1, 2. Eclesiastés 11:6 nisqanman jina, ¿imatataj ruwanallanchejpuni tiyan?

WAKIN suyusmanta runasqa, Diospa Gobiernonmanta willasqanchejta tukuy sonqo japʼikunku. Paykunaqa willasqanchejta uyarispa mayta sonqochakunku. Wakin lugaresmanta runastajrí, mana Diosmanta, nitaj Bibliamantapis uyariyta munankuchu. Predicanchej chaypi runas uyariwajtinchejpis manapis, noqanchejqa willamunallanchejpuni tiyan. Imajtinchus Jehová Diosqa, “kaykamalla” ninawanchejkama predicananchejta munan.

² Jehová Diosqa maykʼajkamachus predicananchejpaj uj fechata churanña. Chay pʼunchay chayamojtintaj niña predicasunchu. “Chaypachamá tukukoyqa jamonqa” (Mat. 24:14, 36). Chay pʼunchay chayamunankama, Eclesiastés 11:6 nisqanta kasukuna. Chaypi nin: “Tutamanta mujuta tarpuy, chʼisiyanankamataj mana samarispa tarpullaypuni”, * nispa. Qhepan parrafopi yachakusunchej, imaynatachus chayta ruwanata.

3. ¿Imatataj kay yachaqanapi yachakusun?

³ Ñaupaj yachaqanapeqa, ‘runa japʼej pescadores’ kanapaj tawa imasta yachakorqanchej (Mat. 4:19). Kay yachaqanapitaj predicayta munanallapajpuni imatachus ruwanata yachakusun. Chayrayku kay kinsa imasmanta parlarisun: predicacionta kausayninchejpi ñaupajman churanamanta, pacienciayoj kanamanta, sinchʼi creeyniyoj kanamanta ima. Chaytaj ima kajtinpis predicanallapajpuni yanapawasun.

4. ¿Imaraykutaj Jehová Dios qowasqanchej llankʼayta ñaupajman churananchej tiyan?

⁴ Jesusqa yachachisqasninman willarqa, tukukuy tiempopi  imaschus kananta, imaynachus runas kanankutapis. Yachachisqasnintaj chay imasta rikuspa, ichapis predicacionta niña ñaupajman churankumanchu karqa. Chayrayku Jesús paykunaman nerqa: “Rijchʼarisqallapuni kaychej”, nispa (Mat. 24:42). Noej tiemponmanta runasqa, ruwanasninkuwan musphasqankurayku mana Noeta uyarerqankuchu. Noqanchejpis chay runas jina musphasunman chayqa, niña predicacionta ñaupajman churasunmanchu (Mat. 24:37-39; 2 Ped. 2:5). Chayrayku kallpachakunanchej tiyan, Jehová Dios qowanchej chay llankʼayta ñaupajman churanapaj.

5. Hechos 1:6-8 nisqanman jina, ¿maykamataj predicaspa chayananchej karqa?

⁵ Kay tiempopeqa Diospa Gobiernonmanta willayta, ni jaykʼaj jina ñaupajman churananchej tiyan. Jesús nerqa, sumaj willaykunaqa wañupusqanmanta qhepamanpis willakunallantapuni, astawan ashkha lugarespitaj (Juan 14:12). Jesús wañupusqantawan, wakin yachachisqasnenqa watejmanta pescadosta japʼej riporqanku. Jesustaj kausarimuytawan, uj milagronejta paykunata ashkha pescadosta japʼicherqa. Yachachisqasninmantaj nerqa, runa japʼej pescadores kanankoqa, imamanta nisqapis aswan sumaj kasqanta (Juan 21:15-17). Chantá cieloman ripunanpajña kashajtin, Jesusqa yachachisqasninman nerqa qallarisqan llankʼay jallpʼantinpi ruwakunanta (Hechos 1:6-8 leey). Aswan qhepamantaj, apóstol Juanman mosqoypi jina rikucherqa imaschus “Señorpa pʼunchayninpi” kananta. * Juanqa chaypacha ashkha tʼukuna imasta rikorqa. Chaykunamanta ujnenqa, uj angelta rikusqan karqa. Chay angelqa “wiñay wiñaypaj sumaj willaykunata” willasharqa “tukuy nacionesman, tukuy ayllusman, tukuy laya parlayniyojkunaman, tukuy laya runasmanpis” (Apo. 1:10; 14:6). Chaytaj rikuchiwanchej predicanallanchejpuni kasqanta. Arí,  Jehová Diosqa “kaykamalla” ninawanchejkama willananchejta munan.

6. ¿Imataj yanapawasunman Diospa Gobiernonmanta willayta ñaupajman churanapaj?

