TATAYPA sutenqa James Sinclair, mamaypatataj Jessie. Paykunaqa 1930 wata chaynejta, Escocia suyumanta Estados Unidosman ripusqanku, Bronx llajtaman. Nacekunaypaj watas faltashajtin, tatasneyqa Willie Sneddonta rejsisqanku. Payqa Escociallamantataj jampusqa. Tatasniy paywan rejsinakushajtinku familiasninkumanta parlarisqanku.

Mamayqa Willieman willarisqa, tatan, kuraj hermanonwan, uj barcopi rishajtinku wañupusqankuta. Chay barcoqa yakuman chinkaykusqa, uj tʼojyanawan tinkusqanrayku. Chaytaj kasqa niraj Ñaupaj kaj Guerra Mundial kashajtin. Willieqa Jehovaj testigon kasqa, paytaj mamayman nisqa: “Tataykeqa infiernopi kashan”, nispa.

Mamayqa chayta uyarispa phiñarikusqa. Imaraykuchus tatanqa kʼacha runa kasqa. Willieqa, mamay phiñakusqanta reparaspa, jinata nisqa: “Jesuspis infiernollamantaj rerqa”, nispa. Mamaytaj yuyarikusqa iglesiapi resasqanmanta. Resaspa nej kasqa, Jesús wañuspa infiernoman risqanta, kinsa dianmantaj kausarimusqanta. Chantá mamayqa sonqonpi nikusqa: “¿Imajtintaj Jesús infiernoman rerqari? Infiernopeqa sajra runaslla ñakʼarishanku”, nispa. Chayta yachayta munaspataj, Jehovamanta yachakuyta qallarisqa. Chantá Bronx llajtapi kaj congregacionman riyta qallarisqa. Kay 1940 watapitaj bautizakorqa.

Jaqay tiempopi tatastaqa, mana anchata yuyaychakojchu wawasninkuwan Bibliata estudianankupaj. Chayrayku juchʼuysitullaraj kashajtiy papasullaywan quedakoj kani. Imaraykuchus mamayqa, tantakuykunaman rej, sabadosta domingostawantaj predicamoj. Watasninmantaj tataywan tantakuykunaman riyta qallarerqani. Mamayqa ashkha runasman Bibliamanta yachachej. Wakin estudiosnintaqa tantaykuspa yachachej, uj lugarllapi tiyakusqankurayku. Escuelapi kashajtiytaj, vacacionespi mamaywan predicamoj kani. Chay jinamanta Bibliamanta astawan yachakorqani. Yachakullarqanitaj imaynatachus runasman Bibliamanta parlarinaytapis.

Wawallaraj kashajteyqa, mana kallpachakojchu kani Diosta astawan sirvinaypaj.  Jinapis 12 watasniyoj kashajtiy publicador karqani. Chaymantapacha Diosmanta willallarqanipuni. Chantá 16 watasniyoj kashajtiy, Jehovamanta mañakuspa Payllapaj kausanayta nerqani. Uj jatun tantakuypitaj bautizakorqani, 24 de julio de 1954 watapi, Canadá suyupi, Toronto llajtapi.

Congregacionniymanta wakin hermanosqa, Betelpi llankʼasqanku, wakintaj chaypi llankʼasharqanku. Paykunamantataj mayta yachakorqani. Paykunaqa Bibliamanta sumajtapuni yachachej kanku. Chayrayku Betelman riyta munarqani. Profesoresniy universidadman rinayta niwajtinkupis, Betelman rinaypaj solicitudta juntʼacherqani, bautizakorqani chay jatun tantakuypi. Watanmantaj chay solicitudta ujtawan juntʼachillarqanitaj. Chay jatun tantakoyqa Nueva Yorkpi ruwakorqa, Estadio de los Yankees nisqapi. Pisi tiemponmantaj Brooklyn Betelpi trabajanaypaj wajyariwarqanku. Betelpi trabajayta qallarerqani, 19 de septiembre de 1955 watapi, 17 watasniyoj kashajtiy. Betelman chayasqaymanta iskay dianman, taller de encuadernación nisqapi trabajanayta niwarqanku. Chay tallertaj Adams nisqa callepi karqa, número 117. Chaypeqa uj maquinata apaykachaj kani. Chay maquinaqa ashkha hojasta sukʼaykoj, uj libropaj. Chay librostataj waj maquinapi siraj kani.

