1. Abrahán creeyniyoj kasqanpi piensarispa, ¿imatá tapukusunman?

 ASHKHA runasqa Abrahanmanta parlajta uyarerqanku. Jinapis casi ni mayqenninku allinta paymanta yachankuchu. Noqanchejtajrí ashkha imasta paymanta yachanchej. Yachanchej Bibliaqa Abrahanmanta kayta nisqanta: “Tukuy creejkunaj tatan”, nispa (Rom. 4:11). Jinapis ichá kayta tapukusunman: “¿Abrahán jina sinchʼi creeyniyoj kayta atiymanchu?”, nispa. Arí, atisunmanpuni.

2. ¿Imaraykutaj Abrahanmanta estudiananchej tiyan? (Santiago 2:22, 23).

² Abrahanmanta estudiayqa yanapawasun pay jina sinchʼi creeyniyoj kanapaj. Payqa Diospa kamachisqanta kasukorqapuni. Chayrayku karu llajtaman tiyakoj riporqa, ashkha watasta toldo wasisllapi tiyakorqa, munasqa wawan Isaactapis ofrendata jina payman jaywayta munarqa. Chay imasta ruwaspa sinchʼi creeyniyoj kasqanta rikucherqa. Ajina creeyniyoj kasqanrayku, ruwasqasninrayku ima Jehovaqa payta allinpaj qhawarqa, amigontaj karqa (Santiago 2:22, 23 leey). Jehovaqa munallantaj tukuy noqanchej, qanpis, ñaupaqenpi allinpaj qhawasqa kananchejta, amigosnintaj kananchejta. Chayrayku Abrahanmanta qhelqacherqa Pablowan Santiagowan. Kunanqa qhawarisunchej Romanos 4 capitulopi, Santiago 2 capitulopiwan imatachus Abrahanmanta nisqanta.

3. ¿Ima versiculoj nisqantataj Pablowan Santiagowan oqharerqanku?

³ Pablowan Santiagowanqa Génesis 15:6 versiculopi nisqanta oqharerqanku. Chaypi nin: “Abranqa Jehová Diospi creerqa.  Diostaj payta cheqan runapaj qhawarqa”, nispa. Jehová uj runata cheqan runapaj qhawasqan, ¿ima niytá munan? Chay runaj ruwasqanwan kusisqa kashasqanta, ñaupaqenpi mana juchachana kasqanta, mana juchayojtaj. Pantaj juchasapa runata Jehová Diosninchej mana juchayojta jina qhawasqanqa tʼukunapaj jinapuni. Noqanchejpis maytachá munanchej ajinallatataj Jehová qhawanawanchejta. Chaytaj atikunpuni. Qhawarina imaraykuchus Jehová Abrahanta cheqan runapaj qhawasqanta, noqanchejpis imatachus ruwananchej kasqanta kikillantataj qhawanawanchejpaj.

4. ¿Imaraykutaj mana cheqan runas kayta atinchejchu?

⁴ Pabloqa romanosman cartanpi nerqa tukuy runas juchasapas kasqanchejta (Rom. 3:23). Chanta, ¿imaynamantataj Diosta kusichiyta atinchej, ñaupaqenpitaj cheqan runaspaj qhawasqa kayta atinchej? Pabloqa Abrahanmanta parlarqa tukuy cristianosman chayta entiendechinanpaj.

5. ¿Imaraykutaj Jehová Abrahanta cheqan runapaj qhawarqa? (Romanos 4:2-4).

⁵ Jehovaqa Abrahán Canaanpi tiyakushajtin, cheqan runa kasqanta nerqa. ¿Imaraykutaj chayta nerqa? Mana Moisespa Leyninta kasukusqanraykuchu (Rom. 4:13). Chayta ninchej Israel nacionqa 400 watas kurajninmanraj chay Leyta japʼisqanrayku. Chanta, ¿imaraykutaj Jehová Abrahanta cheqan runapaj qhawarqa? Payqa Abrahanta mayta khuyakorqa, creeyninraykutaj cheqan runapaj qhawarqa (Romanos 4:2-4 leey).

