Diospa Palabranqa atiyniyoj
“Diospa palabranqa kausayniyoj, atiyniyojtaj” (HEB. 4:12).
1. ¿Imaraykú nisunman Diospa Palabran atiyniyoj kasqanta? (Patapi kaj dibujota qhawariy).
JEHOVAJ TESTIGOSNIN jina, yachanchej Diospa Palabran “kausayniyoj, atiyniyojtaj” kasqanta (Heb. 4:12). Diospa Palabran atiyniyoj kasqanrayku, may chhika runasta yanaparqa, allin runasman tukunankupaj. Wakin runasqa, niraj Jehovaj testigon kashaspa, suwas karqanku, drogakoj kanku, khuchichakojtaj kanku. Wakintaj may rejsisqa chayri qhapaj kaspapis, mana kusisqachu kausakoj kanku (Ecl. 2:3-11). Chayrayku llakisqalla karqanku, wañuyllatañataj suyaj kanku. Jinapis Bibliamanta yachakusqankurayku, uj sumaj kausayta suyakushanku. Chaytataj sutʼita reparanchej Torremanta Qhawaj revistapi “Bibliaqa cambianankupaj yanaparqa”, nisqa yachaqanasta leespa. Chay yachaqanastaj unaymantaña publicacionespi llojsishan. Kunan cristianosña kaspapis Bibliawan yanapachikunallapuni, Jehovaman astawan qayllaykunapaj.
2. ¿Imaynatá Diospa Palabran unay tiempomanta ajllasqa cristianosta yanapasqa?
2 Diospa Palabranqa unaymantapachaña ashkha runasta yanaparqa. Ajllasqa cristianostapis, kausayninkuta cambianankupaj yanaparqa (1 Corintios 6:9-11 leey). Apóstol Pablo imayna runaschus Diospa Gobiernonta herenciata jina mana japʼinankumanta parlaytawan, jinata nerqa: “Qankunamanta wakenqa ajina karqankichej”, nispa. Chay cristianostaqa Diospa Palabran, Diospa atiynin ima kausayninkuta cambianankupaj yanaparqa. Jinapis wakin cristianosqa juchapi urmarqanku, chaytaj Jehovamanta karuncharqa. Bibliaqa nin, uj ajllasqa cristiano, juchallikusqanrayku congregacionmanta qharqosqa kasqanta. Jinapis tiemponman payqa kausayninta cambiarqa, congregacionmantaj kutinporqa (1 Cor. 5:1-5; 2 Cor. 2:5-8). Arí, ashkha cristianosqa kausayninkuta cambiarqanku Diospa Palabranpa yanapayninwan.
3. ¿Imastataj kay yachaqanapi yachakusunchej?
3 Diospa Palabranqa may atiyniyoj. Chaytataj Jehová qowanchej, chaywantaj sumajta yanapachikuna (2 Tim. 2:15). Kay yachaqanapi yachakusunchej imaynatachus Diospa Palabran yanapawasqanchejta: kausayninchejpi, predicacionpi, plataformamanta yachachimushaspapis. Chaykunamanta yachakoyqa yanapawasunchej Jehovata munakunapaj, allinninchejpaj yachachiwasqanchejmanta agradecekunapaj ima (Isa. 48:17).
KAUSAYNINCHEJPI
4. 1) ¿Imatataj ruwasunman Diospa Palabranwan yanapachikunapaj? 2) ¿Ima horaspitaj Bibliata leesunman?
4 Diospa Palabranwan yanapachikunapajqa, sapa día leenanchej tiyan (Jos. 1:8). Casi tukuyninchej ashkha ruwanasniyoj kanchej. Jinapis Bibliataqa sapa día leenanchejpuni tiyan, congregacionpi ruwanasninchej chayri waj ruwanasninchej kajtinpis (Efesios 5:15, 16 leey). Bibliataqa leesunman sutʼiyayta chayri chʼisiyayta manachayri ima horallapipis. Ajinata ruwaspaqa salmista jina yuyasunchej. Pay nerqa: “Maytapuni kamachisqasniykita munakuni; tukuy pʼunchaynintin chayllapi [yuyani]”, nispa (Sal. 119:97).
5, 6. 1) ¿Imaraykú Bibliata leesqanchejpi tʼukurinanchej kanman? 2) Leesqanchej yanapanawanchejpaj, ¿imastataj tapurikusunman? 3) ¿Biblia yanapasorqachu?
