1. ¿Imatá uj ángel nishan, chanta imata ruwanapajtaj chay tanqanawanchej tiyan?

 SICHUS uj ángel noqanchejmanpuni parlawasunman chay, ¿uyarisunmanchu? Kay tiempopeqa uj ángel “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” parlashan. Chay angelqa nishan: “Diosta manchachikuychej, jatunchaychejtaj […]. Yupaychaychej pichus cielota, jallpʼata, mar qochata, yaku juturistawan ruwarqa chayta”, nispa (Apo. 14:6, 7). Tukuyninchej Jehovallata yupaychananchej tiyan, paylla cheqa Dios kasqanrayku. Jehovata mana rikukoj jatun templonpi yupaychayta atisqanchejmanta mayta agradecekunchej. Chayqa may sumajpuni.

2. ¿Imataj Jehovaj mana rikukoj templon? (“ Mana kaywanchu ninakun” nisqa recuadrota qhawariy).

² ¿Imataj Diospa mana rikukoj templon? Chanta, ¿ima partepitaj Biblia chaymanta parlan? Chay mana rikukoj temploqa mana uj wasipunichu. Chay temploqa Jehová payllata munasqanman jina yupaychananchejpaj imatachus wakichin chaywan ninakun. Chaytaj Jesuspa wañuyninpi sayachisqa kashan. Ñaupa tiempopi apóstol Pabloqa chaymanta ashkha imitasta sutʼincharqa. Chaytataj tarinchej Judeapi tiyakoj hebreo cristianosman qhelqasqan cartapi. b

3, 4. ¿Imaraykutaj Pablo hebreo cristianosmanta llakikusharqa, chanta imaynatá paykunata yanaparqa?

³ ¿Imaraykutaj Pablo Judeapi tiyakoj hebreo cristianosman  qhelqarqa? Iskay imasraykusina. Ñaupajtaqa paykunata kallpachananpaj. Chay cristianosmanta ashkhasqa judiospa religionninkupi uywasqa kasqanku, chay religionta kamachejkunataj paykunamanta burlakojchá kanku cristianosman tukusqankurayku. ¿Imarayku? Cristianosman tukojkunajtaqa mana Diosta yupaychanankupaj uj jatun templonku karqachu, nillataj uywasta ofrendata jina jaywanankupaj altarninkupis, nillataj sacerdotesninkupis. Judiospatataj chaykuna karqa. Chayraykutaj Cristoj discipulosnenqa desanimakunkuman karqa, creeyninkupis pisiyanman karqa (Heb. 2:1; 3:12, 14). Ichapis paykunamanta wakenqa yuyarqanku judiospa religionninkuman kutipuyta.

⁴ Iskay kaj, apóstol Pabloqa paykunata reparacherqa mosoj yachachiykunata, chayri aswan pakasqa yachachiykunata entiendenankupaj mana kallpachakushasqankuta. Chay yachachiykunaqa Diospa Palabranmanta “khamuna” mikhuna jina kanku (Heb. 5:11-14). Paykunamanta wakenqa Moisespa Leyninman jinallarajpunisina kausakusharqanku. Pablotaj paykunaman sutʼincharqa Moisespa Leyninpi kamachisqan ofrendasqa mana qʼalatapunichu juchasta pampachayta atisqanta. Chayrayku Leyqa manaña valerqachu. Chaymantataj Pabloqa paykunaman yachacherqa aswan pakasqa cheqa yachachiykunamanta wakinta. Pabloqa paykunaman yuyaricherqa Jesús wañusqanrayku “aswan sumaj suyakuy” kasqanta, chaytaj ‘Diosman qayllaykunankupaj’ yanapasqantapuni (Heb. 7:18, 19).

5. ¿Imatataj sumajta entiendenanchej tiyan, chanta imaraykutaj?

