Ama manchachikunachu, ruwanapachataj
“Kallpachakuy, sinchʼitataj sayay, ruwaj churakuypacha. Ama iskayrayaychu, nitaj manchachikuychu, imaraykuchus Señor Tata Diosneyqa qanwampuni kanqa” (1 CRÓ. 28:20).
1, 2. 1) ¿Imatataj Salomón ruwanan kasqa? 2) ¿Imaraykutaj David Salomonmanta llakikusqa?
JEHOVÁ DIOSQA Salomonman nerqa, Jerusalenpi uj templota ruwananta. Chay temploqa ‘may jatun, tukuy kay mundopi may mentasqa, may kʼachitutaj kanan karqa’. Chantapis chay temploqa, Jehová “Diosta yupaychanapaj” kanan karqa (1 Cró. 22:1, 5, 9-11).
2 Rey Davidqa wawan Salomonmanta llakisqa kasharqa. Imaraykuchus “waynallaraj” karqa, Diospa templonta ruwananpaj. Chayrayku Davidqa, Jehová Diospi atienekorqa, Salomonta yanapananpaj. Salomonqa, Jehovaj templonta ruwananpaj, mana manchachikunanchu karqa. Templotataj ruwaj churakunanpacha karqa.
3. ¿Imatataj Salomón Davidmanta yachakunman kasqa?
3 Davidqa waynallaraj kashajtin, tatanpa ovejasninta jarkʼananpaj uj leonta, jukumaritawan wañucherqa (1 Sam. 17:34, 35). Chantapis Davidqa mana manchachikorqachu Goliatwan maqanakuyta. Goliatqa may jatun runa karqa, kallpasapataj. Davidtaqa Dios yanaparqa, Goliatta warakʼaspa wañurpachinanpaj (1 Sam. 17:45, 49, 50). Arí, Davidqa mana manchachikoj runa karqa. Wawan Salomontaj, maytachá tatanmanta yachakorqa.
4. ¿Imaraykutaj Salomón templota ruwayta mana manchikunanchu kasqa?
4 Davidqa mana manchachikoj runa kasqanrayku, Salomonta kallpacharqa templota ruwananpaj (1 Crónicas 28:20 leey). Salomón templota ruwayta manchachikunman karqa chayqa, mana chay templota qallarillanmanpischu karqa. Ajinamantataj Jehovaj kamachisqanta mana juntʼanmanchu karqa.
5. ¿Imapajtaj Jehovaj yanapayninta necesitanchej?
5 Jehová ima trabajotachus qowasqanchejta mana manchachikuspa juntʼanapaj, Salomón jina Jehovaj yanapayninta necesitanchej. Qhepan parrafospi unay tiempo runasmanta parlarisunchej. Pikunachus mana manchachikuspa Diosta kasukorqanku.
MANA MANCHACHIKOJ RUNAS
6. ¿José, Potifarpa warminta manchikorqachu?
6 Potifarpa warmenqa Joseta sapa kuti nej: “Jamuy, noqawan puñuykunki”, nispa. Josetaj mana manchikuspa Potifarpa warminta qhesachajpuni, wañuchichinanta yachajtinpis (Gén. 39:10, 12).
7. ¿Imatataj Rahab ruwarqa mana manchachikusqanrayku? (28 paginapi dibujota qhawariy).
7 Rahabmantañataj parlarina. Payqa Jericó llajtapi tiyakorqa. Uj kuti Israelmanta iskay wateqajkuna wasinman chayarqanku. Rahabqa chay iskay israelitasta mana rejsisqanrayku, manchikunman karqa. Chaywanpis paykunata pakaykorqa, ayqekunankupajtaj yanaparqa. Rahabqa Jericó llajtamanta reyta, soldadosnintapis mana manchachikorqachu (Jos. 2:4, 5, 9, 12-16). Chayta Rahab ruwarqa, Jehová Diospi creesqanrayku. Payqa creerqa Jericó llajtata, Dios imaynamantapis israelitasman qonanta. Chay jinamanta Rahabqa Diospi creesqanrayku familiantin salvakorqa (Jos. 6:22, 23).
8. ¿Imatataj apóstoles Jesusmanta yachakorqanku?
8 Jesuspa apostolesninmantañataj parlarina. Paykunaqa repararqanku, Jesús runasta mana manchachikusqanta, payman churanakojtinkupis. Chayrayku paykunapis, Jesús jina mana manchachikoj runas karqanku (Mat. 8:28-32; Juan 2:13-17; 18:3-5). Apostolesqa Jesusmanta yachachisqankurayku, saduceos paykunaman churanakorqanku. Jinapis apostolesqa mana manchachikuspa Jesusmanta yachachillarqankupuni (Hech. 5:17, 18, 27-29).
