1. ¿Imatataj hermanos ruwananku tiyan kausayninkupi allin rinanpaj?

 APÓSTOL Pabloqa corintiosman kay jinata qhelqarqa: “Hermanos, ama wawas jina piensaychejchu. […] Qankunaqa wiñay tukusqa runas jina piensaychej”, nispa (1 Cor. 14:20). Allin kanman tukuy cristiano qharis chay yuyaychayta kasukunanku. Kausayninkupi allin rinanpajqa, Jehovaj kamachiykunasninta kasuyta yachakunanku tiyan, Bibliaj yuyaychaykunasninman jinataj kausakunanku tiyan (Luc. 2:52). ¿Imaraykutaj sumaj kanman jovencitos wiñay tukusqa cristianosman tukunanku?

2, 3. ¿Imaraykutaj jovencito hermanos wiñay tukusqa cristianosman tukunanku tiyan?

² Qhari hermanosqa ashkha ruwanasniyoj kanku wasinkupi, congregacionpipis. Jovencitollaraj kanki chay, ichapis piensarerqanki aswan qhepaman imaspichus yanapakunaykita. Ichapis precursor kayta munanki, chayri siervo ministerial, aswan qhepamantaj anciano. Ichá munallankitaj casarakuyta, wawasniyoj kaytapis (Efe. 6:4; 1 Tim. 3:1). Chay tukuy imasta ruwanaykipaj, sumajtaj risunanpajqa wiñay tukusqa cristiano kanayki tiyan. b

³ ¿Imataj yanapasunkiman wiñay tukusqa cristiano kanaykipaj? ¿Imasta ruwaytataj sumajta yachakunayki tiyan? ¿Imaynatá kunanmantapacha wakichikuwaj aswan qhepaman ruwanasniykita sumajta juntʼanaykipaj? Chayta qhawarina.

4. ¿Maypitaj sumaj ejemplosta tariwaj? (Fototawan qhawariy).

⁴ Sumaj ejemplosta ajllay. Bibliaqa ashkha kasukoj qharismanta parlan. Paykunaqa Diosta munakorqanku, llajtantataj tukuy imaymanamanta jarkʼarqanku, paykunamanta mayta yachakuwaj. Familiaykipi, congregacionniykipipis, wiñay tukusqa cristianos kallantajchá, paykunamantapis yachakullawajtaj (Heb. 13:7). Chantapis Jesucristomanta mayta yachakuwaj, payqa uj sumaj ejemplo (1 Ped. 2:21). Paykunamanta estudiashaspaqa, imachus sapa ujmanta gustasusqanpi piensariy (Heb. 12:1, 2). Chaymantataj piensariy imaynatachus paykuna jina ruwawaj.

5. ¿Imatá ruwanayki tiyan sumajta tanteayta yachanaykipaj, chanta imapitaj chay yanapasonqa? (Salmo 119:9).

⁵ ‘Sumajta tanteayta’ yachakuy, amataj chayta ruwayta qonqaychu (Pro. 3:21). Sumajta tanteayta yachaj qharisqa, niraj imatapis ruwashaspa sumajtaraj piensarikunku. Chayrayku qanpis chay jinata ruwanaykipaj sumajta kallpachakuy, amataj chayta ruwayta qonqaychu. ¿Imarayku? Kay mundomanta ashkha jovenesqa yuyasqankuman jinalla, munasqankuman jinallataj ruwanku (Pro. 7:7; 29:11). Chantapis kay imas waj ladoman aysasunkiman: tele, películas, Internet, redes sociales ima. ¿Imatá ruwawaj sumajta tanteayta yachanaykipaj? Ñaupajtaqa Bibliaj yuyaychaykunasninta yuyayniykipi japʼinayki tiyan, piensarinaykitaj tiyan imaraykutaj Jehovaj nisusqan may sumaj qanpaj kasqanta. Chantataj chay yachakusqaykiman jina imatapis ajllay, Jehovata kusichinaykipaj jina (Salmo 119:9 leey). Wiñay tukusqa cristiano kanapajqa sumajta tanteayta yachananchej tiyan (Pro. 2:11, 12; Heb. 5:14). Qhepan parrafospi yachakusun imaynatachus sumajta tanteayta yachay yanapasunanta. 1) ¿Imayná kanayki tiyan hermanaswan kashaspa? 2) ¿Imaynatá vistikunayki, arreglakunaykitaj tiyan?

6. ¿Imaynatá uj joven hermano rikuchinman hermanasta respetasqanta?

