1. ¿Imaraykutaj Abrahán wawayoj kayta suyakullarqapuni?

 JEHOVAQA amigon Abrahanman nerqa mirayninnejta kay jallpʼapi tukuy naciones bendecisqa kanankuta (Gén. 15:5; 22:18). Abrahanqa Jehovapi sinchʼita creesqanrayku mana iskayrayarqachu chay juntʼakunanmanta. Jinapis Abrahán 100 watasniyoj kashajtin, warmintaj 90 watasniyoj kashajtin, niraj ni uj wawayojrajpischu karqanku (Gén. 21:1-7). Biblia nin: “Abrahanqa suyakorqa, creerqataj ashkha nacionespa tatan kananta. Chaytaj karqa payman nisqa kasqanman jina”, nispa (Rom. 4:18). Yachanchej jinataj suyakusqanqa juntʼakorqapuni: Wawan Isaac nacekorqa, pitachus maytapuni suyakusharqa. Jehová nisqanta juntʼananmanta, ¿imaraykutaj Abrahán mana iskayrayarqachu?

2. ¿Imaraykutaj Abrahán mana iskayrayarqachu Jehová nisqanta juntʼananmanta?

² Abrahanqa Jehovata sumajta rejserqa. Chayrayku yacharqa “nisqanta juntʼanantapuni” (Rom. 4:21). Jehovataj creeyninrayku Abrahanta cheqan runapaj qhawarqa, allinpajtaj (Sant. 2:23). Romanos 4:18 nisqanman jina, Abrahanpa creeynenqa imatachus suyakusqanwan ujchasqa kasharqa. Kunanqa qhawarina Romanos 5 capitulopi imatachus apóstol Pablo suyakuymanta nisqanta.

3. ¿Imatá Pablo sutʼincharqa suyakuymanta?

³ Pabloqa nerqa ‘suyakuyniyoj kasqanchejqa mana qhasipajchu’  kasqanta, sutʼincharqataj imaraykuchus chaymanta mana iskayrayanata (Rom. 5:5). Chantapis Pabloqa entiendechillawanchejtaj imaynatachus suyakuyninchejta astawan sinchʼiyachiyta atisqanchejta. Romanos 5:1-5 versiculosta ukhuncharishaspaqa, piensarina imaynatachus suyakuyninchej tiempo pasasqanman jina astawan sinchʼiyasqanta. Chantapis kay yachaqanapi reparasun suyakuyninchej aswan sinchʼiraj kananpaj imatachus ruwananchej kasqanta. Ñaupajtaqa parlarisun uj sumaj suyakuymanta, mayqenmantachus Pablo nin mana qhasipajchu kasqanta.

4. ¿Imamantataj Romanos 5:1, 2 parlan?

⁴ (Romanos 5:1, 2 leey). Pabloqa kay versiculospi nisqanta, Romapi kaj congregacionmanta hermanosman escriberqa. Chay hermanosqa Jehovamanta, Jesusmantapis yachakusqanku, creeyniyoj kasqankuta rikuchisqanku, cristianosmantaj tukusqanku. Chayrayku Diosqa paykunata ‘creeyninkurayku cheqan runaspaj qhawarqa’, espíritu santonwantaj ajllarqa. Chay kutimantapacha, chay cristianosqa uj sumaj suyakuyniyoj karqanku. Chayta japʼinankumantataj mana iskayrayarqankuchu.

5. ¿Imatataj ajllasqa cristianos suyakushanku?

⁵ Aswan qhepaman, Pabloqa Efesomanta ajllasqa cristianosman suyakuyninkumanta sutʼincharqa. Chay suyakuyninkutaj karqa Dios “paypaj tʼaqasqa kajkunaman herenciata jina qonanta” nisqan (Efe. 1:18). Colosensesmantaj nerqa maypichus chay tʼinkankuta japʼinankuta. Paykunaman nerqa cielopi “qankunapaj wakichisqa kashan” nispa (Col. 1:4, 5). Chayrayku ajllasqa cristianosqa suyakushanku kausarimuytawan cielopi wiñaypaj kausakuyta. Chaypitaj Cristowan khuska kamachenqanku (1 Tes. 4:13-17; Apo. 20:6).

6. ¿Imatataj hermanonchej Frederick Franz suyakuyninmanta nerqa?

