1, 2. ¿Imaraykutaj allin kanman Sansonpa kausayninmanta estudiay?

 SANSONMANTA parlajta uyarispa, ¿imataj yuyayninchejman jamun? ¿May kallpasapa kasqancharí? Arí, payqa may kallpasapa runapuni karqa. Jinapis uj kuti pantarqa, chayraykutaj may llakiypi rikhurerqa. Jehovatajrí, Sansón tukuy kausayninpi sinchʼi creeyniyoj kasqanta astawan qhawarqa. Chaytataj Jehovaqa Bibliapi qhelqacherqa, noqanchej paymanta yachakunanchejpaj.

² Jehovaqa Sansonnejta tʼukuna imasta ruwarqa llajtan Israelrayku. Sansón wañupusqanmanta may chhika watasninmantaj, Jehovaqa apóstol Pablota yuyaycharqa Sansonpa sutinta creeyniyoj kajkunamanta qhelqashaspa churananpaj (Heb. 11:32-34). Sansonqa tukuy imapipuni Jehovapi atienekoj. Kay yachaqanapi qhawarisun, imatachus Sansonmanta yachakusqanchejta, imaynatachus kausaynin yanapawasqanchejtapis.

3. ¿Imata ruwananpajtaj Jehová Sansonta ajllarqa?

³ Sansón nacekushajtin, filisteosqa israelitasta mandonkupi japʼisharqanku, maytataj ñakʼarichisharqanku (Jue. 13:1). Filisteosqa manchay sajraspuni kasqankurayku, israelitasta mayta sufrichisharqanku. Ajinata sufrichishajtinku, Jehovaqa Sansonta ajllarqa ‘israelitasta filisteospa makisninkumanta salvayta qallarinanpaj’ (Jue. 13:5). Chayta ruwaytaj mana atinapaj jinallachu karqa, chayrayku Sansonqa Jehovapi atienekunan karqa.

4. ¿Imaynatá Jehová Sansonta yanaparqa? (Jueces 15:14-16).

⁴ Qhawarina imaynatachus Sansón uj pacha Jehovapi atienekusqanta. Chay kutipi may chhika filisteo soldadosqa Lehí jallpʼaman  rerqanku Sansonta japʼinankupaj. Chay jallpʼaqa ichapis Judapi karqa. Judapi kaj runastaj maytapuni mancharikorqanku. Chayrayku paykunaqa israelita masisnillantaj kaspapis, Sansonta iskay mosoj waskhaswan sumajta wataykuspa, filisteospajman aparqanku (Jue. 15:9-13). “Jehová Diospa espirituntaj Sansonman atiyta qorqa”, ajinamanta Sansonqa chay waskhasta pʼitirarqa. “Chantá Sansonqa manaraj allin chʼakisqa burro quijadata tarispa, chaywan wañuracherqa 1.000” filisteosta (Jueces 15:14-16 leey).

5. ¿Imaynatá Sansón Jehovapi atienekusqanta rikucherqa?

⁵ ¿Imaraykutaj Sansón burro quijadallawan maqanakorqa? Burro quijadawanqa mana pipis maqanakunchu. Payqa yacharqa Jehovapi atienekunan kasqanta, manataj imawanchus maqanakunanpichu. Payqa Jehovaj munayninta ruwananpaj imatachus tarisqallanwan maqanakorqa. Jehovapi atienekusqanraykutaj allin rerqa.

6. ¿Imatá yachachiwanchej Sansonpa kausaynin?

⁶ Jehovaqa noqanchejmanpis kallpata qollawasuntaj, ima ruwaytachus llajtanpi japʼinchej chayta ruwanapaj, chayta ruway mana atinapaj jinallachu kajtinpis. Payqa tʼukunapaj jina yanapawasunman. Jehovapi atienekusun chayqa, pay yanapawasun munayninta juntʼanapaj, Sansonman jinataj kallpata qowasun (Pro. 16:3).

7. ¿Imataj rikuchiwanchej Jehovaj yanapaynintapuni maskʼana kasqanta?