⁶ Tanteayta yachayqa warmista respetanaykipaj yanapasonqa. Kaypi piensariy: Ichapis uj jovenmanqa uj hermana gustanman, paytataj astawan rejsiyta munanman. Chayqa mana  sajrachu. Jinapis tanteariyta yachaj jovenqa mana imatapis nenqachu, nitaj escribenqachu, nitaj imatapis ruwanqachu chay hermanata qhawakushasqanta yuyachinanpaj. Chayta ruwanqa paywan casarakuytapuni munaspalla (1 Tim. 5:1, 2). Uj hermanawan rejsinakushanña chaytajrí, mana ni jaykʼaj chay hermanawan sapallankupi kanqankuchu, manaqa pichus wiñay tukusqa kajwanpuni acompañachikonqanku. Ajinamanta mana chay hermanata pisipaj qhawachenqachu (1 Cor. 6:18).

7. Allinta tanteayta yachaj joven, ¿imaynatá vistikunan tiyan?

⁷ Chantapis jovenesqa Jehová jina yuyasqankuta rikuchillankumantaj imaynatachus vistikusqankuwan, imaynatachus peinakusqankuwanpis. Ropasta ruwajkuna, chay ropasta vendenankupaj propagandasta ruwajkunapis, mana Jehovata respetankuchu, astawanpis millay kausayniyoj kanku. Chayrayku ropa ruwasqankoqa manchay matʼiñataj kanku, chayta churakuspataj qharisqa warmis jina purinku. Uj joven wiñay tukusqa cristiano kayta munan chayqa, Bibliaj yuyaychaykunasninpiraj piensarenqa, congregacionmanta wiñay tukusqa cristianos jinataj ruwanqa vistikushaspa, arreglakushaspapis. Kay tapuykunapi piensarinman: “¿Ruwasqaywan rikuchinichu allin yuyayniyoj kasqayta, wajkunaj yuyasqankutapis respetasqayta? ¿Vistikusqaypi sutʼitachu rikuchini Jehovata sirvisqayta?” (1 Cor. 10:31-33; Tito 2:6). Allinta tanteayta yachaj jovenestaqa mana hermanosllachu respetanku, manaqa Tatanchej Jehovapis.

8. ¿Imaynatá uj joven hermanito atienekunapaj jina kanman?

⁸ Atienekunapaj jina kay. Ajina kanki chayqa tukuy ruwanasniykita sumajta juntʼanki (Luc. 16:10). Jesuspi piensariy: Payqa ruwanasninta sumajta juntʼaj, nitaj saqerpajchu. Imatachus Jehová kamacherqa chay tukuy imata ruwarqa, mana atinanpaj jinallachu kajtinpis. Payqa runasta munakoj, astawanraj discipulosninta, kausaynintapis paykunarayku tukuy sonqo qorqa (Juan 13:1). Jesús jina kallpachakuy uj ruwayta qosojtinku, chayta sumajta juntʼanaykipaj. Chayta mana ruwayta atinkichu chayqa, kʼumuykukoj sonqo kay, wiñay tukusqa hermanowantaj yanapachikuy. Mana qhellakuspalla tukuy atisqaykipi yanapakuy (Rom. 12:11). Imatapis ruwanaykita nisunku chayqa, tukunaykikama chayta ruway “Jehová Diospaj jina, manataj runaspaj jinachu” (Col. 3:23). Pantaj runa kasqanchejrayku imapipis pantankipuni. Chayrayku llampʼu sonqo kay, pantasqaykitataj reparakuy (Pro. 11:2).

9. ¿Imaraykutaj uj joven hermano wakin imasta ruwayta yachakunan tiyan?

⁹ Wiñay tukusqa cristiano kanaykipajqa, kausayniykipi yanapasunanpaj jina wakin imasta yachakunayki tiyan. Chayqa yanapasonqa congregacionpi astawan ruwanaspi yanapakunaykipaj, tukuywan allinta apanakunaykipaj, uj trabajota tarikunaykipaj, chay trabajomanta  mana wijchʼuchikunaykipajpis. Ajinamanta ganakuyta atiwaj kausakunaykipaj, familiaykita yanapanaykipajpis. Chaymanta wakin imasta qhawarina.

10, 11. ¿Imaraykutaj joven hermanos leeytapis escribiytapis yachakunankupuni tiyan? (Salmo 1:1-3; fototawan qhawariy).

