1. ¿Imaspitaj hermanasninchej Diospa llajtanpi yanapakunku, chanta ima llakiykunasniyojtaj kanku? (Kay revistaj tapanpi fotosta qhawariy).

HERMANASNINCHEJQA Diospa llajtanpi sumajta yanapakunku. Paykunaqa predicanku, reunionespi comentanku, wajkunamantataj llakikunku. Wakin hermanastaj, Tantakuna Wasista llimphuchaspa chayri allinchaspa yanapakunku. Chayrayku hermanasninchejta mayta munakunchej. Jinapis paykunaqa llakiykunasniyoj kanku. Wakenqa machuyasqa tatankuta chayri mamankuta cuidanku. Wakin hermanastaj familiasninku churanakusqankuta aguantanku. Wakintajrí wawasninkuta sapallanku uywanku. Chayraykutaj mayta trabajanku.

2. ¿Imajtintaj hermanasninchejta respetachinanchej tiyan?

² Kay mundomanta runasqa, warmista mana anchata respetankuchu. Chayrayku hermanasninchejta respetachinanchej tiyan. Chantapis Bibliapuni niwanchej hermanasninchejta yanaparinata. Apóstol Pabloqa Romapi kaj congregacionman nerqa: ‘Febe sutiyoj hermananchejta tukuy sonqo japʼikuychej. Imamanta pisichikojtinpis yanapariychej’, nispa (Rom. 16:1, 2). Pabloqa fariseo kashaspa, fariseos jinallataj warmista pisipaj qhawaj. Jinapis cristianoman tukuspaqa, Jesús jina kananpaj kallpachakorqa. Chayrayku warmista khuyakorqa, respetarqataj (1 Cor. 11:1).

3. 1) ¿Imatataj Jesús mana ruwarqachu? 2) ¿Imaynatá Jesús qhawarqa Diosta yupaychaj warmista?

³ Jesusqa mana warmista pisipaj qhawarqachu (Juan 4:27). Payqa mana tiemponmanta religionta kamachejkuna jinachu karqa. Uj libro nin: “Jesusqa warmispaj ni jaykʼaj sajrata parlarqachu. Astawanpis paykunamanta respetowanpuni parlaj”, nispa. Diospa munayninta ruwaj warmistataj, aswan sumajpajraj qhawaj. Uj pacha, Jesusqa wakin runasta familianta jina qhawasqanta nerqa. Paytaj mana qharisllamantachu parlasharqa, manaqa warmismantapis (Mat. 12:50).

4. ¿Imatataj kay yachaqanapi yachakusun?

 ⁴ Jesusqa Diosta yupaychaj warmista yanaparejpuni. Chantapis paykunata may valorniyojpaj qhawaj, paykunamantaj kutikoj. Kay yachaqanapeqa, hermanasninchejta Jesús jina khuyakuyta yachakusun.

5. ¿Imaraykutaj wakin hermanas mana wajkunawan masichakuyta atillankuchu?

⁵ Qharispis warmispis, wajkunawan parlarikuyta munanchejpuni. Jinapis wakin hermanasqa mana chayta ruwayta atillankuchu. ¿Imaraykutaj mana wajkunawan masichakuyta atillankuchu? Wakin hermanaspa nisqankuta qhawarina. Julia * nin: “Soltera kasqayrayku, wakin kutis ni piwan igualasqayta yuyani”, nispa. Cristina sutiyoj precursorataj, astawan predicananpaj waj lugarman riporqa. Paytaj nin: “Mosoj congregacionniypeqa, qallariypi ni pita rejserqanichu. Chayrayku sapallay kashasqayta yuyarqani”, nispa. Ichá wakin hermanospis ajinallatataj yuyanku. Wakenqa familiankumanta sapallanku testigos kanku. Paykunataj ichá yuyanku familianku mana valechisqankuta, nitaj hermanospis entiendesqankuta. Wakintajrí onqosqas kasqankurayku mana wasinkumanta llojsiyta atinkuchu. Wakintaj onqosqa familiarninkuta qhawasqankurayku, watasqa jina kanku. Ajina llakiyniyoj kajkunaqa sapayakuyta yachanku. Alicia nin: “Mamitayta qhawanayrayku, mana hermanoswan masichakuyta atejchu kani”, nispa.