⁶ Diospa Gobiernonmanta willayta ñaupajman churanapajqa, Jehová Dios imastachus qowasqanchejpi tʼukurina. Jehová Diosqa paypaj qayllallanpipuni kanapaj, ashkha yanapasta qowanchej. Chaykunataj kanku: imprimisqa chayri celularpi leenapaj publicaciones, grabaciones, videos, JW Broadcasting ima. Internetpi jw.org nisqapi publicacionesninchejpis, 1.000 kuraj parlaykunapiña tiyan (Mat. 24:45-47). Kay sajra mundopi runasqa, politicarayku chayri religionesrayku tʼaqanasqa kanku. Manachayrí qhapaj chayri wajchas kasqankurayku, mana ujchasqa kayta atinkuchu. Jehovaj testigosninrí jallpʼantinpi 8 millonesmanta astawanña kaspapis, uj familia jina kanchej. Chayrayku 2019 watapi, viernes 19 de abrilta, jallpʼantinpi tukuy testigos uj videota qhawarqanchej. Chay videoqa sapa pʼunchaypaj ajllasqa textota sutʼinchakusqan karqa. Chʼisintaj Jesuspa wañuyninta yuyarikunapaj, 20.919.041 runas tantakorqanchej. Chay chhika runas tantakusqanchejqa tʼukunapaj jinapuni. Chaykunapi tʼukurispaqa astawan predicayta munanchej.

7. ¿Imaraykutaj Jesusmanta yachakuy predicacionta ñaupajman churanapaj yanapawasunman?

⁷ Jesusmanta yachakoyqa, predicacionta ñaupajman churanapaj yanapawasunman. Payqa ima kajtinpis cheqa kajmanta willallarqapuni (Juan 18:37). Satanasqa “jallpʼantinmanta llajtasta, qhapaj kapuyninkutawan” Jesusman rikucherqa. Runaspis Jesusta reyta jina churayta munarqanku. Jesustajrí mana chay imas pantachinanta saqerqachu (Mat. 4:8, 9; Juan 6:15). Payqa mana qhapaj kayta munarqachu, nitaj runas churanakojtinku manchachikorqachu (Luc. 9:58; Juan 8:59). Chayrayku apóstol Pablo nerqa, ‘mana saykʼunanchejpaj, nitaj sonqonchej llauchʼiyananpaj’ Jesús jina ruwananchejta (Heb. 12:3). Chayta ruwasun chayqa, creeyninchej pruebaman churasqa kajtinpis, Diosmanta willayta ñaupajman churallasunpuni.

8. 1) ¿Imaynataj pacienciayoj runa? 2) ¿Imaraykutaj pacienciayoj kananchej tiyan?

⁸ Pacienciayoj runaqa mana imapis chay rato kananta munanchu. Pacienciayoj kaspaqa, llakiyninchej mana tukukojtinpis chayri imatachus suyasqanchej mana juntʼakojtinpis, kusisqallapuni kasun. Profeta Habacucqa Judá llajtapi sajra ruwaykuna tukukunanta munarqa (Hab. 1:2). Jesuspa yachachisqasnintaj, romanospa makinkumanta kacharichikuyta munarqanku. Chayrayku “Diospa Gobiernon chay ratopacha rikhurimunanta” munarqanku (Luc. 19:11). Noqanchejtajrí mayta munashanchej, Diospa Gobiernon kay sajra mundota chinkachinanta, allin kausaytataj apamunanta (2 Ped. 3:13). Jinapis pacienciawan suyakunanchej tiyan, Jehová Diospa churasqan pʼunchay chayamunanta. Qhepan parrafospeqa, Jehová Diosmanta pacienciayoj kayta yachakusun.

9. ¿Imaraykutaj Jehová Dios pacienciayoj kasqanta nisunman?

⁹ Jehová Diosqa ni pi jina manchay pacienciayoj. Noej tiemponpeqa mana “Jatun Parata apachimusaj” nisqantawanchu parachimorqa. Astawanpis Noé runasman willamunanta, arcata ruwayta tukunanta ima suyarqa (1 Ped. 3:20; 2 Ped. 2:5). Jehová Diosqa Abrahanwanpis pacienciakullarqataj. Uj pacha, Abrahanqa Jehová Diosta Sodoma, Gomorra llajtasta chinkachinanmanta tapuykacharqa. Jehová Diostaj payta pacienciawan uyarerqa (Gén. 18:20-33). Mana kasukoj israelitastapis,  may chhika watasta pacienciawan aguantarqa (Neh. 9:30, 31). Kunanpis Jehová Diosqa pacienciakushallantaj. Imaraykuchus payqa munan, allin sonqoyoj runas pesachikuytawan payman chimpanankuta (Juan 6:44; 1 Tim. 2:3, 4; 2 Ped. 3:9). Jehová Dios jina pacienciayoj kaspaqa, pikunamanchus willanchej, yachachinchejtaj chaykunawan pacienciakusun. Jehová Diosqa pacienciayoj kayta yachachinawanchejpaj, Palabranpi uj kikinchayta churacherqa. Qhepan parrafopi, chay kikinchaymanta parlarisun.