¹⁰ Allinta leeyta, escribiyta ima yachakuy. Bibliaqa nin pichus Bibliata sapa día leej, chaypitaj tʼukurejqa kusisqa kasqanta, tukuy ima ruwasqanpitaj allin risqanta (Salmo 1:1-3 leey). Ajinamanta yachayta atin imatachus Jehová yuyasqanta. Chaytaj yanapanqa sumajta tʼukurinanpaj, chay leesqanman jinataj ruwananpaj (Pro. 1:3, 4). Congregacionpeqa ajina hermanos necesitakun. ¿Imarayku?

¹¹ Congregacionpeqa tukuy necesitanchej hermanos yachachinawanchejta, Bibliawantaj sumajta yuyaycharinawanchejta (Tito 1:9). Sumajta leeyta, escribiyta yachanki chayqa, aswan facilta discursosta preparakunki, sumaj comentariostapis preparakunki, chaywantaj wajkunata kallpachayta atinki. Chantapis estudiashaspa, jinallataj reunionespi, asambleaspipis discursosta uyarishaspa, tukuy ima yachakusqaykita anotakuyta atinki. Ajinamanta creeyniyki astawan wiñanqa, waj hermanitostapis yanapariyta atinki.

12. ¿Imataj yanapasunkiman wajkunawan sumajta parlarikunaykipaj?

¹² Wajkunawan sumajta parlayta yachakuy. Chaytaqa tukuy cristiano qharis yachakunankupuni tiyan. Sumajta parlaj runaqa sumajta wajkunata uyarin, entiendentaj imatachus wajkuna yuyasqankuta, imaynachus sientekusqankutapis (Pro. 20:5). Vozninpa tononpi, uyanpi, cuerponpi reparawaj imatachus niyta munasusqanta. Chaytaqa yachakuwaj uyapurapuni runaswan parlaspa. Correonejllata, mensajesnejllata parlanki chayqa, mana wajkunawan uyapura parlayta atillankichu. Chayrayku piwanpis uyapurapuni parlarikuy (2 Juan 12).

13. ¿Imatataj uj joven hermano yachakunallantaj tiyan? (1 Timoteo 5:8; fototawan qhawariy).

¹³ Trabajakuyta yachakuy. Wiñay tukusqa cristianoqa kausakunanpaj trabajayta yachakunanpuni tiyan, familiantapis chaywan mantienenan tiyan (1 Timoteo 5:8 leey). Wakin suyuspi jovenesqa tatankumanta, chayri waj familiarninkumanta uj oficiota yachakunku, wakin lugarespitaj estudiaspa chayta yachakunku. Imayna kajtinpis yachakunaykipuni tiyan imamantachus trabajanaykita, ajinamanta chaywan kausakunaykipaj (Hech. 18:2, 3; 20:34; Efe. 4:28). Sumajta trabajay, amataj khuskan khuskallanta saqerpariychu. Ajinamanta wajkunaqa uj sumaj joven trabajadorta jina rejsisonqanku. Jinamanta  uj trabajota tariyta atillanki, manataj chaymanta qharqochikunkichu. Kay yachaqanapi yachakorqanchej chay imaspis mayta yanapasonqanku, qhepaman ruwanasta japʼinki chay imasta juntʼanaykipaj. Wakinkunata qhawarina.

14. ¿Imataj yanapasunkiman Jehová Diosta astawan sirvinaykipaj?

¹⁴ Jehovapaj astawan llankʼawaj. Ashkha wiñay tukusqa hermanosqa, jovenllaraj kashaspa precursor kayta qallarerqanku. Precursor kanki chayqa, yachakunki ashkha runaswan trabajayta. Yachakullankitaj qolqeta sumajta apaykachayta (Fili. 4:11-13). Allin kanman precursor auxiliarta orqhonayki. Ashkhastaqa chay yanaparqa precursor regularta orqhonankupaj, chaytaj yanapasunkiman construccionpi yanapakunaykipaj, chayri betelita kanaykipaj.

15, 16. ¿Imatá ruwanan tiyan uj joven hermano siervo ministerial chayri anciano kayta munan chay?

¹⁵ Siervo ministerial kawaj chayri anciano. Congregacionmanta tukuy hermanos kallpachakunanku tiyan, ancianos kanankupaj. Bibliaqa nin ancianos kayta munajkunaqa “sumaj ruwanata” munashasqankuta (1 Tim. 3:1). Anciano kanaykipaj, ñaupajtaqa siervo ministerialraj kanayki tiyan. Siervos ministerialesqa ancianosta ashkha imaspi yanapanku. Ancianospis siervos ministerialespis kʼumuykukoj sonqowan hermanosninkuta yanapanku, astawanpis sonqo kʼajaywan predicanku. Uj joven hermanoqa niraj 20 watasninta juntʼashaspapis siervo ministerial kayta atinmanña. Sumaj wakichisqa siervo ministerialtaj, 20 watasninta juntʼaytawan anciano kanman.

