1. ¿Maykʼajtaj Jehová Diosninchejmanta qonqakapusunman?

¿MAYKʼAJTAJ Jehová Diosta sirviyta atillanchej? ¿Llakiykunapi kaspachu chayri allinta kausakushaspachu? Llakiykunapi kaspaqa, chay rato Jehová Diospa yanapanta maskʼanchej. Jinapis allillanta kausakushaspaqa, Jehová Diosninchejmanta qonqakapusunman. Jehová Diosqa israelitasman nerqa, allinta kausakushajtinku amapuni paymanta qonqakunankuta (Deu. 6:10-12).

2. ¿Imatataj rey Asa ruwarqa?

² Rey Asamanta mayta yachakusunman. Payqa mana llakiypi kashaspallachu Jehová Diospi tukuy sonqo atienekorqa, manaqa allinta kausakushaspapis. “Asaj sonqonqa tukuy kawsaynimpi Tata Diospaj cheqan karqa” (1 Rey. 15:14). Chaytataj reparanchej Judá llajtamanta llulla yupaychayta chinkachisqanpi. Bibliaqa rey Asamanta nin: “Waj dioskunaj altaresninkuta chinkacherqa, jinataj loma patapi yupaychana wasista. Rumismanta lantisninkutapis pʼakirarqa, jinallataj Asera lanti kʼullusninkutapis”, nispa (2 Cró. 14:3, 5). Rey Asaqa, jatun maman Maacatapis manaña reina kananta saqerqachu. Imaraykuchus Maacaqa runas yupaychanankupaj uj lantita ruwachisqa (1 Rey. 15:11-13).

3. ¿Imatataj kay yachaqanapi yachakusun?

³ Rey Asaqa mana llulla diosesllatachu Judá llajtamanta chinkacherqa, manaqa runastapis Jehová Diosman watejmanta chimpanankupaj yanaparqa. Jehová Diostaj payta, tukuynin Judatawan allin kausaywan bendicerqa. Rey Asa kamachishajtenqa,  “chunka watasta Judá suyupi allin kawsakuylla karqa” (2 Cró. 14:1, 4, 6). Kay yachaqanapeqa, imatachus rey Asa chay wataspi ruwasqanta yachakusun. Chantá ñaupa tiempo cristianosmanta yachakusun. Paykunapis mana qhatiykachasqa kashajtinku, rey Asa jinallataj mana tiempota usucherqankuchu. Chaymantataj kay tapuyman kutichisun: Lugarninchejmanta autoridades Jehová Diosta yupaychajta saqellawanchej chay, ¿imatá ruwasunman mana tiempota usuchinapaj?

4. Kay 2 Crónicas 14:2, 6, 7 nisqanman jina, ¿imatataj Asa ruwarqa allin kausay kashajtin?

⁴ (2 Crónicas 14:2, 6, 7 leey). Rey Asaqa Judá llajtamanta runasman nerqa, Jehová Dios paykunata ‘allin kausayman churasqanta’. Jinapis mana yuyarqachu jinalla kakunanku kasqanta. Chayrayku Asaqa Judapi sumaj jarkʼachasqa llajtasta jataricherqa. Chay llajtastataj perqaswan muyuricherqa, torresta, punkusta imataj ruwacherqa. Chantá Judamanta runasman nerqa: “Kay jallpʼas makillanchejpiraj kashan”, nispa. Asaqa chaywan nisharqa, tiempota sumajta aprovechanankuta. Imaraykuchus judiosqa ni imamanta manchachikuspa purikuyta aterqanku, nitaj enemigosninkupis llajtasta ruwajta jarkʼasharqankuchu.

5. ¿Imaraykutaj rey Asa soldadosninta, maqanakupaj armasninkutapis yaparqa?

⁵ Rey Asaqa Judá llajta allin kausaypi kashajtin, soldadosninta, maqanakupaj armasninkutapis yaparqa (2 Cró. 14:8). ¿Jehová Diospi mana atienekusqanraykuchu chayta ruwarqa? Mana. Asaqa rey kasqanrayku, llajta masisninta yanapanan kasqanta yacharqa. Ajinamanta mayqen nacionpis contrankupi oqharikojtin, wakichisqa kanankupaj. Payqa yacharqa, Judá llajtapi allin kausay ima ratollapis tukukunanta. Jinapunitaj karqa.