⁵ Pabloqa hebreo hermanosninman kayta sutʼincharqa: Chay tiempopi imaynatachus Jehovata yupaychashasqanku, ñaupajta yupaychasqankumanta nisqa imaraykuchus aswan sumaj kasqanta. Payqa nerqa judío religionpi imaynatachus Diosta yupaychasqankoqa “jamoj imaspa llanthullan” kasqanta. Chantá nerqa: “Chay imastaj Cristopi juntʼakunku”, nispa (Col. 2:17). Yachanchej jina imaj llanthunpis llanthullan, mana chaypunichu. Ajinallatataj imaynatachus judíos ñaupa tiempopi Diosta yupaychasqankoqa, jamoj imaspa llanthullan karqa. Sumajta entiendenanchej tiyan, Jehová payllata munasqanman jina yupaychananchejpaj imatachus wakichisqanta. Imajtinchus chaynejta juchasninchejmanta perdonasqa kanchej, Jehovatataj munasqanman jina yupaychayta atinchej. Kunanqa kikincharisun “llanthuta” (nisunman imaynatachus judíos Diosta yupaychasqankuta), “juntʼakusqanwan” (nisunman imaynatachus cristianos Diosta yupaychasqankuwan).  Chaypajqa Hebreosman Cartata ukhuncharisun. Ajinamanta aswan sumajta entiendesun imachus Diospa mana rikukoj templon kasqanta, imaynatachus noqanchejtapis yanapawasqanchejta.

6. ¿Imapajtaj karqa Diosta yupaychana toldo?

⁶ Llanthun. Moisesqa 1512 watapi Jesús niraj jamushajtin Diosta yupaychana toldota sayaricherqa, Pablotaj chaywan yanapachikuspa Diospa mana rikukoj templonmanta sutʼincharqa (“Llanthunwan juntʼakuyninwan” nisqa recuadrota qhawariy). Diosta yupaychana toldotaqa Dioswan tinkukuna toldo nispa sutichallajtaj kanku. Chaypitaj israelitas tantakoj kanku Diosta yupaychanankupaj, uywastataj ofrendasta jina jaywanankupaj (Éxo. 29:43-46). Chʼin jallpʼapi kashajtinku, chay toldotaqa maymanchá rej kanku chayman apallajtaj kanku (Éxo. 25:8, 9; Núm. 9:22). Chaypi Diosta yupaycharqanku casi 500 watasta jina, Jerusalenpi templo ruwakunankama. Diosta yupaychana toldoqa ninakullarqataj aswan qhepaman cristianospaj aswan sumaj kanan karqa chaywan.

7. ¿Maykʼajtaj mana rikukoj templo rikhurerqa?

⁷ Juntʼakuynin. Diosta yupaychana toldoqa ‘cielopi kaj imaspa’ llanthun jinalla karqa, ninakorqataj Jehovaj mana rikukoj jatun templonwan. Pablo nerqa: “Chay toldoqa kay tiempopi imaschus kashan chaykunawan kikinchakun”, nispa (Heb. 8:5; 9:9). Chayrayku hebreosman chayta qhelqashajtin, Diospa mana rikukoj templonqa karqaña. Chay mana rikukoj temploqa 29 watapi rikhurerqa. Chay watapi Jesusqa bautizakuspa espíritu santowan ajllasqa karqa. Jehovaj mana rikukoj templonpitaj ‘aswan kuraj kaj sacerdote jina’ sirviyta qallarerqa (Heb. 4:14; Hech. 10:37, 38). c

8, 9. Hebreos 7:23-27 nisqanman jina, ¿imapitaj mana kikinchu kanku Israelmanta kuraj kaj sacerdoteswan aswan Kuraj kaj Sacerdote Jesucristowan?

⁸ Llanthun. Kuraj kaj sacerdoteqa israelitaspa sutinkupi Dioswan parlaj. Israelpeqa ñaupaj kuraj kaj sacerdote Aarón karqa. Jehovataj payta churarqa yupaychana toldota payman jaywashajtinku. Chaywanpis Pabloqa kay jinata sutʼincharqa: “Sacerdotesqa wañupusqankurayku manaña sacerdotesllapuni kayta aterqankuchu. Chayrayku wajkunañataj cuentankumanta yaykoj kanku”, nispa (Hebreos 7:23-27 leey). d Chantapis chay kuraj kaj sacerdotesqa pantaj runas karqanku. Chayrayku juchasninkuraykupis uywasta jaywanallankutaj karqa. Chaypi mana kikinchu kanku Israelmanta kuraj kaj sacerdoteswan aswan Kuraj kaj Sacerdote Jesucristowan.