10. ¿Imatataj Santiago 5:7, 8 versiculospi jallpʼata llankʼaj runamanta yachakusunman?

¹⁰ (Santiago 5:7, 8 leey). Jallpʼata llankʼaj runamanta, pacienciayoj kayta yachakusunman. Wakin plantasqa ratolla wiñanku. Jinapis casi tukuynin poqoyniyoj plantasqa, unaypi poqonku. Israelpeqa tarpusqankumanta cosechanankukama sojta killas pasaj. Chay lugarmanta runasqa, ñaupaj paras qallarisqantawan tarpuyta qallarej kanku, qhepa paras pasasqantawantaj cosechaj kanku (Mar. 4:28). Yachayniyoj kasunchej chayqa, tarpoj runa jina pacienciayoj kasun. Jinapis chayta ruwayqa mana atikullanchu.

11. Runasman yachachishajtinchej, ¿imaynatataj pacienciayoj kay yanapawasunman?

¹¹ Pantaj runas kasqanchejrayku, imapis ratolla ruwasqa kananta munanchej. Uj huertayoj kasqanchejpi piensarina. Chaypi imatapis poqochiyta munanchej chayqa, pacienciayoj kananchej tiyan. Imaraykuchus ñaupajtaqa jallpʼataraj wakichina tiyan. Chantá plantana, qhorana, qarpanataj. Runasman yachachinapajpis pacienciayojllataj kananchej tiyan. Paykunaqa mana uj ratollapichu tukuyta munakuyta yachakonqanku. Pacienciayoj kaspaqa, runas mana uyariwajtinchej mana llakikusunchu. Runas uyariwajtinchejpis, pacienciayojllataj kananchej tiyan. Imaraykuchus mana pitapis obligasunmanchu, Bibliaj nisqanta chay rato  creenanpaj. Jesuspa discipulosninpis, paypa yachachisqanta wakin kutis mana entiendeyta atillarqankuchu (Juan 14:9). Chantapis kayta yuyarikuna: Noqanchejqa plantasunman, qarpasunmantaj, jinapis Jehová Dioslla wiñachin (1 Cor. 3:6).

12. ¿Imataj yanapawasunman mana testigo familiaresninchejwan pacienciakunapaj?

¹² Familiaresninchejman Diosmanta willarishaspaqa, mana pacienciayoj kayta atillanchejchu. Jinapis Eclesiastés 3:7 mayta yanapawasunman. Chaypi nin: “Uj tiempoqa tiyan chʼinyanapaj, uj tiempotaj parlanapaj”, nispa. Familiaresninchejqa cristianos jina allinta kausakusqanchejta rikuspa, Diosmanta yachakuyta munankuman. Jinapis ima ratollapis paykunaman predicanapaj wakichisqa kananchej tiyan (1 Ped. 3:1, 2). Runasman predicayta, yachachiyta ima mayta munaspapis, pacienciakunanchej tiyan, astawanraj familianchejwanqa.

13, 14. ¿Pikunamantataj pacienciayoj kayta yachakusunman?

¹³ Pacienciayoj kanapajqa, Diospa ñaupa tiempo kamachisninmanta, kay tiempopi wakin cristianosmantawan yachakuna. Qallarinapaj Habacucmanta parlarina. Payqa mayta munarqa sajra ruwaykuna tukukunallantaña. Jinapis Diospi atienekuspa nerqa: “Allinta qhawasaj, imaynatachus uj llajta qhawajpaj churasqa soldado sayanampi qhawashan, jinata”, nispa (Hab. 2:1). Apóstol Pablopis, japʼisqan ruwanata tukullaytaña munarqa. Jinapis “sumaj willaykunata” pacienciawan willallarqapuni (Hech. 20:24).

¹⁴ Kunanqa uj qhariwarmimantañataj parlarina. Paykunaqa Galaad Escuelaman risqanku. Chantá maypichus pisi testigoslla tiyan, chay suyuman kachasqanku. Chay suyupeqa casi tukuy runas mana Jesuspi creenkuchu. Chayrayku pisi runaslla Bibliamanta uyariyta munaj kanku. Galaad Escuelamanta compañerosninkurí, waj suyusman kachasqa karqanku. Paykunataj ashkha runasta bautizakunankupaj yanapasqankumanta, mayta parlaj kanku. Jinapis chay qhariwarmeqa, pacienciawan predicallarqankupuni. Ajinata pusaj watasta predicasqankutawan, uj estudionku bautizakorqa. Paykunataj mayta kusikorqanku. ¿Imatataj paykunamanta, Habacucmanta, Pablomanta ima yachakusunman? Pacienciayoj kayta. Paykunaqa Diosmanta japʼisqanku ruwanasta, mana qhellakuspa ruwallarqankupuni. Jehová Diostaj pacienciawan llankʼasqankuta bendicerqa. Chayrayku “pikunachus creeynejta, paciencianejtataj Diospa nisqasninta herenciata jina japʼerqanku, chaykuna jina” ruwana (Heb. 6:10-12).