6. ¿Imatataj ñaupa cristianos ruwarqanku mana qhatiykachasqa kashajtinku?

⁶ Ñaupa tiempomanta cristianosqa, mana tukuy tiempochu qhatiykachasqa karqanku. ¿Imatataj ruwarqanku mana qhatiykachasqa kashaspa? Paykunaqa tukuy atisqankuta sumaj willaykunata willarqanku. Hechos libroqa paykunamanta nin: “Paykunaqa kausakusharqanku Jehová Diosta manchachikuspa”, nispa. Chay cheqa sonqo cristianosqa, mana qhatiykachasqa kashaspa tukuy sonqo predicarqanku. Chayraykutaj “astawan yapakushallarqankupuni”. Chaytaj sutʼita rikuchiwanchej, Jehová Dios paykunata bendecisqanta (Hech. 9:26-31).

7, 8. ¿Imatataj Pablowan waj cristianoswan ruwarqanku?

⁷ Ñaupa tiempomanta cristianosqa, tukuy atisqankuta sumaj willaykunata willarqanku. Apóstol Pablomanta parlarina. Payqa Éfeso llajtapi kashaspa, mayraj chaypi predicana kasqanta repararqa. Chayrayku chaypi predicananpaj uj tiempotawan qhepakorqa (1 Cor. 16:8, 9).

⁸ Kunanqa imatachus Pablowan waj cristianoswan 49 watapi ruwasqankumanta parlarina. Chay watapi circuncisionmanta problema allinchakusqanrayku, paykunaqa astawan predicarqanku (Hech. 15:23-29). ¿Imaynataj chay karqa? Circuncisionmanta problema allinchakojtin, chay allinchakusqanta tukuy congregacionesman willacherqanku. Cristianostaj chayta yachaspa, “Jehová Diospa palabranmanta sumaj willaykunata” tukuy atisqankuta willarqanku (Hech. 15:30-35). Ajinata predicasqankurayku, “congregacionesqa creesqankupi kallpachasqa karqanku, sapa diataj creejkunaqa astawan astawan yapakusharqanku” (Hech. 16:4, 5).

9. Gobierno predicajta saqellawanchej chay, ¿imatá ruwananchej tiyan?

⁹ Ashkha lugarespi gobiernosqa predicajta saqellawanchej. Ajina lugarpi tiyakunchej chay, ¿kallpachakushanchejchu tukuy atisqanchejta predicanapaj? Tukukuy tiempopi kausasqanchejrayku, Diospa llajtanmanta kajkunaqa, ni jaykʼaj jina mundontinpi willashanchej, yachachishanchejtaj (Mar. 13:10). Chay sumaj llankʼaypi yanapakuyta atisqanchejmanta, mayta kusikunchej.

10. ¿Imata ruwanatataj 2 Timoteo 4:2 niwanchej?

¹⁰ Lugarninchejmanta autoridades predicajta saqellawanchej chayqa, ama tiempota usuchinachu (2 Timoteo 4:2 leey). Kay tapuykunapi piensarina: “¿Astawan predicayta chayri precursor kayta atisunmanchu? Mana atinchejchu chayrí, ¿familianchejmanta pillapis chayta ruwayta atinmanchu?”. Kunanqa mana qolqeta chayri tukuy imayoj kayta maskʼana tiempochu kashan. Imajtinchus manchay ñakʼariy tiempo chayamojtenqa, chay imasqa qhasi manakaj kanqa (Pro. 11:4; Mat. 6:31-33; 1 Juan 2:15-17).

11. ¿Imatataj ashkha hermanos ruwanku astawan runasman Diosmanta yachachinankupaj?