⁶ Ajllasqa cristianosqa suyakuyninkuta may jatunpaj qhawanku. Por ejemplo 1991 watapi, hermano Frederick Franz nerqa: “Imatachus suyakusqaykoqa juntʼakonqapuni. 144.000  ajllasqa cristianosqa imatachus Dios niwasqaykuta japʼisqaykupuni. Tʼinkaykoqa imaschus kapuwayku chaymantapis aswan sumajraj kanqa”, nispa. Hermanonchej Frederick Franz ashkha watasta Jehovata sirviytawan, ¿imaynataj kasharqa? Pay nerqa: “Imatachus suyakusqaykuta may valorniyojllapajpuni qhawayku, astawan suyakusqaykuman jina astawan chay suyakuyniykumanta agradecekuyku, mashkha unayta suyanayku kajtinpis suyakullaykumanpuni, mana qhasitachu suyakushayku. Kunanqa suyakuyniyta ni jaykʼaj jina aswan sumajpajraj qhawani”, nispa.

7, 8. ¿Imatataj casi tukuyninchej suyakushanchej? (Romanos 8:20, 21).

⁷ Kay tiempopi Jehovata sirvejkunamanta casi tukuypuni waj suyakuyniyoj kanchej. Chaytaj kashan imatachus Abrahán suyakorqa chayllataj: Diospa Gobiernonpa kamachiyninpi kay jallpʼapi wiñaypaj kausakuy (Heb. 11:8-10, 13). Pabloqa kay sumaj suyakuymantapis qhelqallarqataj (Romanos 8:20, 21 leey). Biblia imachus aswan qhepaman kananta nisqanmanta yachakushajtiyki, ¿imataj astawan tʼukuchisorqa? ¿Juchamanta kacharichisqa kaspa manaña pantaj runa kaychu? ¿Maytachu kusirikorqanki munasqa familiaresniyki kausarinpunankuta, paraisopitaj kausakunankuta yachaspa? Diosninchej “uj suyakuyta” qowasqanchejrayku, qhepaman may sumaj kausay kananta suyakushanchej.

⁸ Cielopi kausakuyta suyakuspapis, kay jallpʼapi kausakuyta suyakuspapis, tukuyninchej may kusisqas kashanchej chay suyakuyniyoj kasqanchejmanta. Chay suyakuyninchejtaj, tiempo pasasqanman jina astawanraj sinchʼiyanman. ¿Imatá chaypaj ruwasunman? Chaypajqa Pabloj qhelqasqanta qhawarinallapuni. Chay nisqanqa yanapawasun, suyakuyninchej mana qhasichu kasqanmanta manapuni iskayrayanapaj.

9, 10. Pablo jina, ¿imaspi rikukunanchejtataj yachanchej? (Romanos 5:3; fotostawan qhawariy).

⁹ (Romanos 5:3 leey). Pablo imatachus nisqanqa ichapis tʼukuchiwasunman. Pay nerqa  llakiykunapi rikukoyqa suyakuyninchejta sinchʼiyachiyta atisqanta. Tukuy cristianosqa llakiykunapi rikukunanchejta yachanchej. Piensarina imatachus Pablo Tesalonicamanta cristianosman nisqanpi. Pay nerqa: “Qankunawan kashajtiykoqa, ñaupajmantaña nej kayku ñakʼarinanchejta. Qankuna yachankichej jinataj, chayqa ajinapuni”, nispa (1 Tes. 3:4). Corintomanta cristianosmantaj nerqa: “Yachanaykichejta munayku […] ima llakiykunapichus kasqaykuta. […] ‘Wañusunchá’ nispataj nerqayku”, nispa (2 Cor. 1:8; 11:23-27).

¹⁰ Kunanpis ajinallapuni kashan. Cristianosqa yachanchej llakiykunapi rikukunanchejta (2 Tim. 3:12). ¿Imaspitaj rikukorqanki Jesuspi creesqaykimantapacha, qhepantataj risqaykimantapacha? Ichapis amigosniyki chayri familiaresniyki qanmanta burlakusorqanku, chayri tukuy imasta ruwasorqanku. Tukuy imapi allintapuni purisqaykirayku, ¿trabajoykipi problemaspichu rikukorqanki? (Heb. 13:18). Suyakuyniykimanta wajkunaman parlarisqaykirayku, ¿gobierno churanakusorqachu? Imaspi rikukojtinchejpis, Pabloqa niwanchej kusikunata. ¿Imarayku?

