“Noqaqa 15 watasniyoj kashajtiy bautizakorqani. Sojta killanmantaj precursora auxiliar jina llankʼayta qallarerqani. Watanmantaj precursora regular kanaypaj uj solicitudta juntʼacherqani. Colegiomanta llojsiytawan, maypichus astawan willajkuna necesitakun, chayman ripuyta munarqani. Chay wataspi abuelitaywan tiyakusharqani. Payqa mana Jehovaj testigonchu karqa. Chayrayku llajtaymanta ripuyta munarqani. Jinapis congregacionesta waturej hermanoqa, llajtallaypi qhepakunayta niwarqa. Jinata niwasqanmanta, may llakisqa kasharqani. Mana reparachikunaypajqa kʼumuykukuspa riporqani, imatachus hermano niwasqanpi tʼukurispataj. Noqawan willaj hermanaman nerqani: ‘Jonasmansina rijchʼakushani. Jinapis payqa Niniveman rerqapuni. Chayrayku maypichus kanayta kamachiwanku chaypi kasaj’, nispa.

“Tawa watastaña precursora jina llajtaypi kashani. Reparanitaj hermano niwasqanta kasukusqayqa, may sumaj kasqanta. Qallariypi mana allintachu yuyasharqani, jinapis kunanqa may kusisqa kashani. Uj killallapi 24 runasman Bibliamanta yachacherqani. Abuelitaymanpis Bibliamanta yachachishallanitaj. Chaymanta Jehovaman may agradecesqa kashani. Imajtinchus payqa ñaupajta mana Bibliamanta yachayta munajchu”, nispa.

Fiyi suyupi uj warmi Bibliamanta yachakusharqa. Payqa jatun tantakuymanchus chayri qosanwan ujnin familiarninpa diachakunmanchus rinanta ajllanan karqa. Qosanqa jatun tantakuyman rinanta saqellarqa. Paytaj qosanman nerqa, tantakuy pasayta diachakuman rinanta. Jinapis jatun tantakuy pasayta, diachakuman rinan mana allinchu kasqanta tʼukurerqa. Chayraykutaj niña rerqachu.

Chaykamataj qosanqa familiaresninman nisqa: “Warmeyqa Jehovaj testigosninpa tantakuynin pasayta jamonqa”, nispa. Familiaresnintaj nisqanku: “Warmiykeqa mana jamonqachu, imajtinchus Jehovaj testigosnenqa mana diachakusta ruwankuchu”, nispa. *

Qosanqa mayta kusikorqa, warmin Bibliaj nisqanta, conciencianta ima kasusqanrayku. Chay señoraqa, ajinata ruwasqanrayku qosanman, wajkunaman ima Diosmanta willayta aterqa. Ajinamanta qosanqa Bibliamanta yachakuyta, tantakuykunaman riyta ima qallarerqa.