu qhawariyta munawaj? Mana, ¿icharí? Chay wasimanpunichá riwaj, muyuynintinta qhawaykurinaykipaj, tukuy cuartosninta, kʼuchuy kʼuchutapuni. Ichapis chay wasej planosnintapis qhawaykuriyta munawaj, imayna ruwasqachus kashasqanta yachanaykipaj. Rantikuyta munashanki chay wasitaqa tukuy ladonmantapunichá qhawaykuriyta munawaj.

² Bibliata leespa, estudiaspapis ajinallatataj ruwasunman. Bibliamanta yachaj runaqa Bibliaj nisqanta kikincharqa “uj jatun wasiwan, mayqenchus jatuchaj torresniyoj, sumaj ukhu cimientosniyojtaj”. ¿Imaynatataj Bibliaj tukuy ima nisqanta sumajta rejsisunman? Usqhay usqhayllata Bibliata leerpasun chayqa, pata patallanta yachakusun, nisunman ‘Diospa Palabranmanta qallariy yachachiykunallata’ (Heb. 5:12). Chayrayku chay wasita jina sumajta qhawaykurinanchej tiyan, nisunman tukuy imitata sumajta ukhuncharinanchej tiyan. Bibliata sumajta estudianapajqa sumajta qhawaykurina imaynatachus uj versículo waj versiculowan ujchasqa kashasqanta. Mana imapichus creesqallanchejwanchu contentakunanchej tiyan, manaqa yachananchej tiyan imaraykuchus chaypi creesqanchejta.

3. Apóstol Pablo, ¿imatataj cristianosman ruwanankuta nerqa, chanta imaraykutaj? (Efesios 3:14-19).

³ Diospa Palabranta sumajsituta entiendenapajqa, Bibliamanta pakasqa yachachiykunata sumajta ukhunchananchej tiyan. Apóstol Pabloqa cristianosman nerqa Diospa Palabranta sumajta estudianankuta, ajinamanta “cheqa kajpa anchonta, largonta, sayayninta, ukhunta ima” sumajta entiendenankupaj. Jinamanta  paykunaqa creeypi “sumaj saphichasqa”, “sinchʼi sayasqataj” kankuman karqa (Efesios 3:14-19 leey). Noqanchejpis kikillantataj ruwananchej tiyan. Kunan yachakusun Diospa Palabranta imaynatachus sumajsituta estudiana kasqanta. Ajinamanta Diospa Palabranta sumajta rejsinapaj, tukuy ima nisqantapis sumajsituta entiendenapaj.

4. ¿Imatá ruwasunman Jehovaman astawan qayllaykunapaj?

⁴ Cristianosqa mana pata patallantachu Bibliata entiendeyta munanchej. Yachakuyta munanchej “Diospa pakasqa yachaynintapis”, chaytataj ruwasunman espíritu santoj yanapayninwan (1 Cor. 2:9, 10). Ichapis Jehovaman astawan qayllaykuchinawanchejpaj jina imatapis estudiayta qallarisunman. Chaypajtaj ashkha imas kan estudianapaj. Ichapis ukhunchasunman imaynatachus Jehová ñaupa tiempomanta kamachisninman munakuyninta rikuchisqanta, imaynatatajchus chay noqanchejtapis munakuwasqanchejta rikuchisqanta. Chantapis estudiasunman imaynatachus Jehová ñaupa tiempomanta israelitas payta yupaychanankuta munasqanta. Chaytataj kikinchasunman imaynatachus kay tiempopi payta yupaychananchejta munasqanwan. Chantapis estudiasunman Jesús kay jallpʼapi kashaspa ruwasqasninwan ima profeciastachus juntʼasqanta.

5. ¿Imastataj astawan ukhunchariyta munawaj?

⁵ Wakin hermanosqa Bibliata sumajta estudianku. Paykunata tapurikorqa, Bibliamanta ima pakasqa yachachiykunatachus sumajta ukhunchariyta munasqankuta. Paykuna kutichisqankumanta wakin imastaj “ Kay imasta sapallanchejpi estudiasunman” nisqa recuadropi kashan. Noqanchejpis chaykunata ukhunchaywan gustachikusunman, chaypajtaj yanapachikusunman Jehovaj testigosnin yachaqanasta maskʼanankupaj nisqa publicacionwan. Bibliata sumajsituta estudiayqa creeyninchejta sinchʼiyachenqa, yanapawasuntaj “Diospa yachayninta” tarinapaj (Pro. 2:4, 5). Kunanqa Bibliaj pakasqa yachachiykunasninmanta wakinta ukhuncharina.