¹¹ Ashkha hermanosqa, astawan runasman Diosmanta yachachinankupaj waj parlayta yachakunku. Diospa llajtanqa sapa kuti astawan ashkha parlaykunapi publicacionesta, videosta, waj yanapastawan orqhoshan. Publicacionesninchejqa 2010 watapi 500 parlaykunapi jina karqa. Kunantajrí 1.000 kuraj parlaykunapiña tiyapuwanchej

12. ¿Imatataj runas ninku Jehová Diosmanta parlayninkupi uyarispa?

¹² ¿Imatataj runas ninku Jehová Diosmanta parlayninkupi uyarispa? Uj experienciamanta parlarina. Estados Unidosmanta Memphis sutiyoj llajtapi, uj jatun tantakuy kiniaruanda  parlaypi ruwakorqa. Chay parlayqa, Ruandapi, República Democrática del Congo nisqapi, Ugandapiwan parlakun. Uj hermanataj chay asambleaman risqa. Payqa wawamantapacha kiniaruanda parlayta parlakun. Hermanaqa asamblea pasayta nerqa: “Diecisiete watastaña Estados Unidospi tiyakuni, nitaj jaykʼajpis uj asambleata kay kuti jina tukuyninta entienderqanichu”, nispa. Chay asambleaqa hermanaj sonqonman chayarqa parlayninpi kasqanrayku. Chayrayku atinchej chayqa, allin kanman waj parlayta yachakunanchej. Ajinamanta predicanchej chaypi runasman parlayninkupi yachachiyta atisun. Ichá wakin runasqa, parlayninkupi Diosmanta willarejtinchej uyariyta munawasun. Waj parlayta yachakunapaj kallpachakusun chayqa, mana qhasichu kanqa.

13. ¿Imatataj Rusiamanta hermanosninchej ruwarqanku 1991 watamantapacha?

¹³ Wakin lugaresmanta autoridadesqa, hermanosninchejta mana predicajta saqenkuchu. Rusiamanta hermanosninchejpi piensarina. Paykunaqa ashkha watasta qhatiykachasqa karqanku. Jinapis marzo de 1991 watapi, religión jina reconocesqa karqanku. Chaypachaqa 16 mil publicadores jina karqanku. Hermanosninchejqa chay watamantapacha astawan predicarqanku. 20 watasninmantaj, 160 mil publicadoresmanta kurajña karqanku. Kunantaj gobiernoqa watejmanta paykunata mana predicajta saqeshanchu. Jinapis Jehová Diosta tukuy atisqankuta sirvishallankupuni.

14, 15. ¿Imaynatataj Jehová Dios rey Asata atiyninwan yanapasqa?

¹⁴ Asaj tiemponmanta watejmanta parlarina. Judá llajtamanta runasqa, uj tiempollata allin kausaypi karqanku. Imajtinchus Etiopiamanta Zeraqa, uj millón soldadoswan paykunawan maqanakoj rerqa. Payqa Judamanta runasta  facilta atipananta yuyarqa. Rey Asatajrí Jehová Dios yanapananta yacharqa. Chayrayku paymanta ajinata mañakorqa: “Yanapariwayku Señorniyku Tata Dios, qampi suyakusqaykurayku, sutiykipitaj kay soldadoswan maqanakoj jamusqaykurayku”, nispa (2 Cró. 14:11).

¹⁵ Etiopiamanta soldadosqa, Judá llajtaj soldadosninmanta casi iskay jinaspiwan aswan ashkha karqanku. Jinapis Asaqa yacharqa Jehová Dios llajtanta yanapayta atisqanta. Jehová Diostaj paykunata yanaparqapuni. Chayrayku Judamanta soldadosqa, etiopesta ni uj puchuyojta tukucherqanku (2 Cró. 14:8-13).

16. ¿Imaynapí yachanchej ima ratollapis qhatiykachasqa kananchejta?