6. Lucas 10:38-42 nisqanman jina, ¿imaynatá Martatawan Mariatawan Jesús yanaparqa?

⁶ Jesusqa Diosta sirvej warmiswan, hermanasninwan jina kausakoj. Payqa Mariawan Martawan ajinata kausakoj. Chay iskay warmisqa solterassina karqanku (Lucas 10:38-42 leey). Jesustaj paykunata hermanasninta jina qhawaj. Paykunapis Jesusta hermanonkuta jinallataj qhawaj kanku. Chayrayku Mariaqa Jesuspa yachachisqanta uyarinanpaj, mana manchachikuspa ñaupaqenman tiyaykukorqa. * Martapis mana manchachikuspa Jesusman nerqa: “Señor, ¿manachu rikunki hermanay mana ruwaysiwasqanta? Niy ari yanapanawanta”, nispa. Jesusqa chay kutipi, Mariamanwan Martamanwan ashkha imasta Diosmanta yachacherqa. Chantapis paykunata, hermanonku Lazarotapis mayta munakoj. Chayrayku Jesusqa paykunata waturikoj rejpuni (Juan 12:1-3). Chantachá Martawan Mariawanqa, Lázaro sinchʼita onqoykojtin chay rato Jesusman willacherqanku (Juan 11:3, 5).

7. ¿Imaynasmantataj rikuchisunman hermanasninchejta munakusqanchejta?

⁷ Wakin hermanasqa reunionesllapi congregacionmanta kajkunawan parlarikuyta atinku. Chayrayku reunionpi kashaspa hermanasninchejta napaykurina, parlarichina, imaynachus kashasqankutapis tapurina. Juliamanta parlarerqanchejña. Pay nin: “‘Allinta comentanki’ chayri ‘qʼaya khuska predicana’ niwajtinku, mayta kusikuni. Kusikullanitaj wajkuna noqamanta llakikojtinku”, nispa. Hermanasninchejman mayta munakusqanchejta rikuchina. Hermana Keylamantañataj parlarina. Pay nin: “Reunionman faltakojtiy, hermanosqa mensajepi tapurimuwankupacha allillanchus manachus kashasqayta. Chaypi yachani paykunaqa mayta munakuwasqankuta”, nispa.

8. ¿Imastawantaj Jesusmanta yachakusunman?

⁸ Hermanasninchejpaj Jesús jina tiempocharikuna. ¿Imaynatá chayta ruwasunman? Paykunata wajyarikusunman khuska imitallatapis mikhurinapaj, chayri imata ruwaspallapis kusirikunapaj. Chay kutispeqa kallpachanapaj jinapuni parlarina (Rom. 1:11, 12). Jesusqa yacharqa,  wakenqa mana casarakusqankurayku llakikusqankuta. Chayrayku nerqa, kusisqa kanapajqa mana casarakunapunichu, nitaj wawasniyojpunichu kana kasqanta (Luc. 11:27, 28). Imajtinchus cheqamanta kusisqa kanapajqa, Jehová Diosta yupaychayta ñaupajman churana (Mat. 19:12). Ancianospis Jesús jinallataj parlasqankuwan kallpachananku tiyan.

9. ¿Imaynatataj ancianos hermanasta munakusqankuta rikuchinkuman?

⁹ Cristiana hermanastaqa mamasninchejta jina, hermanasninchejta jinataj qhawana tiyan. Ancianostaj astawanraj chayta ruwananku tiyan (1 Tim. 5:1, 2). Paykunaqa hermanaswan parlarinankupaj kallpachakunanku tiyan. Chaytataj niraj reunión qallarishajtin chayri reunión pasayta ruwankuman. Cristina nin: “Uj ancianoqa mana tiempoyojlla purisqayta reparasqa. Chayrayku imaynachus rishawasqanta tapuriwarqa. Tapuriwasqanmanta mayta agradecekorqani”, nispa. Ancianos, hermanaswan parlarinaykichejpaj tiempochakunkichej chayqa, paykunata munakusqaykichejta rikuchinkichej. * Aliciamanta parlarerqanchejña. Pay nin: “Ancianos noqawan parlarinankupaj tiempochakusqankurayku, paykunata astawan rejsini. Paykunapis noqata rejsillawankutaj. Chayrayku problemasniyoj kaspa, mana manchachikuspa paykunata tapurikuni”, nispa.