6. 1) ¿Imapitaj mana kikinchu uj imata ruwayta nikuywan uj imata ruwayta munaywan? 2) ¿Imajtintaj nisunman Jehovaj munaynin runaspaj, jallpʼapajpis ‘wiñaypaj’ kasqanta? (Efesios 3:11).

⁶ Qhawarina imatachus Biblia Diospa munayninmanta nisqanta. Uj imata ruwayta nikoyqa manapuni kikinchu uj imata ruwayta  munaywan. Imatapis ruwanata nikoyqa maymanpis chayanapaj uj ñanta ajllay jina. Jinapis chay ñanpi uj jarkʼay rikhurejtin ichapis chaytaqa mana ruwasunmanchu. Uj imata ruwayta munaytataj kikinchasunman maymanchus chayayta munanchej chay lugarwan. Yachanchej maymanchus chayayta munasqanchejta, chaymantaj may ñannintapis chayasunpuni, waj ñanta japʼinanchej kajtinpis. Jehovaj munaynintaqa chaywan kikinchasunman. Mayta agradecekunchej Jehová “wiñay” munayninta pisimanta pisi Bibliapi sutʼinchawasqanchejmanta (Efe. 3:11). Munaynenqa juntʼakunpuni, payqa “tukuy imata ruwan munayninta juntʼananpaj” (Pro. 16:4). Jehovaj ruwasqantaj wiñaypaj yanapawanchej. ¿Imataj Diospa munaynin? Chanta, ¿imastataj waj jinamanta ruwarqa munayninta juntʼananpaj?

7. Adanwan Evawan Diospa contranpi oqharikojtinku, ¿imatataj Jehová ruwarqa munayninta juntʼananpajpuni? (Mateo 25:34).

⁷ Diosqa ñaupa tatasninchejman nerqa imachus paykunapaj munaynin kasqanta. Pay nerqa: “Miraychej, ashkhayaychejtaj. Jallpʼantinman juntʼaykuychej, tarpuychejtaj. Atiyniykichejpi kachunku […] tukuy kausaj animalespis”, nispa (Gén. 1:28). Adanwan Evawantaj Diospa contranta oqharikuspa, tukuyninchejta juchaman jaywaykuwarqanchej. Jinapis chayqa mana jarkʼarqachu Jehovaj munaynin juntʼakunanpaj. Payqa munayninta juntʼananpaj waj jinamantañataj ruwananta nikorqa. Chay rato Jehovaqa nikorqa cielopi uj Gobiernota sayarichinanta, imatachus runaspaj, jallpʼapajpis munarqa chayta juntʼananpajpuni (Mateo 25:34 leey). Maychus tiemponpitaj Jehovaqa munakuwasqanchejrayku, kʼata Wawanta kay jallpʼaman kachamorqa. Jesusqa kay jallpʼapi Diospa Gobiernonmanta willarqa, kausaynintataj juchamanta, wañuymanta kacharichinawanchejpaj qorqa. Chantá kausarichisqa karqa cielopi tiyakunanpaj, Diospa Gobiernonpitaj Rey kananpaj. Pero Diospa munayninmantaqa waj imas kanraj chaypi tʼukurinapaj.

8. 1) ¿Imamantá Biblia astawan parlan? 2) Efesios 1:8-11 nisqanman jina, ¿imatawantaj Jehová ruwayta munan? (Tapapi dibujota qhawariy).

⁸ Bibliaqa astawan parlan imaynatachus Jehová sutinta jatunchananmanta. Chaytaj ruwakonqa kay jallpʼapi munaynin juntʼakojtin, Jesucristo Diospa Gobiernonpi gobernamojtin. Ni ima jarkʼanmanchu Diospa munaynin juntʼakunantaqa. Payqa ninña nisqanman jinapuni tukuy ima ruwakunanta (Isa. 46:10, 11; Heb. 6:17, 18). Tiempowanqa kay jallpʼa paraisoman tukonqa, chaypitaj Adanpatawan Evajtawan kasukoj wawasninkoqa “wiñaypaj kusisqa” kausakonqanku, niñataj pantaj runaschu kanqanku (Sal. 22:26). Pero chaywanpis Jehovaqa mana chayllatachu ruwayta munashan. Payqa munan tukuy cielopi, kay jallpʼapi kausakojkunapis uj familia jinalla ujchasqa kanankuta, payllatataj Tukuyta Kamachejta jina tukuy sonqo kasukunankuta. Chaytataj juntʼanqapuni (Efesios 1:8-11 leey). Imaynatachus Jehová munayninta juntʼasqanqa may sumajpuni kanqa, ¿icharí?