⁷ Jehovata yupaychanapaj wasista ruwaypi yanapakoj ashkha hermanosqa, Jehovapi atienekusqankuta rikuchinku. Ñaupaj watasqa, Tantakuna Wasista, waj wasistapis ruwanapaj, Diospa llajtanpuni planosta ruwaj, chaykunatataj sayarichej. Pero Jehovaj llajtan wiñasqanrayku, waj jinamantañataj ruwakunan karqa. Ñaupajman apaj hermanosqa, Jehovaj yanapayninta mañakuytawan waj jinasmanta ruwayta qallarerqanku. Paykunaqa wasistaña ranterqanku, chaykunatataj allinchallarqankuña. Robertmanta parlarina, payqa kay qhepa wataspi mundontinmanta ashkha lugarespi construccionpi yanapakorqa. Pay nin: “Qallariypeqa uj jinamantañataj ruwakushasqanman  mana yachaykukuyta atillarqaykuchu. Sumaj yachasqaña karqayku ñaupajta ruwarqayku ajinaman, may chhika watastaña ajinata ruwasqaykurayku. Pero hermanosqa waj jinamanta ruwakusqanman tukuy sonqo yachaykukorqanku. Sutʼi reparaytaj karqa Jehová chayta bendecishasqan”, nispa. Chayqa sutʼita rikuchiwanchej Jehovaqa llajtanta yanapashasqanta munayninta juntʼananpaj. Noqanchejpis sapa kuti kaypi piensarisunman: “¿Jehovaj yanapaynintapunichu maskʼani? ¿Kallpachakunichu waj jinamanta ruwakusqanman yachaykukunaypaj?”.

8. ¿Imatá Sansón ruwarqa yakumanta chʼakichikuspa?

⁸ Ichapis yuyarikunchej imastawanchus Sansón ruwasqanta. Uj kuti uj león payman chimpaykojtin makisnillanwan chay leonta wañurpacherqa. Chaymantataj Asquelonpi 30 filisteosta wañuracherqa (Jue. 14:5, 6, 19). Sansonqa yacharqa tukuy chaytaqa mana sapallanmantachu ruwasqanta, manaqa Diosninpa yanapaynillanwan. Jehovapi atienekusqanqa sutʼi yachakorqa 1.000 filisteosta wañuchiytawan, yakumanta mayta chʼakichikojtin imatachus ruwasqanpi. Paylla yakuta maskʼakunanmantaqa Jehovamanta yanapata mañakorqa (Jue. 15:18).

9. ¿Imaynatá Jehová Sansonpa mañakuyninman kuticherqa? (Jueces 15:19).

⁹ ¿Imaynatá Jehová Sansonpa mañakuyninman kuticherqa? Uj milagronejta yakuta phullchichimuspa. “Sansontaj chay yakuta tomaspa watejmanta kallpata japʼerqa, kutirikorqataj” (Jueces 15:19 leey). Ashkha watasninman, Jehová profeta Samuelta Jueces librota qhelqananpaj yuyaychashajtin, chay yaku jutureqa kakushallarqapunisina. Ichapis israelitasqa chay yaku juturita rikuspa, yuyarikoj kanku Jehovapi atienekojtinku, payqa yanapanantapuni.

10. ¿Imatá ruwananchej tiyan Jehová yanapanawanchejpaj? (Fotostawan qhawariy).

¹⁰ Noqanchejpis Sansón jinallataj Jehovaj yanapanta maskʼananchej tiyan. Imata ruwayta yachaspapis, chayri ashkha imaynasmantaña payta sirvispapis, tukuy necesitanchej paypa yanapayninta. Llampʼu sonqos kananchej tiyan, reparakunataj tiyan Jehovapi atienekojtillanchej allin rinawanchejta. Sansonqa watejmanta kallpata japʼerqa Jehovaj qosqan yakuta tomaspa. Noqanchejpis Sansón jinallataj imastachus Jehová qowanchej tukuy chayta japʼikusun chayqa, creeypi sinchʼi sayasqa kasun (Mat. 11:28).

11. ¿Imatá ruwananchej tiyan Jehovawan yanapachikunapaj? Uj qhariwarmimanta parlariy.