⁹ Juntʼakuynin. Kuraj kaj Sacerdotenchej Jesucristoqa sirvin ‘cheqa kaj toldopi, mayqentachus Jehová Dios sayaricherqa, manataj runaschu chaypi’ (Heb. 8:1, 2). Pablo sutʼincharqa: “Jesús wiñaypaj kausasqanrayku, manaña cuentanmanta waj sacerdotes yaykunankuchu tiyan”, nispa. Chantapis Pablo nerqa Jesusqa “mana chʼichiyoj, juchasapasmanta tʼaqasqa” kasqanta, nitaj Israelmanta chay waj kuraj kaj sacerdotes jinachu juchasninrayku “sapa día uywa wañuchisqasta” jaywanan kasqanta. Altaresmantawan jaywanasmantawanrí, ¿imatá nisunman? Qhawarina imaspichus mana kikinchu kasqanta llanthunwan juntʼakuyninwan.

10. ¿Imawantaj ninakorqa cobre altarpi jaywaj kanku chay jaywanas?

¹⁰ Llanthun. Diosta yupaychana toldo punkupeqa cobremanta uj altar karqa, chaypitaj Jehovaman uywasta jaywaj kanku (Éxo. 27:1,  2; 40:29). Chaywanpis chay jaywanasqa mana runaspa juchasninkuta tukuyninta chinkachiyta atejchu (Heb. 10:1-4). Diosta yupaychana toldopi sapa kuti uywasta jaywakusqanqa, ninakorqa runaspa juchasninkuta qʼalatapuni pichanan karqa chay jaywanawan.

11. ¿Ima altarpitaj Jesús jaywasqa karqa? (Hebreos 10:5-7, 10).

¹¹ Juntʼakuynin. Jesusqa yacharqa Jehovaqa payta kay jallpʼaman kachamusqanta kausayninta qonanpaj, chaywan runasta kacharichinanpaj (Mat. 20:28). Chayrayku Jesusqa bautizakushaspa Jehovaj ñaupaqenman rerqa munayninta ruwananpaj (Juan 6:38; Gál. 1:4). Chayqa altar patapi ofrendata jayway jina karqa. Altarqa Diospa “munayninwan” ninakorqa, Jehovataj munarqa Wawan Jesús mana juchayoj cuerponta jaywananta. Jesustaj kausayninta “uj kutillata wiñaypaj” jaywarqa. Ajinamanta paypi creejkunaj juchasninku qʼala llimphuchasqa kananpaj (Hebreos 10:5-7, 10 leey). Qhepan parrafospi parlarisunchej Diosta yupaychana toldoj ukhunpi imaschus kasqanmanta, chaykunamanta wakin imawanchus ninakusqantapis.

12. ¿Pikunallataj yaykuyta atej kanku Santo Lugarman, Aswan Santo Lugarmanpis?

¹² Llanthun. Diosta yupaychana toldopis, aswan qhepaman Jerusalenpi templosta ruwakorqa chaykunapis, ukhunpeqa casi kikillan karqanku. Chay ukhunpeqa iskay cuartos karqa: Ujnenqa “Santo Lugar”, ujnintaj “Aswan Santo Lugar”. Chaykunataj uj cortinawan tʼaqasqa karqa (Heb. 9:2-5; Éxo. 26:31-33). Santo Lugarpeqa karqa oromanta candelero, inciensota qʼoshñichinapaj altar, Diospa ñaupaqenpi kaj nisqa tʼantata churanapaj mesa ima. Chay Santo  Lugarmanqa “ajllasqa” sacerdoteslla yaykuyta atej kanku, ruwanasninkuta juntʼanankupaj (Núm. 3:3, 7, 10). Aswan Santo Lugarpitaj Diospa trato ruwasqan arca kasharqa, mayqenchus oromanta karqa, Jehová chaypi kashasqanwantaj ninakorqa (Éxo. 25:21, 22). Kuraj kaj sacerdotella cortinata pasaspa Aswan Santo Lugarman yaykuyta atej. Payqa Perdonta Tarina Pʼunchayllapi chayman yaykoj, mayqenchus watapi uj kutillata ruwakoj. Chaymanqa yaykoj uywaspa yawarninku aparisqa, juchasninmanta, runaspa juchasninkumantawan perdonta tarinanpaj (Lev. 16:2, 17). Tiempowantaj Jehovaqa espíritu santonnejta sutʼincharqa, imawanchus chay imas ninakusqanta (Heb. 9:6-8). e

