1. ¿Imatá Pedro Jesusman nerqa uj milagronejta ashkha pescadosta japʼiytawan?

 PEDROQA tutantin pescaspa ni uj pescadollatapis japʼisqachu. Jesustaj payta nerqa: “Canoaykita aswan ukhunejman apay, chantá chʼipasniykichejta yakuman wijchʼuykuychej pescadosta japʼinaykichejpaj”, nispa (Luc. 5:4). Pedroqa Jesús chayta nejtin, mana creerqachu pescadosta japʼinanta, jinapis payta kasorqa. Ajinamantataj may chhika pescadosta japʼerqanku, chʼipasninkupis llikʼirakusharqaña. Pedrowan, paywan kasharqanku chaykunawanqa, repararqanku Jesús uj milagrota ruwashasqanta, ‘maytataj tʼukorqanku’. Chayrayku Pedroqa Jesusta nerqa: “Señor, karunchakuy noqamanta, juchasapa kani”, nispa (Luc. 5:6-9). Pedroqa mana Jesuswan kananpaj jinallapischu kasqantasina yuyakorqa.

2. ¿Imaynatá Pedromanta yachakuy yanapawanchej?

² Pedroqa “juchasapa kani” nispa kajllata nisharqa. Bibliaqa nin Pedro wakin kutis imatachus nisqanmanta, chayri ruwasqanmanta pesachikusqanta. ¿Noqanchejpis Pedro jinachu wakin kutis sientekunchej? Unayñachu kallpachakushanchej uj imapi aswan sumaj cristiano kananchejpaj, uj mana allin imatataj atipananchejpaj. Jina kajtenqa ama desanimakunachu. Pedroj kausayninmanta yachakuy mayta yanapawasunman. Kaypi piensarina: Jehovaqa Pedroj pantasqasninta mana Bibliapi qhelqachinmanchu karqa. Jinapis noqanchej chaymanta yachakunanchejpaj qhelqacherqa (2 Tim. 3:16, 17). Pedro noqanchej jinallataj imasta atipananpajchus mayta kallpachakusqanta yachayqa, reparachiwanchej Jehovaqa mana perfectos kananchejtachu suyasqanta. Payqa munan wakin imaspi pantajtinchejpis, mana saykʼuspa kallpachakunallanchejtapuni.

3. ¿Imajtintaj mana saykʼupunachu tiyan?

³ ¿Imajtintaj mana saykʼuspa kallpachakunallanchejpuni tiyan? Imata ruwanapajpis kallpachakunchej chayqa, chayta sumajta ruwayta  yachakunchej. Kaypi piensarina: Pillapis charangota sumajta tocayta yachakunanpajqa watasta practicanan tiyan. Chay practicasqan tiempopitaj ashkha kutista pantanqa, jinapis practicallajtinpuneqa aswan sumajta tocanqa. Chantapis sumajta tocayta yachaspañapis, wakin kutisqa ichá pantanqaraj. Jinapis mana chayraykuchu tocayta saqeponqa, astawanqa practicallanqapuni. Noqanchejwanpis kikillantaj. Uj imata atipasqanchejtaña yuyajtinchejpis, ichá watejmanta chaypi urmasunmanraj. Chaywanpis kallpachakullanchejpuni. Tukuypis wakin kutis imatachus ruwasqanchejmanta chayri nisqanchejmanta pesachikunchej. Jinapis mana saykʼupusunchu chayqa, Jehovaqa yanapallawasunpuni mejoranapaj (1 Ped. 5:10). Qhawarina Pedro mana saykʼuspa kallpachakullasqantapuni. Pedro pantajtinpis, Jesusqa paymanta khuyakorqa. Chayta yachaytaj noqanchejtapis yanapawanchej Jehovata sirvinallapajpuni.

4. Lucas 5:5-10 nisqanman jina, ¿imatá Pedro pay kikinmanta nerqa, chanta imaynatá Jesús sonqonta tiyaykucherqa?

⁴ Bibliaqa mana willanchu imaraykuchus Pedro “juchasapa kani” nispa nisqanta, nillataj ninchu chayta nishaspa ima juchasta ruwasqanpichus piensashasqanta (Lucas 5:5-10 leey). Payqa ichá jatuchaj juchaspi urmarqa. Jesustaj repararqa Pedro manchachikusqanta, ichapis Pedro pisipaj qhawakusqanrayku. Jinapis yachallarqataj Pedroqa sinchʼi sayasqa kayta atinanta. Chayrayku kʼachallamanta nerqa: “Amaña manchachikuychu”, nispa. Jesús Pedropi atienekusqanqa, Pedrota yanaparqa kausayninta cambiananpaj. Paywan hermanon Andreswanqa aswan qhepaman, pescado negocionkuta saqepuytawan, Mesiaspa qhepallantaña rerqanku. Chayta ruwasqankuraykutaj tʼukuna bendicionesta japʼerqanku (Mar. 1:16-18).