11. ¿Imaraykutaj sinchʼita sayananchej tiyan?

¹¹ Llakiykunapi rikukuspaqa kusikunchej. Imaraykuchus Romanos 5:3 versiculoqa niwanchej “llakiykunaqa sinchʼita sayanapaj yanapawasqanchejta”. Tukuy cristianos llakiypi rikukusqanchejrayku, sinchʼita sayayta yachakunanchej tiyan. Sinchʼita sayaspalla mayta suyakushanchej chay tʼinkata japʼisun. Jesusqa rumiraraman tʼakakoj mujumanta parlarqa, manataj munasunmanchu chayman rijchʼakoj runas jina kayta. Paykunaqa Diospa palabranta uyariytawankama kusiywan japʼikunku. Jinapis “ñakʼariy, qhatiykachaypis rikhurejtin” urmankupacha (Mat. 13:5, 6, 20, 21). Ni pimanpis gustawanchejchu wajkuna churanakunawanchej, nitaj pruebaspi rikukuypis. Jinapis chaykunata aguantayqa mayta yanapawanchej. Qhawarina imaraykuchus.

12. ¿Imaspitaj aguantay yanapawanchej?

¹² Santiagoqa nerqa aguantasqanchej mayta yanapawasqanchejta. Pay nerqa: “Mana saykʼuspa aguantasqaykichejtaj, sumajta wakichisonqachej. Ajinamanta tukuy imapi juntʼasqas, mana imanasqastaj kanaykichejpaj, nitaj ni imamanta pisisqas kanaykichejpaj”, nispa (Sant. 1:2-4). Chaypi nin jina, mana saykʼuspa aguantasqanchejqa sumajta wakichiwanchej. ¿Imapaj? Astawan pacienciayoj kanapaj, astawan creeyniyoj kanapaj, Diospitaj astawan atienekunapaj. Chantapis aguantayqa waj imapi yanapallawanchejtaj.

13, 14. Pruebasta aguantasqanchej, ¿imaynatá yanapawanchej, chayrayku imaynataj suyakuyninchej? (Romanos 5:4).

¹³ (Romanos 5:4 leey). Pablo nerqa: “Sinchʼita sayaytaj Dios allinpaj qhawanawanchejpaj yanapawanchej”, nispa. Chayqa mana ninayanchu llakiykunapi kajtinchej Jehová kusikusqanta, payqa kusikun chay llakiykunata aguantajtinchej. Jehovamanta mana kacharikusunchu, aguantasuntaj chayqa, payta kusichisun. ¿Nichu chayta yachay mayta kallpachawanchej? (Sal. 5:12).

¹⁴ Abrahanpi piensarina. Paytaqa Dios allinpaj qhawarqa pruebasta aguantasqanrayku. Jehovaqa payta amigonpaj qhawarqa, cheqan runapajtaj (Gén. 15:6; Rom. 4:13, 22). Noqanchejwanpis kikillantaj kanman. Diosqa mana payta sirvispa imastachus ruwasqanchejraykuchu, nitaj congregacionpi ima ruwanasniyojchus kasqanchejraykuchu allinpaj qhawawanchej, manaqa paymanta mana kacharikusqanchejrayku, aguantasqanchejraykutaj. Chaytataj tukuy ruwayta atinchej, ima edadniyoj kaspapis, imapi rikukuspapis, chayri imata ruwayta yachaspapis. Ichapis wakinninchejqa,  kunitan pruebaspi rikukushanchej. Jina kajtin kayta yuyarikunapuni: Jehovamanta mana kacharikusunchu chayqa, payqa allinpaj qhawawasun. Jehovata kusichishasqanchejta yachayqa, suyakuyninchejta maytapuni sinchʼiyachin.

15. ¿Imatawantaj Pablo sutʼincharqa, chanta imatá ichapis tapukusunman?