Chay tallerpeqa killata trabajarqani. Chantá waj trabajota ruwanayta niwarqanku, maquinapi escribiyta yachasqayrayku. Chay tiempopeqa Torremanta Qhawaj revistata, ¡Despertad! revistastawan tukuy munajkunaman apachej kayku. Chaypajqa, chay runaspa sutisninkuta, direccionninkutawan uj moldepi churaj kayku. Killasninmantaj waj lugaresman revistasta apachispañataj trabajarqani. Chay trabajomanta encargadoqa, hermano Klaus Jensen  karqa. Pay niwarqa uj camionerota yanapanayta. Revistasta apaspa yanapakojtiytaj, aswan kallpayoj kanayta. Imaraykuchus tullito karqani, 57 kilosllataj pesaj kani. Camionerowanqa revistasta apaj kayku, barcos sayanku chayman, waj suyusman apachinaykupaj. Chantá revistasta gangochuspi apaj kayku oficina de correoman. Chay revistastataj Estados Unidospi kaj congregacionesman apachikoj. Ajinata trabajasqayraykutaj, hermano Jensen nisqanman jina aswan kallpayoj karqani.

Chantá repararqani Brooklyn Betelpi, revistasta ashkha parlaykunaman imprimikusqanta, wakin parlaykunamanta mana yachallarqanipischu. Mayta kusikoj kani karu lugaresman parlayninkupi revistasta apachikusqanmanta. Chay kutipi mana yuyallarqanipischu, chay karu lugaresman chayanayta.

Kay 1961 watapitaj, Grant Suiter hermanota yanapanayta niwarqanku. Payqa qolqemanta encargado karqa. Watasninmantaj hermano Nathan Knorr oficinanman wajyachimuwarqa. Payqa chay tiempopi, Diospa llajtanta ñaupajman apasharqa. Hermano Nathan Knorr niwarqa, payta yanapaj hermano Ñaupajman Apajkunapaj Escuelaman rishasqanta. Chaymanta kutimojtintaj, Congregacionesta Yanapaj Oficinaspi trabajananta niwarqa. Chayrayku chay hermanoj cuentanmanta yanapanayta niwarqa, hermano Don Adamswantaj trabajanayta. Hermano Adamsqa, 1955 watapi, uj jatun tantakuypi, Betelman jamunaypaj solicitudta juntʼachisqayta aprobasqa. Chay hermanowanqa trabajasharqanku Robert Wallen, Charles Molohan ima. Tawantiykutaj 50 watasmanta astawan trabajarqayku. May sumajpunitaj  karqa, paykunawan Diosta sirveyqa (Sal. 133:1).

Kay 1970 watapitaj niwarqanku sucursalesta waturikamunayta. Chaytataj ruwanay karqa, sapa wata chayri iskay watamanta. Sucursalesta waturispaqa, Betel wasipi trabajajkunata kallpacharej kani, jinallataj misionerostapis. Qhawarillajtaj kani, sapa sucursalpi imaynatachus llankʼashasqankuta. Sucursalesta waturishaspaqa ashkha misionerosta rejserqani. Paykunamanta wakintaj, Galaad escuela qallarikushajtin risqanku. Paykunaqa Galaad escuelamanta kacharqanku chay lugarespi Diosta sirvishallarqankupuni. Sucursalesta waturispaqa casi 100 suyusmanpuni rerqani.

Betelpi trabajajkunataqa, Nueva York llajtapi kaj congregacionesman kachawarqayku. Noqatataj Bronx congregacionman kachawarqanku. Chay congregación ashkhayasqanrayku, iskayman tʼaqakorqa. Congregacionniytaj Upper Bronx sutikorqa.