5 Bibliataqa mana leenallanchejchu tiyan. Manaqa leesqanchejpi sumajta tʼukurinanchej tiyan (Sal. 1:1-3). Ajinata ruwaspalla, Bibliaj yuyaychasqanwan yanapachikusun. Arí, Bibliata papelpi chayri ima aparatopi leespapis, kallpachakuna Bibliaj nisqanman jina kausakunapaj, kausayninchejta cambianapajpis.
6 Bibliawan yanapachikunapajqa, mana patan patallatachu leena tiyan. Astawanqa kay tapuykunapi tʼukurisunman: “¿Imatataj kay leesqay Jehovamanta yachachiwan? ¿Yachakusqayman jinañachu kausakushani? ¿Imastawantaj 2 Cor. 10:4, 5).
kausayniypi cambianay kanman?”, nispa. Chantapis Diospa Palabranman jina kausakunapajqa, Jehovaj yanapayninta mañakuna, leesqanchejpitaj sumajta tʼukurina (PREDICACIONPI
7. ¿Imaynatá Diospa Palabranwan predicacionpi yanapachikusunman?
7 Runasman predicashaspa, yachachishaspa imaqa, Diospa Palabranmanta leeripunanchejpuni tiyan. Uj hermano nerqa: “Jehovawan wasimanta wasi predicashawaj chay, ¿manachu Jehovata parlachiyta munawaj? Bibliamanta runasman leeripuspaqa, Jehovatapis parlarejta saqeshasunman jina”, nispa. Bibliamanta uj versiculota runasman leeripoyqa, aswan sumaj noqallanchej parlaykunanchejmantaqa (1 Tes. 2:13). Chayrayku predicashaspaqa, maytapuni kallpachakuna Bibliata runasman leeripunapaj.
8. Predicashaspa, ¿runasman Bibliata leeripunallanchejchu kashan?
8 Casi tukuy runasqa Biblia nisqanta mana entiendenkuchu. Unay tiempomanta runaspis, manallataj entiendejchu kanku (Rom. 10:2). Runasman Bibliata leeripushaspaqa, ama yuyanachu leeripusqanchejta entiendesqankutapacha. Chayrayku runaspajqa mana uj versiculota leeripuyllachu. Manaqa entiendenankupaj leepusqanchej versiculomanta, wakin palabrasta watejmanta leeripullasunmantaj. Chantataj chay versiculota sutʼincharisunman. Ajinata ruwajtinchejqa, Diospa Palabran runaj yuyayninman, sonqonmantaj chayanqa (Lucas 24:32 leey).
9. ¿Imaynatá runasta yanapasunman Bibliata jatunpaj qhawanankupaj?
9 Wasiyojman Bibliata niraj leeripushaspa sumajta parlarisqanchejqa, Bibliata jatunpaj qhawananpaj yanapasunchej. Bibliamanta runaman leeripunapajqa, 1 Cor. 9:22, 23).
ichapis ajinata nisunman: “Imatachus Diosninchej chaymanta nisqanta qhawarina”, nispa. Jehovata mana yupaychaj runawan parlashaspataj, ichapis ajinata nisunman: “Qhawarina imatachus Diospa Palabran nisqanta”, nispa. Mana ima iglesiaman rej runawan parlashaspataj, ichapis ajinata nisunman: “¿Maykʼajllapis kayta uyarerqankichu?”, nispa. Reparanchej jina, sapa runaqa mana kikintachu creenku, nillataj kikintachu yuyanku. Chayrayku may sumaj kanman wakichikunanchej runaswan miskʼita parlarinapaj (10. 1) ¿Imaynatá uj hermano uj caballerota yanapasqa? 2) Predicashaspa, ¿repararqankichu Diospa Palabran runaspa sonqonman chayasqanta?
10 Predicacionpi Diospa Palabranta runaspaj leeripoyqa, may sumajpuni. Uj hermanomanta parlarina. Payqa uj caballeroman revistasta apapojpuni. Chay caballeroqa unaymantaña revistasninchejta leej kasqa. Uj kutitaj hermanoqa Torremanta Qhawaj revistata saqenallanmantaqa, kay 2 Corintios 1:3, 4 versiculosta leeripusqa. Chaypi nin: “Paymin may khuyakuyniyoj Tata, tukuy imapi sonqochaj Diostaj. Paymin sonqochawanchej tukuy llakiyninchejpi”, nispa. Chay caballerotaqa, chay hermanoj leesqan, sonqonta kuyurichisqa. Chayrayku chay versiculosta watejmanta leeripunanta nisqa. Chantá chay caballeroqa hermanoman nisqa, señoranwan may llakisqa kashasqankuta. Hermano Bibliamanta leeripusqanrayku, chay caballeroqa astawan Bibliamanta yachakuyta munarqa. Reparanchej jina, Bibliaqa may atiyniyoj. Predicashaspa runasman Bibliata leeripusqanchejqa runaspa sonqonmanpuni chayanqa (Hech. 19:20).
