1, 2. 1) ¿Imatá ichapis tapukusunman? 2) ¿Imastataj kay yachaqanapi yachakusun?

 TUKUYPIS wakin kutis iskayrayanchejpuni. a Uj jovenpi piensarina. Payqa yuyanman Jehovapaj mana valesqanta, chayraykutaj mana bautizakuyta munanmanchu. Chayri piensarina uj hermanopi, payqa joven kashaspa Jehovata ñaupajman churasqanrayku mana qolqe gananamanchu qokorqa. Kunantaj familiayojña, qolqeta ganakusqantaj mana familianta mantienenanpaj alcanzanchu, chayrayku ichá yuyanman manasina allintachu ajllasqanta. Uj kuraj hermanitapiñataj tʼukurina, payqa kallpan pisiyasqanrayku manaña unay jinachu imatapis ruwayta atin, chayraykutaj desanimakunman. Ichá noqanchejpis wakin kutis tapukorqanchej: “¿Jehová qhawamushawanmanchu? Payrayku wakin imasta saqespa, ¿allintachu ruwarqani? ¿Jehovapaj valenirajchu?”, nispa.

² Ajinasta yuyayqa creeyninchejta pisiyachinman, Jehovamantapis karunchawasunman. Kay yachaqanapi yachakusun imaynamantachus Biblia yanapanawanchejta Jehová mana qhawamushawasqanchejta yuyajtinchej, ñaupajta allintachus manachus ajllasqanchejta yuyajtinchej, Jehovapaj valesqanchejtarajchus manachus yuyajtinchej.

 ¿IMATÁ RUWASUNMAN MANAÑA ISKAYRAYANAPAJ?

3. ¿Imataj yanapawasun manaña iskayrayanapaj?

³ Imamantapis iskayrayajtinchejqa Diospa Palabran yanapawasun. Ajinamanta aswan creeyniyoj kasun, Jehovamanpis astawan qayllaykusun, ‘creeypitaj sinchʼita sayasun’ (1 Cor. 16:13).

4. ¿Imaynatá ‘tukuy imata allinta qhawaykusunman’? (1 Tesalonicenses 5:21).

⁴ (1 Tesalonicenses 5:21 leey). Biblia yuyaychawanchej “tukuy imata allinta qhawaykuychej”, nispa. ¿Imaynatá chayta ruwasunman? Imatachus yuyasqanchejta Bibliaj nisqanwan kikincharispa. Jehovapaj mana valesqanta yuyaj jovenpi piensarina. ¿Ajinallatapunichu yuyanan kanman? Mana. Astawanpis Bibliapi ‘tukuy imata allinta qhawaykunan’ tiyan imatachus Jehová yuyasqanta yachananpaj.

5. ¿Imaynatá Jehovaj nisqanta uyarisunman?

⁵ Bibliata leeshajtinchejqa, Jehovapis parlamushawasunman jina. Imamantapis iskayrayashanchej chayqa, Jehová imatachus chaymanta nisqanta uyarinanchej tiyan. Chaypajqa chaymanta parlaj textosta maskʼananchej tiyan, ima yanapastachus Diospaj llajtan qowanchej chaykunapipis maskʼanallanchejtaj tiyan (Pro. 2:3-6). Chaykunasta maskʼashaspaqa Jehovamanta mañakunanchejpuni tiyan imatachus maskʼashasqanchejta tarinanchejpaj. Sumajta reparana Bibliaj yuyaychaykunasninta, noqanchejpaj jina kaj yachaqanastataj maskʼana. Chantapis Bibliapi maskʼallasunmantaj noqanchej jina llakiyniyoj kaj runaspa kausayninkumanta.

6. ¿Imaynatá tantakuykuna yanapawanchej imamantapis manaña iskayrayanapaj?

⁶ Tantakuykunaspipis Jehovata uyarillanchejtaj. Mana faltakuspa tantakuykunaman risun chayqa, uj discursopi chayri uj comentariopi imamantachus iskayrayashasqanchejmantapuni parlakunman (Pro. 27:17). Kunantaj qhawarina imatachus ruwanata imamantapis iskayrayaspa.

“¿JEHOVÁ NOQAMANTA LLAKIKUNCHU?”

7. ¿Imatá wakin kutis tapukusunman?

⁷ Ichá maykʼajllapis kayta tapukorqanchej: “¿Jehová noqata qhawamushawanmanchu?”, nispa. Mana qhawamushawasqanchejta yuyaspaqa, ichapis piensasunman ni jaykʼaj Diospa amigon kayta atisqanchejta, pay tukuy imata ruwaj Dios kasqanrayku. Ichá rey Davidpis ajinallatataj yuyarqa. Jehová runasta qhawamushasqanmanta mayta tʼukuspa nerqa: “Jehová Diosníy, ¿imataj runa kasqa paymanta yuyarikunaykipajri? ¿Imapunitaj runaj wawan kasqa payta qhawanaykipajri?”, nispa (Sal. 144:3). Kunantaj yachakuna imatachus ruwanata Jehová qhawamushawasqanchejmanta mana iskayrayanapaj.