¹⁶ ¿Imatá ruwawaj siervo ministerial chayri anciano kanaykipaj? Bibliapi willashan imatachus ruwanayki kasqanta. Chaypajtaj Jehovata, familiaykita, hermanostapis munakunayki tiyan (1 Tim. 3:1-13; Tito 1:6-9; 1 Ped. 5:2, 3). Siervo ministerial chayri anciano kanaykipaj imatachus Biblia nisqanta sumajta entiendey. Jehovamanta mañakuy chayta juntʼanaykipaj yanapasunanta. c

17. ¿Imaynatá uj joven hermano wakichikunman sumaj qosa kananpaj, sumaj uma kananpajpis? (Fototawan qhawariy).

¹⁷ Munaspaqa casarakuwaj, familiaykimantataj uma kawaj. Jesús nerqa jina, ashkha wiñay tukusqa hermanosqa solterosllapuni kayta munanku (Mat. 19:12). Qan casarakuyta munanki chayqa, qosa kanki, familiaykimanta umataj (1 Cor. 11:3). Jehovaqa munan qosas warminkuta munakunankuta, ni imata faltachinankuta, sumaj amigonku kanankuta,  Diosmanta mana karunchakunankupajtaj yanapanankuta (Efe. 5:28, 29). Kay yachaqanapi yachakorqanchej sumajta tanteayta yachananku kasqanta, warmista respetananku kasqanta, atienekunapaj jinataj kananku kasqanta. Chaytaj yanapasonqa uj sumaj qosa kanaykipaj, astawanpis uj sumaj uma kanaykipaj.

18. ¿Imaynatá uj joven wakichikunman uj sumaj tata kananpaj?

¹⁸ Wawasniyoj kawaj. Casarakunki chayqa wawas rikhurinman. Uj sumaj tata kanaykipajtaj Jehová Diosmanta ashkha imasta yachakuwaj (Efe. 6:4). Jehovaqa mana pʼenqakorqachu Jesusman niyta mayta munakusqanta, allinpajtaj qhawasqanta (Mat. 3:17). Tata kanki chayqa, wawasniykita munakusqaykita ninaykipuni tiyan, allinta ruwajtinkutaj felicitanayki tiyan. Jehová jina ruwaj tatasqa, wawasninkuta wiñay tukusqa cristianosman tukunankupaj yanapanku. ¿Imaynatá kunanmantapacha sumaj tata kanaykipaj wakichikuwaj? Familiaykiman, hermanosmanpis munakuyniykita rikuchispa, paykunata munakusqaykita nispa, jatunpajtaj qhawasqaykita nispa (Juan 15:9). Chayqa mana qhepaman casarakojtillaykichu, chayri wawasniyoj kajtillaykichu yanapasonqa. Kunanpis chayqa mayta yanapasonqa Jehovapaj, familiaykipaj, congregacionpajpis, may valorniyoj kanaykipaj.

19, 20. ¿Imatá ruwanan tiyan uj joven hermano wiñay tukusqa cristianoman tukunanpaj? (Tapapi fotosta qhawariy).

¹⁹ Joven kanki chayqa yuyarikuy, mana jinallamantachu wiñay tukusqa cristianoman tukunki. Chayrayku sumaj ejemplosta ajllanayki tiyan, sumajta tanteayta yachanayki tiyan, atienekunapaj jina kanayki tiyan, yanapasunanpaj jina wakin imasta yachakunayki tiyan, aswan qhepapajtaj wakichikunayki tiyan.

²⁰ Tukuy chay imaspi yuyaspa, ichapis yuyawaj qanpaj ancha kasqanta. Ama llakikuychu, ruwayta atinkipuni. Astawanpis ama qonqaychu Jehová Diosninchej yanapayta munasusqanta (Isa. 41:10, 13). Congregacionmanta hermanospis chaypi kanqanku yanapasunankupaj. Jehová munasqanman jina uj sumaj cristianoman tukunki chayqa, kausayniykipi allin risonqa, kusisqataj kanki. Jóvenes, maytapuni qankunata munakuyku. Wiñay tukusqa cristianoman tukunaykichejpaj kallpachakuychej, Jehovataj bendecisonqachej (Pro. 22:4).