5. ¿Ima bendicionestataj Pedro japʼerqa manchikuyninta atipasqanrayku?

⁵ Pedroqa Cristoj discipulon kasqanrayku tʼukuna imasta rikorqa. Payqa Jesusta rikorqa onqosqasta sanoyachisqanta, supaykunata qharqosqanta, wañusqastapis kausarichisqanta (Mat. 8:14-17; Mar. 5:37, 41, 42). b Chantapis Pedroqa Jesusta waj jina rijchʼayniyojman tukojtin, Diospa Gobiernonpi Reyta jinaña rikorqa. Chay rikusqantataj nichá ni jaykʼaj qonqakorqachu (Mar. 9:1-8; 2 Ped. 1:16-18). Pedroqa manachus Jesuspa discipulonman tukunman karqa chayqa, ni jaykʼaj chay imasta rikunmanchu karqa. Payqa ni imapaj sirvisqanta yuyaspapis, Jesuspa qhepanta rillarqapuni. Maytachá kusikorqa chayrayku ashkha bendicionesta japʼisqanmanta.

6. ¿Imajtintaj Pedro wakin imasta atipananpaj kallpachakunallanpuni karqa?

 ⁶ Pedroqa tukuy chayta rikuspapis uyarispapis, kallpachakunallanpuni karqa wakin imasta atipananpaj. Qhawarina imaspichus kallpachakusqanta. Jesusqa uj pacha discipulosninman nerqa, Bibliaj profeciasnin nisqanman jina sufrinanpuni kasqanta, wañuchisqapunitaj kanan kasqanta. Pedrotaj chayta uyariytawan payta kʼamerqa (Mar. 8:31-33). Ashkha kutispitaj Pedrowan chay waj apostoleswanqa, mayqenninkuchus kurajpaj qhawasqa kasqankumanta siminakorqanku (Mar. 9:33, 34). Jesusta wañucherqanku chay ñaupaj chʼisin, Pedroqa uj runaman correykuspa ninrinta mururparerqa (Juan 18:10). Chantapis Pedroqa chay chʼisillataj, manchachikusqanrayku kinsa kutipi amigon Jesusta mana rejsisqanta nerqa (Mar. 14:66-72). Chaymantataj sonqo nanayta waqarikorqa (Mat. 26:75).

7. Jesús kausarimuytawan, ¿imata ruwanantataj Pedrota saqerqa?

⁷ Pedroqa manchay desanimasqa kasharqa, Jesustaj mana saqerparqachu. Payqa kausarimuytawan, saqerqa Pedro payta munakusqanta rikuchinanta. Chayrayku ovejitasninta kʼumuykukoj sonqowan michipunanta nerqa (Juan 21:15-17). Pedrotaj wakichisqa kasharqa chayta ruwananpaj. Chayrayku payqa Pentecostés pʼunchaypi Jerusalenpi kasharqa, espíritu santowan ñaupajta ajllasqa karqanku chaykunamanta ujnintaj karqa. 

8. ¿Imapitaj Pedro mayta pantaykorqa Antioquiapi?

⁸ Pedroqa ajllasqa cristianoña kaspapis, wakin imasta atipananpaj kallpachakunallanpuni karqa. 36 watapi Pedroqa rikorqa Cornelio sutiyoj runa espíritu santota japʼisqanta. Payqa mana judiochu karqa, nitaj circuncidasqachu. Chaypi sutʼi reparakorqa “Diosqa tukuy runasta uj rejllata qhawasqanta”, waj nacionesmanta runastaj cristianosman tukuyta atisqankuta (Hech. 10:34, 44, 45). Chaymantapacha Pedroqa mana judío kajkunawan mikhullajña, chaytataj ñaupajtaqa ni jaykʼaj ruwarqachu (Gál. 2:12). Jinapis wakin judío cristianosqa, yuyarqanku mana judío kajkunaqa judioswan mana mikhunankuchu kasqanta. Ajinata yuyaj cristianos Antioquiaman chayajtinkutaj, Pedroqa mana judío hermanosninwan niña mikhorqachu. Ichapis Pedroqa chayta ruwarqa judío cristianosta phiñachiyta manchachikusqanrayku. Apóstol Pablotaj puraj uya kasqanta rikuspa, Pedrota tukuypa ñaupaqenpi kʼamerqa (Gál. 2:13, 14). Pedrotaj ajinata pantaspapis ñaupajllamanpuni rerqa. ¿Imataj chaypaj yanaparqa?