8. 1 Samuel 16:6, 7, 10-12 nisqanman jina, ¿imatataj Jehová uj runapi qhawan?

⁸ Bibliaqa nin pisipaj qhawasqa kajkunatapis Jehová qhawamushasqanta. Chayta reparanchej Davidpa kausayninpi. Jehovaqa Samuelta, Jesej wasinman kacharqa ujnin wawanta ajllamunanpaj Israelpi rey kananpaj. Jeseqa qanchis wawasninta Samuelman pusamorqa, Davidtataj sullkʼita kasqanrayku mana pusamorqachu. b Jehovataj chay sullkʼitatapuni ajllakorqa (1 Samuel 16:6, 7, 10-12 leey). ¿Imarayku? Jehovaqa yacharqa  imachus Davidpa sonqonpi kasqanta, maytataj payta munakusqanta, chayrayku payta ajllakorqa.

9. ¿Imaraykutaj mana iskayrayasunmanchu Jehová sapa ujninchejta qhawamushawasqanchejmanta? (Fototawan qhawariy).

⁹ Imastachus Jehová munakuwasqanchejrayku ruwasqanpi tʼukurina. Payqa necesitasqanchejman jinapuni sumaj yuyaychaykunasta qowanchej (Sal. 32:8). Sumajta rejsiwasqanchejraykulla ajinata yuyaychayta atiwanchej, ¿icharí? (Sal. 139:1). Sichus chay yuyaychaykunasninman jina ruwasun chayqa, allinpuni riwasun, reparasuntaj sapa ujninchejtapuni Jehová munakuwasqanchejta (1 Cró. 28:9; Hech. 17:26, 27). Jehovaqa payrayku imastachus ruwasqanchejta qhawamushan, imaynachus sonqonchejpi kasqanchejtapis (Jer. 17:10). Payqa amigonchej kayta munan, maytataj kusikun noqanchejpis amigon kayta munajtinchej (1 Juan 4:19).

“¿ALLINTACHU AJLLARQANI?”

10. ¿Imastataj ichapis tapukusunman?

¹⁰ Watas pasasqanman jina, ichapis yuyasunman wakin imasta mana allintachu ajllasqanchejta. Jehovapaj astawan llankʼananchejrayku ichapis uj trabajota saqeporqanchej, chayri ichapis uj negocioman mana yaykorqanchejchu. Kunantaj ichapis rikunchej wakin rejsisqasninchejqa, qolqeta ganayman qokusqankurayku sumajta kausakushasqankuta. Chayrayku ichapis tapukusunman: “¿Allintachu ruwarqani Jehovarayku ashkha imasta saqespa? Mana chayta ruwayman karqa chay, ¿aswan allinchu riwanman karqa?”, nispa.

11. ¿Imaraykutaj 73 Salmota qhelqaj llakisqalla kaj?

¹¹ Maykʼajllapis ajinata yuyarqanchej chayqa,  73 Salmota qhelqaj imaynachus kashasqanpi piensarina. Payqa rikorqa Jehovata mana sirvejkunaqa mana onqospa, ni imamanta llakikuspa, tukuy ima patapitaj kausakusqankuta (Sal. 73:3-5, 12). Allillanta kausakushasqankuta yuyaspataj, Jehovapaj ruwasqan qhasilla kasqanta yuyarqa. Chay yuyaylla kasqanrayku, “tuta pʼunchay” llakisqalla kaj (Sal. 73:13, 14). ¿Imataj payta yanaparqa?

12. Salmo 73:16-18 nisqanman jina, ¿imataj salmistata yanaparqa sumajta tʼukurinanpaj?

¹² (Salmo 73:16-18 leey). Salmistaqa Diospa santo wasinman yaykorqa, chaypitaj sumajta tʼukuriyta aterqa, repararqataj allillanta kausakushajkunaqa, mana sumaj kausayniyojchu kasqankuta. Chaypitaj repararqa Jehovata ñaupajman churayqa imamanta nisqapis aswan sumaj kasqanta. Ajinamanta niña llakikorqachu, kallpatataj japʼerqa Jehovata siga sirvinallanpajpuni (Sal. 73:23-28).

13. ¿Imatá ruwasunman sonqo tiyasqas kanapaj? (Fotostawan qhawariy).

¹³ Noqanchejpis salmista jinallataj sonqo tiyayta tariyta atisunman. ¿Imaynamanta? Ñaupajtaqa piensarina ima allin imaschus kapuwasqanchejpi, Jehová mayta bendeciwasqanchejpipis. Jehovata mana sirvejkunajtataj mana chay imas kapunchu. Paykunajtaqa tiyapun imaschus kay mundopi kaj imaslla, nitaj ima suyakuyniyojpischu kanku. Noqanchejmantaj Jehovaqa qhepaman may sumaj imasta qonawanchejta niwanchej (Sal. 145:16). Waj imasta kausayninchejpi ajllasunman karqa chay, ¿aswan allinchu riwasunman karqa? Chaytaqa mana yachayta atisunmanchu. Jinapis kayta yachanchej:  Jehovata, runa masinchejtapis munakusqanchejrayku imatapis ruwanchej chayqa, aswan kusisqaspuni kasun, nitaj imapis pisiwasunchu.