9. ¿Imatataj 2 Timoteo 1:7 niwanchej?
9 José, Rahab, Jesús, apóstoles imaqa, allin kajtapuni ruwanankupaj kallpachakorqanku. Paykunaqa Jehová Diospi atienekusqankurayku, mana manchachikoj runas karqanku. Noqanchej imapi rikukuspapis paykuna jina, Jehová Diospi atienekunanchej tiyan, nitaj noqallanchejpichu (2 Timoteo 1:7 leey). Qhepan parrafospi yachakusunchej, familia ukhupi, jinallataj congregación ukhupipis, mana manchachikoj kananchejta.
AMA MANCHACHIKUNACHU
10. ¿Imaraykutaj jóvenes allin kajta ruwanankupaj kallpachakunanku kasqa?
10 Jovenesqa Jehovaj munayninta ruwanankupaj, mayta kallpachakunanku tiyan. Paykunaqa Salomonmanta yachakunkuman. Salomonqa templota sayachinanpaj sumajta yuyaychakorqa, mana manchachikuspataj ruwaj churakorqapacha. Tatasqa wawasninkuta imatapis ruwanankupaj yuyaycharinankupuni tiyan. Jinapis wawaspuni ajllananku tiyan, imatachus ruwanankuta (Pro. 27:11). Kuraj Supayqa tukuyman churanakuwanchej. Jinapis jovenesqa mana manchachikunankuchu tiyan. Astawanqa kallpachakunanku tiyan allin amigosta ajllanankupaj, allin imaswan kusirikunankupajpis. Kallpachakunallankutaj tiyan bautizakunankupaj, millay imaswan yuyayninkuta mana chʼichichanankupajpis.
11, 12. 1) ¿Imatataj Moisés ruwasqa mana manchachikusqanrayku? 2) ¿Imatá jóvenes Moisés jina ruwankuman?
11 Jovenesqa sumajta piensarinkuman imatachus kausayninkupi ruwanankuta. Wakin Heb. 11:24-26). Jehová Diostajrí Moisesta mayta bendicerqa, paraisopitaj astawanraj bendicenqa.
suyuspeqa, jovenesta inkitanku uj profesionniyoj kanankupaj, ashkha qolqetataj gananankupaj. Wakin suyuspeqa tukuy imapis ancha valesqa. Chayrayku ichá wakin jovenesqa trabajollaman qokunkuman, familiankuta yanapanankupaj. Ajinapi rikukunchej chayqa, imatachus Moisés ruwasqanpi tʼukurisunman. Moisestaqa Faraonpa ususin, wawanta jina uywakorqa. Chayrayku Moisestaqa Faraonpa familian, profesoresnin, waj runaspiwan, maytachá tanqankuman karqa, qhapajyananpaj, may rejsisqataj kananpaj. Jinapis Moisesqa chay runasta mana manchachikuspa, Jehová Diosta sirviyta ajllarqa. Chantataj Egiptoj qhapaj kayninta saqepuytawan, Jehovapi atienekorqa (12 Jovenespis Moisés jina ruwankuman. Paykunaqa Jehovapaj astawan llankʼankuman, Gobiernonmantataj willayta ñaupajman churankuman. Jehová Diostaj paykunata bendecenqa, familiankumanpis ni imata faltachenqachu. Ñaupa tiempomanta joven Timoteoqa “esclavo jina llankʼarqa sumaj willaykunata willaspa”. Jovenespis Timoteo jinallataj ruwankuman (Filipenses 2:19-22 leey). *
Tukuy imaymanamanta Jehovata sirvinaykipaj ama manchachikuychu. (13-17 parrafosta qhawariy).
13. ¿Imapajtaj uj hermana sipas kashajtin kallpachakunan kasqa?
13 Uj hermanamanta parlarina. Payqa Estados Unidosmanta, Alabama llajtamantataj. Payqa Jehovapaj astawan llankʼananpaj kallpachakunan karqa. Pay nin: “Sipas kashajtiy, hermanoswan parlayta manchachikoj kani. Jinallataj predicacionpi runaswan parlaytapis. Jinapis hermanos, tatasniypis precursora kanaypaj yanapawarqanku. Repararqanitaj Kuraj Supaypa mundonpeqa, may chhika runas jovenesta tanqasqankuta, sumaj profesionniyoj kanankupaj, may rejsisqa kanankupaj, qhapajyanankupaj, ashkha imasniyoj kanankupajtaj. Chay imasllata runas maskʼasqankuraykutaj, llakiyllapi rikukusqankuta, onqosqankutataj. Noqatajrí Jehová Diosta sirvisqayrayku may kusisqa kani, sonqo juntʼasqataj”, nispa.