PLATAFORMAMANTA YACHACHIMUSHASPA
11. ¿Imamantataj discursantes yachachimunanku kashan?
11 Tantakuykunaman, jatun tantakuymanpis, Jehová Diosta yupaychanapaj rinchej. Chantapis chaypi yachakusqanchejqa, mayta yanapawanchej. Chayrayku plataformamanta yachachimoj hermanosqa, uj sumaj llankʼayniyoj kanku. Chaytaj mana pujllakunapajchu (Sant. 3:1). Discursantesqa Diospa Palabranmantapuni yachachinanku tiyan. Plataformamanta yachachimuspaqa, Diospa Palabranwan runasta mayta yanapasunman.
12. Uj hermano discursonpi Bibliawanpuni yachachinanpaj, ¿imastataj ruwanman?
12 Discursota qoshaspa Bibliata leereyqa, may sumajpuni (Juan 7:16). Ichapis discursota qoshaspaqa uj experienciamanta parlarisunman chayri kikincharisunman. Jinapis Bibliawanpuni yachachinanchej tiyan. Bibliata leeytaj, mana kikinchu Bibliamanta yachachiywan. Uj discursopi Bibliamanta ashkha versiculosta leejtinchejqa, runasqa mana japʼeqanqankuchu. Chayrayku sumajta ajllananchej tiyan ima versiculostachus leenanchejta. Chantá piensarina imaynatachus chay versiculota sutʼincharinapi, imawantajchus kikincharinapi. Piensarillasunmantaj imaynatachus chay versículos runasta yanaparinanpi (Neh. 8:8). Discursota qonapaj bosquejonchejta sumajta estudiana. Jinallataj chay bosquejopi rikhurej versiculostapis. Chay discurso imamantachus parlasqanta, imaraykuchus chaypi versículos kashasqanta sumajta entiendenanchej tiyan. Discursota qoshaspataj ajllasqanchej versiculosta leerisunman. Astawan yachakunapajqa Benefíciese de la Escuela del Ministerio Teocrático, nisqa librota leerisunman, 21-23 paginaspi. Astawanqa Jehovaj yanapayninta mañakuna, Bibliaj nisqanta sumajta sutʼinchanapaj (Esdras 7:10; Proverbios 3:13, 14 leey).
13. 1) ¿Imaynatá uj hermanata Bibliamanta uj versículo yanaparqa? 2) ¿Imaynatataj Bibliata leekusqan tantakuypi chayri jatun tantakuypi qanta yanapasorqa?
13 Uj hermanamanta parlarina. Payqa Australia suyumanta, wawallaraj kashaspataj ashkha llakiykunapi rikukorqa. Tiemponmantaj Jehovamanta yachakorqa. Jinapis mana sutʼita reparajchu Jehová munakusqanta. Uj kuti, tantakuypi kashajtin Bibliamanta uj versiculota uyarisqan, sonqonta kuyurichisqa. Payqa chay versiculopi tʼukurerqa, sumajtataj chay versiculota ukhuncharqa. Ajinamanta waj versiculostawan leerqa. Chaypitaj repararqa Jehová maytapuni munakusqanta. * Ichá noqanchejpis uj tantakuypi chayri jatun tantakuypi kashajtinchej, uj versículo sonqonchejta kuyuricherqa (Neh. 8:12).
14. ¿Imastataj ruwasunman Bibliata jatunpaj qhawananchejpaj?
14 Mayta agradecekunchej Jehová Diosman, Bibliata qowasqanchejmanta. Jehovaqa nerqa Palabran wiñaypaj kananta, ajinapunitaj (1 Ped. 1:24, 25). Chayrayku kallpachakunallapuni Bibliata sapa día leenapaj, yachakusqanchejman jinataj kausakunapaj. Chantapis Bibliawan runasta yanapasunman. Chaykunata ruwajtinchejqa, Bibliata may jatunpaj qhawasunchej. Astawanqa Jehová Diosta jatunchasunchej, munakusunchejtaj.
^ párr. 13 “ Jehovaqa mayta munakuwan”, nisqata qhawariy.