9. Bibliata leesqanchejrayku, ¿imastataj yachanchejña?

⁹ Jehovaqa Génesis 3:15 versiculopi uj profeciata willarqa, Edén huertapi. Chaypi piensarina. b Chay profeciapeqa nin imaschus kananta Diospa munaynin juntʼakunanpaj, chay imastaj may chhika watasninmanraj pasanan karqa. Chaymanta ujnintaj kashan, Mesías Abrahanpa mirayninmanta jamunan karqa chay profecía. Mesiasqa warmej ñaupaj kaj miraynin  (Gén. 22:15-18). Profeciapi nikusqanman jina, Jesusqa 33 watapi chaki talonninmanta khanisqa karqa (Hech. 3:13-15). Chay profecía tukuynin juntʼakunanpajqa 1.000 watas kurajraj pasanan kanqa. Chaypi Satanaspa uman pʼaltasqa kanqa (Apo. 20:7-10). Pero Satanaspa mundonwan Diospa llajtanwan chejninakusqanku niraj tukukushajtin, ashkha imasraj pasanqa. Bibliataj chaymanta ashkha imasta sutʼinchan.

10. 1) ¿Imastaj tumpamantawan pasanqa? 2) ¿Imaynatá sapa ujninchej sonqonchejta, yuyayninchejtapis wakichishasunman? (Sutʼinchayninta qhawariy).

¹⁰ Biblia aswan qhepaman imaschus pasananmanta imastachus nisqanta yuyarikuna. Tukuy naciones nenqanku: “Tukuy imapis allillan, ni imamanta llakikuna kanchu”, nispa (1 Tes. 5:2, 3). Manchay ñakʼariy tiempoqa “ujllata” qallarenqa, naciones tukuy llulla religionespa contranta oqharikojtinku (Apo. 17:16). Chantaqa ichapis tʼukuna imas pasanqa, maypachachus Runaj Wawanta, nisunman Jesusta ‘phuyus patata atiywan, jatun kayninwantaj jamushajta’ rikonqanku chaypacha (Mat. 24:30, sutʼinchaynin). Jesusqa tukuy runasta juzganqa, ovejastataj cabrasmanta tʼaqanqa (Mat. 25:31-33, 46). Satanastaj mana jinallachu qhepakonqa. Sonqonpi chejnikuy juntʼa kasqanrayku, uj qotu nacionesta tanqanqa Diospa llajtanpa contranpi oqharikunankupaj. Bibliataj chay qotu nacionesta sutichan Magog jallpʼamanta Gog nispa (Eze. 38:2, 10, 11). Kay jallpʼapi puchoj ajllasqa cristianostaj tukuyninku cielopi tantasqa kanqanku. Chaypi Cristowan ujchaykukonqanku, cielopi kaj ejercitosninwan ima, Armagedón guerrapi maqanakunankupaj. Manchay ñakʼariy tiempotaj chay guerrawan tukukonqa (Mat. 24:31; Apo. 16:14, 16). c Chaymantataj kay jallpʼapi Cristoj Waranqa Watas Kamachiynin qallarenqa (Apo. 20:6).

11. Wiñaypaj kausakojtiyki, ¿imayna sumajpunitaj kausayniyki kanman? (Dibujostawan qhawariy).

¹¹ Kunanqa piensarina chaymanta aswan qhepaman imachus kananpi. Bibliaqa nin Diosninchejqa runaspa sonqosninkuman “wiñay kausayta” churasqanta (Ecl. 3:11). Piensarina imaynapunichus kausayninchej kananpi,  imaynatapunichus Jehovata rejsinanchejpipis. Jehovaman qayllaykuna nisqa libropeqa 319 paginapi kay jina kʼachituta nin: “May chhika unaytaña kausakuspaqa kunan yachakusqanchejmanta astawanraj Jehovamanta yachakusun. Jinapis Jehovamanta ashkha imastaraj yachakunanchej kasqanta reparasun. […] Paraisopi wiñaypaj kausakoyqa may sumajpuni kanqa. Jinapis Jehovaman astawan qayllaykuyta atisqanchejqa aswan sumajraj kanqa”, nispa. ¿Imastawantaj Diospa Palabranmanta ukhuncharisunman?