14. Cristiano tatas, ¿imasta ruwanankupajtaj kallpachakunkuman?
14 Cristiano tataspis mayta kallpachakunallankutaj tiyan Diosta sirvinankupaj. Ichapis uj tatata, patronnin ninman astawan llankʼananta Familiapi Diosta yupaychanapaj chʼisipipuni, chayri predicamunan diapipuni, manachayri tantakuy diapuni. Ajinapi uj tata tarikuspa, patronninman mana atisajchu ninanpaj mana manchachikunanchu tiyan. Wawaspis chayta rikuspa tatanku jina ruwanqanku. Chantá ichá uj tataqa, wawan wakin imasta ruwananta mana munanmanchu. Chayta rikuspa wakin hermanosqa ichá chay tatata tapurinkuman, imajtinchus wawanta mana chayta ruwajta saqesqanta. Ajinapi tarikuspa chay tataqa mana manchachikuspa chay hermanoman sutʼincharinman, imaraykuchus wawanta chayta ruwajta mana saqesqanta.
15. ¿Imaynatataj Salmo 37:25; Hebreos 13:5 versículos tatasta yanapanman?
15 Tatasqa wawasninkuta yanapananku tiyan, Diospaj astawan llankʼanankupaj. Ichapis chayta ruwayqa, wakin tataspaj mana facilchu kanman. Ichá wakin tatasqa, mana munankumanchu wawasninku precursores kanankuta, chayri pisi hermanoslla kanku chayman yanapakoj rinankuta. Chantá nillataj munankumanchu Betelpi yanapakamunankuta, jinallataj Tantakuna Wasista, Jatun Tantakuna Wasista ruwaysikunankutapis. Imaraykuchus tatasqa manchikunkuman machuyapojtinku wawasninku saqerparinankuta. Sumaj yuyayniyoj tatasrí, mana manchikuspa wawasninkuta kallpachanku, Diospaj astawan llankʼanankupaj. Chantapis Jehová ni jaykʼaj saqerparinanpi creenku (Salmo 37:25; Hebreos 13:5 leey). Tatas, Jehová Diospi atienekonqanku chayqa, wawasninkupis paykuna jinallataj ruwanqanku (1 Sam. 1:27, 28; 2 Tim. 3:14, 15).
16. 1) ¿Imaynatá wakin tatas wawasninkuta yanapasqanku? 2) ¿Imapajtaj wawasta yanapan Diospaj astawan llankʼasqanku?
16 Estados Unidosmanta uj tatamamaqa, wawasninkuta Diospaj astawan llankʼanankupaj yanaparqanku. Tata nerqa: “Wawitasniyman juchʼuysitu kashajtinku, willarejña kayku precursor jina Diospaj astawan llankʼay may sumajpuni kasqanta, jinallataj congregacionpi yanapakuypis. Kunanqa wawasniyku astawan Diospaj llankʼashanku. Chaytaj yanaparqa, mana juchapi urmanankupaj, Diosta sirviypi sumaj sayasqa kanankupajpis”, nispa. Uj hermanoqa, iskay wawitasniyoj, pay nin: “May chhika tatasqa mayta trabajanku wawasninku uj profesionniyoj kanankupaj, sumaj deportistas kanankupaj, jinallataj imallatapis sumajta ruwayta yachanankupaj. Noqanchejqa mana chay tatas jinachu ruwana, astawanqa tukuy imata ruwana wawasninchej Diosman qayllaykunankupaj, astawantaj paypaj llankʼanankupaj. Chaypaj qolqenchejta, kallpanchejta churaytaj mana qhasipajchu. Wawasniykuta Diospaj astawan llankʼanankupaj yanaparqayku. Kunantaj may kusisqa kashayku, wawasniyku Diosta tukuy sonqo sirvishasqankumanta”, nispa. Tatas wawasninkuta Diospaj astawan llankʼanankupaj yanapajtinkoqa, Diosqa paykunata allinpaj qhawanqa.
CONGREGACIONPI AMA MANCHACHIKUNACHU
17. Ancianos, soltera hermanas ima, ¿imasta ruwanankupajtaj mana manchachikunankuchu kanman?
17 Congregacionpi allin kajta ruwanapaj mana manchachikunachu. Ancianosqa mana manchachikunankuchu tiyan, jatun juchapi urmaj hermanosta yanapanankupaj. Chantapis mana manchachikuspa yanapallankumantaj wañuy patapi tarikoj hermanosta. Manallataj manchachikunankuchu tiyan, carcelespi runasman Bibliamanta yachachimuyta, jinallataj chaypi tantakuykunata ruwaytapis. Soltera hermanasqa mana manchachikuspa tukuy imaymanamanta Diosta astawan sirvinkuman. Paykunaqa precursoras kankuman, maypichus pisi hermanos kanku chaypi yanapakunkuman. Yanapakamullankumantaj Tantakuna Wasista ruwaysikuspa, allinchaspa, planosta dibujaspa ima. Chantapis
solicitudta juntʼachinkuman Reinomanta Willajkunapaj Escuelaman rinankupaj. Chantá wakin hermanasqa, ichá wajyarisqa kankuman Galaad Escuelaman.18. ¿Imasta ruwanapajtaj kuraj hermanitasninchej mana manchachikunankuchu kanman?
