1. ¿Ima ruwaytataj Jehová Pedroman qorqa niraj wañupushajtin?

 APÓSTOL Pedroqa ashkha watasta Jehovata tukuy sonqo sirverqa. Payqa Jesuswan khuska predicaj rerqa, waj lugarespipis predicacionta qallaricherqa, Diospa llajtanta kamachejkunamanta ujnintaj karqa. Manaña unaytachu kausanan kashajtintaj, Jehovaqa waj llankʼaytawan qorqa. 62, 64 watas chaynejta, Diosqa Bibliamanta iskay cartasta qhelqananpaj yuyaycharqa: Ñaupaj kaj Pedrota, iskay kaj Pedrotawan. Apóstol Pedroqa munarqa chay cartasnin cristianosta yanapanallantapuni, pay wañupojtinñapis (2 Ped. 1:12-15).

2. ¿Imajtintaj Pedroj cartasnin chay tiempopaj sumaj karqa?

² Pedroqa chay iskay cartasta qhelqarqa, hermanosnin “imaymana pruebaswan” ñakʼarishajtinku (1 Ped. 1:6). Sajra runasqa hermanos ukhupi llullasta yachachisharqanku, congregaciontataj chʼichichayta munasharqanku (2 Ped. 2:1, 2, 14). Jerusalenpi tiyakoj cristianosqa, tumpamantawan ‘tukuy imaj tukukuyninta’ rikunkuman karqa. Romamanta soldadosqa Jerusalenta, templontapis thuñinkuman karqa (1 Ped. 4:7). Chayrayku Pedroj iskay cartasnenqa, chay tiempomanta cristianosta pruebasninkuta aguantanankupaj yanaparqa, aswan qhepaman imachus kananpajpis wakichikunankupaj. b

3. ¿Imajtintaj Pedroj cartasninta estudiananchej tiyan?

³ Pedro chay iskay cartasninta ñaupa tiempomanta cristianosman qhelqajtinpis, Jehovaqa Bibliaman chaykunata churacherqa noqanchejpis chay iskay cartaswan yanapachikunanchejpaj (Rom. 15:4). Kay tiempopipis chʼichi kausayniyoj runaspa chaupinkupi tiyakushanchej, llakiykunapitaj rikukunchej. Chaykunataj Jehovata sirvejta mana saqellawasunmanchu. Chantapis tumpamantawanqa manchay ñakʼariy tiempo kanqa. Chaytaj Jerusalenta, templontawan thuñisqankumantapis aswan sinchʼiraj  kanqa. Chayrayku Pedroj iskay cartasninmantaqa ashkha sumaj imasta yachakusunman. Chaykunataj yanapawasun Jehovaj pʼunchayninta rijchʼarisqas suyanapaj, runata mana manchachikunapaj, hermanosninchejtapis mayta munakunapaj. Kay yuyaychaykunaqa ancianostapis yanapallanqataj hermanosta sumajta cuidanankupaj.

4. ¿Imataj creeyninchejta pisiyachinman? (2 Pedro 3:3, 4).

⁴ Runasqa mana creenkuchu imatachus Biblia aswan qhepaman kananta nisqanpi. Noqanchejqa ashkha watastaña kay mundoj tukukuynin chayamunanta sonqo kʼajaywan willashanchej. Chayrayku contranchejpi kaj runasqa noqanchejmanta burlakuwasunman, ninkumantaj tukukoyqa ni jaykʼaj chayamunanta (2 Pedro 3:3, 4 leey). Pillapis predicacionpi chayta niwajtinchej, chayri trabajonchejmanta, familianchejmanta pillapis ajinata niwajtinchej creeyninchej pisiyanman. ¿Imataj yanapawasunman? Qhawarina imatachus Pedro nisqanta.

5. ¿Imataj yanapawasun tukukuy chayamunanta pacienciawan suyakunapaj? (2 Pedro 3:8, 9).