15. ¿Imaraykutaj creeyniyoj kay predicayta munanallapajpuni yanapawanchej?

¹⁵ Imatachus willasqanchej cheqapuni kasqanta creenchej. Chayrayku tukuy runasman willamuyta munanchej. Chantapis Jehová Diospa nisqasnin juntʼakunanta sutʼita yachanchej (Sal. 119:42; Isa. 40:8). Bibliaj nisqasnenqa kay tiempopiña juntʼakushan. Ashkha runastaj, Bibliaj nisqanta kasukuspa aswan sumajta kausakushanku. Chay tukuy imasta rikuspaqa, Diospa Gobiernonmanta astawan willamuyta munanchej.

16. 1) Salmo 46:1-3 nisqanman jina, ¿imaynatataj Jehová Diospi creey predicayta munanapaj yanapawanchej? 2) ¿Imaynatá Jesuspi creey yanapawanchej?

¹⁶ Jehová Diospiwan Jesuspiwan creenchej. Jehová Diosqa imatachus willamunanchejta niwanchej. Wawan Jesustaj Gobiernonpi presidente jina kashan (Juan 14:1). Jehová Diosninchejqa ima llakiypi kajtinchejpis, jarkʼakuwasun, kallpachawasuntaj (Salmo 46:1-3 leey). Payqa Wawan Jesusman tukuy atiyta qorqa. Jesustaj chay atiywan predicacionta cielomantapacha  ñaupajman apashan. Noqanchejtaj chayta sutʼita yachanchej (Mat. 28:18-20).

17. ¿Imaraykutaj predicanallanchejpuni kasqa?

¹⁷ Creeyniyoj kasqanchejrayku, mana iskayrayanchejchu Jehová Dios ruwasqanchejta bendecinanmanta. Wakin kuteqa tʼukunapaj jina bendeciwanchej (Ecl. 11:6, TNM). Ujmanta parlarina. Carritoswan chayri publicacionesniyoj mesaswan predicasqanchejrayku, ashkha runas Diosmanta yachakushanku. Noviembre 2014 watamanta Reinomanta Willayninchej nin: ‘Universidadpi yachakoj sipasqa, Jehovaj testigosninmanta qhelqayta munaspa, salonninchejta maskʼasqa, nitaj tarisqachu. Jinapis uj semananman, universidadnillanpitaj publicacionesniyoj mesata rikusqa. Ajinapi testigosmanta qhelqayta atisqa. Payqa aswan qhepaman bautizakorqa, kunantaj precursora regular kashan’. Chay jina willaykunata uyareyqa, predicayta munanallapajpuni yanapawanchej. Imajtinchus reparachiwanchej, ashkha runasraj Diospa Gobiernonmanta uyariyta munasqankuta.

18. ¿Maykʼajkamataj Diospa Gobiernonmanta willasunchej?

¹⁸ Jehová Diosqa uj fechata churanña Gobiernonmanta willayta tukunanchejpaj. Noej tiemponmanta watejmanta parlarina. Jehová Diosqa chay kutipi maychus tiemponpipuni nisqanta juntʼarqa. Payqa Jatun Para qallarinanpaj 120 watas faltashajtinña, runasta chinkachinata willarqa. Aswan qhepatataj, Noeman arcata ruwananta nerqa. Noetaj 40 chayri 50 watasta mana saykʼuspa trabajarqa. Payqa runas mana uyarejtinkupis, predicallarqapuni. Chaytataj ruwarqa, Jehová Dios animalesta arcaman qhatiykunanta ninankama. Chantá Jehová Diosqa, maychus tiemponpi “arcaj punkunta wisqʼaykorqa” (Gén. 6:3; 7:1, 2, 16).

19. ¿Imataj tumpamantawan kanqa?

¹⁹ Tumpamantawan Jehová Diosqa, sumaj willaykunata willayta tukusqanchejtaña niwasun. Chantá Satanaspa sajra mundonta chinkachenqa, uj mosoj mundotataj sayarichenqa. Chaypitaj Diosta kasukoj runasllaña kausanqanku. Chay tiempo chayamunankamaqa Noé jina, Habacuc jina, Diospa waj kamachisnin jinataj willanallapuni. Chay llankʼayta kausayninchejpi ñaupajman churana, pacienciayojtaj kana. Chantapis Jehová Diospi, nisqasninpiwan sinchʼita creena.