Kay 1965 watas chaynejpi, uj familia Letonia suyumanta congrecionniyman chayamorqa. Chay familiaqa, Bronx llajtaj ura kantunpi kashajtinku, Bibliamanta yachakusqanku. Chay familiamanta kuraj warmi wawankoqa, Levija sutikorqa. Payqa colegiota tukuytawan precursora regular jina llankʼayta qallarerqa. Chantá Massachusetts llajtaman yanapakoj riporqa. Chaypeqa pisi hermanoslla karqanku. Payqa willarimuwaj predicacionpi sumaj rishasqanmanta. Noqataj congregacionmanta willarej kani.

Tiemponmantaj precursora especial jina llankʼananta nerqanku. Payqa Diospaj tukuy atisqanta llankʼayta munasqanrayku, uj solicitudta juntʼachillarqataj, Betelpi trabajananpaj. Kay 1971 watapitaj Betelman wajyarerqanku. Betelman chayamojtintaj, Jehová “paywan casarakuy” nishawanmanpis jina karqa. Casarakorqaykutaj 27 de octubre de 1973 watapi. Hermano Knorrtaj casarakunaykupaj discursapuwarqayku. Jehovataj mayta bendeciwarqayku, Imaraykuchus señoraywanqa, 40 watastapuni Betelpi trabajarqayku. Kay Proverbios 18:22 nisqantaj noqaykupi juntʼakorqa. Chaypi nin: “Pichus casarakunampaj warmita tarejqa allin kayta tarin, chaywantaj Tata Diosqa kʼacha yanapayninta payman rikuchin”, nispa. Kunankamaqa Bronx llajtapi kaj congregacionllamanpuni rishayku.

Hermano Knorrwan llankʼayqa may sumajpuni karqa. Payqa Jehovata munakusqanrayku maytapuni llankʼaj, misionerostataj munakoj. May chhika misionerosqa, ima lugaresmanchus kachasqa karqanku chay lugarespi, qallariypi paykunalla Jehovaj testigosnin karqanku. Kay 1976 watapitaj, hermano Knorrqa cancerwan onqoykorqa. Chay onqoywantaj mayta ñakʼarerqa. Uj kuteqa, Knorr camapi kashajtin, niwarqa uj publicacionta leeripunayta. Chay publicaciontaj tumpamantawan imprimikunan karqa. Chantapis hermano Frederick  Franzta wajyarinayta niwarqa, paypis chay leesqayta uyarinanpaj. Hermano Franzqa, manaña sutʼitachu qhawaj. Chayraykutaj hermano Knorrqa publicacionesta leeripoj kasqa.

Hermano Knorrqa ajllasqa cristiano karqa. Kay 1977 watapitaj wañuporqa. Diosmantataj ni jaykʼaj karunchakorqachu (Apo. 2:10). Paypa cuentanmantataj hermano Franz Diospa llajtanta ñaupajman aparqa.

Chay tiempopajqa, hermano Milton Henschelpa secretarion karqani. Payqa Knorrta unayta yanapasqa. Hermano Miltonqa jinata niwarqa: “Hermano Franzta tukuy imapi yanapanki”, nispa. Hermano Franzpajqa publicacionesta leeripojpuni kani, niraj imprimikushajtin. Payqa leepusqayta sumajta entiendej. Chaytaj tʼukuchiwaj. Noqapajqa manchay kusiy karqa, payta yanapaspa Diosta sirviyqa. Payqa ajllasqa cristiano karqa. Kay 1992 watapitaj wañuporqa, diciembre killapi.

Tatasneyqa wañupunankukama, Diosta sirvillarqankupuni. Maytataj suyakushani paraisopi paykunawan tinkuyta (Juan 5:28, 29). Betelpeqa 61 watasta karqani, tiempotaj ima jina riporqa. Diosta sirviyqa ni imawan kikinchakunchu. Señoraywan noqawanqa sonqomantapacha niykuman, Jehová mayta ‘kallpachawasqaykuta’ payta sirvisqaykurayku (Neh. 8:10).

Jehovamanta willakunanqa, mana uj runamantachu kashan. Imapis pasajtin, Jehovamanta willakullanqapuni. Noqaqa, ashkha ajllasqa hermanoswan trabajarqani. Chaykunamanta wakintaj cielopiña kashanku. May sumajpuni karqa, Diosta mana wasanchaj hermanoswan trabajayqa.