⁵ Wakin runasqa ichapis yuyankuman Jehová kay mundota tukuchinanpaj anchata qheparishasqanta. Jinapis Pedroj nisqanqa yuyarichiwanchej Jehovaqa mana noqanchej jinachu tiempota qhawasqanta (2 Pedro 3:8, 9 leey). Jehovapajqa waranqa watas uj pʼunchay jinalla. Chantapis payqa mayta pacienciakuwanchej, nitaj munanchu ni pi chinkachisqa kananta. Jinapis pʼunchaynenqa chayamonqapuni, kay mundotaj tukuchisqapuni kanqa. Chayrayku tiempo kashajtillanraj tukuy runasman predicayta munanchej. Chaytaj ni imawan kikinchakunchu.

6. ¿Imatá ruwasunman Jehovaj pʼunchayninta rijchʼarisqas suyanapaj? (2 Pedro 3:11, 12).

⁶ Pedroqa niwarqanchej Jehová Diospa pʼunchaynin chayamunanta “rijchʼarisqas” suyananchejta (2 Pedro 3:11, 12 leey). ¿Imaynatá chayta ruwasunman? Atikojtenqa sapa día piensarisunman imayna kʼachituchus kausayninchej paraisopi kananpi. Chaypeqa niña chʼichi airetachu samasun, sumaj alimento mikhunasta mikhusun, wañupoj familiaresninchejwan tinkukapusun, ñaupa tiempomanta runasmanpis imaynatachus Bibliaj profeciasnin juntʼakusqanta willarisun. Chay imaspi tʼukureyqa yanapawasun rijchʼarisqas kanapaj, qhepa pʼunchaykunapiña kausakushasqanchejtataj mana qonqakunapaj. Imachus aswan qhepaman kananta “ñaupajmantaña” yachasqanchejrayku, llullasta yachachejkunawan mana ‘apachikusunchu’ (2 Ped. 3:17).

7. ¿Imataj kanman runata manchikojtinchej?

⁷ Noqanchejqa yachanchej Jehovaj pʼunchaynin qayllitapiña kashasqanta. Chayrayku munanchej wajkunaman Diospa Gobiernonmanta tukuy atisqanchejta willariyta. Pero wakin kutisqa ichá manchikusunman willariyta. ¿Imajtin? Runata manchikusqanchejrayku. Pedropis ajinapi rikukorqa Jesusta juzgasharqanku chay chʼisi. Pedroqa mana Jesuspa discipulon jinachu rejsichikorqa, kinsa kutispitaj Jesusta mana rejsisqanta nerqa (Mat. 26:69-75). Jinapis Pedroqa manchikuyninta atiparqa. Aswan qhepamantaj nerqa: “Ama manchachikuychejchu imastachus runas manchachikunku chayta, nitaj llakikuychejchu”, nispa (1 Ped. 3:14). Chay nisqanpi sutʼita reparanchej manchikuyninchejta atipayta atisqanchejta.

8. ¿Imataj yanapawasunman runata manchachikuyta atipanapaj? (1 Pedro 3:15).

⁸ ¿Imataj yanapawasun runata manchachikuyta atipanapaj? Pedroj yuyaychasqan. Pay nerqa: “Sonqoykichejpi Cristota Señorniykichejta jina jatunchaychej”, nispa (1 Pedro 3:15 leey). Chaypajtaj tʼukurinanchej tiyan Señorninchej  Jesucristoqa Reyña kasqanpi, may atiyniyojtaj kasqanpi. Pillamanpis predicariyta munashajtinchej, tumpata mancharikunchej chayri kharkatinchej chayqa, Reyninchej Jesucristopi piensarina. Piensarina cielopi gobernashasqanpi, may chhika angeleswantaj muyurisqa kashasqanpi. Yuyarikunataj kay nisqanta: “Diosqa tukuy atiyta qowan cielopi, jinallataj kay jallpʼapipis”, nispa. Kay nisqantapis yuyarikunallataj: “Qankunawan tuta pʼunchay kasaj, kay mundoj imasnin tukukunankama”, nispa (Mat. 28:18-20). Pedroqa niwarqanchej creeyninchejmanta sutʼinchanapaj “wakichisqapuni” kanata. ¿Munasunmanchu trabajopi, escuelapi chayri waj lugarpi predicariyta? Jina kajtenqa, piensarina ima ratochus chayta ruwananchejpi, imatachus ninanchejtataj wakichikuna. Jehovamanta kallpata mañakuna, atienekunataj runata manchikuyta atipanapaj pay yanapanawanchejpi (Hech. 4:29).