¹⁶ Mana yachanchejchu imachus sapa ujninchejmanta qhepaman kananta. Jinapis yachanchej, ima ratollapis qhatiykachasqa kananchejta. Jesusqa tukukuy pʼunchaykunapi “tukuy runaspa chejninan” kananchejta nerqa (Mat. 24:9). Apóstol Pablopis nillarqataj: “Cristo Jesuspa yachachisqasnin jina Diosta sirvispa kausayta munajkunaqa, qhatiykachasqallataj kanqanku”, nispa (2 Tim. 3:12). Chantapis Satanasqa “manchay phiñasqa” kashan. Chay phiñakuyninmantataj nipuni ayqeyta atisunchu (Apo. 12:12).

17. ¿Imaynasmantataj creeyninchej ichá pruebaman churasqa kanqa?

¹⁷ Pisi tiempomantawanqa, tukuy cristianospa creeyninku pruebaman churasqa kanqa. Imajtinchus tumpamantawanqa “manchay ñakʼariy kanqa, mayqenchus kay mundoj qallariyninmantapacha kunankama manaraj karqachu” (Mat. 24:21). Chay tiempopeqa, familiaresninchejpis ichá contranchejpi sayaykonqanku. Autoridadespis ichá manaña predicajta saqewasunchu (Mat. 10:35, 36). Chay tiempo chayamojtin, ¿Asa jinachu Jehová Dios yanapanawanchejpi, jarkʼanawanchejpi ima atienekusun? Sapa ujninchej chaypi piensarinanchej tiyan.

18. Hebreos 10:38, 39 nisqanman jina, ¿imataj yanapawasun jamoj tiempopi sinchʼita sayanapaj?

¹⁸ Jehová Diosqa imaschus jamonqa chaypaj, kunanmantaña creeyninchejta kallpachashan. Payqa ‘allin kamachi yuyayniyojnejta’ “tiemponpi mikhunata” qoshawanchej. Ajinamanta sinchʼita sayanallanchejpajpuni (Mat.  24:45). Jinapis sapa ujninchej, Jehová Diospi astawan creenapaj kallpachakunanchej tiyan (Hebreos 10:38, 39 leey).

19, 20. Kay 1 Crónicas 29:17 nisqanpi piensarispa, ¿ima tapuykunapitaj piensarinanchej kanman, chanta imaraykutaj?

¹⁹ Noqanchejpis rey Asa jina Jehová Diospa yanapanta maskʼana (2 Cró. 14:4; 15:1, 2). Jehová Diostaqa rejsisqanchejmantapacha maskʼayta qallarerqanchej. Bautizakunapajpis paypa yanapanta maskʼallarqanchejtaj. Jinapis Jehová Diosta astawan munakunanchej tiyan. Payta astawan munakunapajtaj, tukuy atisqanchejta ruwananchej tiyan. Chayrayku kay tapuypi piensarina: “¿Reunionesman mana faltakuspachu rishanchej?”. Reunionesqa Jehová Diosta sirvinallapajpuni kallpachawanchej. Chantapis chaypeqa hermanosninchejwan kallpachanakunchej (Mat. 11:28). Kay tapuykunapiwan piensarina: “¿Bibliata estudiayman yachasqachu kanchej? Familianchejwan tiyakunchej chay, ¿sapa semanachu Bibliata estudianapaj tantakunchej? Sapallanchej tiyakunchej chayrí, ¿Bibliata sapa semana estudianapaj tiempochakunchejchu? ¿Tukuy atisqanchejtachu predicashanchej, runasmanpis yachachishanchejchu?”.

²⁰ Chay tapuykunapeqa piensarinanchejpuni tiyan. Imajtinchus Bibliaqa nin, Jehová Dios sonqonchejta, yuyayninchejtapis qhawaykusqanta. Chayrayku noqanchejpis kikinta ruwananchej tiyan (1 Crónicas 29:17 leey). Chayta ruwashaspaqa, ichapis yuyayninchejta chayri imastachus ruwayta munasqanchejta cambiananchej kasqanta reparasun. Jina kajtin, Jehová Diospa yanapanta mañakuna. Jamoj pruebaspajqa kunan wakichikunanchej tiyan. Chayrayku autoridades Jehová Diosta yupaychajta saqeshawanchej chayqa, ama tiempota usuchinachu.