9. Juan 6:68, 69 nisqanman jina, ¿imatá Pedro ruwarqa?

⁹ Pedroqa ni imarayku Jesusmanta kacharikorqachu. Payqa ima kajtinpis Jesusta qhatillarqapuni. Uj pacha ajina kasqanta sutʼita rikucherqa, maypachachus Jesuspa nisqanta discipulosnin mana entienderqankuchu chaypacha (Juan 6:68, 69 leey). Ashkhasqa Jesusta mana tapuspalla, nitaj sutʼinchananta suyaspalla payta saqerparerqanku. Pedrotajrí mana chaytachu ruwarqa. Payqa tukuypa ñaupaqenpi Jesusman nerqa: “Nisqasnillayki wiñay kausayman pusan”, nispa.

10. ¿Imaynamantá Jesús rikucherqa Pedropi atienekusqanta? (Dibujotawan qhawariy).

¹⁰ Jesusqa ni jaykʼaj Pedrota saqerparqachu. Payqa uj chʼisillatawanña kay jallpʼapi kanan kashajtin, yacharqaña Pedropis waj apostolespis payta saqerparinankuta. Jinapis Jesusqa Pedroman nerqa sutʼita yachasqanta pay kutirikunanta, Jehovatataj kasukunallantapuni (Luc. 22:31, 32). Jesusqa yacharqa “runaqa cheqa kajtapuni ruwayta” munasqanta, “cuerpontajrí mana chaypaj jinachu” kasqanta (Mar. 14:38). Chayrayku Pedro payta mana rejsisqanta nejtinpis, Jesusqa mana nerqachu ni jaykʼaj kutirikunanta. Kausarimuytawantaj, Pedroman sapallanpisina rikhurerqa (Mar. 16:7; Luc. 24:34;  1 Cor. 15:5). Chaytaj maytachá Pedrota kallpacharqa.

11. ¿Imaynatá Jesús Pedroman rikucherqa Jehová cuidanantapuni?

¹¹ Jesusqa Pedroman sutʼita rikucherqa Jehová cuidanantapuni. Jesusqa kausarimuytawan Pedrota chay waj apostolestawan uj milagronejta yanaparqa, ashkha pescadosta japʼinankupaj (Juan 21:4-6). Chay milagrotaj Pedroman sutʼitachá rikucherqa, Jehovaqa tukuy ima necesitasqanta qoyta atisqantapuni. Ichapis chaypi Pedro yuyarikorqa imatachus Jesús Jehovamanta nisqanta. Jesusqa nerqa Jehovaqa ‘ñaupajta Diospa Gobiernonta’ maskʼajkunata cuidanantapuni (Mat. 6:33). Pedroqa chayta yachasqanrayku, predicayta kausayninpi ñaupajman churarqa, manataj pescado negociontachu. Pedroqa Pentecostés 33 watapi, mana manchachikuspa runasman willararqa, chaytaj ashkha runasta yanaparqa sumaj willaykunata tukuy sonqo japʼikunankupaj (Hech. 2:14, 37-41). Aswan qhepamantaj ashkha samaritanosta, mana judiosta ima yanaparqa Cristoj discipulosninman tukunankupaj (Hech. 8:14-17; 10:44-48). Sutʼita reparanchej Jehovaqa Pedromanta mayta valekusqanta, tukuy laya runasta llajtanman pusamunanpaj.

12. Imatapis unaytaña atipayta munashanchej chay, ¿imaynatá Pedroj kausaynin yanapawanchej?

¹² Jehovaqa noqanchejtapis yanapawasunman mana saykʼunapaj. Chaytaj wakin kuteqa mana atikullanmanchu, astawanraj imata atipanapaj unaytaña kallpachakushanchej chayqa. Ichapis yuyasunman imastachus atipayta munasqanchejqa, Pedrojmanta nisqaqa aswan mana atipay atinaraj kasqanta. Chaywanpis Jehová kallpata qoyta atiwanchej ñaupajman rinallapajpuni (Sal. 94:17-19). Uj hermanomanta parlarina. Niraj Jehovata rejsishajtin, paymanqa qhari masisnillantaj gustaj, ajinatataj ashkha watasta kausakorqa. Chay kausayninta qʼalata cambiajtinpis, wakin kuteqa sajra munaykunasnin umanman jamojrajpuni. ¿Imataj payta yanaparqa mana sajra munayninwan atipachikunanpaj? Pay nin: “Jehová kallpata qowanchej”, nispa. Nillantaj: “Jehovaj espiritunpa yanapayninwanqa, […] Jehová munasqanman jina kausakuyta atisqanchejta yachakuni. Jehovaqa saqewan payta sirvinayta […]. Ashkha imaspi pantajtiypis, payqa kallpachallawanpuni”, nispa.

13. ¿Imaynatá Pedro jina ruwasunman? (Hechos 4:13, 29, 31; fototawan qhawariy).