¹¹ Alexeimanta parlarina. Payqa Rusiamanta, chay nacionpi qhatiykachay kasqanraykutaj paypis sinchʼi qhatiykachasqallataj kashan. ¿Imataj payta yanapan aguantananpaj? Paywan warminwanqa mana saqespa Bibliata estudianku, Jehovapaj ruwanasninkutataj ruwanku. Alexéi nerqa: “Tukuy atisqayta kallpachakuni sapallaypi Bibliata estudianaypaj, sapa diataj Bibliata leenaypaj. Chantapis sapa paqarin warmiywan noqawanqa, sapa día estudianapaj textota leeyku, Jehovamantataj khuska mañakuyku”, nispa. ¿Imatá paykunamanta yachakunchej? Paykuna jina Jehovapipuni atienekuna, amataj noqallanchejpichu. Chayrayku sinchʼi creeyniyoj kanapajqa, Bibliata estudiananchej tiyan, orakunanchej tiyan, tantakuykunaman, predicacionmanpis rinanchejpuni tiyan. Tukuy chayta ruwasun chayqa, Jehovaqa mayta bendeciwasun, yanapawasuntaj payta sirvikunallapajpuni. Imaynatachus Sansonman kallpata qorqa, ajinallatataj noqanchejmanpis kallpata qowasun.

12. ¿Imaraykutaj Sansón Dalilawan sonqonta suwachikusqan mana allinchu karqa?

¹² Sansonqa noqanchej jinallataj pantaj runa kasqanrayku, wakin kutisqa pantarqa. Uj pacha Jehovaj nisqanta mana kasusqanrayku pantarqa, chayraykutaj may llakiypi rikhurerqa. Unaysitutaña juez kashajtin, “Sansonqa Sorec mayumanta Dalila sutiyoj warmiwan sonqonta suwachikorqa” (Jue. 16:4). Niraj Dalilata rejsishaspa payqa uj filistea warmiwan casarakuyta munarqa. Bibliataj nin “chayqa Jehová Diospa wakichisqan kasqanta. Diosqa maskʼasharqa imaynallamantapis filisteospa contrankupi maqanakuyta”. Chay qhepatataj Sansonqa filisteospa Gaza llajtankuman rispa, uj khuchi warmej wasinpi qhepakorqa. Chay kutipi Jehovaqa Sansonman kallpata qorqa chay llajtaj punkusninta orqhorananpaj, ajinamanta niña sumaj jarkʼasqachu kananpaj (Jue. 14:1-4; 16:1-3). Pero Dalilawan sonqonta suwachikuspaqa mana allintachu ruwarqa. Paywan casaraspaqa manaña filisteoswan maqanakuyta atinmanchu karqa, imaraykuchus Dalilaqa israelitasina karqa.

13. ¿Imatá Dalila ruwarqa Sansonta chʼaukiyananpaj?

¹³ Filisteosqa munarqanku Dalila Sansonta chʼaukiyananta. Chaypajtaj ashkha qolqeta paganankuta nerqanku, Dalilataj munallarqa. Chantá, ¿imajtín Sansón mana reparanmanchu karqa Dalila chʼaukiyayta munashasqanta? Ichapis mayta munakusqanrayku. Jina kajtinpis manapis, Dalilaqa kutin kutita Sansonta taporqa maymantachus kallpan jamusqanta, Sansontaj willallarqaña. Chayrayku Sansonqa uj tiempota kallpanta pierderqa, Jehovapis niña allinpajchu qhawarqa (Jue. 16:16-20).

14. ¿Imapitaj Sansón rikukorqa Dalilapi atienekusqanrayku?

¹⁴ Sansonqa Jehovapi atienekunanmanta,  Dalilapi astawan atienekorqa. Chayraykutaj may llakiypi rikhurerqa. Filisteosqa Sansonta japʼispa ñawisninta orqhorarqanku. Chaymantataj Gazaman aparqanku, chaypi carcelman wisqʼaykuspataj esclavota jina trabajacherqanku molino rumita muyuchichispa. Chay llajtaqa Sansón punkusninta orqhorarqa chay llajtallataj karqa. Chantá filisteosqa uj fiestata ruwarqanku. Chaypitaj Diosninku Dagonman jaywanasta jaywarqanku, Sansonta pay makisninkuman jaywaykusqanta yuyaspa. “Sansontaqa carcelmanta orqhomorqanku paymanta asikunankupaj”, nisunman asipayaspa kʼumuykachachinankupaj (Jue. 16:21-25).

15. ¿Imajtín nisunman Sansón watejmanta Jehovapi atienekusqanta? (Jueces 16:28-30; tapapi dibujota qhawariy).

¹⁵ Sansonqa mayta pantaspapis Jehovata sirvillarqapuni. Jehovaqa filisteoswan maqanakunanta munarqa, Sansontaj chayta ruwaytapuni munarqa (Jueces 16:28-30 leey). Chayrayku Jehovamanta kay jinata mañakorqa: ‘Kallpata qoway ari, filisteoswan pagachikunaypaj’, nispa. Diostaj chay mañakusqanta uyarerqa, kallpatataj watejmanta qorqa. Ajinamanta Sansonqa tukuy kausayninpi filisteosta wañuchisqanmanta nisqaqa, astawanraj chay kutipi wañuracherqa.