12. ¿Imaynatá patata qhawarisunman? Sutʼinchariy.

¹² Diospa Palabranqa tumpata rikuchiwanchej imaynachus Diospa tiyakusqan lugar kasqanta, “payqa patapi tiyakun” (Isa. 33:5). Bibliaqa tʼukuna imasta Jehovamanta niwanchej, cielopi llajtanmantapis (Isa. 6:1-4; Dan. 7:9, 10; Apo. 4:1-6). Bibliapeqa qhelqasqa kashan, ima tʼukuna imastachus Ezequiel rikusqanmanta. Chaypachaqa “cielos kicharikorqanku, Diostaj mosqoykunapi jina” rikucherqa (Eze. 1:1).

13. Imatachus Jesús cielopi ruwashasqanpi piensarispa, ¿imayná kashanki? (Hebreos 4:14-16).

¹³ Piensarina imatachus Jesús cielopi ruwashasqanpi Rey jina, khuyakoj Kuraj kaj Sacerdote jinataj. Jesusnejta “jatun khuyakuyta qoj Diospa kamachina tiyananman” qayllaykuyta atinchej mañakuynejta, khuyakuynintataj mañakuyta atinchej “yanapata necesitashajtinchejpuni” (Hebreos 4:14-16 leey). Sapa día tʼukurinapuni Jehovawan Jesuswan cielomantapacha imastañachus noqanchejrayku ruwasqankupi, imastatajchus kunan ruwashasqankupi. Paykuna munakuwasqanchejqa sonqonchejta kuyurichinan tiyan, tanqanawanchejtaj tiyan Jehovata sonqo kʼajaywan sirvinapaj (2 Cor. 5:14, 15).

14. ¿Imaynamantá Jehovatawan Jesustawan agradecekusqanchejta rikuchisunman? (Fotostawan qhawariy).

 ¹⁴ ¿Imaynamantataj Diosman, Jesusmanpis agradecekusqanchejta rikuchisunman? Kallpachakuna runasta yanapanapaj Jehovaj testigosninman tukunankupaj, Cristoj discipulosninmanpis tukunankupaj (Mat. 28:19, 20). Apóstol Pablopis chayta ruwarqa Jehovaman, Cristomanpis agradecekusqanrayku. Pabloqa yacharqa Diosqa munasqanta “tukuy laya runas salvakunankuta, cheqa kajtataj allinta rejsinankuta” (1 Tim. 2:3, 4). Chayrayku payqa mayta kallpachakorqa tukuy atisqan runasta yanapananpaj. “Chay jinamanta imaynallamantapis wakinta” salvananpaj (1 Cor. 9:22, 23).

15. Salmo 1:2 nisqanman jina, ¿imata ruwaytaj kusichiwasun?

¹⁵ Chayraykuchá uj salmistaqa nerqa pichus “Jehová Diospa leyninta mayta” munakoj, “tuta pʼunchay Diospa leyninta leerispa” chaypi tʼukurejqa kusisqa kasqanta, allintaj payta risqanta (Sal. 1:1-3). Kay versiculomanta parlaspa, Bibliata traducej uj runa nerqa Bibliata leej runamanqa “Diospa yuyaychaykunasnin mayta gustasqanrayku, chaykunata maskʼanan tiyan, yachakunan tiyan, chaykunapitaj tʼukurinan tiyan” nispa. Pay nillantaj: “Ajinamanta chay runapajqa leesqanta mana entiendeyqa tiempota pierdey jina kanqa”, nispa (Studies in the Psalms, Joseph Rotherham). Noqanchejpis kallpachakunallataj Bibliata sumajsituta entiendenapaj, imaynatachus uj versículo, waj versiculowan ujchakusqantapis reparanapaj. Chayta ruwasun chayqa, Bibliata estudiaywan gustachikusun. May sumajpuni Diospa Palabranta tukuy ladonmanta entiendeyqa.

16. ¿Imatá qhepan yachaqanapi yachakusun?

¹⁶ Jehová sumaj cheqa yachachiykunasninta Palabranpi yachachiwasqanchejtaqa tukuy entiendeyta atinchej. Qhepan yachaqanapeqa Bibliaj pakasqa yachachiykunasninmanta ujninta yachakusun, Jehovaj mana rikukoj jatun templonmanta. Chay templomantaqa Pablo escriberqa hebreosman cartanpi. Tukuychá kusikusunchej chayta ukhuncharispa.