13. ¿Imawantaj ninakun Santo Lugar, Aswan Santo Lugarpis?

¹³ Juntʼakuynin. 144.000 cristianosqa espíritu santowan ajllasqa kanku, chayraykutaj Diospa wawasnin jina kanku. Paykunaqa Jesuswan khuska sacerdotes jina cielopi sirvenqanku (Apo. 1:6; 14:1). Santo Lugarqa ninakun ajllasqa cristianosta kay jallpʼapiraj kashajtinku, Diosninchej wawasninta jina rejsikapusqanwan. Chaytataj ruwan espíritu santonwan paykunata ajllaspa (Rom. 8:15-17). Aswan Santo Lugartaj cielowan ninakun, maypichus Jehová tiyakun chaywan. Santo Lugarta, Aswan Santo Lugarmanta tʼaqarqa chay cortinataj Jesuspa cuerponwan ninakun. Runa jina aycha cuerpoyoj kasqanrayku, Jesusqa mana cieloman yaykuyta atinmanchu karqa, Diospa mana rikukoj templonpi aswan Kuraj kaj Sacerdote jina kananpaj. Cuerponta runasta kacharichinanpaj jaywasqanrayku, Jesusqa tukuy ajllasqa cristianospaj uj ñanta kicharerqa, cieloman rinankupaj. Ajllasqa cristianospis cielopi tʼinkankuta japʼinankupajqa aycha cuerponkuta saqepunanku tiyan (Heb. 10:19, 20; 1 Cor. 15:50). Jesusqa kausarimuytawan mana rikukoj templomanta Aswan Santo Lugarman yaykorqa. Tiempowantaj tukuy ajllasqa cristianosqa paywan tantasqa kanku.

14. Hebreos 9:12, 24-26 nisqanman jina, ¿imajtintaj aswan sumaj Diospa mana rikukoj templon?

¹⁴ Jehová payllata yupaychananchejpaj imatachus wakichisqanqa aswan sumajpuni. Chaytaj Jesuspa wañuyninpi sayachisqa kashan, Kuraj kaj Sacerdote Jesucristotaj pusashan. Toldopi kaj Aswan Santo Lugarqa runaspa makisnillanwan ruwasqa karqa, chaymantaj Israelmanta kuraj kaj sacerdote yaykoj animalespa yawarninku aparisqa. Jesustajrí chaymanta nisqa aswan santo lugarmanpuni yaykorqa: “Cielomanpuni”, Jehovaj ñaupaqenman. Chaypitaj mana juchayoj kausayninpa valorninta tukuyninchejrayku jaywarqa. “Ajinamanta pay kikin jaywaykukusqanwan juchata chinkachinanpaj” (Hebreos 9:12, 24-26 leey). Jesuspa wañuynenqa ima jaywanamantapis aswan sumajraj, juchastataj qʼalata pichan. Kunanqa qhawarisun Jehovaj mana rikukoj templonpi tukuyninchej payta yupaychayta atisqanchejta, cielopi kausakuyta suyakuspapis, kay jallpʼapi kausakuyta suyakuspapis.

15. ¿Pikunataj Diosta yupaychana toldoj pationpi sirvej kanku?