16. ¿Imatá Sansonmanta yachakunchej?

¹⁶ Sansón pantasqanrayku llakiypi rikhurejtinpis, Jehovaj munayninta juntʼananpaj kallpachakullarqapuni. Ichá noqanchejpis pantasqanchejrayku cheqanchasqa kasun, chayri uj ruwayta pierdesun. Jinapis Jehovata sirvinallanchejpuni tiyan. Kayta yuyarikuna: Jehovaqa perdonanawanchejpaj wakichisqa kashan (Sal. 103:8-10). Pantajtinchejpis, Jehovaqa Sansonman jina atiyta qowasun munayninta ruwanapaj.

17, 18. ¿Imaraykutaj Michaelpa kausaynin kallpachasunki? (Fotostawan qhawariy).

¹⁷ Michael sutiyoj joven hermanomanta parlarina. Payqa siervo ministerial karqa, precursor regulartaj, chantapis tukuy atisqanta Jehovapaj llankʼasharqa. Jinapis juchapi urmarqa, chayraykutaj congregacionpi ruwanasninta pierderqa. Pay nin: “Chay kutikamaqa Jehovapaj tukuy atisqayta ruwasharqani. Jinallapi niña ni imata Jehovapaj ruwayta aterqanichu. Yacharqani Jehová mana saqerparinawanta. Jinapis piensarej kani ñaupajta jina Jehovaj sumaj amigon kayta atinaytachus manachus, congregacionpipis ñaupajta jina ruwanasniyoj kayta atinaytachus manachus”, nispa.

¹⁸ Jinapis Michaelqa ñaupajllamanpuni rerqa.  Pay nin: “Jehovaman astawan qayllaykunaypaj kallpachakorqani. Chaypajtaj tukuy sonqo Jehovamanta mañakoj kani, estudiaj kani, chaypitaj tʼukurej kani”, nispa. Tiemponman Michaelqa watejmanta congregacionpi ruwanasninta japʼerqa. Kunanqa anciano, precursor regulartaj. Pay nin: “Hermanos, astawanraj ancianos yanapariwasqanku, kallpachariwasqankupis reparachiwarqa Jehová munakullawasqantapuni. Kunanqa watejmanta Jehovata llimphu sonqowan sirviyta atini. Chantapis kunanqa sutʼita reparani, Jehovaqa pillatapis perdonayta atisqanta sichus tukuy sonqo arrepientekun chayqa”, nispa. Noqanchejpis Michael jinallataj sutʼita yachanchej, juchapi urmajtinchejpis Jehovapaj watejmanta llankʼayta atisqanchejta, bendicionesnintataj japʼinanchejta. Pero chaypajqa tukuy atisqanchejta kallpachakunanchej tiyan cambianapaj, Jehovapitaj atienekunallapajpuni (Sal. 86:5; Pro. 28:13).

19. ¿Imaynatá Sansonpa kausaynin kallpachasunki?

¹⁹ Kay yachaqanapeqa Sansón tʼukuna imasta ruwasqanmanta, wakillanmanta yachakunchej. Payqa pantaj runa kaspapis, Dalilawan sonqonta suwachikuspa mana allinta ruwaspapis, kallpachakullarqapuni Jehovata sirvinanpaj. Jehovataj mana wijchʼurparqachu, astawanpis paynejta tʼukuna imasta ruwallarqapuni. Jehovaqa sinchʼi creeyniyoj runata jinallapuni Sansonta qhawarqa. Chayrayku Hebreos 11 capitulopi kasukoj kamachisninpa sutisninkuta churachispa, Sansonpa sutintawan churacherqa. Tatanchej Jehovaqa mayta munakuwanchej, kallpatataj qoyta munawanchej, astawanraj problemaspi kashajtinchej, yanapaynintataj necesitajtinchej. Chayta yachaytaj mayta kallpachawanchej. Chayrayku Sansón jinallataj Jehovamanta mañakuna: ‘Ama jina kaspa noqamanta yuyarikuway ari. Diosníy, ama jina kaspa kallpata qoway ari’, nispa (Jue. 16:28).