6. ¿Imaraykutaj Jehová juchasapa runata cheqan runapaj qhawan?

⁶ Chantá Pabloqa sutʼincharqa uj runa Diospi creejtin, “Diosqa payta creeyninrayku cheqan runapaj” qhawasqanta (Rom. 4:5). Chantá nillarqataj: “Davidpis imayna kusikuyniyojchus uj runa kasqanmanta parlarqa, pitachus Diosqa cheqan runapaj qhawan, mana leyman jinapuni ruwajtinpis. David nerqa: ‘Kusisqa kanku sajra ruwasqasninkuta Dios perdonajtin, kusisqallataj kanku juchasninkuta Dios pampachajtin. Kusisqamin runaqa, Jehová Dios juchanta qonqayman churajtin’, nispa” (Rom. 4:6-8; Sal. 32:1, 2). Diosqa paypi creej runaspa juchasninkuta qʼalata perdonapun, pampachapun, mañana ujtawan chay juchasninkumanta yuyarikunchu. Jehovaqa creeyninkurayku paykunata cheqan runaspaj qhawan, mana juchayojta jinataj.

7. ¿Imaraykutaj nisunman ñaupa tiempomanta Diospa kamachisnin cheqan runas kasqankuta?

⁷ Diosninchej Abrahanta, Davidta, waj kamachisnintapis cheqan runaspaj qhawajtinpis, paykunaqa pantaj runasllapuni, juchasapasllapuni karqanku. Chaywanpis Diosqa paypi creesqankurayku, paykunata mana juchayojta jina qhawarqa, astawanraj payta mana yupaychaj runaswan kikinchaspa (Efe. 2:12). Pabloqa Romanosman Cartata qhelqashaspa sutʼita nerqa, Jehovaj amigosnin kanapajqa creeyniyojpuni kana kasqanta. Ajina karqa Abrahanwan Davidwan ima, noqanchejwanpis ajinallataj kanman.

8, 9. ¿Imatataj wakinkuna pantasqata yuyanku, chanta imaraykutaj?

⁸ May chhika watastaña cristiano nichikoj iglesiasta kamachejkunaqa, mana uj yuyayllaman chayayta atinkuchu, creeywan ruwasqasninchejwan ujchasqa kasqanmanta. Wakenqa ninku salvasqa kanapajqa Señorninchej Jesucristollapi creena kasqanta. Ichapis uyarerqanchej kay jinata nejta: “Jesusllata sonqoykipi japʼikuy, salvasqataj kanki”, nispa. Ichapis chayta ninku Romanos 4:6 versiculopi imatachus nisqanrayku. Chaypi Pabloqa nerqa:  “Diosqa cheqan runapaj qhawan, mana leyman jinapuni ruwajtinpis”, nispa. Wakintajrí ninku salvakunapajqa, santo lugarpaj qhawanku chay lugaresman karusta rina kasqanta, allin ruwaykunatataj ruwana kasqanta. Chaytaqa ninku ichapis Santiago 2:24 versiculopi imatachus nisqanrayku. Chaypi nin: “Uj runaqa ruwasqasninrayku cheqan runapaj qhawasqa, manataj creesqanraykullachu”, nispa.

⁹ Chay yuyasqanku mana kikinchu kasqanrayku, Bibliata estudiaj wakin runasqa ninku Pablowan Santiagowanqa mana kikintachu yuyasqankuta creeymanta, ruwasqasninchejmantawan. Paykuna nisqankuman jina, Pabloqa yuyarqa Diospa ñaupaqenpi allinpaj qhawasqa kanapajqa creeyniyojlla kana kasqanta, Santiagotaj yuyarqa allin imasta ruwana kasqanta. Uj yachayniyoj runa nerqa: “Santiagoqa mana entienderqachu imaraykuchus Pablo creeyninchejraykulla cheqan runaspaj qhawasqa kasqanchejta nisqanta, manataj ruwaykunasninchejraykuchu”, nispa. Jinapis Pablowan Santiagowanqa ajinata qhelqarqanku Jehová yuyaychasqanrayku (2 Tim. 3:16). Imaraykuchus sapa ujninku waj jinata qhelqasqankutaqa entiendeyta atillasunman. Chaypajqa imastawanchus qhelqasqankuta qhawarina.