¹⁵ Llanthun. Diosta yupaychana toldopeqa uj patio karqa. Chay patioqa jawapi kasharqa, telaswan muyurisqataj. Chaypi sacerdotes ruwanasninkuta ruwaspa sirvej kanku. Chay patiopeqa cobremanta uj jatun altar karqa, qʼolachina ofrendasta jaywanapaj. Chaypi kallarqataj cobremanta uj wirkhi, chaypitaj sacerdotes yakuwan mayllakoj kanku niraj ruwanasninkuta ruwashaspa (Éxo. 30:17-20; 40:6-8). Aswan qhepaman templosta ruwakorqa chaypipis, jawa patio kallarqataj. Chaypitaj mana sacerdoteschu kajkuna Diosta yupaychaj kanku.

16. Mana rikukoj temploj sapa pationpi, ¿pikunataj sirvishanku?

 ¹⁶ Juntʼakuynin. Kay jallpʼapiraj kausakushanku chay ajllasqa cristianosqa, niraj cielopi Jesuswan khuska sacerdotes kashaspa, mana rikukoj temploj ukhu pationpi Jehovata tukuy sonqo sirvinku. Diosta yupaychana toldopi, templopipis yakuyoj jatun wirkhi kasqanqa paykunata, tukuy cristianostapis yuyarichiwanchej kausayninchejpi, Diosta yupaychayninchejpipis llimphus kananchej kasqanta. Chanta, Cristoj ajllasqa hermanosninta tukuy sonqo yanapaj may chhika runas, ¿maypitaj Diosta yupaychanku? Apóstol Juanqa rikusqanmanta nerqa: “Paykunaqa sayasharqanku kamachina tiyanaj ñaupaqenpi”, nispa. Rikullarqataj ‘tuta pʼunchay’ Diosta sirvishasqankuta. May chhika runasmanta kajkunaqa kay jallpʼapi chayta ruwashanku, mana rikukoj temploj jawa pationpi (Apo. 7:9, 13-15). Mana rikukoj templopi Jehovata yupaychananchejpaj uj lugar tukuypaj kapuwasqanchejqa may sumajpuni.

17. ¿Imastataj Jehovaman jaywanasta jina jaywasunman?

¹⁷ Tukuy cristianos Jehovaman jaywanasta jina jaywayta atinchej. ¿Imaynatá chayta ruwasunman? Diospa Gobiernonta tiemponchejwan, kallpanchejwan, kapuyninchejwan ima yanapakuspa. Apóstol Pablo hebreo cristianosman nerqa jina, Diosta jatunchayta atinchej. “Chayqa Diosman uj jaywanatapis jaywashasunman jina. Noqanchejqa siminchejwan runasman sutinta rejsichinchej” (Heb. 13:15). Noqanchejmanta aswan sumaj kajta Jehovaman qosun chayqa, payta yupaychayta atisqanchejta may sumajpaj qhawasqanchejta rikuchisun.

18. Hebreos 10:22-25 nisqanman jina, ¿imastataj ruwananchejpuni tiyan, chanta imatataj ni jaykʼaj qonqakunanchejchu tiyan?

¹⁸ (Hebreos 10:22-25 leey). Pabloqa hebreosman qhelqasqan cartaj tukukuyninpi, Diosta yupaychayninchejpi kay imasta ruwayta mana saqenata nerqa: Jehovamanta mañakunapuni kasqanta, suyakuyninchejmanta wajkunaman parlarina kasqanta, hermanosninchejwan tantakunanchej kasqanta, purajmantataj kallpachanakunanchej kasqanta, “astawanraj Diospa pʼunchaynin qayllaykamushasqanta reparaspa”. Apocalipsis libroj qhepa kaj capitulosninpeqa Jehovaj angelnin nin: “¡Diosta yupaychay!”, nispa. Chaytataj iskay kutitapuni nin, chayta ruwananchejpuni kasqanrayku (Apo. 19:10; 22:9). Kay imasta ni jaykʼaj qonqakunachu: Jehovaj mana rikukoj jatun templonmanta pakasqa imasta yachakusqanchejta, jatun Diosninchejta yupaychayta atisqanchej may sumaj kasqantapis.