“¿JEHOVAPAJ VALEYMANRAJCHU?”

14. ¿Imaraykutaj wakin hermanos mana Jehovapaj astawan llankʼayta atinkuchu, chanta imatataj tapukunkuman?

¹⁴ Wakin hermanosqa Jehovapaj astawan llankʼayta munanku. Jinapis mana chayta ruwayta atinkuchu machitusña kasqankurayku, onqosqas kasqankurayku, chayri mana sanitoschu kasqankurayku. Chayraykutaj yuyankuman Jehovapaj manaña imatapis ruwayta atisqankuta. Ichá paykuna ninkuman: “¿Jehovapaj valeymanrajchu?”, nispa.

15. 71 Salmota qhelqaj, ¿imatataj sutʼita yacharqa?

¹⁵ 71 Salmota qhelqajpis kikillantataj yuyarqa. Payqa Jehovaman nerqa: “Kallpay tukukojtinpis ama saqerpariwaychu”, nispa (Sal. 71:9, 18). Jinapis payqa sutʼita yacharqa Jehovata sirvikullajtinpuneqa pay yanapananta. Yachakorqataj Jehová mayta kusikusqanta pipis payta sirvinanpaj tukuy atisqanta ruwajtin, ima jarkʼayniyoj kajtinpis (Sal. 37:23-25).

16. ¿Imaraykutaj machitu hermanitos Jehovapaj mayta valenku? (Salmo 92:12-15).

¹⁶ Sichus machituña kanki chayqa, piensariy imaynatachus Jehová qhawasusqanpi. Wakin imasta ruwanaykipaj manaña kallpayki kajtinpis, Jehovaqa yanapasunkiman payta tukuy sonqo sirvikunallaykipajpuni (Salmo 92:12-15 leey). Ama yuyaychu imastachus mana ruwayta atisqaykipeqa, manaqa imastachus ruwayta atisqaykipi. Ejemploykiwan wajkunata kallpachayta atiwaj, imaynachus kashasqankutapis tapuriwaj. Chantapis wajkunaman willariwaj  imaynatachus Jehová kausayniykipi yanapasusqanta, nisqasnin juntʼakunantataj mayta suyakushasqaykita. Amapuni qonqaychu wajkunapaj mañapusqaykeqa may atiyniyoj kasqanta (1 Ped. 3:12). Arí, tukuypis Jehovapaj, wajkunapajpis ashkha imasta ruwayta atisunman.

17. ¿Imaraykutaj wajkunawan mana kikinchakunanchejchu tiyan?

¹⁷ Jehovapaj manaña ashkhata ruwayta atisqaykirayku llakikunki chayqa, yuyarikuy payqa kallpachakusqaykita may sumajpaj qhawasqanta. Amapuni chaymanta iskayrayaychu. Wakin kutisqa ichapis wajkunawan kikinchakuyta munawaj. Chaywanpis kallpachakuy ama chayta ruwanaykipaj, imaraykuchus Jehovaqa ni piwan kikinchawanchejchu (Gál. 6:4). Uj kuti Mariaqa, may valorniyoj perfumasqa aceitewan Jesuspa chakisninman jichʼaykorqa (Juan 12:3-5). Uj wajcha viudataj, iskay pisi valorniyoj qolqesitusllata templopi churarqa (Luc. 21:1-4). Jesustaj mana paykunata kikincharqachu, astawanpis nerqa iskayninku creeyniyoj kasqankuta. Tatanchej Jehovaqa payta munakusqaykirayku, paytataj yupaychayta munasqaykirayku, ima ruwasqaykitapis may valorniyojpaj qhawan, qanpaj chay ruwasqayki may pisisitulla kajtinpis.

18. ¿Imatá ruwasunman manaña iskayrayanapaj? (“ Diospa Palabranqa manaña iskayrayanapaj yanapawanchej” nisqa recuadrota qhawariy).

¹⁸ Wakin kutisqa tukuy iskayrayanchejpuni. Kaypi yachakunchej jinataj, Diospaj Palabranqa yanapawanchej manaña iskayrayananchejpaj. Chayrayku imamantapis iskayrayashanchej chayqa, Diospa Palabranpi yanapata maskʼana, ajinamanta manaña imamantapis iskayrayasunchu, nitaj llakikusunchu. Jehovaqa imatachus ruwasqanchejta qhawamushan, imastachus payrayku saqesqanchejtapis may jatunpaj qhawan, niwanchejtaj chayta ruwasqanchejrayku bendecinawanchejta. Kayta amapuni qonqanachu: Jehovaqa sapa ujninchejta mayta munakuwanchej, cuidawanchejtaj.