10. ¿Imaynatá hermanasninchejta kallpachasunman?

¹⁰ Wajkuna imatapis allinta ruwasqanchejta reparajtinku, chayri imamantapis agradecekuwajtinchej, tukuypis kusikunchej. Ni pí chayta ruwajtintaj llakikunchej. Hermana Abigailqa soltera, precursorataj. Payqa wakin kutis mana valechisqankuta yuyan. Pay nin: “Hermanosqa, ‘chay naj wawan’ chayri ‘paypaj hermanan’ nispalla noqamanta parlanku. Ni pi rejsispa jinawanchu”, nispa. Pamelamantañataj parlarina. Paypis solterallataj, ashkha watastataj misionera karqa. Jinapis tatasninta cuidananpaj lugarninman kutiporqa. Kunanqa 70 watas kurajniyojña, precursorallapunitaj. Pay nin: “Hermanaspis hermanospis ‘munakuyki’ niwajtinku, mayta kallpachawanku”, nispa.

11. ¿Imaynatataj Jesús payta yanapaj warmista sumajpaj qhawasqanta rikucherqa?

¹¹ Wakin warmisqa Jesusta “kapuyninkuwan yanapaj kanku”. Paytaj ajinata yanapasqankumanta agradecekorqa (Luc. 8:1-3). Chantapis Diospa munayninta chay warmisman yachacherqa. Jesusqa paykunaman willarqa, wañuchisqa kananta, kausarimunantapis (Luc. 24:5-8). Chantapis chay warmista jamoj llakiykunapaj wakicherqa, imaynatachus apostolesninta wakicherqa, ajinallatataj (Mar. 9:30-32; 10:32-34). Bibliaqa nin, wakin warmis Jesusta wañupunan horakama acompañasqankuta. Jesusta presochashajtinku, apostolesnenqa payta saqerpaytawan ayqerikaporqanku. Jinapis wakin warmisqa, Jesús kʼaspipi warkhusqa kashajtinpis, payllawanpuni kasharqanku (Mat. 26:56; Mar. 15:40, 41).

12. ¿Ima llankʼaytataj Jesús wakin warmisman qosqa?

¹² Jesusqa wakin warmisman sumaj llankʼayta qorqa. Jesús kausarimusqantaqa, warmisraj ñaupajta yacharqanku. Jesustaj chay warmisman nerqa, kausarimusqanta apostolesninman willamunankuta (Mat. 28:5, 9, 10). Chantá 33 watamanta Pentecostés fiestapi, Diospa atiyninta japʼejkuna ukhupeqa ichá warmispis kashallarqankutaj. Jina kajtin, chay cristianaspis ichá waj parlaykunapi parlanankupaj atiyta japʼillarqankutaj. Jinamanta paykunapis, “Diospa may jatuchaj tʼukuna ruwasqasninmanta” parlarqanku (Hech. 1:14; 2:2-4, 11).

13. 1) ¿Imastataj hermanas Diospa llajtanpi ruwanku? 2) ¿Imaynatá hermanasninchejta kallpacharisunman?

¹³ Hermanasninchejqa Jehová Diospa llajtanpi ashkhata llankʼanku. Wakenqa Diosta yupaychanapaj wasista ruwaysikunku chayri allinchaysikunku. Wakintaj waj parlaypi kaj congregacionpi yanapakunku. Wakin hermanastajrí Betel wasipi wakin diasta yanapakunku. Wakintaj jatun llakiypi tarikoj hermanosta yanaparinku, manachayrí publicacionesta waj parlayman tijrachispa yanapakunku. Wakenqa precursoras kanku, wakintaj misioneras kanku. Ashkha hermanastaj, hermanos jinallataj Precursorespaj Escuelaman, Diospa Gobiernonmanta Willajkunapaj Escuelaman, chayri Galaad Escuelaman rinku. Casada hermanastajrí, qosasninkuta Diospaj llankʼanankupaj yanapanku. Ajinata yanapasqankurayku, qosasninkoqa Diospa llajtanpi ruwanasninkuta sumajta juntʼanku, ‘sumaj regalos jinataj’ kanku (Efe. 4:8). Hermanasninchej chay jinata llankʼasqankumanta, allinta ruwasqankuta nina. Chantapis paykunata imaynallamantapis kallpacharina. Ajinamanta Diospa llajtanpi sumajta yanapakullanqankupuni.