¹⁵ Yachakunchej jina, Pabloqa nerqa aguantajtinchej Dios allinpaj qhawanawanchejta. Chayta niytawan, ¿imatawán sutʼincharqa? Pay nerqa: “Dios allinpaj qhawawasqanchejtaj, suyakuyniyoj kanapaj yanapawanchej. Suyakuyniyoj kasqanchejtaj mana qhasipajchu”, nispa (Rom. 5:4, 5). Aswan ñaupajsitutaña Romanos 5:2 versiculopi, Pabloqa nerqaña Romamanta cristianosqa ‘Dios jatunchananta suyakushasqankuta’. Jinapis ichá kayta tapukusunman: “Chay cristianos suyakuyniyojña karqanku chay, ¿imajtintaj Pablo watejmanta suyakuymanta parlarqa?”.

16. ¿Imaynatataj uj runaj suyakuynin sinchʼiyan? (Fotostawan qhawariy).

¹⁶ Suyakuyninchejqa astawan sinchʼiyayta atin. Chayrayku Pablo imatachus nisqanqa maychus kajlla. Kaypi piensarina: Ñaupaj kutirayku paraisopi wiñaypaj kausakunanchejta willariwajtinchej, ¿imayná kasharqanchej? Ichapis yuyarqanchej mana creenapaj jinachu kasqanta. Jinapis Jehovata astawan rejsisqanchejman jina, Bibliaj nisqantapis astawan yachakusqanchejman jina, repararqanchej chay suyakoyqa juntʼakunantapuni. Chayrayku niña iskayrayarqanchejchu.

17. Bautizakusqaykimantapacha, ¿imaynatá suyakuyniyki astawan sinchʼiyan?

¹⁷ Bautizakusqanchejmanta qhepamanqa astawan Jehovata rejserqanchej, astawantaj payta munakorqanchej. Chaytaj suyakuyninchejta astawan sinchʼiyacherqa (Heb. 5:13–6:1). Noqanchejpis Romanos 5:2-4 nisqanman jinachá rikukorqanchej: Llakiykunata pasarqanchej, repararqanchejtaj Jehová allinpaj qhawawasqanchejta. Jehová noqanchejwan  kusisqa kashasqanta yachaspaqa, nisqanta juntʼananmanta astawanraj mana iskayrayanchejchu. Chayrayku suyakuyninchejqa, qallariymanta nisqa aswan sinchʼiña. Kunanqa rikushanchejmanñapis jina, mana wajpa suyakusqan jinallachu, aswan jatuntaj. Chayraykutaj chayman jina familianchejpi kausakunchej, chayman jina imatapis ajllanchej, tiemponchejtapis apaykachanchej.

18. ¿Ima garantiatataj Jehová qowanchej?

¹⁸ Pabloqa Dios allinpaj qhawawasqanchej suyakuyniyoj kanapaj yanapawasqanchejta niytawan, uj imatawan nerqa: Chay suyakuyninchej juntʼakunantapuni. ¿Imaynapí yachanchej juntʼakunantapuni? Pabloqa Dios yuyaychasqanman jina kay garantiata qorqa cristianosman. Pay nerqa: “Suyakuyniyoj kasqanchejtaj mana qhasipajchu. Imaraykuchus Diospa munakuynenqa sonqonchejpi juntʼa kashan japʼisqanchej espíritu santonejta”, nispa (Rom. 5:5). Chayrayku manapuni iskayrayanchejchu suyakuyninchej juntʼakunanmanta.

19. ¿Imamantataj mana iskayrayanchejchu?

¹⁹ Abrahanmanta yuyarikunapuni. Jehovaqa paypaj uj imata ruwapunanta nerqa, allinpaj qhawarqa, amigonta jinataj. Chay suyakusqantaj juntʼakorqapuni. Biblia nin: “Abrahanqa pacienciawan suyakusqantawanraj Diospa chay nisqanta japʼerqa”, nispa (Heb. 6:15; 11:9, 18; Rom. 4:20-22). Abrahán jinallataj sutʼita yachanchej Jehovamanta mana kacharikusunchu chayqa, suyakuyninchej mana qhasipajchu kananta, manaqa japʼinanchejtapuni. Imatachus suyakusqanchejqa mana uj cuentollachu. Chayraykutaj mayta kusikunchej (Rom. 12:12). Pablo nerqa: “Suyakuyta qoj Diosqa, paypi atienekusqaykichejrayku qankunata kusiywan juntʼachichun, sonqo tiyaykuywantaj. Ajinamanta suyakuyniykichej espíritu santoj atiyninnejta aswan sinchʼi kananpaj”, nispa (Rom. 15:13).