9. ¿Maykʼajtaj Pedro munakuyninta mana rikucherqachu? (Dibujotawan qhawariy).

⁹ Pedroqa yachakorqa imaynatachus wajkunata munakuna kasqanta. Payqa Jesús kayta nishajtin chaypi kasharqa: “Uj mosoj kamachiyta qoykichej: Purajmanta munanakuychej. Imaynatachus noqa munakorqaykichej ajinallatataj qankunapis purajmanta munanakuychej”, nispa (Juan 13:34). Chaywanpis aswan qhepaman judío hermanosninta manchikusqanrayku,  mana judío kaj hermanosninwan manaña mikhuyta munarqachu. Apóstol Pablotaj Pedroman nerqa chayta ruwaspaqa puraj uya kasqanta (Gál. 2:11-14). Pedroqa Pablo cheqanchasqanta japʼikuspa cambiarqa. Iskaynin cartasninpi, Pedroqa sutʼita rikucherqa hermanosninchejta munakusqanchejqa mana sonqollanchejpichu kanan kasqanta, manachayqa chay munakuyninchejta ruwasqasninchejwan rikuchina kasqanta.

10. ¿Imataj yanapawanchej hermanosninchejta ‘familianchejta jina tukuy sonqo munakunapaj’? (1 Pedro 1:22).

¹⁰ Pedroqa nerqa hermanosninchejta ‘familianchejta jina tukuy sonqo munakunanchej’ kasqanta (1 Pedro 1:22 leey). Hermanosninchejtaqa ajinata munakunchej ‘cheqa kajta kasukusqanchejrayku’. Chay cheqa kajmanta ujnin yachachiytaj kashan “Diosqa tukuy runasta uj rejllata” qhawasqan (Hech. 10:34, 35). Wakin hermanosnillanchejta munakushasunman chayqa, imatachus Jesús munakuymanta nisqanta mana kasukushasunmanchu. Ichapis wakin hermanosninchejwanqa aswan sumaj amigos kanchej, imaynatachus Jesuspis wakin discipulosninwan karqa ajina (Juan 13:23; 20:2). Jinapis Pedroqa yuyarichiwanchej tukuy hermanosta ‘familianchejta jina’ munakunanchej kasqanta (1 Ped. 2:17).

11. ¿Imataj niyta munan “sonqomantapacha mayta” munanakuy?

¹¹ Pedroqa kayta yuyaycharqa: “Sonqomantapacha mayta munanakuychej”, nispa. Kay versiculopi “mayta munanakuychej” nispa nisqanqa, pikunatachus mana munakuyta atillanchejchu chaykunatapis munakuna kasqanta niyta munan. Kaypi piensarina: ¿Imatataj ruwasunman ujnin hermanonchej imatapis ruwawajtinchej, chayri sonqonchejta nanachiwajtinchej? Ichapis paytaqa mana munakuyta atillasunmanchu, manaqa kikillanwantaj kutichiyta munasunman. Chaytaj mana allinchu kanman. Pedroqa Jesusmanta yachakorqa chayta ruwayqa Diosta mana kusichisqanta (Juan 18:10, 11). Pedro qhelqarqa: “Ama sajramanta sajrallawantaj kutichiychejchu, insultasojtiykichejpis ama insultallaychejtajchu. Astawanpis bendeciychej”, nispa (1 Ped. 3:9). Wajkunata mayta munakusun chayqa, sonqonchejta nanachiwanchej chaykunawanpis kʼachas kasun, nitaj kikillanwantajchu pagachikusun.