¹³ Yachakunchej jina, Pedroqa ashkha kutispi runata manchachikusqanrayku pantarqa.  Jinapis Jehovamanta yanapata mañakorqa, manchikuynintataj atiparqa (Hechos 4:13, 29, 31 leey). Noqanchejpis manchikuyninchejta atipayta atisunman. Horst sutiyoj hermanomanta parlarina. Payqa joven kashaspa Alemaniapi nazis kamachishajtinku kausakorqa. Colegiopi kashajtenqa, manchachikusqanrayku ashkha kutispi saludarqa Heil, Hitler nispa. Chayqa niyta munan “Hitler salvawasun”, chayrayku chayta neyqa mana allinchu karqa. Tatasnintaj payta kʼaminankumantaqa, paywan khuska Jehovamanta mañakorqanku mana manchachikunanpaj kallpata qonanta. Tatasnin yanapasqankurayku, Jehovapitaj atienekusqanrayku, Horstqa tiempowan kallpata japʼerqa Jehovata kasukunanpaj. Aswan qhepamantaj nerqa: “Jehovaqa ni jaykʼaj saqerpawarqachu”, nispa. c 

14. Llakisqa kaj hermanosta, ¿imaynatá ancianos kallpachankuman?

¹⁴ Jehovawan Jesuswanqa yachanku mejorayta atisqanchejta. ¿Imatataj Pedro ruwarqa Jesusta mana rejsisqanta niytawan? ¿Manañachu kallpachakorqa? Chayri, ¿Cristoj discipulollanpunichu karqa? Jesusqa Jehovamanta mañakusqaña Pedroj creeynin mana pisiyananpaj. Chaymantataj Pedroman nerqa paypaj Diosmanta mañapusqanta, manataj iskayrayasqanta aswan qhepaman hermanosninta kallpachananmanta (Luc. 22:31, 32). Pedroqa Jesuspa chay nisqasninta yuyarikuspa, maytachá kallpachakorqa. Noqanchejpis kausayninchejpi jatuchej imasta ajllananchej kanqa. Chay kutispitaj ichapis Jehovaqa ancianosnejta munakuywan kallpachawasun paymanta mana karunchakunanchejpaj (Efe. 4:8, 11). Paulqa ashkha watasña anciano, maytataj kallpachakun wajkunata sonqocharinanpaj. Uj hermano niña ñaupajman riyta atisqanta yuyajtin, payqa yuyarichin  imaraykuchus Jehová llajtanman pusamusqanta. Chantapis payman nin Jehovaqa payta munakusqanrayku ni jaykʼaj saqerparinanta. Paul nin: “Rikuni imaynatachus ashkha llakisqa hermanos Jehovaj yanapanwan ñaupajman rillasqankutapuni”, nispa.

15. ¿Imaynatá Pedroj kausayninpi, hermanonchej Horstpa kausayninpiwan reparanchej Mateo 6:33 juntʼakusqantapuni?

¹⁵ Reparanchej jina, Jehovaqa apóstol Pedroman, waj apostolesmanpis imatachus necesitasqankuta qorqapuni. Noqanchejmanpis necesitasqanchejta qollawasuntaj paytapuni ñaupajman churasun chayqa (Mat. 6:33). Segunda Guerra Mundial pasayta, Horstqa precursor regular kayta munarqa. Jinapis payqa may pobre karqa, chayraykutaj yuyarqa mana qolqewan alcanzachikunanta precursor kajtin. ¿Imatá ruwarqa? Jehovata pruebaman churarqa, congregacionesta waturej hermano visitarishajtintaj, semanantinta predicaj rerqa. Semana tukukushajtintaj, waturej hermanoqa uj papelsitupi payman qolqeta jaywarqa, nitaj yachakorqachu pichus chay qolqeta apachisqanta, chayraykutaj tʼukupacha qhepakorqa. Chay qolqeqa ashkha killasta precursor kayta atinanpaj jina kasqa. Horstqa chaypi repararqa Jehovaqa payta cuidanantapuni. Chaymantapachataj, Diospa Gobiernonmanta willayta kausayninpi ñaupajman churarqa (Mal. 3:10).

16. ¿Imajtintaj Pedromanta, cartasninmantapis estudiananchej tiyan?

¹⁶ Pedroqa maytachá kusikorqa Jesús mana paymanta karunchakusqanmanta, “karunchakuy noqamanta” nishajtinpis. Cristoqa Pedrota wakichillarqapuni sumaj apóstol kananpaj, waj cristianospis paymanta yachakunankupaj. Noqanchejpis Jesús Pedrota wakichisqanmanta ashkha sumaj imasta yachakusunman. Pedroqa chaykunamanta wakinta, waj imastawan iskay cartasninpi qhelqarqa, chaykunatataj ñaupa tiempomanta cristianosman apacherqa. Qhepan yachaqanapi chay cartasmanta wakin imasta yachakusun, imaynatachus chayman jina ruwanatapis.