Kay 2023 watamanta Torremanta Qhawaj revistasta leerqanki chayqa, kay tapuykunaman kutichiyta atiwaj.

¿Ima niytá munan yuyayninchejta mosojyachiy? (Rom. 12:2).

Mana uj mashkha allin imasllatachu ruwananchej tiyan. Astawanqa sumajta qhawaykurikunanchej tiyan imaynachus sonqonchej ukhupi kashasqanchejta, cambiananchejtaj tiyan. Ajinamanta Jehovaj kamachiykunasninman jinapuni kausakunapaj (w23.01, páginas 8, 9).

¿Imatá ruwasunman mundo enteropi imaschus pasashasqanta maychus kajllata qhawanapaj?

Maytapuni yachayta munanchej mundo enteropi imaschus pasashasqan imaynatachus Bibliaj profeciasninta juntʼashasqanta. Mana munanchejchu imatapis yuyasqanchejman jinalla niyta, chayqa congregacionta tʼaqanachinman. Astawanpis Jehovaj llajtan sutʼinchasqanman jinapuni imatapis ninanchej tiyan (1 Cor. 1:10) (w23.02, página 16).

Jesuspa bautizakusqanwan discipulosninpa bautizakusqankuwan, ¿imapitaj mana kikinchu?

Jesusqa Diospaj tʼaqasqa nacionpi nacekusqanrayku, mana noqanchej jina Jehovaman kausayninta qopuyta necesitarqachu. Mana pantaj runa kasqanrayku, mana ima juchamantapis arrepientekunanchu karqa (w23.03, página 5).

¿Imatá ruwasunman wajkunapis comentanankupaj?

Comentariosninchejqa pisi palabrasllapi kanan tiyan, ajinamanta ashkha hermanos comentanankupaj. Mana ashkha imasmantachu ujllapi parlaykuna tiyan. Ajinamanta wajkunaqa waj imitasmanta comentayta atenqanku (w23.04, página 23).

Isaías 35:8 versiculopi “Santo Ñan” nispa, ¿imamantá parlashan?

Ñaupa tiempopeqa judíos Babiloniamanta llajtankuman kutiporqanku chay ñanwan ninakorqa. Kay tiempomantarí, ¿imatá nisunman? Ashkha watas ñaupajta niraj 1919 wata kashajtin, uj ñanta wakicherqanku Bibliasta imprimispa, traducispa, waj imastawan ruwaspa. Kunantaj Diospa llajtanqa chay “Santo Ñan” nisqata purishanchej. Aswan qhepamantaj Diospa Gobiernonpi ashkha bendicionesta japʼisun (w23.05, páginas 15-19).

¿Ima iskay warmismantataj Proverbios capítulo 9 parlan?

Chaypeqa parlan “mana yuyayniyoj” warmimanta, invitadosnintaj ‘Sepulturaman’ chayanku. Parlallantaj ‘cheqa yachaywan’ ninakoj warmimanta, invitadosnintaj ‘yachaypa ñanninman’ chayanku, kausaymantaj (Pro. 9:1, 6, 13, 18) (w23.06, páginas 22-24).

¿Imaynatá Jehová Lotman rikucherqa kʼumuykukoj sonqo kasqanta, nitaj nisqantapunichu valechisqanta?

Jehovaqa Lotta kamacherqa orqosman ayqekunanta. Lot Zoarllaman ayqekojta saqenanta rogarikojtintaj, Jehovaqa mañakusqanta uyarerqa (w23.07, página 21).

¿Imatá uj warmi ruwanman qosan pornografiata qhawajtin?

Yuyarikunan tiyan mana paychu juchayoj kasqanta. Jehovaman astawan qayllaykunan tiyan, Bibliapi sinchʼi llakiypi rikukoj warmismanta parlasqanpitaj tʼukurinan tiyan, pikunamanchus Jehová sonqo tiyaykuyta qorqa. Chantapis qosanta yanapanman chay juchaman tanqaj imasmanta cuidakunanpaj (w23.08, páginas 14-17).

Pipis creenciasninchejmanta mana allinta parlajtin, ¿imaynatá tanteariyta yachay yanapawanchej llampʼu sonqowan kutichinapaj?

Runas imatapis tapuwajtinchej chayri creenciasninchejmanta mana allinta parlajtinku, tantearina imatachus yuyasqankuta chayri imachus llakichishasqanta. Ajinamanta sumaj wakichisqa kasun llampʼu sonqowan kutichinapaj (w23.09, página 17).

¿Imaynatá María jina kallpata japʼisunman?

Mariaqa Mesiasta nacechikunanpaj onqoj rikhurinanta yachaspa wajkunawan yanapachikorqa. Ángel Gabrielwan Elisabetwanqa Mariata mayta kallpacharqanku. Noqanchejpis kallpata japʼisunman hermanosninchejwan yanapachikuspa (w23.10, página 15).

¿Imaynatá Jehová oracionesninchejman kutichiwasunman?

Payqa niwanchej mañakusqanchejta uyarinantapuni, munayninpi piensarispapunitaj kutichiwanchej (Jer. 29:12). Kikin imasta mañakojtinchejpis, mana tukuymanpunichu kikinta kutichiwasunman. Jinapis payqa yanapawasunpuni (w23.11, páginas 21, 22).

Romanos 5:2 versiculopi suyakuymanta parlanña chay, ¿imajtintaj 4 versiculopi watejmanta suyakuymanta parlan?

Uj runa ñaupaj kutirayku Bibliamanta willarejtinku, ichapis suyakunman kay jallpʼapi uj paraisopi kausakuyta. Chaywanpis llakiykunata pasaspa, chaykunata aguantaspa ima reparan Jehová allinpaj qhawasqanta. Chayrayku suyakuynenqa, qallariymanta nisqa aswan sinchʼiña, nitaj wajpaj suyakusqan jinallachu (w23.12, páginas 12, 13).