12. 1) Hermanosninchejta mayta munakunchej chay, ¿imatawán ruwasun? 2) Usqhayllata perdonanakuna nisqa video, ¿imata ruwanaykipajtaj yanapasunki?

¹² Pedroqa ñaupaj kaj cartanpi “mayta munanakuychej” nispa nillarqataj. Chay munakuytaj mana uj mashkha juchasllatachu pʼampan, manachayqa “ashkha juchasta pʼampan” (1 Ped. 4:8). Chayta qhelqashaspa, ichapis Pedroqa yuyarikorqa imatachus Jesús ashkha watas ñaupajta perdonmanta yachachisqanta. Chay kutipi Pedroqa Jesusman nerqa contranpi juchallikojta ‘qanchis kutitapuni’ perdonananta, chayta nispataj manchay kʼacha kasqantachá yuyasharqa. Jesustaj payman nerqa “77 kutista” perdonanan kasqanta, nisunman mana yupaspa perdonanan kasqanta. Noqanchejpis chaymanta mayta yachakusunman (Mat. 18:21, 22). Ichapis mana atillanchejchu chay yuyaychayman jina ruwayta. Jina kajtenqa siga kallpachakunallapuni. Pantaj runas kasqanchejrayku tukuyninchej wakin kuteqa mana perdonayta atillanchejchu. ¿Imatá ruwasunman? Tukuy atisqanchejta kallpachakuna hermanosninchejta perdonanapaj, paykunawantaj allinyakunapaj. c

13. ¿Imaraykutaj ancianos mana atillankumanchu hermanospaj tiempochakuyta?

¹³ Pedroqa imatachus Jesús kausarimuytawan nisqanta nichá ni jaykʼaj qonqakorqachu.  Pay nerqa: “Ovejitasniyta michipuway”, nispa (Juan 21:16). Qanpis anciano kanki chayqa, chayta ruwanaykipuni tiyan. Chaywanpis ichá Diospa ovejitasninta cuidanaykipaj mana tiempochakuyta atillawajchu. Ancianosqa ñaupajta familiankuman imatachus necesitasqankuta qonanku tiyan, chantapis munasqa sientekunankupaj, Jehovaj qayllallanpipunitaj kanankupaj yanapananku tiyan. Mana chayllachu, paykunaqa wajkuna yachakunankupaj jina predicananku tiyan, reunionespi yachachinankupaj, asambleaspi discursosta qonankupajpis sumajta wakichikunanku tiyan. Chantapis wakin ancianosqa Comités de Enlace con los Hospitales nisqapi, chayri Departamento Local de Diseño y Construcción nisqapi yanapakunku. Chayrayku paykunaqa ashkha ruwanasniyoj kanku.  

14. ¿Imaraykutaj ancianos hermanosta cuidayta munanku, chanta imataj chayta ruwanankupaj yanapanman? (1 Pedro 5:1-4).

¹⁴ Pedroqa ancianosllataj karqanku chay cristianosman nerqa: “Diospa ovejasninta michiychej”, nispa (1 Pedro 5:1-4 leey). Yachanchej ancianosqa hermanosta mayta munakusqankuta, cuidaytataj munasqankuta. Chaywanpis ichapis wakin kutisqa yuyankuman, chayta ruwayta mana atisqankuta, manchay ocupasqa kashasqankurayku, chayri saykʼusqa kashasqankurayku. Qanpis ajinata yuyanki chay, ¿imatá ruwawaj? Jehovaman willariy imaynachus kashasqaykita. Pedro nerqa: “Pipis wajkunata sirvin chayqa, Dios kallpata qosqanpi atienekuspa sirvichun”, nispa (1 Ped. 4:11). Ichapis hermanospa problemasninkoqa mana kay tiempopi allinchakuyta atenqachu. Jinapis yuyarikuypuni Jesucristo “kuraj michej” kasqanta. Paytaj qanmanta nisqaqa kunanpis paraisopipis hermanosta astawan yanapayta atin. Jehovaqa kay imasta ancianos ruwanankuta munan: hermanosta munakunankuta, paykunata cuidanankuta, hermanos yachakunankupaj jinataj kausakunankuta.