10. ¿Ima ruwaykunamantataj Pablo astawan parlasharqa? (Romanos 3:21, 28; dibujostawan qhawariy).

¹⁰ ¿Ima ‘ruwaykunamantataj’ Pablo parlasharqa Romanos 3, 4 capitulospi? Payqa astawan parlasharqa ‘leyman jina ruwanamanta’. Chay Leytaqa Dios Moisesnejta israelitasman qorqa (Romanos 3:21, 28 leey). Wakin cristiano judiosqa, manasina entiendeyta atillarqankuchu chay Leyqa manaña valesqanta, nitaj chay Leyman jinañachu ruwananku kasqanta. Chayrayku Pabloqa Abrahanmanta parlaspa sutʼita rikucherqa, uj runaqa mana Leyman jina ruwasqanraykuchu Diospa ñaupaqenpi  allinpaj qhawasqa kasqanta, manaqa creeyninrayku. Chay nisqanmanta yachakunchej Diospiwan Cristopiwan creejtinchejqa, Diospa ñaupaqenpi allinpaj qhawasqa kayta atisqanchejta. Chayrayku chay nisqanqa maytapuni kallpachawanchej.

11. ¿Ima ruwaykunamantataj Santiago parlasharqa?

¹¹ Santiago 2 capitulopi “ruwasqasninpi” nispaqa, mana ‘leyman jina ruwanamantachu’ parlashan, mayqenmantachus Pablo parlarqa chaymanta. Santiagoqa parlasharqa sapa día imatachus uj cristiano ruwasqanmanta. Chay ruwasqanpi sutʼi rikukun uj cristiano cheqamantachus manachus Diospi creesqanta. Santiago iskay imasta nisqanta qhawarina.

12. ¿Imaynatá Santiago sutʼincharqa creeywan ruwaykunasninchejwan ujchasqa kashasqanta? (Dibujostawan qhawariy).

¹² Ñaupajta Santiagoqa nerqa cristianosqa mana wakillantachu allinpaj qhawananku kasqanta, manaqa tukuy runasta uj rejllata qhawananku kasqanta. Paykunaman sutʼita reparacherqa qhapaj runawan kʼacha kaspa, wajcha runatataj pisipaj qhawaspaqa, mana creeyniyojchu kasqankuta, creeyniyoj kasqankuta nishajtinkupis (Sant. 2:1-5, 9). Iskay kajpitaj uj runamanta parlarqa, pichus hermanonta chayri hermananta ropamanta chayri mikhunamanta pisichikushasqanta rikuspapis, mana yanaparerqachu. Chay runa creeyniyoj kasqanta nejtinpis, mana ruwaykunasninwanchu rikuchisqanrayku qhasilla karqa. Santiago nerqa: “Ajinallataj creeywanpis, manachus ruwaykunapi sutʼi yachakun chayqa, wañusqa kashan”, nispa (Sant. 2:14-17).

13. ¿Pimantataj Santiago parlarqa creeyninchejta ruwaykunasninchejwanpuni rikuchina kasqanta ninanpaj? (Santiago 2:25, 26).

¹³ Santiagoqa Rahabmanta parlarqa, nerqataj payqa ruwasqasninwan creeyniyoj kasqanta  rikuchisqanta (Santiago 2:25, 26 leey). Rahabqa Jehovamanta parlajta uyarisqanrayku, yacharqa israelitasta yanapashasqanta (Jos. 2:9-11). ¿Imatataj Rahab ruwarqa Jehovapi creesqanta rikuchinanpaj? Iskay wateqaj israelitasta pakaykorqa mana wañuchisqa kanankupaj. Chayrayku Rahabqa Abrahán jinallataj cheqanpaj qhawasqa karqa, pantaj warmi kajtinpis, nitaj israelitachu kajtinpis. Paymanta yachakunchej creeyninchejta ruwaykunasninchejwanpuni rikuchina kasqanta.