14. Salmo 68:11 nisqanta entiendej ancianos, ¿imatataj ruwanku?

¹⁴ Sumaj yuyayniyoj ancianosqa, yachanku hermanasqa imapipis sumajta yanapakusqankuta. Paykunaqa yachallankutaj, sumajta predicajkuna ukhupeqa ashkha hermanas kasqankuta (Salmo 68:11 leey). Chayrayku ancianosqa paykunawan sumajta yanapachikunku. Hermana Abigailmanta parlarerqanchejña. Pay nin: “Hermanosqa tapuriyta yachawanku, imaynatachus predicacionpi runaswan parlayta  qallarisqayta. Chaypi yachani Jehová Diospa llajtanpi mana qhasichu kashasqayta. Chaytaj mayta kallpachawan”, nispa. Sinchʼi creeyniyoj hermanasqa, joven hermanasta ashkhata yanapayta atinkuman. Ancianostaj chayta sumajta yachanku (Tito 2:3-5). Rikunchej jina, hermanasqa Diospa llajtanpi sumajta llankʼanku. Chayrayku paykunata munakuna, agradecekunataj.

15. ¿Imaspitaj hermanasninchej yanapananchejta necesitankuman?

¹⁵ Wakin hermanasqa, ichá paykunata yanapananchejta chayri respetachinanchejta necesitankuman (Isa. 1:17). Uj viuda hermanapi chayri divorciasqa hermanapi piensarina. Ichá wakin imastaqa qosallanku ruwaj. Kunantaj manaña qosayoj kasqankurayku, chay imasta ruwanankupaj yanapata necesitanku. Uj kuraj hermanitataj, ichá pillapis doctorwan parlaripunanta necesitashan. Manachayrí uj precursora payman kutikunanchejta necesitashan. Ichapis payqa Diospa llajtanpi waj imaspi yanapakusqanrayku, mana anchata predicaj llojsinchu. Waj hermanostaj, paymanta mana allintachu parlankuman. Chayrayku paymanta niña pantasqata yuyanankupaj yanapananchej tiyan. ¿Imastawantaj ruwasunman hermanasninchejta yanapanapaj? Chayta yachanapaj, Jesusmanta yachakunallapuni.

16. Marcos 14:3-9 nisqanman jina, ¿ima kutispitaj Jesús Mariaman kutikorqa?

¹⁶ Diosta yupaychaj warmismanta mana allinta parlajtinku, Jesusqa paykunaman kutikojpacha. Uj kuti, Martaqa Mariata kʼamichiyta munarqa. Jesustaj Mariaman kutikorqa (Luc. 10:38-42). Waj kutipitaj, discipulosninñataj Mariamanta sajrata parlasharqanku. Chaypipis Jesusqa Mariaman kutikullarqataj (Marcos 14:3-9 leey). Jesusqa yacharqa, María allin sonqoyoj kasqanta. Chayrayku Mariamanta nerqa: “Chay ruwasqanqa noqapaj may allin. [...] Payqa atisqanta ruwan”, nispa. Chantá nillarqataj: “Tukuy kay mundopi, mayllapipis Diospa Gobiernonmanta sumaj willaykuna willakojtin, kay warmej ruwasqanpis willakullanqataj”, nispa. Kay yachaqanataj chaytapuni ruwashan. Jesuspa nisqanqa, maytachá Mariata sonqocharqa. Jesusqa sumaj willaykuna mundontinpi willakunanta nishaspa, Mariaj ruwasqanpis mana qonqasqachu kananta nerqa.

17. ¿Maykʼajtaj uj hermana payman kutikunanchejta necesitanman?