15. ¿Imatá uj anciano ruwan hermanosta cuidananpaj? (Fototawan qhawariy).

¹⁵ Williamqa unayña anciano, paypajtaj may sumajpuni Jehovaj ovejitasninta cuiday. Coronavirus onqoy qallarejtin, paywan congregacionninmanta waj ancianoswanqa nerqanku gruposninkumanta hermanosta sapa semana wajyarinankuta. ¿Imajtín chayta ruwanankuta nerqanku? Pay nin: “Ashkha hermanosqa sapitallanku wasinkupi kasharqanku, chayraykutaj facilta llakikuyta atinkuman karqa”, nispa. Uj  hermano problemasniyoj kajtin, Williamqa sumajta uyariyta yachan, ajinamanta imatachus necesitasqanta, imachus llakichishasqantapis sutʼita yachananpaj. Chaymantataj chay hermanota yanapananpaj jina uj yachaqanata maskʼan, astawanqa Internetpi paginanchejmanta uj videota. William nillantaj: “Hermanostaqa ni jaykʼaj jina kunan astawan cuidana tiyan. Runasta Jehovata rejsinankupaj yanapanapajqa mayta kallpachakunchej. Hermanosta cuidanapajpis ajinallatataj kallpachakunanchej tiyan. Ajinamanta hermanosninchej Jehovata sirvinallankupajpuni”, nispa.

16. ¿Imaynatá Pedroj cartasninpi yachakusqanchejman jina ruwasunman?

¹⁶ Kay yachaqanapeqa Pedroj iskaynin cartasninmanta wakin imasllata yachakunchej. Ichapis sapa ujninchej reparanchej wakin imaspi astawan kallpachakunanchej kasqanta. Paraisopi imayna sumaj kausaychus kananpi, ¿astawanchu tʼukuriyta munanchej? ¿Trabajopi, colegiopi chayri waj lugarpi predicarinanchejtachu nikunchej? ¿Piensarinchejchu imaynasmantawanchus hermanosninchejta mayta munakusqanchejta rikuchinapi? Anciano kanki chay, ¿munankichu Jehovaj ovejitasninta tukuy sonqo, sumajtataj cuidayta? Chay tapuykunapi piensarishaspa sichus reparanchej wakin imitaspi mana allintachu ruwashasqanchejta chayqa, ama desanimakunachu. Yuyarikuna “Señor kʼachapuni kasqanta”, paytaj yanapawasun aswan sumajta ruwanapaj (1 Ped. 2:3). Pedro kayta niwanchej: “Diosqa qankunata wakichiyta tukuchanqa. […] Paymin sinchʼita sayachisonqachej, kallpachasonqachej, sumaj cimientopitaj sayachisonqachej”, nispa (1 Ped. 5:10).

17. ¿Ima premiotataj japʼisun mana saykʼuspa, Jehová wakichinawanchejtataj saqespa?

¹⁷ Uj kutipi Pedroqa mana Diospa Wawanpa ñaupaqenpi kananpaj jinachu kasqanta yuyakorqa (Luc. 5:8). Jehovawan Jesuswan munakuywan yanapasqankuraykutaj, Pedroqa mayta kallpachakorqa Cristota qhatinallanpajpuni. Chayraykutaj “Señorninchej, Salvawajninchej Jesucristoj wiñay Gobiernonman” yaykunña (2 Ped. 1:11). Chayqa may sumajpuni. Noqanchejpis Pedro jina mana saykʼusunchu chayqa, saqesuntaj Jehová wakichinawanchejta chayqa, wiñay kausayta uj premiota jina japʼisun, ajinamanta ‘creesqanchejrayku salvacionta’ tarisun (1 Ped. 1:9).