14. ¿Imaraykutaj Pabloj qhelqasqanwan Santiagoj qhelqasqanwan mana churanakunchu?

¹⁴ Yachakunchej jina Pablowan Santiagowanqa creeymanta, ruwasqasninchejmantawan parlaspa, mana kikin imastachu niyta munasharqanku. Pabloqa judío cristianosman nisharqa, Leyman jina ruwaspallaqa ni jaykʼaj Jehovaj ñaupaqenpi allinpaj qhawasqa kanankuta. Santiagotaj tukuy cristianosman sutʼincharqa, creeyninkuta ruwasqasninkuwan rikuchinanku kasqanta.

15. ¿Imaynasmantá rikuchisunman creeyniyoj kasqanchejta? (Fotostawan qhawariy).

¹⁵ Jehovaqa mana ninchu cheqan runaspaj qhawanawanchejpaj, Abrahán imastachus ruwarqa chay kikin imasllatataj ruwananchejta. Ashkha imaynasmanta rikuchisunman creeyniyoj kasqanchejta. Congregacionninchejpi mosojkunata tukuy sonqo japʼikusunman, necesitaj hermanosta yanaparisunman, familiaresninchejtapis yanaparisunman. Tukuy chayqa Jehovata mayta kusichin (Rom. 15:7; 1 Tim. 5:4, 8; 1 Juan 3:18). Chaykunamanta aswan sumajtaj sonqo kʼajaywan predicay. Chaywan creeyninchejta rikuchillanchejtaj (1 Tim. 4:16). Tukuyninchej ruwasqasninchejwan rikuchisunman, Jehová nisqasninta juntʼananpi creesqanchejta, payllataj tukuy imata may sumajta ruwasqanpi creesqanchejta. Chayta ruwasun  chayqa Diosninchejqa cheqan runaspaj, amigosninpajtaj qhawawasun.

16. ¿Ima suyakuyniyojtaj Abrahán karqa, chanta imapitaj creerqa?

¹⁶ Romanos 4 capitulopeqa Abrahanmanta kaytawan yachakullanchejtaj: Suyakuyniyoj kana kasqanta. Jehovaqa nerqa Abrahannejta ‘ashkha naciones’ bendecisqa kanankuta. Chayqa Abrahanpaj may sumaj suyakuypuni karqa (Gén. 12:3; 15:5; 17:4; Rom. 4:17). Chaywanpis Abrahanqa 100 watasniyojña karqa, Sarataj 90 watasniyojña, nitaj ni uj wawankupis karqarajchu. Runa jinalla yuyaspaqa niña wawayoj kayta suyakunkumanchu karqa. Chayqa Abrahanpaj uj sinchʼi prueba karqa. Jinapis “suyakorqa, creerqataj ashkha nacionespa tatan kananta” (Rom. 4:18, 19). Tiemponmantaj chay suyakusqanqa juntʼakorqapuni. Wawan Isaac nacekorqa, pitachus maytapuni suyakusharqa (Rom. 4:20-22).

17. ¿Imaynapí yachanchej Diosninchej cheqan runaspaj, amigosninpajtaj qhawayta atiwasqanchejta?

¹⁷ Noqanchejpis Abrahán jinallataj Jehovawan cheqan runaspaj, amigosninpajtaj qhawachikusunman. Chayrayku Abrahanmanta parlaspa Pablo nerqa: “‘Cheqan runapaj qhawasqa karqa’ nisqaqa, mana Abrahanllapajchu qhelqasqa karqa, manachayqa noqanchejpajpis. Imaraykuchus noqanchejpis, Diospi creesqanchejrayku cheqan runaspaj qhawasqa kasun. Paymin Señorninchej Jesusta wañusqas ukhumanta kausaricherqa”, nispa (Rom. 4:23, 24). Chayrayku Abrahán jinallataj creeyniyoj kananchej tiyan, ruwasqasninchejwan chayta rikuchinanchej tiyan, suyakuyniyojtaj kananchej tiyan. Qhepan yachaqanapeqa imatachus Pablo Romanos 5 capitulopi suyakuymanta nisqanta yachakusun.