18 Kuraj hermanitasninchejta mayta munakunchej, maytataj kusikunchej congregacionpi kasqankumanta. Wakin kuraj hermanitasninchejqa Diospaj manaña ñaupajta jinachu llankʼayta atinku. Jinapis atisqankuman jina may kusiywan congregacionpi yanapakunku (Tito 2:3-5 leey). Ichapis ancianosqa, uj kuraj hermanata ninkuman uj sipasta yuyaycharinanta allinta vistikunanpaj. Kuraj hermanitataj, kʼachallamanta chay sipas hermanawan parlarinman. Mana manchikuspataj reparachinman, maychus kajta pʼachallikuna kasqanta, wajkunata mana pantachinanpaj (1 Tim. 2:9, 10). Kuraj hermanitasninchej ajinamanta yanapakojtinku, congregación may ujchasqa kanqa.
19. 1) Hermanos, ¿ima ruwanasta japʼinankupajtaj mana manchachikunankuchu kanman? 2) ¿Imaynatá Filipenses 2:13; 4:13 versículos hermanosta yanapanman mana manchachikunankupaj?
19 Hermanosqa mana manchachikunankuchu tiyan ancianos jina, chayri siervos ministeriales jina llankʼayta. Ancianos jina, siervos ministeriales jinataj hermanos yanapakojtinkoqa, congregacionqa ujchasqa kanqa (1 Tim. 3:1). Ichapis uj hermano ñaupajpi pantasqanrayku, anciano jina, chayri siervo ministerial jina llankʼayta mana munanmanchu. Wakin hermanostaj chay ruwanasta japʼinankupaj, mana wakichisqachu kasqankuta yuyankuman. Noqanchejpis chay hermanos jinallataj yuyanchej chayqa, ama qonqanachu Jehová Dios kallpachanawanchejta (Filipenses 2:13; 4:13 leey). Jehová, Moisesta yanapasqanmanta yuyarikusunman. Jehovaqa Moisesman uj llankʼayta qorqa. Moisestaj chay llankʼayta mana juntʼayta atinanta nerqa (Éxo. 3:11). Jinapis Jehovaqa Moisesta yanaparqa mana manchachikunanpaj, yuyaycharqataj llankʼayninta juntʼananpaj. Hermanosqa mana manchachikunankupaj, Jehová Diospa yanapanta mañakunkuman, Bibliatapis sapa día leenkuman. Chantapis tʼukurinkuman, mana manchachikoj Diospa kamachisninpi. Kʼumuykukoj sonqowantaj ancianos yuyaycharinankuta maskʼankuman. Congregacionpitaj imata ruwaspapis yanapakunkuman. Munayku hermanos ama manchachikunaykichejta, congregacionpitaj tukuy sonqo yanapakunaykichejta.
‘JEHOVAQA QANWANPUNI KANQA’
20, 21. 1) ¿Imatataj David Salomonman nisqa? 2) Jehovata mana manchachikuspa sirvisun chay, ¿imataj kanqa?
20 Rey David wawan Salomonman nerqa: ‘Jehová Diosqa qanwanpuni kanqa. Paypa templonpi tukuy ruwanasta tukunaykikama’, nispa (1 Cró. 28:20). Salomonqa tatanpa nisqata yuyarikullajpunichá. Payqa waynallaraj kaspapis, mana manchachikuspa Diospaj templonta ruwarqa. Jehová Diospa yanapayninwantaj, qanchis wata kurajpi chay jatun templota tukorqa.
21 Imaynatachus Jehová Dios Salomonta yanaparqa, ajinallatataj noqanchejtapis yanapawasunchej familiapi, congregacionpi ruwanasninchejta juntʼanapaj (Isa. 41:10, 13). Mana manchachikuspa tukuy imaymanamanta Jehová Diosta sirvisun chayqa, mayta bendeciwasun. Chayrayku ‘mana manchachikuspa ruwanasninchejta ruwaj churakunapacha’.
^ párr. 12 Imaynasmantachus Jehovapaj astawan llankʼanaykita yachanaykipaj, “Fijémonos metas espirituales para glorificar al Creador”, nisqa yachaqanata leeriwaj. Chaytaj kashan La Atalaya del 15 de julio de 2004 watapi.