¹⁷ Hermanasninchej yanapata necesitajtinku, ¿paykunaman kutikunchejchu? Uj casada hermanapi piensarina. Qosan mana testigo kasqanrayku, reunionesman tardellapuni chayamun, tukukusqantawantaj ripunpacha. Chantapis wawasninta maypi jinalla reunionesman pusamun. Chayrayku wakin hermanos hermanaspis, paypaj rimayta qallarinku, ninkutaj: “Qosanwan kasuchikunan á wawasninta reunionman pusamunanpaj”, nispa. Jinapis hermanitanchejqa, tukuy atisqanta Jehová Diosta sirvishan. Mana paychu tiemponmanta dueña. Chantapis qosanta respetanan tiyan. Chayrayku qosan mana munajtenqa, mana wawasninta reunionman pusamuyta atinmanchu. ¿Imaynatá chay hermanitaman kutikusunman? Jehová Diosta tukuy atisqanta sirvisqanmanta, “allinta ruwashanki hermanitáy” nisunman. Chantapis hermanosman nisunman, hermananchej tukuy atisqanta ruwashasqanta. Paymanta allinta parlajtinchej, ichá wajkunapis manaña paymanta sajrata parlanqankuchu.

18. ¿Imaynasmantataj hermanasninchejta yanapasunman?

¹⁸ Hermanasninchejta yanaparispaqa, paykunata munakusqanchejta rikuchillasunmantaj (1 Juan 3:18). Hermana Aliciaqa, onqosqa mamitanta qhawasqanta nerqanchej. Paytaj nin:  “Wakin hermanosqa wasiyman jamuspa mamitayta qhawaripuwaj kanku. Noqataj chaykama ruwanasniyta ruwaj kani. Wakintaj mikhunitata apanpuwaj kayku. Ajinata yanapawasqankurayku, hermanos munakuwasqankuta, familianta jinataj qhawawasqankuta repararqani”, nispa. Hermana Juliatapis, uj hermano autonta cuidayta yachachisqa. Pay nin: “Mayta kusikuni hermanos mana accidentakunaypaj yanapawasqankumanta”, nispa.

19. ¿Imaynasmantataj ancianos hermanasta yanapankuman?

¹⁹ Ancianosqa reparananku tiyan imapichus hermanas yanapata necesitasqankuta. Jehová Diosqa hermanasta sumajta cuidanankuta munan (Sant. 1:27). Chayrayku ancianosqa Jesús jina kanankupaj kallpachakunku. Kamachiykunata churanankumantaqa, hermanaswan kʼachas kanankupaj, paykunata entiendenankupaj ima kallpachakunku (Mat. 15:22-28). Ancianos hermanasta imitallapipis yanaparejtinkoqa, hermanasqa paykunamanta llakikusqankuta reparanku. Keylamanta parlarinallataj. Gruponmanta encargado hermanoqa, waj wasiman astakushasqanta yachasqa. Chayta yachaspataj waj hermanoswan parlasqa Keylata yanaparinankupaj. Pay nin: “Hermanos yanapariwasqankumanta mayta kusikorqani. Ancianosqa mana parlaspallachu kallpachawarqanku, manaqa ruwasqankuwanpis. Sutʼita repararqani congregacionpi may munasqa kasqayta. Ima problema kapuwajtinpis, yachani mana sapallaychu kashasqayta”, nispa.

20, 21. ¿Imastá ruwasunman hermanasninchejta sumajpaj qhawasqanchejta rikuchinapaj?

²⁰ Tukuy congregacionespi hermanasninchejqa sumajta llankʼanku. Chayrayku paykunata yanaparinanchej tiyan. Jesustaj chaypaj sumajta yachachiwanchej. Chayrayku pay jinallataj, hermanasninchejpaj tiempochakuna, paykunatataj astawan rejsina. Chantapis Jehová Diospaj llankʼasqankuta sumajpaj qhawana. Paykunata jarkʼakunanchej kajtintaj jarkʼakuna.

²¹ Apóstol Pabloqa romanosman cartanta qhelqayta tukushaspa, jisqʼon hermanaspa sutisninkuta oqharerqa (Rom. 16:1, 3, 6, 12, 13, 15). Pabloqa paykunata napaykorqa, Diospajtaj sumajta llankʼasqankuta nerqa. Chay cristianasqa, chayta uyarispa maytachá kusikorqanku. Noqanchejpis hermanasninchejta sumajpaj qhawasun chayqa, familianchejta jina munakusqanchejta rikuchisun.